ئه‌ڤرۆ نیوز:
په‌یڤدارێ وه‌زاره‌تا ئه‌وقافێ وكاروبارێن ئاینى ل هه‌رێما كوردستانێ، نه‌به‌ز ئیسماعیل، راگه‌هاند، ل باژێرێ مه‌كه ل وه‌لاتێ سعودیێ عومره‌كاره‌كا كورد ب ناڤێ (زیبه حسێن محمه‌د) كو ژیێ وێ 77 سال بوون وخه‌لكێ گه‌رمیانه ژ ئه‌گه‌رێ روودانه‌كا هاتنوچوونێ ل جادا ( محبس الجن) ل باژێرێ مه‌كه، گیانێ خوه ژ ده‌ست دا.
گۆت ژى” پشتى ب دووماهى ئینانا پێرابوونێن قانوونى، ل گورستانا باژێرێ مه‌كه هاته ڤه‌شارتن”.
ئه‌ڤرۆ نيوز:
ئه‌مريكا هوشدارى دا هێلێن ئه‌سمانى يێ بازرگانى يێن ئه‌مريكى ل ده‌مێ فرينا فرۆكێن وان ل ئه‌سمانێ كه‌نداڤێ عه‌ره‌بى وعومانێ.
ژ ئه‌گه‌رێ گرژيا له‌شكرى وسياسى د ناڤبه‌را ئه‌مريكا وئيرانێ دا، فه‌رمانگه‌ها فرۆكه‌ڤانى يا فيدرالى يا ئه‌مريكى هوشدارى ژ مه‌ترسيا ئه‌منى دا كۆمپانيێن فرۆكه‌ڤانى ئه‌وێن گه‌شتێن ئه‌سمانى ل سه‌ر ئاڤا كه‌نداڤێ عه‌ره‌بى ل به‌سرا يا عيراقى ووه‌لاتێ عومانێ ئه‌نجام دده‌ن.
د راگه‌هاندنه‌كا فرۆكه‌ڤانيا فيدرالى يا ئه‌مريكى دا هاتيه” زێده‌بوونا ئالۆزيێن سياسى وچالاكيێن له‌شكرى ل ده‌ڤه‌رێ مه‌ترسيێ ل سه‌ر كاركرنا فرۆكێن مه‌ده‌نى په‌يدا دكه‌ت ودبيت ببيته ئه‌گه‌رێ ملمه‌لا خراب ل گه‌ل فرۆكێن ئه‌مريكى”.
ئەڤرۆ نیوز:
بریارە سوبەھی رۆژا ئێکشەمبی ١٩-٥-٢٠١٩ پەرلەمانێ کوردستانێ ناڤێ ئەوان بەربژێرێن خوە بۆ پوستێ سەرۆکاتیا ھەرێما کوردستانێ بەربژار کرین ئاشکرا کەت.
ئەندامەکا لژنا قانوونی یا پەرلەمانێ کوردستانێ دیارکر د روونشتنا سوبەھی یا پەرلەمانێ کوردستانێ دا ناڤێ بەربژێرێن پوستێ سەرۆکاتیا ھەرێما کوردستانێ دێ ھێنە راگەھاندن لێ ناڤێ ھەموو بەربژاران ناھێنە پەسەند کرن و دێ رێ دەنە وان کەسان بۆ ماوێ دو رۆژان تانێ ل بریارا نە پەسەندکرنا ناڤێن خوە کەت ل دادگەھا تێھەلچوونا ھەرێمێ دیسان پشتی ئەڤ چەندە دھێتە ئێکلاکرن د ماوێ سێ رۆژان دا دەستەیا سەرۆکاتیا پەرلەمانێ کوردستانێ دێ ژڤانەکی دەستنیشان کەت بۆ ھەلبژارتنا سەرۆکێ ھەرێمێ.
ل دووڤ راستڤەکرنا قانوونا سەرۆکاتیا ھەرێمێ دێ شێوازێ دەنگدانێ یێ ئاشکرا بیت و ئەو کەسێ بیتە سەرۆکێ ھەرێمێ پَێدڤیە ٥٦ دەنگێن پەرلەمانتاران دەستخوە ڤە بینت.
