ب بەرهەڤبوونا مەسرور بارزانی، جێگرێ سەرۆكێ پارتی دیموكراتی كوردستان، كەرنەڤالێ بانگەشەیا هەلبژارتنا یا كەركووك، گەرمیان، بەغدا و دیالا یا پارتی بڕێڤەچوو.
د كەرنەڤالێدا مەسرور بارزانی پەیڤەك پێشكێشكر . ئەڤە دەقێ وێ یە:
بەرهەڤبوویێن هێژا
خەلكێ خەباتكەر و قەهرەمانێ دلێ كوردستانێ..
گەلەك خوەشحال و بەختەوەرم ئەڤرۆ د خزمەتا هەوەیێن بەرێز و خوەشتڤی دامە بۆ بانگەشەیا هەلبژارتنێن ڤێجارێ یێن جڤاتا نوونەرێن ئیراقێ، خوەشحالم كو بەربژارێن مە ئەڤرۆ ل گەل مە ل ڤێرێ د بەرهەڤن وب خێرهاتنەكا گەرم لێ دكەین.
هەكە دەلیڤەیێ بدەن من پێخوەشە ڤێ بانگەشەیێ ب هۆزانەكا خوە ل سەر كەركووكێ دەست پێ بكەم ب ناڤێ (دەردەدلێ كەركووك)..
پێم دەڵێن قودسی كوردانە
كەی ئەمە رەوا و ویژدانە؟
بۆ قودس لە من پیرۆزتر بێت؟
ناوی لە من ئازیزتر بێت
مێژووم پڕە لە سەروەری
خەبات دژی داگیركەری
شاری ئەنفال و قوربانیم
داگیركراو و زیندانیم
خاوەنەكانم دەركران
هاوردە لە شوێنیان دانران
بۆ مێژووی من لەبیر دەكەن؟
ناو و نیشانم لێڵ دەكەن
بۆ وا ناوم كەم دەكەن؟
بە شوێنی تر دەمشوبهێنن
شاری پێكەوەژیانم
پێشمەرگەیە پاسەوانم
فەرموودەی بارزانی جوانە:
كەركووك دڵی كوردستانە

بەرێزان..
ئەز سوپاسییا خۆڕاگرییا هەوە دكەم، سوپاسییا بێهنفرەهییا هەوە دكەم، سوپاسییا هەوە دكەم سەرەرای وێ هەموو ستەما كو ل هەوە هاتیە كرن، هێشتا خوونا هەوە یا زەرە ودلێ هەوە بۆ كوردستانێ لێ ددەت.
ئەڤ هەلبژارتنە بۆمە د گرنگن چونكە نوكە ل سەر ئاستێ هەرێما كوردستانێ پارتی ب هێزترین حزبا سیاسییە و هیچ ئالییەك نینە بشێت ل ئاستێ كوردستانێ هەڤڕكییا پارتی بكەت، بەلێ مە دڤێت ڤێجارێ بچین و ل بەغدایێ بەرگریێ ژ مافێن دەستووری یێن هەموو خەلكێ كوردستانمێ و بگرە یێن هەموو ئیراقێ ژی بكەین. گرنگە ئەم پشكداریێ د وان هەلبژارتناندا بكەین چونكە مخابن پێشتر خەلكەكێ دی ب نافێ نوونەرایەتییا خەلكێ كوردستانێ، چوون رێككەفتنەكا نهێنی ل گەل هەڤدو كر و هەڤپەیمانی دروستكر و ل شوونا وێ چەندێ بەرگریێ ژ مافێن خەلكێ كوردستانێ بكەن، تنێ بۆ بەرژەوەندییا تایبەتییا خوە كاركر، ڤێجارێ پارتی دێ چیت بۆ وێ چەندێ بەرگریێ ژ مافێن خەلكێ كوردستانێ بكەت نەك بەرژەوەندییا كەسی.
ئەڤ خوەشتڤییە، ئەڤ بەرێزە بەربژارێن هەوەنە، كچ و كۆڕ و خوسم و برایێن هەوەنە، دێ چن بۆ وێ چەندێ داخوازا مافێن هەموو خەلكێ ئیراقێ بكەن، داخوازا مافێن خەلكێ كوردستانێ یێ ستەملێكری كەن، مافێن هەموو پێكهاتە و ئایین و ئایینزایان بكەن، ئەو ناچنە وێرێ داخوازا رێككەفتنێن نهیچنی یان هەڤپەیمانیێ ل گەل ئالیێن دی بۆ بەرژەوەندییا حزبی و كەسی بكەن، دێ چنە وێرێ بۆ چەسپاندنا مادەیا 140 و بۆ بجهئینانا هەموو مادەیێن دەستووری.
ئەوا هەتا نوكە ل كەركووكێ و دەڤەرێن دابرای دەرحەق هەموو نەتەوە و ئایینێن دی هاتیە كرن، ب راستی ستەمەكا مەزنە و ئێدی ئەو ستەمە ناهێتە قەبوولكرن، ئەم دزانین كو ب چەندین شێوازان ئەڤ ستەمە هەتا نوكە یا بەردەوامبوو، راستە گەلەك جاران ئەڤ ستەمە ب شێوەیێ قانوونی كریە، بەلێ ستەم هەر ستەمە قانوون ل گەل بیت یان قانوون ل گەل نەبیت، لەوما ئەم دێ روو ب روویێ هەموو ستەمكارەكی راوەستین ودێ مافێن خوە وەرگرین.
دڤێت مادەیا 140 وەك خوە بهێتە بجهئینان، دڤێت مادەیێن دەستووری یێن هاتینە بنپێكرن وەك خوە بهێنە بجهئینان، نابیت ئێدی دەستوور ببیتە بژاردەیێ دەستێ هندەك كەسان ب كەیفا خوە وان مادەیێن ب دلێ وان بجهبینن، ئەو مادەیێن كو بۆ بەرژەوەندیێن هەموو خەلكێ ئیراقێ و ب تایبەتی خەلكێ كوردستانێ نە، بهێنە پشت گوه هاڤێتن و بنپێكرن، ئەم ئێدی ڤێ چەندێ قەبوول ناكەین، ڤێجارێ شەڕێ مە ل جڤاتا نوونەرێن ئیراقێ دێ بۆ بجهئینانا دەستووری بێی جوداهی و بێی كێماسی بیت.
دیرۆكا مە ل گەل كەركووكێ دیرۆكەكا دێرینە، كەركووك تنێ پشكەك نینە ژ ئاخا كوردستانێ، كەركووك دلێ كوردستانێیە، ل سەر كەركووكێ بارزانیێ نەمر، بارزانیێ باب شۆڕشەك ل سەر دانا، ڤێجارێ ئەم د بەرهەڤین خوون و گیانێ خوە ژی ل سەر كەركووكێ دانین و هەر دێ زڤرینین. كەركووك ئاخەك نینە بشێین دەستان ژێ بەردەین، نە شەهیدێن مە دەست ژێ بەردایە، نە ئەم دەست ژێ بەردەین و رۆژەكێ ژ رۆژان دێ هەر كەركووك زڤریتە ب سەر كوردستانێ ڤە، بەلكو نەحەزێن كوردستانێ بزاڤێن جدی بكەن بۆ وێ چەندێ ئاخا مە داگیر بكەن، چەندین جاران ئاخا مە داگیركریە، بەلێ چو جاران نەشیاینە ئیرادەیا ە داگیر بكەن. بەرسڤ ل دەف مە هەیە كا چاوان دێ شێین خزمەتا هەموو ئیراقێ كەین، چاوان دێ شێین خزمەتا كەركووكێ كەین، چاوان دێ شێین خزمەتا هەموو دەڤەرێن دی یێن ڤەقەتیای كەین، چونكە دیرۆكا پارتی یا دیارە، دەستكەفتێن مە، پڕۆژەیێن مە بەلگەنە بۆ وان ئاخڤتنان كو پارتی دێ كەت، كو پارتی دبێژیت رێ بدەنە من، باوەرییا بدەنە من بهێم خزمەتا كەركووكێ بكەم، بەلگەیێن مە د دیارن كو دشێین خزمەتا كەركووكێ بكەین.
