ئەڤرۆ نیوز، زنار تۆڤی:
ژ ئەنجامێ باینا بەفرێ ل سەنتەرێ ناحیا کانی ماسێ رێژەکا باش یا بەفرێ باریە و نوکە ژی بەفر بەردەوام یا دباریت.
شڤێدی پێلەکا دی یا بەفرێ ناحیا کانی ماسێ و گوندێن دەوروبەر ڤەگرتینە و د ئەنجامدا ل سەنتەرێ ناحیا کانی ماسێ پتری 10 سم بەفرێ بارینە و ل کۆمەلگەها دەروازێ نێڤدەولەتی یێ سەرزێری پتر ژ ڤێ رێژێ باریە و نوکە ژی بەفر بەردەوام یا دباریت.
هەروەسا د ئەڤ سالە دا ئەڤە جارا چارێ یە ل ڤێ دەڤەرێ بەفر دباریت.
ئەڤرۆ نیوز، زنار تۆڤی:
ب شێوەکێ نەچاڤەرێکری، ڤلادیمێر پوتین پێشنیازا راستڤەکرنا دستۆرێ رووسیا دکەت، ب رەنگەکێ دەرفەتا هندێ پێ ددەت کو د پۆستێ خوە دا بمینیت.
دوهی ڤلادیمێر پوتینی سەرۆكێ رووسیا ب شێوەکێ نەچاڤەرێکری پێشنیازا گوهۆرینا دستۆری كر، شارەزا دبێژن، ئەڤا پوتینی ل بەرە بکەت ئامادەكاریە بۆ سالا 2024 هەتا دوبارە ببیتە سەرۆكێ رووسیا.
نوکە پوتین د ژیێ 67 سالیێ دایە، لدووڤ دستۆری نابیت خوە كاندید بكەت، بەلێ وی پێشنیار كریە ئەگەر هەیە دەستكاریێ د وی مادێ دستۆری دا بكەن.
ڤلادیمێر پوتین ل سالا 1999 دەستهەلات گرتیە دەست، د ڤی دەمی دا دو جاران بوویە سەرۆك وەزیر و دو جاران ژی سەرۆكێ رووسیا.
ئەو خالێن کو پوتینی دەست نیشان كرین، کو بهێنە راستڤە کرن، پشتی پەسەندكرنا وان ژ لایێ پەرلەمانیڤە، دڤێت راپرسی ل سەر بهێتە کرن ژ ئالیێ وەلاتیان ڤە و دەنگی پێ بدەن.
هەکە لدووڤ دستۆرێ رووسیا بیت، د هەلبژارتنێن سەرۆكاتیا رووسیا دا ل سالا 2024 ب ئەگەرێ مەزن بوونا ژیێ وی و هەم ژی ب ئەگەرێ کو دو جاران بوویە سەرۆكێ وەلاتی، بۆ وی نینە خوە كاندید بكەت.
ئەڤرۆ نیوز:
پەیڤدارێ كۆمسیۆنا ئێکەتیا ئورۆپا، پیته‌ر ستانۆ هه‌موو ئه‌و ده‌نگۆیە ره‌تكرن، یێن گو گوتین ب ئەگەرێ گرژیێن ڤێ دوماهیێ وان ل بەرە عیراقێ بجهبهێلن و گوت ژی ئێکەتیا ئورۆپا چ جاران عیراقێ ب تنێ بجهناهێلێت و دێ به‌رده‌وام بن ل سەر هاریكاریێن خوە بۆ گه‌لێ عیراقێ.
هه‌روه‌سا گوتیە ئەو یێ بزاڤێ دکەن، بۆ ب هێزکرنا په‌یوه‌ندیێن خوە ل گه‌ل عیراقێ.
هه‌روەسا دوهی وه‌زیرێ دهرڤە یێ ئه‌لمانیا، هایكۆ ماس، راگه‌هاند، سه‌رۆك وه‌زیرێ كاربرێكه‌ر یێ عیراقێ، عادل عه‌بدولمه‌هدی گوتیە وان، به‌غدا دخوازیت سه‌رباز و راوێژكارێن ئه‌لمانیا ل عیراقێ بمینن.
ئەڤرۆ نیوز:
محه‌مه‌د عه‌لی حه‌كیم وه‌زیرێ دهرڤە یێ عیراقێ ل تۆرا جڤاکی یا توویته‌رێ بەلاڤە کریە، د چه‌ند رۆژێن داهاتیدا ئه‌یمه‌ن سه‌فدی وه‌زیرێ دهرڤە یێ ئوردنێ دێ سه‌رەدانا به‌غدا کەت.
گوتیە ژی: ناڤهاتی دێ نامه‌کا عه‌بدولایێ دویل شاهێ ئوردنێ دێ ل گەل خوە ئینیتە عیراقی و دێ ل گەل به‌رپرسێن بلند یێن عیراقێ كۆم بیت.