ئەڤرۆ نیوز:
حەفتیا بۆری جەبار یاوەر ئەمیندارێ گشتی یێ وەزارەتا پێشمەرگەی دیار کربوو کو ژ بەر رەوشا ئالۆز یا دەڤەرێ ئەمریکا و ئەلمانیا بریار داینە مەشقدانا ب پێشمەرگێ کوردستانێ رابگرن.
لێ ئەڤرۆکە وەزارەتا پێشمەرگەی راگەهاند کو مەشقدانا پێشمەرگێ کوردستانێ ژ ئالیێ هەڤپەیمانیا نێڤدەولەتی یا ل دژی داعشێ دێ جارەکا دی دەستپێکەتە ڤە و چو گوهۆرینەک د بەرنامێ کارێ وان یێ مەشقدانا ب هێزێن پێشمەرگێ کوردستانێ ژی نینە.
ئه‌ڤرۆ نیوز:
به‌رپرسه‌كێ عه‌شیره‌تێن عه‌ره‌ب یێن عیراقێ راگه‌هاند، ئه‌مریكا 50 هزار سه‌رباز ل عیراقێ یێن به‌لاڤكرین وئیرانێ ژى مووشه‌كێن بالیستى داینه حه‌شدا شه‌عبى ل عیراقێ.
مزاحم ئه‌حمه‌د حوێت، په‌یڤدارێ عه‌شیره‌تێن عه‌ره‌ب بۆ ئاژانسا (ئه‌نادۆل) یا ده‌نگوباسان گۆت” ئێرانێ چه‌كه‌كێ زۆر گه‌هاندیه حه‌شدا شه‌عبى ل عیراقێ ب مه‌ره‌ما ئارمانجگرتنا هێزێن ئه‌مریكى ل عیراقێ و د نوكه دا ئه‌مریكا زێده‌تر ژ 50 هزار سه‌رباز یێن ل سه‌ربازگه‌هێن عیراقێ جێگیركرین”.
حوێت گۆت ژى” مه پێزانینێن پشت راستكرى یێن هه‌ین كو ل چه‌ندرۆژێن داهاتى دا نێزیكى 100 هزار سه‌رباز وراوێژكارێن دى یێن ئه‌مریكى دێ هێنه هنارتن بۆ عیراقێ وئارمانج ژ كۆمكرن وجێگیركرنا سه‌ربازێن ئه‌مریكى هێرشكرنه ل سه‌ر ئیرانێ”.
گۆت ژى” ئه‌و هێزا ئه‌مریكى ب چه‌ك وكه‌ره‌سته‌كێ سه‌ربازى یێ زۆر ل عیراقێ هاتیه جێگیركرن، هه‌رچه‌نده عیراق وه‌سا خوه نیشان دده‌ت كو دێ یا بێلایه‌ن بیت د ململانێ وشه‌رێ د ناڤبه‌را ئیرانێ وئه‌مریكا دا، به‌لێ عیراق دێ پشكه‌كا مه‌زن بیت د هه‌ڤكێشێن له‌شكرى وسیاسى د ناڤبه‌را ئه‌مریكا وئیرانێ”.
دیاركر” ئیرانێ به‌رهه‌ڤیێن تمام یێن كرین بۆ ب ئارمانجگرتنا هێزێن ئه‌مریكى ل عیراقێ وبۆ ڤێ مه‌ره‌مێ ژى هژماره‌كا مه‌زن ژ مووشه‌كێن بالیستى یێن ئیرانى راده‌ستى حه‌شدا شه‌عبى ل عیراقێ كرینه تاكو بنكه وباره‌گایێن هێزێن ئه‌مریكى ل عیراقێ ببنه ئارمانجێن وان”.