پێدڤییە خەلكێ كەركووكێ راستییان بزانن، پێدڤییە بزانن ئەوا ل دیرۆكێ خوە كریە قوربانی ، پارتی بوویە و رۆلێن پارتی بوون و كەسوكارێن هەوە بوون، دڤێت خەلكێ كەركووكێ یێ هشیار و ئاگەهدار بیت كو ئەوێن یاری ب چارەنڤیسێ خەلكێ كەركووكێ كری و ل سەر بەرژەوەندیێن هەوە بۆ دەستكەفتێن كەسی یێن خوە و حزبێن خوە رێككەفتن كرین، گەلەك د جودا و د دیارن و ئەو بیاڤێ بووی هەتا نوكە نەشیاینە خزمەتا خەلكێ كەركووكێ بكەن، ڤیجارێ داخوازییا مە ژ خەلكێ كەركووكێ ئەوە، رێ ب پارتی بدەن بهێین خزمەتا هەوە بكەین.
بەرێزان..
من گوهلێبوو ئەو برادەر دبێژن ئێك ملیۆن دەنگ، ئەڤە چالێنجەكە كو برایێ من یێ بەرێز نێچیرڤان بارزانی راگەهاندی، ئەز پرسیارا هەوە دكەم، ئایا دێ شێین ئێك ملیۆن دەنگان ئینین یان نە؟ دێ شێین زڤرینە كەركووكێ یان نە؟ بەلێ دشێین، دشێین بزڤرینە كەركووكێ، دشێین ئێك ملیۆن دەنگان ژی بینین، دشێین پارتی ببیتە مەزنترین و سەركەفتیترین لیست د ڤان هەلبژارتناندا، دەمێ پارتی ئیرادە هەبیت دێ كەت، چونكە ئەوا پارتی گوتی یا ئەنجامدی، ژ نوكە و وێڤە ژی هەر چ پارتی بێژیت دێ شێت ئەنجام دەت، بەلێ دشێن ئەنجام بدەین.
خوشك و برایان..
ئەم شانازیێ ب دیرۆكا خوە وقوربانیێن خوە وخوونا شەهیدێن خوە و بنەمالێن سەربلندێن شەهیدێن خوە و دەستكەفتێن خوە و پڕۆژەیێن خوە و بیر و بۆچوونێن خوە سەرۆكێ خوە و رێبازا خوە و پارتا خوە دكەین.
سەحكەنە بەرامبەر پارتی، بزانن كی دی ژ بلی پارتی، بێی پارتی، هیچ دەستكەفتەك بۆ خەلكێ كوردستانێ هەبوویە؟ هەكە دەستكەفت ژی هەبیت، ل وان دەمان بوویە كو هەڤپەیمانێن پارتی بوون، ل وان دەمان بوویە كو كورد ئێكڕێز بوون، لەوما ئەم نەتنێ بۆ پارتییان، بەلكو بۆ هەموو خەلكێ كوردستانێ و بۆ هەموو خەلكێ ئیراقێ، داخواز دكەین هاریكارییا مە بكەن بۆ وێ چەندێ دادپەروەری بهێتە چەسپاندن، تاكو مافێ هەموو كەسەكی وەك خوە بهێتە بجهئینان و هیچ جوداهی د جهئینانا مافێن هەموو خەلكێ ئیراقێدا نەهێتە كرن.
رێگریكرن ل سەركەفتنا پڕۆژەیان دەستكەفت نینە، رێگریكرن ل پێكئینانا حوكمەتێ دەستكەفت نینە تاكو شانازی پێ بهێتە كرن، شانازی ب وێ ئێكێ دهێتە كرن دلسۆزێ خەلكێ خوە بی و یێ بەرهەڤبی پێخەمەت خەلكێ خوە تو خوە بكەیە قوربانی. ئەو دەستكەفتێن ل كوردستانێ دبینین، ژ زاخۆ بگرە هەتا هەلەبجە ل هەموو باژێر و باژێركان كو دهێنە كرن، دەستكەفتێن ئێك ل دووڤ ئێك مە چەندین جاران باسكریە، ژ پڕۆژەیێ رۆناهی، هەژمارا من، قیركرنا رێ و پران، خزمەتگوزاریێن دیجیتالی، هەموو ئەو كارێن مە كرین ل كەرتێن ساخلەمیێ، پەروەردەیێ، خواندنێ، ل هەموو پشكێن خزمەتگوزاری، ئەو هەموو ئەو دەستكەفتەنە كو د شیاندایە ئەم بۆ كەركووكێ ژی بكەین، بەلێ مە پێدڤی ب باوەری و دەنگ و پشتەڤانییا خەلكێ كەركووكێیە، باوەرییا بدەنە مە بۆ وێ چەندێ كەركووكێ ژی وەك هەموو باژێرێن كوردستانێ پێشبێخین و بەر ب پێشڤە ببەین. گونەهە باژێرەكێ وەك كەركووكێ ئەو هەموو قوربانی داین، ل سەر دەریایەكا پەترۆلێ دژیت، هێشتا كارەبا نەبیت، رێ و پرێن وێ ب ڤی جۆری بن، یان خەلكێ هێشتا كێشەیا ژیارێ هەبیت، ئەو شەڕێ ل گەل هەرێما كوردستانێ دهێتە كرن، ل گەل كەركووكێ ژی دهێتە كرن، ئەو بودجە بڕینە، ئەو خزمەتنەكرنە ل گەل خەلكێ كەركووكێ ژی دهێتە كرن، خەلكێ كەركووكێ ژ كوردستانێ نەهاتیە جوداكرن، چونكە ناهێتە جوداكرن، كەركووك كوردستانە و دڤێت ئەم وی شەڕی بكەین بۆ وێ چەندێ مافێن وی خەلكی بزڤرن، ئەز دزانم هەوە چەند زەحمەت كێشایە، هە وە چەند ئازار دیتینە، ژ هەموو روویەكی ڤە، ژ روویێ ژیارێ، ژ روویێ ئابۆری، ژ روویێ سیاسی، ژ روویێ ئاسایشێ و ئارامیێ، پێدڤی بوو كەركووك نوكە نموونەیا پێكڤەژیانیچ با ل سەر ئاستێ ئیراقێ و هەموو جیهانێ. ئەز دشێم بێژمە هەوە كەركووك د دەستێ پارتی دا بیت، دێ بیتە نموونەیا پێكڤەژیانێ ل سەر ئاستێ هەموو جیهانێ.
هەوە هەموو خەلكێ دی تاقیكر، ئالیێن دی هەوە تاقیكرن، ل شوونا خزمەتا هەوە بكەین، هوون بكارئینان بۆ بەرژەوەندییا خوە، رێ بدەن پارتی خوە بكەتە قوربانی هەوە، رێ بدەن پارتی خزمەتا هەوە بكەت.
خوشك وبرایان…
ئینشائەللا هوون هەموو دێ پشتەڤانێن سەرسەختێن پارتی بن بۆ وێ چەندێ پارتی پترییا دەنگان ل كەركووكێ بینیت، پشتەڤانییا ڤان خوشك و برایێن خوە یێن بەربژار بكەن بۆ وێ چەندێ سەربكەڤن.
هەموو دەڤەرێن ڤەقەتیای یێن كوردستانێ دڤێت ئێك ل دووڤ ئێك بزڤرنە ب سەر نیشتمانی ڤە، دڤێت خانەقین و مەخموور و زوممار و شنگال بزڤرن، نابیت هیچ بهۆستەكا ڤێ ئاخێ ل بن دەستێ داگیركەران ڤە بمینیت. هەكە وان باوەری ب دیموكراسییەتێ و فیدرالییەتێ هەیە، بلا بهێن خالێن دەستووری بجهبینن، بەلێ خەلكەك هبەیت خوە ژ چەسپاندنا مافێن دەستووری ڤەدزیت، دڤێت ئەم بچین و نەچارین بكەین كو ئەڤ دەستوورێ بۆ هەموو ئیراقێ هاتیە نڤیسین و تنێ مولكێ ئالییەكی و پشكەكا تایبەت نینە، مولكێ مە هەموویانە و دڤێت هەموو بڕگەیێن وی وەك خوە بهێنە بجهئینان، مادەیا 140 وەك خوە بهێتە بجهئینان و هەموو خەلك ب مافێن خوە شاد بن.
