ئه‌ڤرۆ نيوز:

ئێڤاريا ئه‌ڤرۆ ئێكشه‌مبى 13/10/2019 سه‌رۆكێ ئه‌مريكى دونالد ترامپ د به‌رپه‌رێ خوه‌ ل سه‌ر تۆرا جڤاكى يا تويته‌رى به‌لاڤكر كو ل گه‌ل سيناتۆر ليندسى گراهام و چه‌ند ئه‌ندامێن دى يێ كۆنگرێسێ ئه‌مريكى، ب ديموكراتيان ژى ڤه‌، مژوولى به‌حسكرنا سه‌پاندنا سزايه‌كێ گران ل سه‌ر توركيا نه‌.

ترامپى دياركر ژى” ئه‌ز يێ ل سه‌ر هێلێ بۆ به‌حسكرنا ده‌ركرنا بريارا دۆرپێچه‌كا گران ل سه‌ر توركيا، وه‌زاره‌تا گه‌نجينێ يا به‌رهه‌ڤه‌ بۆ ڤێ چه‌ندێ، لايه‌نێن قانوون دانانێ يێن دى ژى دبيت پێدڤى بكه‌ت ئه‌وژى بهێنه‌ سه‌ر هێلێ، ل سه‌ر ڤى بابه‌تى كوده‌نگيه‌كا باش يا هه‌ى، توركيا داخواز كريه‌ كو كاره‌كێ ب ڤى شێوه‌ى نه‌كه‌ين”  گۆت ژى “چاڤه‌رێ بن”.

ئه‌ڤرۆ نيوز:

ليندسى گراهام مه‌زنه‌ سيناتۆرێ كۆمارى ل كۆنگرێسێ ئه‌مريكى راگه‌هاند، ئه‌و هێرشێن توركيا ل باكوورێ سووريێ (رۆژئاڤايێ كوردستانێ) ئه‌نجام دده‌ت، تنێ مفا بۆ داعش، ئيران و رووسيا هه‌يه‌.

گراهام د زنجيره‌ تويته‌كێ دا، نووترين هه‌لويستێ خوه‌ ل دۆر ره‌وشا رۆژئاڤا به‌رچاڤكر و پێشوازى ل دووماهى داخۆيانيا دونالد ترامپ سه‌رۆكێ ئه‌مريكا دكه‌ت، كو بۆ سه‌پاندنا سزايان ل سه‌ر توركيا، كارى ل گه‌ل كۆنگرێسى دكه‌ت.

گۆت ژى” سه‌رۆك ترامپ برياره‌كا باش دايه‌ بۆ كاركرنێ ل گه‌ل كۆنگرێسى بۆ سه‌پاندنا سزايان ل سه‌ر توركيا ژبه‌ر هێرش و داگيركارى و تاوانێن شه‌رى كو ل سووريێ ئه‌نجام دده‌ت”.

ل دۆر سزايێن چاڤه‌رێكرى ل سه‌ر توركيا، دبێژيت” ره‌شنڤيسێ سزايان ل سه‌ر ئاستێ هه‌ردو پارتێن كۆمارى و ديموكراتى پشته‌ڤانيا باش لێ دهێته‌ كرن”.

خوياكر ژى”پێدڤيه‌ رێ ب وێ چه‌ندێ نه‌ده‌ين هێرشێن توركيا ببنه‌ ئه‌گه‌رێ شكاندنا هه‌ڤپه‌يمانه‌كێ بهادار وه‌كو كوردان و نه‌بيته‌ ئه‌گه‌رێ دووباره‌ په‌يدابوونا داعشێ”.

ئه‌ڤرۆ نيوز:

د شه‌ر و پێكدانان و بۆردۆمانێن سه‌رێ كانيێ ل رۆژئاڤايێ كوردستانێ هه‌تا دره‌نگيا شه‌ڤا بۆرى د به‌رده‌وامبوون و سپێده‌هيا ئه‌ڤرۆ ژى دووباره‌ ده‌ست پێ كريه‌ڤه‌.