ئەڤرۆ نیوز، عەلی حاجی :
گەنجەکێ زاخۆ د ژیێ دناڤبەرا ۲۰ ـ ۲۲ سالیێ دا د روودانەکا تەقەکرنێ دا دایک و برایێن خوە کوشتن و ژ ئەگەرێ برینا وی یا کوور گیانێ خوە ژ دەستدا.
ئەمیر عەلی بەرپرسێ راگەهاندنا ساخلەمیا زاخۆ بۆ ئەڤرۆ نیوز گوت :پشتی د وێ روودانێ دا وی گەنجی تەقە ل دایک و برایێن خوە و هێزێن ئەمنی کرین و پشتی ئەو گەنجە ب برینداری کەفتیە دەستێ هێزێن ئەمنی دا و هاتیە رەوانەکرن بۆ نەخوشخانا هەوار هاتنێ ل زاخۆ ژبەر برینا وی یا کوور ئەو کەسێ بریندار ب مەرەما رەوانەکرنێ بۆ نەخۆشخانا دهۆکێ، بەلێ بەری بگەهیتە نەخۆشخانا دهۆکێ گیانێ خوە ژ دەستدا و ب ڤێ چەندێ زیانێن گیانی د وێ روودانێ دا گەهشتنە سێ کەسان کەسەک ژی بریندار بوویە.
ئەڤرۆ نیوز:
مه‌سرور بارزانی، سه‌رۆكێ حكومه‌تا هه‌رێما كوردستانێ، ب بوونا په‌سندكرنا قانوونا چاكسازیێ ل په‌رله‌مانێ كوردستانێ، په‌یامەک بەلاڤکر.
ده‌قێ پەیاما سەرۆکێ حوکمەتا هەرێمێ:
دەستخۆشیێ ل پەرلەمانێ کوردستانێ دکەم بۆ پەسەند کرنا پڕۆژە قانوونا چاکسازیێ، ئەڤە پێنگاڤەکا مێژوویە بەرەف کوردستانەکا ب هێزتر، ئەڤ پرۆژە پشکەکا گرنگ یا کارناما کابینا نەهێ یا حکومەتا هەرێما کوردستانێ بوو، بۆ بەرسڤدانا خواست و،داخوازیا وەلاتیێن هەرێما کوردستانێ بۆ ئەنجامدانا چاکسازیێ، ئامانج ژێ رێکخستنا خەرجیێن گشتییە و ئینانا دادپەروەریێ یە بۆ فەرمانبەران و کەسوکارێن سەربلند یێن شەهیدان و پێشمەرگێن قارەمانە.
پشتی پێکئینانا کابینا نەهێ یا حکومەتا هەرێما کوردستانێ ل تەمۆزا سالا بوری ، مە دەستبجهـ لژنەکا بلند ژ حکومەتێ پێکئینا بۆ پێداچوون و ب هێزکرنا رەشنڤیسێ پرۆژە قانوونا چاکسازیێ.
وەلاتیان دلنیا دکەین کو دەقێ دوماهیا ڤێ قانوونێ دلنیایا گرنگ تێدایە سەبارەت مووچەی و ئیمتیازێن فەرمانبەر و مووچەخۆران ب جۆرەکێ کو کەسێن شایستە دێ مافێن وان یێ پاراستی بیت.
چاکسازی پرۆسەکا بەردەوامە و دێ گشت کەرتان ڤەگریت، ئەڤ قانوونە بەلگەکێ روونێ دیترە ل سەر پابەندبوونا حکومەتا هەرێما کوردستانێ بۆ سنۆردانانا گەندەلیێ و بزاڤکرن بۆ بنبرکرنێ، هەروەسا پێنگاڤەکا گرنگە ژی بەرەف حکومەتەکا مۆدێرن و شەفاف و باشترکرنا خزمەتکاریان و خزمەتکرنا وەلاتیێن هەرێما کوردستانێ بێی جۆداهی کو ئارمانجا سەرەکی یا ڤێ حوکمەتێ یە.
مەسرور بارزانی
سەرۆکێ حوکمەتا هەرێما کوردستانێ
2020/1/16
ئەڤرۆ نیوز:
ل سپێدەهیا رۆژا شەمبی 11-1-2020 بەلەمەک ب 50 سەرنشینان ڤە د دەریا ئایۆنی دا ل نێزیک دورگەیا پاکسوسا یۆنانێ ژێر ئاڤ ببوون، کو پشکەک ژ وان وەلاتیێن هەرێما کوردستانێ بوون، حوکمەتا هەرێما کوردستانێ سەرەرای هەڤخەمیا خوە بۆ کەسوکارێن وان دیار کریە، دێ هەموو هاریکاری و کارئاسانیێ بۆ ڤەگه‌راندنا ته‌رمێن قوربانیان کەن.
