ئه‌ڤرۆ نيوز:

فرۆكێن توركى ئه‌ڤرۆ چارشه‌مبى 5/6/2019  گوند وده‌ڤه‌رێن گه‌ليێ شێخزادان ل باژێركێ سيده‌كان بوردومان كر وسێ وه‌لاتى ب دژوارى بريندار بوون.

ئێك ژ وان برينداران ب ناڤێ مهاجر خه‌ليل د داخۆيانيه‌كا رۆژنامه‌ڤانى دا گۆت” ل سثێده‌يا ئه‌ڤرۆ دو فرۆكێن توركى بوردومانا سنورێ گوندێ وان ( مێرگه‌ره‌شێ) كر ود ئه‌نجامدا ئاگر به‌ربوو پۆش وپاوانى وب مه‌ره‌ما كونترۆلكرنا ئاگرى چوونه‌ جهێ بوردومانێ وهه‌ر وى ده‌مى جاره‌كادى بوردومانا ده‌ڤه‌رێ هات كرن وئه‌و بوونه‌ ئارمانج”.

گۆت ژى”ل ده‌مێ بوردومانێ ده‌نگێ چه‌كدارێن په‌كه‌كێ ل وان دول وچيايان دهات وژ به‌ر فرۆكان دره‌ڤين، به‌لێ د ئه‌نجامێ بوردومانێ دا ئه‌ز وبرايه‌كێ من وپسمامه‌كێ من بريندار بووين كو برينێن وان د دژوارن”.

بريندارێن وێ بوردومانێ ب ناڤێن (خوشه‌ڤى ميكائيل، مهاجر ميكائيل، جابر خه‌ليل سلێمان) هه‌رسێ پێشمه‌رگێن هێزا سيده‌كانن سه‌ر ب يه‌كه‌يا 80 ونوكه‌ ل نه‌خوه‌شخانا ئاشتى ل سۆران چاره‌سه‌ريێ وه‌ردگرن.

ئه‌ڤرۆ نيوز:

ئه‌ڤرۆ چارشمبى 5/6/2019 ل رۆژا دويێ يا جه‌ژنا ره‌مه‌زانێ، سه‌رۆك مه‌سعود بارزانى ب مه‌ره‌ما پيرۆزكرنا جه‌ژنێ سه‌ره‌دانا هێزێن پێشمه‌رگه‌ى ل سه‌نگه‌رێن ميحوه‌رێ خازر كر.

ئه‌ڤرۆ نيوز:

نڤيسينگه‌ها راگه‌هاندنا باره‌گايێ بارزانى ل دۆر پێشنيازا دياركرنا فه‌ره‌يدوون عه‌بدولقادر بۆ پارێزگارێ كه‌ركووكێ وئه‌و شاشيا تێگه‌هشتنێ ل سه‌ر وێ پرسێ  ل ده‌ف ئێكه‌تيێ دروستبووى، رۆهنكرنه‌ك ئاراسته‌ى رايا گشتى كر.

د وێ رۆهنكرنێ دا هاتيه‌،  رۆژا ئێكشه‌مبى 2/6/2019 نڤيسه‌ر ورۆژنامه‌ڤان عارف قوربانى ديدار ل گه‌ل سه‌رۆك بارزانى هه‌بوو وبيرورا ل سه‌ر بابه‌تێ كه‌ركووكێ ودانانا پارێزگارێ وناڤئينانا فه‌ره‌يدوون عه‌بدولقادر هاته‌ ئالوگۆركرن، ل دووڤ ئاخڤتنێن عارف قوربانى خراب تێگه‌هشتنه‌ك ل سه‌ر وى بابه‌تى ل ده‌ف براده‌رێن ئێكه‌تيێ دروستبوو ول ده‌زگه‌هێن راگه‌هاندنێ دا خواندنا جۆراوجۆر بۆ ڤى بابه‌تى هاته‌ كرن، بۆ رۆهنتركرنا هه‌لويستێ سه‌رۆك بارزانى ژ پرسا پارێزگارێ كه‌ركووكێ وناڤئينانا فه‌ره‌يدوون عه‌بدولقادر ونه‌هێلانا هه‌ر جۆره‌ نه‌ هه‌ڤتێگه‌هشتنه‌كێ ب رايا گشتى يا كوردستانێ وهه‌موو لايه‌كى رادگه‌هينين:

1- رێككه‌فتنه‌كا گه‌له‌ك رۆهن د ناڤبه‌را پارتى ديموكراتى كوردستان وئێكه‌تى نيشتمانى كوردستان هاتيه‌ ئيمزاكرن كو رێككه‌فتن ل سه‌ر دانانا پارێزگاره‌كى بۆ كه‌ركووكێ هه‌ڤده‌م ل گه‌ل بزاڤێن پێكئينانا كابينا نوو يا حوكمه‌تا هه‌رێمێ ورێككه‌فتنا سه‌رۆك بارزانى وكوسره‌ت ره‌سول ل سه‌ر ناڤێ كه‌سه‌كى ببيته‌ بنه‌مايێ رێككه‌فتنا پارتى وئێكه‌تى ل سه‌ر به‌ربژاره‌كێ هه‌ڤپشك بۆ پۆستێ پارێزگارێ، ئه‌ڤێ ژى چو په‌يوه‌ندى ب هه‌لبژارتنا سه‌رۆكێ هه‌رێمێ نه‌بوو ويا ديار ژى نينه‌ چاوان خراب تێگه‌هشتنه‌ك ل ده‌ف براده‌رێن ئێكه‌تيێ ل سه‌ر وێ رێككه‌فتنه‌كێ دروست بوويه‌.

2- ناڤئينانا فه‌ره‌يدوون عه‌بدولقادر بۆ پۆستێ پارێزگارێ كه‌ركووكێ پشتى وێ چه‌ندێ هاتيه‌ كو ژلايێ كوسره‌ت ره‌سول ئه‌و داخوازيه‌ ژێ هاتيه‌ كرن، پشتى كو سه‌رۆك بارزانى وكوسره‌ت ره‌سول هاتينه‌ سه‌رپشككرن ژ دانانا كه‌سه‌كى بۆ پۆستێ پارێزگارێ كه‌ركووكێ وسه‌رۆك بارزانى زانيبوو كو كوسره‌تى داخواز ژ فه‌ره‌يدوون عه‌بدولقادر كريه‌ ببيته‌ پارێزگار، سه‌رۆك بارزانى ژى حه‌زكريه‌ كه‌سه‌كێ نيشتمانپه‌روه‌ر وه‌كو فه‌ره‌يدوون عه‌بدولقادر ببيته‌ پارێزگار وب په‌سه‌ند وهه‌ژى زانى يه‌، له‌وما فه‌رسه‌ت سۆفى راسپارديه‌ كو سه‌ره‌دانا كوسره‌تى بكه‌ت ورازيبوونا سه‌رۆك بارزانى ل سه‌ر وى ناڤێ پێ رابگه‌هينيت، ب ڤێ چه‌ندێ سه‌رۆك بارزانى وكوسره‌ت ره‌سول رازهى بوونه‌ ل سه‌ر ناڤێ فه‌ره‌يدوونى، له‌وما دووپاتى دكه‌ن كو فه‌ره‌يدوونى داخوازا  وى پۆستى نه‌كريه‌، به‌لكو كوسره‌ت وسه‌رۆك بارزانى بوون ل سه‌ر دانانا وى رێككه‌فتين، فه‌ره‌يدوون عه‌يدولقادرى ژى گوتبوو ناكه‌م چونكى ئه‌ركه‌كێ ب زه‌حمه‌ته‌ به‌لێ هه‌كه‌ هاتنا من ببيته‌ ئه‌گه‌رێ خزمه‌تا كه‌ركووكێ وچاره‌سه‌ركرنا كێشان، لارى بوون من نينه‌.

3- ژبه‌ر ره‌وشا نه‌ ئاسايى يا كه‌ركووكێ وپێدڤيا ئاساييكرنا ره‌وشا ئه‌منى وئيدارى يا باژێرى وخزمه‌تكرنا خه‌لكێ كه‌ركووكێ، پێدڤيه‌ پارێزگاره‌كێ ب هێز بهێته‌ دانان كو ژبلى پارتى وئێكه‌تيێ، جهێ رازيبوونا لايه‌نان وكورد وتوركمان وعه‌ره‌ب وپێكهاتان بيت ورێككه‌فتن ژى ل گه‌ل حوكمه‌تا عيراقێ هه‌بيت، چونكى ئه‌وێ دبيته‌ پارێزگارى وده‌ستهه‌لاتێن پێدڤى نه‌بن ورازيبوونا لايه‌نان ل سه‌ر نه‌بيت، نه‌شێت خومه‌تا خه‌لكێ كه‌ركووكێ بكه‌ت وره‌وشا كه‌ركووكێ ژى ئاسايى بكه‌ت.