ئەم دخوازین پڕۆژەیێ رۆناهی بگەهیتە كەركووكێ، دخوازین خزمەتگوزاری بگەهنە كەركووكێ، دخوازین پێكڤەژیانا راستەقینە و ئاشتەوایییا دروست ل كەركووكێ بهێتە بەرقەراركرن، ئەم بەرگریێ ژ مافێن هەموو نەتەوەیان دكەین، نەك تنێ كورد، بەلكو ژ ئەرەب و توركمان و كریستیان و هەموو تەخ و چینەكێ دكەین، دزانین كو ڤی خەلكی چ ئازارەك دیتییە، هەژی وێ چەندێ نینن ئێدی ب ڤی جۆری ژبەر وێ چەندێ كو دەستهەلاتەكا نە هەژی نەشیایە حوكمڕانییەكا دروست بڕێڤەببەت، ئەم ببینە قوربانی دەستێ ڤێ جۆرێ حوكمڕانیێ، دڤێت رێڕەوێ حوكمڕانیێ ل بەغدا بهێتە راستڤەكرن، دڤێت مافێن خەلكێ ئیراقێ هەموویێ وەكهەڤ بهێنە بجهئینان و كەركووك و هەموو باژێرێن دی ل باكوورێ ئیراقێ و باشووری و رۆژهەلات و رۆژئاڤایێ ئیراقێ، هەموو ببن ئەرك ل سەر ملێ ڤان خوشك و برایان كو نوونەرێن راستەقینەیێن پارتی نە، ل وێرێ بەرگریێ ژ مافێن هەر هەموویان بكەن.
دزانین كو خەلكێ ئیراقێ گەلەك وەك مە مخابن هاتینە چەوساندن، رێگری ل پێشئێخستنا ڤی وەلاتی هەیە، ل دابینكرنا خزمەتگوزارییان بۆ هەموو وەلاتییان، باژێرێن دی یێن ئیراقێ مخابن دبینین كو ژیانا وان چەند یا دژوارە، ئایا ئیراقێ ژێدەرێن سروشتی نینە؟ داهات نینە؟ شیان نینن؟ بەلێ یێن هەین، بەلێ ئیدارەیەكا تمام یا وی داهاتی نەهاتییە كرن و ب شێوەیەكێ وەكهەڤ خزمەتگوزاری بۆ خەلكی نەهاتینە كرن. ئەركێ مەیە ل بەغدا پارێزگاریێ ژ وەكهەڤیێ بكەین، ژ دادپەروەریێ بكەین، ئەركێ مەیە پارێزگاریێ و پشتەڤانیێ ل مافێن هەموو تاكەكێ ڤی وەلاتی بكەین. هەكە خوەشگوزەرانی ل ئیراقێ بەرقەرار بیت، خەلكی ژیانەكا بەختەوەر هەبیت، ئاسوودە بیت، ئارام بیت، پشتڕاست بن كوردستان ب هەمووڤە دێ زێدەتر پێشكەفتیتر بیت و خوەشگوزارەنییا زێدەتر تێدا هێتە بجهئینان.
كەسەك دلسۆزێ كەركووكێ بیت ، تنێ ب درووشمان نائاخڤیت، دێ هیت ب كریار، ب شێوەیەكێ پراكتیكی، ب كریار دێ خزمەتا خەلكێ كەركووكێ كەت، ئایا هوون د رازی نە ب ڤێ جۆرێ ژیانا نوكە ل كەركووكێ و دەڤەرێن ڤەقەتیایێن دی یێن كوردستانێ هەی؟ ئانكو دەست ل ناڤ دەست هەڤدو، دڤێت بزاڤەكا جدی بكەین بۆ وێ چەندێ هەموو پشكێن كوردستانێ ب دەڤەرێن ڤەقەتیای ڤە، ب دەڤەرێن داگیركری ژی ڤە، هەموو مفادار بن ژ وان خزمەتگوزاریێن كو پارتی دشێت بۆ هەوە بكەت.
خوشك وبرایان..
مە دەستوورەك نڤیسی و مە دەنگ ل سەر دا كو ئیراق ببیتە وەلاتەكێ دیموكراسی و فیدرالی كو مافێ هەموو پێكهاتەیان تێدا بهێتە مسۆگەركرن، كو كەس نەشێت دەستووری بن پێ بكەت، بەلێ كو دبنیین رێگری دهێتە كرن د بجهئینانا مادەیێن دەستووریدا، د جهئینانا مادەیا 140، بودجەی، ژیارا خەلكی، هەموو هاتنە كرن ب كارت و فشارێن سیاسی، ڤێجارێ مە بژاردەیێن دی ل بەردەست نینن ژبلی وێ چەندێ بچینە بەغدا و ل وێرێ شەڕی ل سەر ڤان مافان بكەین. ئەڤ هەلبژارتنە د گرنگن بۆ وێ چەندێ ئێدی چاڤەڕێ نەبیت خەلك ب بیرو بۆچوونێن شۆڤینی، ب هزرەكا داگیركەرانە هزر د داگیركرنا كوردستانێدا بكەت یان هزر د چارەسەریێن دی دا بكەت، هزر د وێ چەندێ دا بكەت كوردستان داگیر بكەت ئەم چاڤەڕێ وێ چەندێ نابین پیلان بهێنە داڕێشتن، دڤێت ئەم خوە پیلانێن وان ل بەغدا ب هەلوەشینین. لەوما گرنگە دەنگ ب ڤان نوونەران بدەن كو بچنە بەغدا و ل وێرێ رێگریێ ل وێ پیلانگێریێ بكەن، دڤێت دەنگ ب وان خوشك و برایان بدەن بۆ وێ چەندێ بچن ل وێرێ بەرگریێ ژ مافێن هەوە بكەن.
نابیت ئەم چاڤەڕێ بین، خەلك، ئالیێن دی هەڤپەیمانیێ دروست بكەن، نوكەژ ی سۆزا وێ چەندێ ددەن و دبێژن دێ هێین قەوارەیێ هەرێما كوردستانێ تێك دەین، نەشێن، هوون نەشێن بهێن جارەكادی كوردستانێ داگیر بكەن، بەلێ ڤێجارێ مە پێدڤی ب وێ چەندێ نەبیت بچین شەڕی بكەین و بەرگریێ ژ مافێن خوە بكەین، ڤێجارێ پێدڤییە ئەڤ شەڕە ل جڤاتا نوونەران بهێتە كرن، پێدڤییە ڤێجارێ ئەڤ شەڕە ب شێوەیەكێ قانوونی بهێتە كرن، دڤێت ئەڤ خوشك وبرایە بچن ل بەغدا كارەكێ وەسا بكەن دەستوور وەك خوە بهێتە بجهئینان، فیدرالییەت بهێتە چەسپاندن، دیموكراسییەت بهێتە چەسپاندن، ئێدی رێ نادەین ئیراق بەر ب ناڤەندیبوونێ و دیكتاتۆریییەتێ وبۆ پاشڤە بزڤریت.
ئەوا جهێ دلخوەشیێیە خوشك و برایان، ل ڤێ بانگەشەیێ دبینین ل سەر ئاستێ هەموو كوردستانێ كو دهێتە كرن و گەلەك دلێ من یێ پێخوەشە كو دبینم گەلەك گەنجان روو ل پارتی كریە، ئەڤە مەزنترین ئومێدە بۆ پاشەرۆژا وەلاتێ مە. مە ژی بەرنامە هەیە بۆ گەنجان، دڤێت گەنجێن مە ژیانەكا باشتر و بەرختەوەرتر هەبیت، ئێدی چاڤەڕێ وێ چەندێ نەكەن بزانن بەلكو دێ شەڕ بیت یان خودێ نەكەت تشتەكێ نەچاڤەڕێكری رووبدەت، دڤێت گەنجێن مەژی وەك وەلاتێن پێشكەفتی، خودانێن دەلیڤەیێن وەكهەڤ بن بۆ كاركرنێ، خودانێن كارێن خوە بن، ژیارەكا هەژی هەبیت، ئەو ئومێد و باوەریێن وان هەین بشێن بكەنە راستی، پارتی دشێت هاریكارییا هەوە بكەت، چونكە مە چەندین پڕۆژە هەنە بۆ هاریكارییا گەنجان كو گەنج ب خوە بشێت هاریكارییا خوە بكەت. مخابن ل بەغدا هەتا نوكە ژی رێگری دهێتە كرن كو خەلك ل هەرێما كوردستانێ بهێتە دامەزراندن، هەتا ل كەركووكێ ژی ناهێلن خواندنا كوردی هەبیت و كێشە بۆ دورستكرینە مە بۆ هەموو گەنجان بەرنامە هەیە، بەلێ وان بەرنامەیان پێدڤی ب پشتەڤانییا هەوەژی هەیە، دشێین پێكڤە بەرنامەیێن سەربێیخین، دشێین پێكڤە ئەجیندایێن خوە بكەینە راستی، چاوان پێشتر ئەو تشتێن كو ب دیتنا خەلكی خەونن و مە كرنە راستی، ڤێجارێ ژی ب پشتەڤانییا هەوە، ب باوەرییا هەوە ب پارتی و بەربژارێن پارتی، ب سەرئێخستنا لیستا 275، دشێین وان خەونێن میان بكەینە راستی.