دەقێ راگەهاندنا حوکمەتا هەرێما کوردستانێ:
د چه‌ند رۆژێن بوری دا، ب ئەگەرێ نقوومبوونا به‌له‌مەکێ دناڤبەرا تورکیا و یۆنانێ دا، ب داخڤە هژماره‌کا كه‌سان بوونه قوربانی، كو هندەک وەلاتیێن هه‌رێما كوردستانێ ژی تێدابوون.
دوهی رێزدار مەسرور بارزانی سه‌رۆكێ حوکمه‌تا هه‌رێما كوردستانێ د كۆمبوونا جڤاتا وه‌زیران دا، سەرەرای ده‌ربرینا هەڤخەمیا خوە ل گەل بنەمال و کەسوکارێن قوربانیان، دەزگەهێن حوکمەتێ ژی راسپاردینە کو هەموو هاریکاری و کارئاسانیان بکەن بۆ ڤەگه‌راندنا ته‌رمێن قوربانیان بۆ هه‌رێما كوردستانێ.
جوتیار عادل
پەیڤدارێ حوکمه‌تا هه‌رێما كوردستانێ
٢٠٢٠/١/١٦
ئەڤرۆ نیوز:
پشتی بۆ دەمەکێ ژ راگرتنا كار و چالاكیان، ئەڤرۆ پێنجشەمبی دێ پرۆسا سەربازی یا ئەمریكا ل عیراقێ دەست پێ کەتەڤە، کو ب ئەگەرێ كوشتنا قاسم سلێمانی ئەمریکا هەموو چالاکیێن خوە ل عراقێ راگرتبوون.
رۆژناما نیویۆرک تایمز یا ئەمریکی ژ ژێدەرەکێ سه‌ربازی بەلاڤە کریە، پشتی (10) رۆژان ژ راگرتنێ و ب ئەگەرێ کوشتنا قاسم سلێمانی و ئەبو مەهدی موهەندس، سوپایێ ئەمریکا پرۆسا سەربازی ل گەل سوپایێ عیراقێ دەست پێ کرەڤە.
وێ رۆژنامێ گۆتیە: ئەمریکا یا رژدە ل سەر بەردەوامیدانێ بۆ روو ب روو بوونا داعشێ و دەرفەت نەدان ب وێ رێکخراوێ بۆ دوبارە خوە رێکخستنێ.
ئه‌ڤرۆ نیوز، زنار تۆڤى:
وه‌لاتیه‌ك رابوویه ب دروستكرنا هنده‌ك سندۆقێن دارى ژ بۆ گیانه‌وه‌رێن كیڤى داكو ل وه‌رزێ زڤستانێ خوه ژ سه‌رمایێ بپارێزن و ل گه‌ل هندێ خوارنێ ژى دده‌ته گیانه‌وه‌رێن كیڤى.
ئه‌ندازیار و وێنه‌گر عسمه‌ت مایى ئێكه ژ وان كه‌سان كو گه‌له‌ك خزمه‌تا گیانه‌وه‌رێن كیڤى دكه‌ت، د دیداره‌كێ دا بۆ ئه‌ڤرۆ نیوز دیار كر: ل وه‌رزێ زڤستانێ ئه‌و كۆمه‌كا سندۆقێن دارى ل ناڤا ئاقارى و ده‌ردورا گوندێ مایێ ل ده‌ڤه‌را به‌روارى بالا د دانیت، داكو گیانه‌وه‌رێن كیڤى یێن وه‌كو سڤۆران و چیچكان و جۆرێن دیتر یێن گیانه‌وه‌ران و دچنه دناڤا وان سندۆقان دا و خوه ژ سه‌رما زڤستانێ دپارێزن، ئه‌ڤه چه‌ندسن ساله ل وه‌رزێ زڤستانێ ئه‌و ڤى كارى ئه‌نجام دده‌ت، د هه‌مان ده‌م دا ئه‌و خوارنێ ژى د ده‌ته وان گیانه‌وه‌ران، پرانیا جاران ئه‌و كاكلێن گویزان و نانى و گه‌نمى دكه‌ته د وان سندۆقان دا، داكو ل ده‌مێ بارینا به‌فرێ ئه‌و گیانه‌وه‌ره وێ خوارنێ بخۆن.
ناڤهاتى زێده‌تر دبێژیت: ئه‌و گه‌له‌ك یێ دلخۆشه ب چێكرنا وان سندۆقان بۆ گیانه‌وه‌رێن كیڤى و وى ب خوه ئه‌و سندۆقه چێكرینه، وى ل به‌ره هنرده‌م حڤمه‌تا گیانه‌وه‌رێن كیڤى بكه‌ت و ئه‌و ڤێ چه‌ندێ ب ئه‌ركێ خوه دزانیت، وى دڤێت خه‌لكێ مه ژى هه‌رده‌م گیانه‌وه‌ران بپارێزن، چونكى ئه‌و گیانه‌وه‌ره جوانیه‌كا تایبه‌ت دده‌نه ژینگه‌ها مه.
نيشاندان