ئه‌ڤرۆ نیوز ، زنار تۆڤى:
یه‌لده شیبه یه‌لده، وه‌لاتیه‌كێ مه‌سیحیه و ئه‌ڤه ده‌مێ 57 سالانه بێى ڤه‌قه‌تیان كارێ مۆختاریێ دكه‌ت و نوكه د ژیێ 82 سالیێ دایه و هه‌موو ژیێ خوه ل كانى ماسێ بوراندیه، د دیداره‌كێ دا بۆ ئه‌ڤرۆ نیوز دیار كر: ل سالا 1938 ل گوندێ كانى ماسێ، كو نوكه ناحیا كانى ماسێ یه یێ سه‌ر ب قه‌زا ئامێدیێ ڤه ژ دایك بوویه، ل سالا 1963 بۆ جارا ئێكێ بوویه مۆختارێ گوندێ كانى ماسێ، كو ل وى ده‌مى مووچێ مۆختارى 30 دینارێن عیراقى بوون، هه‌تا نوكه یێ ل سه‌ر كارێ خوه به‌رده‌وامه، هه‌روه‌سا ل وى ده‌مى ترۆمبێل نه دهاتنه كانى ماسێ، له‌وما ب ده‌واران ئه‌و دچوونه ئامێدیێ و كارێن گوندیان برێڤه دبرن و كارێ وان هه‌موو ل سه‌ر پشتا ده‌واران بوو، هه‌روه‌سا وان سێڤ و متایێ خو یێ هشك ب ده‌واران دبر و ژ وێڤه بۆ خوه ئه‌رزاق ژ ئامێدیێ د ئینا.
ناڤهاتى زێده‌تر گۆت: د به‌رێ دا خه‌لكێ بۆ خوه كارێ جۆتیاریێ شڤانیێ دكر و خه‌لكێ داهاتیێ خوه ب ده‌ستێن خوه په‌یدا دكر، لێن وكه خه‌لكێ مه كار ناكه‌ت و هه‌موو یێن ماینه ب هیڤیا مووچه‌ى ڤه، دیسان د به‌رێ دا پرانیا خه‌لكێ ڤێ ده‌ڤه‌رێ په‌ز و ده‌وار هه‌بوون، جۆت و كێلان ب گایان و ده‌واران دكر، هه‌روه‌سا ژبه‌ر بوردومانكرنا فرۆكان وان كارێ خوه ب شه‌ڤێ دكر و ب رۆژێ ژى وان خوه ل شكه‌فتان دڤه‌شارت.
یه‌لده هێشتا دبێژیت:هه‌ر د به‌رێدا په‌یوه‌ندیێن مه‌سیحى و موسلمانان ل كانى ماسێ گه‌له‌ك د خۆشن، باب و باپیرێن وان پێكڤه مه‌زن بووینه، هه‌ردو پێكڤه پشكداریێ د جه‌ژن و هه‌لكه‌فتێن ئێك دا دكه‌ن، چو جۆداهى دناڤبه‌را وان دا نینه، هه‌روه‌سا ل شۆره‌شا ئیلۆنێ ژى پێشمه‌رگه بوویه، دیسان پشتى سالا 1975 جاده هاتیه كانى ماسێ و ل وى ده‌مى ترۆمبێل ژى هاتینه ناحیا كانى ماسێ.
نيشاندان