داخوازێ ژ هەوە دكەن ل رۆژا هەلبژارتنان، ئەم هەموو پێكڤە بچینە سەر سندووقێن دەنگدانێ، ئەم و كەسوكارێن مە، دۆست و نیاسێن خوە پالدەین بچن بۆ دەنگدانێ، ئافرەتێن خوەشتڤی، خوشك و دایكان، هوون نیڤا جڤاكی نە، دزێت هوون ژی هاریكارییا مە بكەن، دەنگی بدەنە خزبا خوە، دەنگی بدەنە باوەرپێكریێن خوە، دەنگی بدەنە لیستا 275 یا پارتی دیموكراتی كوردستان، بەر ب سەركەفتنێ، بەر ب هەلبژارتنێن سەركەفتی بۆ پارتی دیموكراتی كوردستان.

دیدار، هۆشەنگ تاجر:

نڤیسەرەکێ ناڤدار یێ رۆژئاڤایێ کوردستانێ دیار دکەت، دەنگدان ب لیستا ٢٧٥ یا پارتی دیموکراتی کوردستان ئەرکەک نەتەوەیی یە، دەنگدان ب لیستا سەرۆک بارزانی خوەدان دەرکەفتنە ژ شۆرەشا ئیلۆنێ و کۆمارا کوردستانێ و هەموو شۆرەشێن دی یێن کوردستانێ.

کۆنێ رەش نڤیسەرێ ناڤدار یێ رۆژئاڤایێ کوردستانێ د دیدارەکا تایبەت دا بۆ رۆژنامەیا ئەڤرۆ دیار کر، دەنگدان ب لیستا پارتی دیموکراتی کوردستان ئەرکەک نەتەوەیی یێ تاکێ کوردستانێ یە، چونکی لیستا ٢٧٥ لیستا نەتەویی یە، لیستا شۆرەش و بەرخوەدان و قوربانیدانێ یە، دەنگدان ب لیستا سەرۆک بارزانی خوەدان دەرکەفتنە ژ کۆمارا کوردستانێ، شۆرەشا ئیلۆنێ و هەموو شۆرەشێن دی یێن گەلێ کوردستانێ، کو کوردان ب هزاران قوربانی بۆ ئازادیێ دان و ئەڤرۆکە لیستا پارتی نوونەراتیا وان شۆرەشان و دەستکەفتیان دکەت.
ناڤهاتی د پشکەکا دی یا ئاخڤتنا خوە دا ئەو یەک ژی دیار کر، دەنگدان ب لیستا ٢٧٥ دەنگدانە ب ئازادیا نها ل هەرێما کوردستانێ هەی، دەنگدانە ب پێکڤەژیانا ئازادانە یا هەموو ئایینان و پێکهاتەیێن ل هەرێما کوردستانێ کو ب سالانە پێکڤە دژین، چونکی ئەڤا نها ل هەرێما کوردستانێ هەی بەرهەمێ شۆرەش و قوربانیدانا گەلێ کوردستانێ یە ب سەرکێشیا پارتی دیموکراتی کوردستان و گۆت: (دەنگدان ب لیستا سەرۆک بارزانی دەنگدانە ب پێشمەرگەیێن ئازادیا کوردستانێ، ئەو پێشمەرگەیێن ب خوونا خوە شیان هەرێما کوردستانێ بپارێزن، ژ بەر ڤێ یەکێ ژی لیستا پارتی دیموکراتی کوردستان نها نوونەراتیا ئازادیێ، پێکڤەژیانێ، خزمەتێ و پێشکەفتنێ دکەت، دەمێ بەرێ خوە ددەمە لیستا ٢٧٥ یا پارتی ئەڤ هەموو تشتە دهێنە بەرچاڤێن من، ئانکو لیستا پارتی تنێ لیستەک ژ ناڤێ هندەک کەسان نینە، بەلکو بەرهەمێ خەبات و قوربانیدانا ب سالان یا گەلێ کوردستانێ یە).
نڤیسەرێ ناڤدار یێ رۆژئاڤایێ کوردستانێ ئەو یەک ژی دیار کر، دەمێ بەرێ خوە ددەمە لیستا ٢٧٥ یا پارتی مەشا دیرۆکی یا بارزانیێ نەمر بۆ سۆڤیەتا بەرێ دهێتە بیرا من، بەرخوەدانەکا بێ وێنە یا بارزانیێ نەمر ژ بۆ ئازادیا کوردستانێ دهێتە بیرا من، خەباتەکا مەزن یا ب سالان بۆ بدەستڤەئینانا مافێن رەوا یێن گەلێ کوردستانێ دهێتە بیرا من و گۆت: (لیستا سەرۆک بارزانی تنێ نوونەراتیا کوردان ناکەت، لیستا ٢٧٥ نوونەراتیا کوردان، ئێزدیان و هەموو نەتەوە و پێکهاتەیێن دی یێن ل هەرێما کوردستانێ دکەت، ب سالانە چەندین نەتەوە و پێکهاتەیێن جودا جودا ل هەرێما کوردستانێ پێکڤە د ناڤ ئازادیێ دا دژین و نها ژی لیستا ٢٧٥ یا پارتی دیموکراتی کوردستان نوونەراتیا وان هەموو نەتەوەیان و پێکهاتەیان دکەت و ژ بەر ڤێ یەکێ ژی دەنگدان ب لیستا پارتی د هەمان دەمی دا دەنگدانە ب ئازادیێ، پێکڤەژیانێ و خوەدان دەرکەفتنە ژ دەستکەفتیێن ل هەرێما کوردستانێ کو بەرهەمی خوونا ب هزاران پێشمەرگەیێن قارەمانە).
ناڤهاتی د دووماهیا ئاخڤتنا خوە دا ئەو یەک ژی دیار کر، ژ بۆ پێشکەفتنێن زێدەتر، ژ بۆ کوردستانەکا ئازاد، ژ بۆ خزمەتێن زێدەتر و ژ بۆ بەردەوامیا پێکڤەژیانێ و کوردستانە ئارام گرنگە هەموو دەنگدەرێن هەرێما کوردستانێ دەنگێ خوە بدەنە لیستا ٢٧٥ و گۆت: (پشتەڤانیێ ل لیستا ٢٧٥ دکەم و هیڤیدارم لیستا ٢٧٥ کو وەکو من گۆتی نوونەراتیا هەموو پێکهاتەیێ ل هەرێما کوردستانێ دکەت، بشێت د ڤان هەلبژارتنان دا سەرکەفتنەکا مەزن بدەستڤە بینیت، سەرکەفتنا لیستا پارتی دیموکراتی کورستان سەرکەفتنا کوردان و هەموو پێکهاتەیێن دی یێن هەرێما کوردستانێ یە، کو ب سالانە پێکڤە ب ئازادی دژین).

دوهی سێشەمبی 21/10/2025، ل باژێرێ هەولێرێ، سەرۆك بارزانی ل گەل پشكەك ژ خەلكێ هەولێرێ كۆمبوو.
د پەیڤەكێدا سەرۆك بارزانی خوەشحالییا خوە ب كۆمبوونێ دەربڕی و راگەهاند» دەمێ باسێ هەولێرێ دهێتە كرن ئانكو باسێ دیرۆكا چەند هزار سالێن ڤی وەلاتی دهێتە كرن و ئەڤرۆ هەولێر پایتەختە و جهێ ڤەحەویانا هەموو لێقەومایەكی و هەموو ئازادیخوازەكییە».
د پەیڤا خوە دا سەرۆك بارزانی باس ل هەلبژارتنێن خولا شەشێ یا جڤاتا نوونەرێن ئیراقێ كر و ئاماژە ب وێ چەندێ كر هەموو هەلبژارتن د گرنگن و سەبارەت مە تشتەكێ مەبدەئییە و مە باوەری ب وێ چەندێ هەیە كو مللەت بڕیارێ ل چارەنڤیسێ خوە بدەت هەروەكو ل مەها ئادارا 1991 ل دەمێ سەرهلدانێ ل كۆیە من داخوازكری هەلبژارتن بهێنە ئەنجامدان و مللەت بڕیارا خوە بدەت.
سەرۆك بارزانی دوپاتكر كو پێدڤییە هەلبژارتنێن پاقژ د سەقایەكێ ئارامدا بهێنە ئەنجامدان.