ئه‌ڤرۆ نيوز:

سه‌رۆكێ هه‌لبژارتيێ هه‌رێما كوردستانێ نێچيرڤان بارزانى وبه‌رهه‌م سالح سه‌رۆك كۆمارا عيراقێ په‌يوه‌نديه‌كا ته‌له‌فۆنى ئه‌نجامدا وتێدا به‌رهه‌م سالح هاته‌ داخوازكرن ژلایێ نێچیرڤان بارزانى ڤه‌ بۆ به‌رهه‌ڤبوونێ د رێ وره‌سمێن سويند خواندنا وى دا وه‌كو سه‌رۆكێ هه‌رێما كوردستانێ.

ئه‌ڤرۆ نیوز:

سه‌رۆكێ لژنا بلند یا ئه‌زموونان ل وه‌زاره‌تا په‌روه‌ردێ ئه‌ڤرۆ دوشه‌مبى 3/6/2019 رۆهنكرنه‌ك بۆ هه‌موو قوتابیێن رێزا 12 ئاماده‌یى به‌لاڤكر.

كه‌ریم ئیسماعیل، سه‌رۆكێ لژنا بلند یا ئه‌زموونان ل وه‌زاره‌تا په‌روه‌ردێ به‌لاڤكر”ل دووڤ وان داتا وئامارێن ل به‌رده‌ستێ مه‌، ئاماژێ دكه‌ن كو ئه‌زموونێن وه‌زارى یێن ڤێ سالا خواندنێ 2018 – 2019 ل دووڤ پیڤه‌رێن په‌روه‌رده‌یى دهێنه‌ ئه‌نجامدان، ب جۆره‌كێ گه‌له‌ك باشتر ژ سالێن بۆرى، ل گه‌ل وان گوهۆرینێن د پرۆسێ دا هاتینه‌ ئه‌نجامدان”.

دیاركر ژى” ل دووڤ هه‌لسه‌نگاندنا مه‌، چو كێماسیێن دیار نینن كو ببنه‌ جهێ گرفتێ، هه‌كه‌ هه‌بیت ژى، ب پشت راستى ڤه‌ دێ ل ئه‌زموونێن داهتى هێنه‌ چاره‌سه‌ركرن”.

ئه‌ڤرۆ نیوز:

شیره‌تكارێ جڤاتا ئاسایشا هه‌رێما كوردستانێ، مه‌سرور بارزانى ئه‌ڤرۆ دوشه‌مبى 3/6/2019 ب هه‌لكه‌فتا جه‌ژنا ره‌مه‌زانێ، په‌یامه‌كا پیرۆزباهیێ به‌لاڤكر وتێدا دبێژیت، ئومێده‌وارم ئه‌ڤ جه‌ژنه‌ هانده‌ر بیت بۆ ب هێزكرنا پێكڤه‌ كاركرنێ ژبۆ كوردستانه‌كا ب هێز.

مه‌سرور بارزانى د په‌یاما خوه‌ دا گۆت” ب هه‌لكه‌فتا جه‌ژنا ره‌مه‌زانا پیرۆز، پیرۆزباهیێ ل كه‌سوكارێن سه‌ربلندێن شه‌هیدان وپێشمه‌رگێ قه‌هره‌مان وكارمه‌ندێن جڤاتا ئاسایش وهه‌موو ده‌زگه‌هێن ئه‌منى وپۆلیسان وموسلمانێن كوردستانێ وجیهانێ دكه‌م”.

گۆت ژى” زێده‌بارى ل به‌رچاڤ وه‌رگرتنا خه‌باتا به‌رده‌وام وقوربانیدانا گه‌لێ مه‌ بۆ گه‌هشتن ب ئارمانجێن خوه‌، ئومێده‌وارم ئه‌ڤ جه‌ژنه‌ هانده‌ره‌ك بیت بۆ ب هێزكرنا پێكڤه‌كاركرنێ ژبۆ كوردستانه‌كا ب هێز كو ل ئاستێ خواست وچاڤه‌رێ وپێشبینیێن وه‌لاتیێن كوردستانێ بیت”.