ميدايێن هێزێن سوريا ديموكرات (هه‌سه‌ده‌) راگه‌هاند، دره‌نگى شه‌ڤا بۆرى (شه‌مبى 12-10-2019) توركيا و چه‌كدارێن ئۆپۆزسيۆنا سوريا كو توركيا پشته‌ڤانيا وان دكه‌ت، ل ده‌ڤه‌را پێشه‌سازى ل سه‌رێ كانيێ هێرشه‌كا به‌رفره‌هـ ده‌ست پێ كريه‌. شه‌رڤانێن هه‌سه‌دێ به‌رسينگێ هێرشێ داينه‌ و سه‌ر و پێكدادانێن دژوار د ناڤبه‌را وان دا روودايه‌.

توركيا ل گه‌ل ده‌ستپێكا هێرشێ ل چارشه‌مبيا بوورى ل ئۆپه‌راسيۆنا كانيا ئاشيێ، سه‌رێ كانيێ بۆردۆمان دكه‌ت و “ژ ئه‌گه‌رێ به‌رسينگگرتنا هێزا شه‌رڤانان، فرۆكێن شه‌رى يێ سۆپايێ توركيا ب سه‌ر ده‌ڤه‌رێ دا د گه‌ريێن و ده‌ڤه‌را وان بۆردۆمان دكه‌ن”.

ئه‌ڤرۆ نيوز:

كه‌نالێ سێ ئێن ئێن يێ ئه‌مريكى ل دۆر هێرشا توركيا بۆ سه‌ر باكوورێ سووريێ (رۆژئاڤايێ كوردستانێ) ل سه‌ر زارێ به‌رپرسه‌كێ ئه‌مريكى ڤه‌گوهاست ” توركيا پێگيرى وى سنوورى نابيت يێ بۆ هاتيه‌ دياركرن”.

وى كه‌نالى ژ وى به‌رپرسێ ئه‌مريكى، بێ كو ناڤێ وى ئاشكرا بكه‌ت،  ڤه‌گوهاست ژى” توركيا پلان يا هه‌ى هه‌تا سنوورى عيراقێ كونترۆل بكه‌ت”.

 وى به‌رپرسێ ئه‌مريكى گۆت ژى” توركيا دێ هێرشێن خوه‌ بۆ سه‌ر باكوورێ سووريێ به‌رفره‌هتر لێكه‌ت”.

ئه‌ڤرۆ نيوز:

سه‌رۆك مه‌سعود بارزانى ئه‌ڤرۆ شه‌مبيێ 12/10/2019 پێشوازى ل شێخ ( ئه‌حمه‌د عاسى ئه‌لجه‌ربا) سه‌رۆكێ ره‌وتێ غه‌د يێ سوورى و شانده‌كێ د گه‌لدا كر.

د ديداره‌كێ دا ره‌وشا سياسى يا سووريێ و دووماهى پێشهاتێن رۆژئاڤا كوردستانێ هاته‌ به‌حسكرن.

هه‌ر د وێ كۆمبوونێ دا سه‌رۆك بارزانى نێگه‌رانيا خوه‌ ل دۆر چاره‌نڤيسێ گه‌لێ كورد ل سووريێ و ئاواره‌بوونا خه‌لكى و كاره‌سات و نه‌هاه‌تيا زێده‌تر بۆ گه‌لێ كورد ل سووريێ بۆ شاندێ مێهڤان به‌رچاڤكر.

ئه‌ڤرۆ نيوز:

ئه‌ميندارێ گشتيێ كۆمكارا عه‌ره‌بى ئه‌حمه‌د ئه‌بولغيت هه‌لويستێ خوه‌ يێ توند به‌رامبه‌ر هێرشا توركيا بۆ سه‌ر رۆژئاڤايێ كوردستانێ ده‌ربرى و داخواز ژ توركيا كر، هێرشا خوه‌ بۆ سه‌ر باكوورێ رۆژهه‌لاتا سووريێ ب راوه‌ستينيت، هوشدارى ژى دا كو توركيا دخوازيت نه‌ژادێ كوردان نه‌هێليت و ديموگرافيا ده‌ڤه‌رێ ب گوهۆريت.