هەروەسا سەرۆك بارزانی باس ل قووناغێن هەلبژارتنان كر ل ئیراقێ ژ سالا 2005 و هەتا نوكە سەرەرای بەرچاڤكرنا سەرنج و تێبینییان ل سەر قانوونا نوكە یا هەلبژارتنان ل ئیراقێ، دوپاتكر ژی كو ژ بەر بەرژەوەندییا گشتی دێ پشكداریێ د هەلبژارتناندا كەین و هیڤیدارین پشتی ڤان هەلبژارتنان گوهۆڕین بهێنە كرن و خەلكەك بهێت كو هەست ب بەپرسیارەتیێ بكەت و چارەسەرییا كێشەیان بهێتە كرن.
سەرۆك بارزانی بۆ بەرهەڤبوویان گوت» هەلوەست و بۆچوونا هەوە گەلەك یا گرنگە و هەموو تشت یێن ل بەرچاڤێن هەوە و ئەوا هوون ب باش دزانن بۆ هەولێرێ و كوردستانێ و ئیراقێ ژی، هوون وێ بڕیارێ بدەن».
ل دۆر كاروانێ ئاڤەدانیێ و پڕۆژەیێن خزمەتگوزاری، سەرۆك بارزانی گوت» گەلەك پڕۆژە یێن هاتینە ئەنجامدان، ئەڤە منەت تێدا نینە و ئەو كارێ حوكمەتێیە، پارتی بۆ وێ چەندێ دروست بوویە خزمەتا ڤی مللەتی بكەت، پارتی هەر چ بكەت بۆ ڤی مللەتی و بۆ هەولێرێ هێشتا كێمە».
هەر د پەیڤا خوە دا سەرۆك بارزانی هەلوەستێ مەردانە و دۆستانەیێ خەلكێ هەولێرێ باسكر ل دەمێ پرۆسەیا ئەنفالا بارزانییان و ئەنفالا سالا 1988 و راگەهاند» هیچ دەمەكی قەنجییا خەلكێ هەولێرێ ناهێتە ژبیركرن و هەتا ماینە قەردارێن هەوەینە».
هەروەسا سەرۆك بارزانی راگەهاند» هەولێر باژێرێ پێكڤەژیانێیە، فەرهەنگا پێكڤەژیانێ فەرهەنگەكا زەنگینە و ئەم پێ د سەربلندین و ب هێزترین چەك بوویە د دەستێ مەدا ل دەرڤە و ل هەموو ناڤەندێن نێڤدەولەتی كو شانازیێ پێ دكەین و پێدڤییە ئەڤ فەرهەنگە بۆ نڤشێن داهاتی ب بهێتە ب هێزتركرن».
سەبارەت هەڤبەندیێن هەولێرێ و بەغدا سەرۆك بارزانی گوت» مە وەسا هزر دكر پشتی 2003 دێ دەلیڤەیەكا زێرین هێتە پێش كو هەموو تاكەكێ ئیراقی بگەهیتە ماف و ئەركێ خوە لەوما چووینە بەغدا و ب هەموو نیەتەكا پاقژ مە بزاڤكر تاكو گەهشتینە قووناغا بەرهەڤكرنا دەستووری ل سالا 2005 كو بۆ وی دەمی و نوكە و پاشەڕۆژێ ژی پشكا وێ چەندێ تشتێن ئەرێنی تێدانە كو كار پێ بهێتە كرن و مفا ژێ بهێتە وەرگرتن و ئەم پشتەڤانییا وی دەستووری دكەین بەلێ مخابن ژ ئالیێ حوكمەتا بەغدایێ ڤە نەهاتە بجهئینان، نوكە ژی گەلەك تشتێن كو پەیوەندی هەیە ب هەرێما كوردستانێ و ب قانوونێن رژێما بەعس ڤە حوكم دكەن».
سەبارەت وێ چەندێ كو ئیراق وەلاتەكێ فرەنەتەوە و فرە مەزهەب و فرەئایینە، سەرۆك بارزانی باس ل بزاڤان بۆ چەسپاندنا مافێن پێكهاتەیان د دەستووریدا كر و راگەهاند» هەكە كورد نەبان، ب نیاز نەبوون وێ بڕگەیێ د دەستووریدا بچەسپینن».
سەرۆك بارزانی هیڤی خواست هەموو ئالی بزڤرن بۆ دەستووری و كێشە بهێنە چارەسەركرن و ئێدی مافێن دەستووری و قانوونی یێن خەلكێ كوردستانێ نەهێتە بنپێكرن.
هەر د وێ كۆمبوونێدا سەرۆك بارزانی دوپاتی ل بەردەوامییا برایەتی و پێكڤەژیانێ كر و د وی چارچۆڤەیدا باس ل سەردەمێ شۆڕشا ئیلۆنێ كر كو عەرەب و مەسیحی و توركمان د سەركردایەتییا شۆڕشێدا بوون.
ل دۆر رەوشا كوردستانێ و پرسا پێكئینانا حوكمەتا نوو، سەرۆك بارزانی دوبارە دوپاتكر كو بەری هەلبژارتنێن جڤاتا نوونەرێن ئیراقێ حوكمەتا نوو بهێتە پێكئینان.
د پشكەكا دی یا وێ كۆمبوونێدا سەرۆك بارزانی ئاماژە ب وان پڕۆژەیێن ستراتیژی كر كو ل هەرێما كوردستانێ دهێنە بجهئینان و ب تایبەت دروستكرنا بەنداڤان كو دێ كاریگەرییەكا مەزن هەبیت د پاراستنا ئاڤێدا ل كوردستانێ و روو ب رووبوونا قەیرانا ئاڤێ ل پاشەڕۆژێ.
دوپاتی ژی ل پاراستنا ژینگەهێ و پێشڤەبرنا كەلتوورێ ژینگەهپارێزیێ كر.
ل دووماهیێ سەرۆك بارزانی گوت» ژ هەولێرێ و هەولێرییان فێری رەوشت و مرۆڤدۆستیێ و مەردایەتیێ دبین».

دوهی سێشەمبی 21/10/2025، ل پیرمام سەرۆك مەسعود بارزانی پێشوازی ل ئانل بۆرا ئینان، بالیۆزێ توركیا ل ئیراقێ كر.
د دیدارەكێدا كو ئێرمان تۆپچو، قونسلێ گشتیێ توركیا ل هەوێرێ ژی بەرهەڤبوو، باس ل رەوشا سیاسییا ئیراقێ و دەڤەرێ ب گشتی و هەلبژارتنێن داهاتی یێن جڤاتا نوونەرێن ئیراقێ هاتە كرن.
گرێدای ب هەرێما كوردستانێ ڤە دوماهی پێنگاڤ بۆ پێكئینانا كابینەیا نوو یا حوكمەتا هەرێما كوردستانێ وپ رۆسەیا هنارتنا پەترۆلا هەرێما كوردستانێ ب رێیا بەندەرێ جەیهان یێ توركی گەنگەشە ل سەر هاتە كرن.
هەڤبەندیێن د ناڤبەرا توركیا ل گەل ئیراقێ و هەرێما كوردستانێ تەوەرەكێ دی یێ ڤێ دیدارێ بوو، هەردو ئالییان دوپاتی ل بەردەوامی و پێشڤەبرنا هەڤبەندییێن د ناڤبەرا هەرێما كوردستانێ و توركیا د هەموو واراندا كر.

دوهی سێشەمبی 21/10/2025، نێچیرڤان بارزانی، سەرۆكێ هەرێما كوردستانێ، پێشوازی ل فەریقێ ئێكێ یێ رۆكن عەبدولئەمیر رەشید یارەللا، سوپاسالارێ ئیراقێ و شاندەكێ د گەلدا كر كو ژ هەمارەكا پلەدارێن بلند یێن لەشكری و ئەمنی پێكهاتبوو.
سەرۆكایەتییا هەرێما كوردستانێ بەلاڤكر» د كۆمبوونەكێدا كو سوپاسالارێ پێشمەرگەی و بەرپرسێن وەزارەتا پپێشمەرگە، بەرهەڤ بووین، هاریكارییا هەڤپشك یا لەشكرێ ئیراقێ و پێشەرگەی ل گەل هەڤپەیمانییا نێڤدەولەتی، هەروەسا هەڤبەندیێن لەشكری و ئەمنی یێن ئیراقێ و ئەمریكا د چارچۆڤەیێ رێككەفتنا دو ئالییانەیا ئەمنی د ناڤبەرا واندنا، مەترسیێن تیرۆرێ و رەوشا سووریێ، هاتنە گەنگەشەكرن.
هەردو ئالی هەڤڕا بوون كو داعشی هێشتا مەترسییەكا راستەقینەیە و گەفە ل ئاسایش و ئارامییا ئیراقێ و سووریێ. سەبارەت ڤێ چەندێ سەرۆكێ هەرێما كوردستانێ دوپاتكر كو ئیراق و هەرێما كوردستانێ بۆ بەرهنگاربوونا گەف و مەترسیێن تیرۆرێ و د چارچۆڤەیێ رێككەفتنێن ئەمنی یێن ئیراقێدا، هێشتا پێدڤی ب هاریكاری و پشتەڤانییا هەڤپەیمانییا نێڤدەولەتی هەیە.
سەرۆكێ هەرێمێ هەروەسا رێز بۆ رۆلێ لەشكرێ ئیراقێ د بەرقەراكرنا ئاسایش و ئارامیێ ل وەلاتێ هەبوو، هەروەسا ب هێزكرنا هاریكارییا هەڤپشك یا پێشمەرگەی و لەشكرێ ئیراقێ ب پێدڤی هەژمارت. ژ ئالیێ خوەڤە سوپاسالارێ ئیراقێ دوپاتكر كو نوكە هاریكاری د ناڤبەرا لەشكری وپێشمەرگەیدا د باشترین رەوشدایە و ل دۆر ڤێ چەندێ رۆلێ سوپاسالارێ پێشمەرگەی بلند هەلسەنگاند.
پاراستنا ئاسایشا سنووری و رەوشا دەرگەهێن سنووری ب تایبەتی د ناڤبەرا سووریێ و ئیراقێدا، ب دوماهیهاتنا ئەركێ هەڤپەیمانییا نێڤدەولەتی ل ئیراقێ ل ئیلۆنا 2026 و رەوشا پشتی ڤێ قووناغێ، تەوەرەكێ دی یێ كۆمبوونێ بوو.

دوهی سێشەمبی 21/10/2025، نێچیرڤان بارزانی، سەرۆكێ هەرێما كوردستانێ پێشوازی ل نائل بۆرا ئینان، بالیۆزێ توركیا ل ئیراقێ كر.
سەرۆكایەتییا هەرێما كوردستانێ ل دۆر كۆمبوونێ بەلاڤكر» هەڤبەندیێن توركیا ل گەل ئیراقێ و هەرێما كوردستانێ، پرسا ئاڤێ د ناڤبەرا توركیا و ئیراقێدا، هەلبژارتنێن داهاتی یێن جڤاتا نوونەرێن ئیراقێ، پاشەڕۆژا پرۆسەیا سیاسی و رەوشا ناڤخوەیا ئیراقێ و هەرێما كوردستانێ، هاتنە گەنگەشەكرن».
سەرۆكایەتییا هەرێما كوردستانێ دیاركر ژی» هەردو ئالییان داكۆكی ل پێشڤەبرنێ ب هەڤبەندیێن توركیا ل گەل ئیراقێ و هەرێما كوردستانێ ب تایبەتی د وارێ ئابۆریدا كر».
ئاماژەكر ژی» هەردو ئالییان هنارتنا پەترۆلا هەرێما كوردستانێ ب پێنگاڤەكا ئەرێنی بۆ ئابۆرێ ئیراقێ ب گشتی دا زانین، هەروەسا دەرباڕەی هەڤبەندیێن كەلتووری و جڤاكی ،بیر و بۆچوون لێكگۆهارتن».
سەرۆكایەتییا هەرێما كوردستانێ خویاكر ژی» دوماهی پێشهاتێن رەوشا دەڤەرێ ب گشتی و چەند پرسێن جهێ گرنگییا هەڤپشك، ئالییەكێ دی یێ كۆمبوونێ بوو كو قونسلێ كشتیێ توركیا ژی ل هەرێما كوردستانێ بەرهەڤبووی».

دوهی سێشەمبی 21/10/2025، مەسرور بارزانی، جێگرێ سەرۆكێ پارتی دیموكراتی كوردستان، پشكداری د ئاهەنگا بانگەشەیا لیستا 275 یا پارتی ل زاخۆ كر.
د پەیڤەكێدا كو ل ئاهەنگێ پێشكێشكری، جێگرێ سەرۆكێ پارتی، باس ل رۆلێ خەلكێ زاخۆ د بەرگریكرنێ ژ كرودستانێ كر و دوپاتكر كو هەردەم شێرەتێن سەرۆك بارزانی ئەوە بوون خزمەتا خەلكێ قەهرەمانێ زاخۆ بهێتە كرن.
دەقێ پەیڤا جێگرێ سەرۆكێ پارتی دیموكراتی كوردستان:
جەماوەرێ قەهرەمانێ زاخۆ
ئەندامێن پارتی دیموكراتی كوردستان
دلسۆزێن رێبازا بارزانی
سلاڤێن سەرۆك بارزانی بۆ هەوە هەموویان هەنە

ئەڤرۆ بۆ بانگەشەیا لیستا 275 یا پارتی دیموكراتی كوردستان ل ڤێرێ نە. دەمێ ئەم دهێنە زاخۆ هوون هێزەكا وەسا ددەنە مە كو مرۆڤ هەست ب شانازییەكا مەزن دكەت كو ئەم یێ دناڤ خەلكێ خوە دا و دناڤ جهەكی داینە كو دلێ سەرۆك بارزانی یە ژ بەر وێ چەندێ بۆمە جهێ شانازییەكا گەلەك مەزنە ئەم ئەڤرۆ یێن ل دەف هەوە هەموویان.
زاخۆ باژێرێ شەهیدایە، باژێرێ پێشمەرگێن قەهرەمانە، باژێرێ خەلكەكێ خۆڕاگرە، هوون دلی سەرۆكی نە ژبەر وێ چەندێ ئەم ئەڤرۆ یێن هاتینە خزمەتا هەوە ژبۆ وێ ئێكێ جارەكادی داخواز بكەین باوەرییا خوە بدەنە مە دا جارەكادی پارتی دیموكراتی كوردستان ببیتە سەركەفتیترین حزب ل هەلبژارتنێن داهاتی یێن جڤاتا نوونەرێن ئیراقێ..
خووشك و برایێن هێژا..
ئەڤ هەلبژارتنە بۆ وێ چەندێ نە ئەم بەربژارێن خوە بهنێرینە جڤاتا نوونەرێن ئیراقێ و ئەڤ هەلبژارتنە بۆمە د گرنگن چونكە بەری نوكە ب مخابنی ڤە بەلێ خەلكەكێ دی كو نوونەرایەتییا خەلكێ كوردستانێ كری ل جڤاتا نوونەرێن ئیراقێ وەك پێدڤی بەرگری ژ مافێن خەلكێ كوردستانێ نەكریە، ڤێجارێ دڤێت ئەم وان كەسان بهنێرینە جڤاتا نوونەرێن ئیراقێ بۆ وێ چەندێ پارێزڤانیێ و بەرگریێ ژ مافێن خەلكێ كوردستانێ و هەموو ئیراقێ بكەن و جارەكادی كەسەك نە ل بەغدا و نە ل هیچ جهەكی ل هەرێما كوردستانێ بشێت مافێن دەستووری یێن خەلكێ كوردستانێ بن پێ بكەت، لەوما گەلەك یا گرنگە ئەم هەموو پێكڤە بچینە سەر سندووقێن دەنگدانێ و ب ئێكدەنگ لیستا 275 یا پارتی دیموكراتی كوردستان سەربێخین.
شیرەتێن سەرۆك بارزانی بۆ مە هەموویان ئەون ئەم د ئاستەكێ بلند دا بانگەشەیا هەلبژارتنان بكەین و ئەم خوە نائینینە رێزا خەلكەكی كو دژایەتییا پارتی دكەت یان ل سەر حیسایا دژایەییا پارتی ب سالان ب خێرا پارتی د بەردەوامبوون، مە دڤێت ئاستێ پارتی، ئاستێ رێبازا بارزانی ب رێزڤە بۆ خەلكێ كوردستانێ هەتا ل گەل نەحەزێن خوەژی زمانەكێ ئارام، ئاسایش و ئارامییا كوردستانێ بپارێزین و ڤان هەلبژارتنان ب شێوەیەكێ گەلەك پێشكەفتی و شارستانی بڕێڤەببەین و داخوازا مە ژ هەوە هەموویان ئەوە ل سەرخوە و ب پێنگاڤێن ب هێز بچنە سەر سندووقێن دەنگدانێ و ب دەنگێن خوە بۆ هەموو جیهانێ ب سەلمینن كو پارتی مەزنترین و سەركەفتیترین حزبە ل سەر ئاستێ هەرێما كوردستانێ.