ئه‌بولغيت ئه‌ڤرۆ شه‌مبيێ 12/10/2019 د گۆتاره‌كێ دا ل كۆمبوونا ب له‌ز يا كۆمكارا عه‌ره‌بى كو ل قاهيره‌ تايبه‌ت ل دۆر هێرشا توركيا بۆ سه‌ر باكوورێ رۆژهه‌لاتا سووريێ ب رێڤه‌چوو، راگه‌هاند” مه‌ترسيا نه‌هێلانا كوردان ل سووريێ ژ لايێ توركيا ڤه‌ يا هه‌ى”. داخواز ژ ئه‌نقه‌ره‌ ژى كر هێرشا خوه‌ ب راوه‌ستينيت.

گۆت ژى” ئه‌و هێرشا توركيا دێ كاره‌ساتێن مه‌زن بۆ ده‌ڤه‌رێ ل دووڤ خوه‌ ئينيت و گه‌فه‌كا مه‌زنه‌ بۆ نه‌هێلانا كوردان و ئاكنجيكرنا په‌نابه‌ران ل جهێن وان وگوهۆرينا ديموگرافيا ده‌ڤه‌رێ، هه‌روه‌سا په‌يدابوونا رێكخراوێن تيرۆرستى يێن نوو ب تايبه‌ت ل ده‌ڤه‌رێن رۆژهه‌لاتا فوراتێ، كو ژ لايێ توركيا ڤه‌ بووينه‌ ئارمانج و 7 زيندانێن مه‌زن يێن لێ هه‌ين و ب هزاران چه‌كدارێن زيندانكريێن داعشێ د وان زيندانان دانه‌”.

دياركر” 12 هزار چه‌كدارێن داعشێ يێن د زيندانێن باكوورێ سووريێ دا هه‌ين”. به‌رپرسياره‌تيا ئه‌نجامێن ڤێ ره‌وشى ژى خستنه‌ ستوويێ توركيا.

ئه‌ڤرۆ نيوز:

وه‌زاره‌تا خواندنا بلند و ڤه‌كۆلينێن زانستى ل هه‌رێما كوردستانێ د رۆهنكرنه‌كێ دا ده‌مێ ( تۆماركرنا سكالان) و (دابه‌زين) و (گوهۆرينا جهى) بۆ ده‌رچوويێن 12 ئاماده‌يى درێژ دكه‌ت.

عه‌باس ئه‌كره‌م، په‌يڤدارێ وه‌زاره‌تا خواندنا بلند و ڤه‌كۆلينێن زانستى ئه‌ڤرۆ شه‌مبيێ 12/10/2019 راگه‌هاند”  پێشكێشكرنا سكالايان بۆ ده‌رچوويێن 12 ئاماده‌يى بۆ ده‌مێ 48 ده‌مژمێران هاته‌ درێژكرن، ئانكو هه‌تا ده‌مژمێر 12 شه‌ڤا دوشه‌مبى 14/10/2019 و تۆماركرنا سكالايان ب شێوێ ئۆنلاين ل ويب سايتێ  (www.regayzanko.com) دێ بەردەوام بيت”.

دياركر ژى” (دابه‌زين) و (گوهۆرينا جهى) هه‌تا دووماهيا ڤێ حه‌فتيێ دێ به‌رده‌وام بيت، ئانكو هه‌تا دووماهيا ده‌واما فه‌رمى ل رۆژا پێنجشه‌مبيا داهاتى كو پرۆسا دابه‌زين و گوهۆرينا جهى د ناڤبه‌را تۆمارا زانكۆيان ب خوه‌ دا دێ هێنه‌ ئه‌نجامدان”.