ئەڤ هەلبژارتنە بۆمە د گرنگن چونكە ئەو جهێ پارتی لێ نەبیت پیلان دژی هەرێما كوردستانێ لێ دهێنە گێران، بەلێ هەر جهەكێ پارتی لێبیت چو جاران نەحەز نەشیاینە بەرامبەری ئیرادەیا خەلكێ پارتی ب راوەستن، ژ بەر وێ چەندێ هەبوونا پارتی ل بەغدا گەلەك یا فەرە.
هوون ئەو پێشمەرگەنە یێن دوهی هەوە داستان تۆماركرین بۆ بەرگریكرنێ ژ ئاخا كوردستانێ، هوون كچ و كورێن وان پێشمەرگانە یێن بەرگری ژ بهۆست بهۆست ئاخا كوردستانێ و مافێن خەلكێ كوردستانێ كری، پێدڤییە ئەڤرۆ جارەكادی ئەم بچینەڤە سەنگەرێ خەباتێ بەلێ ڤێجارێ ب پێنووس و دەست و دەنگێ خوە جارەكادی رێ ل داگیركەران بگرین و رێبازا بارزانی و پارتی سەربێخین.
ئەڤە چەندین سالە مە هەموو یان هەڤدو یا نیاسی، دەستكەفتێن پارتی د دیارن ، خەبات و قوربانیدانا پارتی یا دیارە، خوونا شەهیدێن مە ل هەموو پارچێن كوردستانێ یا هاتیە رێتن، پێشمەگێن مە ل هەموو جهان خەبات و قوربانیدانا دای، دەمێ پێدڤی ب بەرگریێ و شەڕابیت ئەم ل بەراهییا سەنگەری بووین و دەمێ پێدڤی ب ئاڤەدانیێ بیت دیسا پارتی سەركێشا كاروانێ ئاڤەدانیێ بوویە ل كوردستانێ، نوكە ئەم پێدڤی دەنگێن هەوەینە، پێدڤی پشتەڤانییا هەوەینە ژبۆ وێ چەندێ بێژینە خەلكێ دی كو ئەڤە پارتییە، پارتی نە تنێ بەرامبەری دوژمنان یا زیرەكە و پێچێدبیت رێیا دوژمنان بگریت، بەلكو ل ئاڤەدانكرنا كوردستانێ نوكە هێز هێزەك نینە ل كوردستانێ ل بەری پارتی بیت، ئەو خزمەت و خەباتا پارتی بۆ خەلكێ كوردستانێ كری بێی جوداهی ئەو ب خوە دیداڤانێ ئاخڤتنێن مەیە ژ بەر ڤێ چەندێ هەكە خەلكێ دی سۆزا بدەتە هەوە كو دێ ڤی تشتی بۆ هەوە كەین، پێدڤی ناكەت ئەم چو سۆزا بدەینە خەلكی، بەلێ پێدڤییە بەرێ وان بدەینە ڤان سالێن بۆری كا پارتی چ كریە بۆ خەلكێ كوردستانێ ئێك ئێكە ڤان هەموو پڕۆژە و دەستكەفتان رێزكەین ئەڤە هەموو دەستكەفتێن هەوە و حزبا هەوە بووینە یێن وێ باوەریێ بووینە یێن هەوە دایە حوكمەتا خوە. پارتی هەموو دەمان دەستكەفتێن مەزن بۆ خەلكێ كوردستانێ هەبوون و پارتی شانازیێ ب قوربانیێن خوە ددەت و چو جاران خزمەت نەكریە منەت بەلكو خزمەت ئەركە و دێ د بەردەوام بین د بجهئینانا ئەركێ خوە و خزمەتا مللەتێ خوە.
هەكە پارتی چەند یا بەردەوامبیت د خزمەتكرنێ دا، د هەمان دەمدا گەلەك پیلان ژی هەبوون بۆ وێ چەندێ رێگریێ ل مە بكەن تاكو خزمەت و ئاڤەدانی بۆ خەلكی نەهێتە كرن، پیلان یێن هاتینە گێران و هەڤپەیمانی یێن هاتینە دروستكرن ل سەر ئاستێ ناڤخوە و ئیراقێ بۆ وێ چەندێ رێ ل پێشكەفتنا پارتی بگرن، پارتی گیانێ كوردستانێیە و ئەوێ بەرامبەری پارتی د راوەستیت پێدڤییە باش تێبگەهیت مللەتێ

كوردستانێ هەموو دێ ل بەرامبەری ڤان نەحەزان راوەستیت.
هێزا پارتی هێزا خەلكێ كوردستانێیە، هێزا خوونا شەهیدێن مەیە، هێزا پێشمەرگێن قەهرەمانە، هێزا هەوەیە، هێزا گەنج و لاوێن مەیە، پارتی تشتەك نینە یا جودا بیت ژ خەلكێ كوردستانێ، دۆست و دوژمن ڤێ چەندێ باش دزانن كو پارتی ئانكو كوردستان و كوردستان ئانكو پارتی، دەمێ پارتی بەرنامە د دانان دا خزمەتا خەلكێ كوردستانێ بكەت و مافێن دەستووری یێن هەرێما كوردستانێ بجهبینیت، پیلان و بەرنامە هەبوون چاوان بودجە و مووچەیێن هەرێما كوردستانێ بهێنە بڕین وبەرنامە هەبوون چاوان رێگری ل پێشكەفتنێن كوردستانێ بهێتە كرن و چاوا هەرێما كوردستانێ تووشی كێشە و گرفتێن ئەمنی ببیت، بەرنامە هەبوون چاوا هەرێما كوردستانێ بهێتە بچووكرن ڤە، ئەڤ بەرنامە هەتا نوكە ژی د بەردەوامبوون، بەلێ ب هێز و ئیرادەیا خەلكێ كوردستانێ بەرنامەیێن وان سەرنەكەفتینە و سەرناكەڤن ژی چونكە خودا و هوون یێن ل گەل مە.
دەمێ پێدڤی بیت ئەم بەرسڤا نەحەزێن چەپەرێ بەرخودانێ بدەین هەموو دەمان ئەم د بەرهەڤ بووینە و ژ نوكە و وێڤە ژی ئەم د بەرهەڤین د چەپەرێن بەرخودانێدا بین، بەلێ دەمێ پێدڤی بیت بەرسڤا نەحەز و دوژمنان ب خزمەتكرنا مللەتێ خوە بدەینەڤە دیسان ئەم د بەرهەڤین و دیسان ژی دێ د بەردەوام بین د خزمەتكرنا مللەتێ خوە دا و ب پڕۆژەیێن خوە و سەركەفتنا پارتی دێ بەرسڤا نەحەزێن خوە دەینەڤە.
مە چەندین دەستكەفتێن مەزن ل سەر ئاستێ كوردستانێ بۆ هەموو باژێر و دەڤەرێن كوردستانێ هەبوون ئێك ژوان پڕۆژەیێ رۆناهی بوویە بۆ رۆناهیكرنا كوردستانێ و بەری چەند رۆژان تێستا كارەبا 24 ساتی ل زاخۆ ژی ب سەركەفتییانە هاتیە ئەنجامدان و ل دوماهییا ڤێ مەهێ سەنتەرێ زاخۆ دێ بیتە كارەبا 24 ساتی و ئینشائەللا هەتا دووماهییا ئەڤسالە دێ دەوروبەرێن زاخۆ ژی دێ بیتە كارەبا 24 ساتی.
دەمێ ئەم باسێ خزمەتكرنێ دكەین هیچ منەت تێدا نینە و مافێ هەوەیە، ژ بەركو هەوە هند خەبات و خزمەت یا كری كو ئەم ب شەڤ و رۆژ خزمەتا هەوە بكەین و ئەڤە ئەركێ مەیە و چو منەت تێدا نینە، ئەز چەندین جاران هاتیمە زاخۆ و هەموو جاران شیرەتێن سەرۆك بارزانی ئەوبوون پێدڤییە خزمەتا خەلكێ قەهرەمان و خەباتكەرێ زاخۆ بكەن و مە ژی وەك ئەرك خزمەتا زاخۆ یا كری و ئەز سوپاسییا هەوە دكەم بۆ وێ باوەرییا هەوە دایە مە و هەوە رێ دایە مە بهێین خزمەتا هەوە بكەین و سوپاسییا فەرمانبەر و بەرپرسێن ئیدارەیا زاخۆ ژی دكەین كو ب ئەمانەت ب ئەركێن خوە رابووین و دشیاندا بیت د خزمەتا هەوەدا بن و ئەڤرۆ ئەم زاخۆ دبینین كو بەری چەند سالا ل كیرێ بوو و ئەڤرۆ ل كیرێ یە و ئەڤە ژی هەموو ئەو دەستكەفتن یێن وێ باوەرییا هەوە دایە مە و هەوە رێ دایە مە خزمەتا زاخۆ بكەین.
بەری چەند سالان 60% جادەیێن د ناڤ زاخۆ دا هێشتا ئاخ بوون، نوكە یێن دهێنە قیركرن، كۆرنیشێ زاخۆ جهەك بوو خەلك نەدشیا بچیتێ بەلێ نوكە ئێك ژ جوانترین كۆرنیشایە ل سەر ئاستێ هەموو ئیراقێ، گەلەك خزمەتگوزاریێن دی بۆ زاخۆ یێن هاتینە كرن بەلكو گەلەك ددیار نەبن بەلێ كۆرنیش گەلەك یێ دیارە هەرچەندە خزمەتێن دی بۆ دەوروبەرێن زاخۆ هاتینە كرن بۆ رێ وپرێن زاخۆ هاتیە كرن و بۆ قەزا و ناحیێن دەوروبەرێن زاخۆ هاتیە كرن، دیسان ژی دبێژم ئەڤە ئەركە و دێ د بەردەوام بین د خزمەتا هەوە دا د ئاڤەدانكرنا زاخۆ و هەموو كوردستانێدا.
نوكە زاخۆ یا بوویە جهەكێ سەرنج راكێش ل هەموو كوردستانێ و ئیراقێ و بگرە هەتا ژ گەلەك جهێن دی یێن جیهانێ ژی دخوازن بهێنە زاخۆ.
مە بەرنامەیێن گەلەك باشتر و پێشكەفتیتر یێن هەین بۆ وێ چەندێ زاخۆ ببەینە قووناغەكا دی و گەلەك زێدەتر خزمەتا زاخۆ بهێتە كرن.
خەلكێ زاخۆ خەلكەكێ قەهرەمانە، پێشمەرگێن قەهرەمانن و هونەرمەندێن گەلەك ژێهاتی ژێ دەركەفتینە، زاخۆ جهێ پێشئێخستنا هونەر و كەلتوورێ كوردستانێیە لەوما دێ گرنگییەكا مەزنتر دەینە بابەتێ هونەری و كەلتوری ل زاخۆ و ل هەمو كوردستانێ، گەنجێن مە یێن زاخۆ وەرزشڤانێن گەلەك ب هێزن بەری نوكە مە دیت یانا زاخۆ سەركەفتنێن مەزن بدەستڤەئینان وەكو من زانی یانا زاخۆ ئەڤرۆ یارییەكا هەی ل وەلاتێ بەحرێنێ و هەر ل ڤێرێ پشتەڤانییا خوە بۆ دیار دكەین و هیڤییا سەركەفتنێ بۆ دخوازین.
دەمێ مە بڕیار دای خزمەتا كوردستانێ بكەین بڕیارا مە ئەوبوو خزمەتا هەموو كوردستانێ بكەین بێی جوداهی هیچ باژێرەك و هیچ گوندەك و هیچ دەڤەرەك نەهێتە ژبیركرن، هەر دەڤەرەكێ تایبەتمەندییا خوە هەیە خزمەتا دهۆكێ و سێمێلێ و زاخۆ و بێگوڤا و سۆران و هەولێرێ و هەلەبجە و
و گەرمیان و هەموو باژێرێن كوردستانێ بهێتە كرن و هیچ دەڤەرەك یا بێبەهر نەبیت ژ خزمەتگوزارییان و تایبەتمەندیێن ڤان جهان ژی ل بەرچاڤ بهێنە وەرگرتن، جهێ سەربلندیێیە كو نوكە حوكمەتا هەرێمێ ل سەر ئاستێ هەموو كوردستانێ خزمەتگوزاری پێشكێش كرینە و ئەڤە یا بوویە جهێ شانازیێ بۆ خەلكێ كوردستانێ و یا بوویە گرێیەك بۆ وان نەحەزێن چاڤێن وان ب كوردستانێ ناڕابن كو گەلەك هەنە چاڤێن وان ب كوردستانێ ناڕابن و سۆزا ددەن كو قەوارەیێ هەرێما كوردستانێ بهێتە هەلوەشاندن و رێ ل پێشكەفتنا كوردستانێ بهێتە گرتن، چونكە گەندەلی یا دناڤ واندا رێ نادەت خزمەتا خەلكێ خوە بكەن. ل ڤێرێ پەیاما مە و كوردستانێ بۆ هەموو خەلكێ ئیراقێ، دەمێ تیرۆرستێن داعشێ هێرش ئینایە سەر ئیراقێ، دەرگەهێن كوردستانێ د ڤەكری بوون بۆ خووشك وبرایێن مە یێن ئێزدی و عەرەب و كریستیان و توركمان و هەموو دەمان دەرگەهێن كوردستانێ د ڤەكرینە و دێ د بەردوام بین و دێ نیشا هەموو جیهانێ دەین كو مێرخاسییا كوردستانێ و مالێن كوردستانێ و باوەرییا مە ب پێكڤەژیانێ ب رێبازا پارتی و رێبازا بارزانی چەند یا ب هێزە، ئەم دێ د بەردەوام بین خزمەتا هەموو خەلكێ ئیراقێ
بكەین ڤێجارێ نەتنێ خەلكێ ئیراقێ هاتیە ل دەرگەهێ كوردستانێ بدەت و داخواز بكەن ل ڤێرێ ب ئارامی بژین، نوكە داخواز هەموو خەلكێ ئیراقێیە پارتی بەرگریێ ژ مافێن وان بكەت د جڤاتا نوونەرێن ئیراقێدا.
بەربژارێن مە دەمێ دچنە بەغدا دێ چن دا ل وێرێ پارێزڤانیێ ل مافێن دەستووری یێن كوردستانێ بكەن، نابیت هیچ كەسەك و ئالییەك هێزەكا سیاسی ئەو ماف و دەستهەلات هەبیت مافێن دەستووری یێن هەرێما كوردستانێ بن پێ بكەت، بابەتێ مووچەی بكەتە بابەتەكێ سیاسی و میزاجا كەسی كو بڕیارێ دەت ئایا دێ مووچەیێن كوردستانێ هنێرن یان نە و مافێن هەرێما كوردستانێ هێنە بجهئینان یان نە.
مە باوەری ب فیدرالییەتا ئیراقێ هەبوو و مە باوەرییا ب دیموكراسییەتێ هەی و مە باوەری ب وان كەسان هەبوو یێن مە باوەری پێ ئینای و حوكمڕانی كەفتییە د دەستی دا بۆ وێ چەندێ ئەو ببنە وەكیلێن مە و پارێزڤانیێ ل مافێن مە بكەن، بەلێ دەمێ ئەم دبینین خەلكەك ئەمانەتا خوە بجه نائینیت و پارێزڤانیێ ل مافێن كوردستانێ ناكەت مە چو رێ نامینن ژبلی كو ئەم ب خوە بچینە بەغدا و ئەم ب خوە پارێزڤانیێ ل مافێن خوە بكەین. ڤێجارێ بەربژارێن مە دێ چنە وێرێ بۆ بەرگریێ ژ هەموو مافێن مە یێن دەستووری كو هەموو وەك خوە بهێنە بجهئینان.
بۆ وێ چەندێ پەیاما مە ل بەغدا یا ب هێز بیت و هەبوونا مە یا ب هێز بیت ئەم پێدڤی ب دەنگ و پشتەڤانی و باوەرییا هەوەینە، دەمێ هوون باوەرییا خوە بدەنە مە بۆ هەوە ژی یا رۆهنە دێ مە ژێ پێچێبیت خزمەتكارێن هەوە بین و باوەرییا هەوە دایە مە جارەكادی بۆ خزمەتكرنا وەلاتێ خوە بكاربینین ڤە.
جارەكادی داخوازێ ژ هەوە هەموویان دكەم، ئەم و كەسوكار و نیاسێن خوە، بچینە سەر سندووقێن دەنگدانێ و هێوزا پارتی نیشا هەموو ئالییەكی بدەین، لیستا 275 یا پارتی دیموكراتی كوردستان سەربێخین، نوونەرێن خوە بهنێرینە بەغدا، چاڤەڕێی پێشكەفتنێن زێدەتر بین.