ئاماژه‌كر” گه‌هاندن وبه‌لاڤكرنا مووشه‌كێن بالیستى وجۆرێن چه‌كى ژ ئیرانێ بۆ عیراقێ ب چاڤدێریا قاسم سلێمانى بوو كو نوكه ل عیراقێ یه ومژوولى ئێكخستنا ناڤمالا شیعى وحه‌شدا شه‌عبى یه دژى هه‌بوونا هێزێن ئه‌مریكى ل عیراقێ وبۆ ڤێ مه‌ره‌مێ ژى ئه‌و یێ د كۆمبوونێن به‌رده‌وام دا”.
خویاكر ژى” ئیران دخوازیت چه‌ند بنگه وباره‌گا وكاروانێن هێزێن ئه‌مریكى ل عیراقێ بكه‌ته ئارمانج، ب مه‌ره‌ما كێمكرنا فشار له‌شكرى یێن ئه‌مریكى ل سه‌ر ئیرانێ كو دبیت ببیته ده‌رگه‌هێ شه‌ره‌كێ مه‌زن وخویناوى د ناڤبه‌را وان هه‌ردو وه‌لاتان دا ئه‌ڤێ چه‌ندێ ژى دێ كاریگه‌ریا ئه‌رێنى ل سه‌ر عیراقێ هه‌بیت ودێ ده‌ڤه‌رێن سونه‌نشین زیاندار بن”.
ئه‌ڤرۆ نیوز:
ده‌ستهه‌لاتدارێن وه‌لاتێ هندستانێ بریاره‌كا فه‌رمى ل دۆر یاریا بۆپجى ده‌ركر كو هه‌ر كه‌سێ د ناڤ ئاخا وى وه‌لاتى دا یاریا بۆپجى بكه‌ت دێ هێته ده‌سته‌سه‌ركرن.
ل دووڤ مالپه‌رێ cnet، ژ ئه‌گه‌رێ كرنا یاریا بوپجى 26 كه‌س ل باژێرێن جودا جودا ل هندستانێ یێن هاتینه ده‌سته‌سه‌ركرن.
ئه‌و بریاره یا بوویه جهێ حێبه‌تیا وه‌لاتیێن هندستانێ وهه‌ڤده‌م ژى تیمه‌كا دامه‌زرێنه‌را وى یاریێ، ب مه‌ره‌ما زانینا سه‌رهلدانا قه‌یرانێ وچاره‌سه‌ریا وێ، سه‌ره‌دانا هندستانێ كریه.
ل دووڤ داخۆیانیێن ده‌ستهه‌لاتدارێن وه‌لاتێ هندستانێ، ئه‌و یاریه هاندانا توندوتیژیێ دكه‌ت، له‌وما یا هاتیه قه‌ده‌غه‌كرن.
ئه‌ڤرۆ نیوز:
په‌یڤدارێ حوكمه‌تا هه‌رێما كوردستانێ، سه‌فین دزه‌یى، راگه‌هاند سه‌رۆكێ هه‌رێما كوردستانێ د ده‌مێ خوه یێ دیاركرى دا دێ هێته هه‌لبژارتن وئاشكرا كر ژى كو دبیت پرۆسا ده‌ست بكاربوونا سه‌رۆكێ هه‌رێمێ گیروببیت.
سه‌فین دزه‌یى گۆت” ده‌مه‌كێ دیاركرى هه‌بوو كو 15 هه‌یڤێ دووماهى رۆژ بوو بۆ پێشكێشكرنا به‌ربژارێن سه‌رۆكاتیا هه‌رێما كوردستانێ وده‌مێ هه‌فتیه‌كێ پێداچوون ب ناڤان دێ هێته كرن، پاشى ل په‌رله‌مانى دێ ده‌نگ ل سه‌ر هێته دان وپاشى پرۆسا سویند خواندنا سه‌رۆكێ هه‌رێما كوردستانێ دێ ده‌ستپێكه‌ت ودبیت ده‌ست بكاربوونا سه‌رۆكێ هه‌رێمێ چه‌نده‌كێ گیرو ببیت”.
سه‌باره‌ت گاڤێن پێكئینانا كابینا نوو یا حوكمه‌تا هه‌رێما كوردستانێ ژى، سه‌فین دزه‌یى گۆت”پشتى ده‌ست بكاربوونا سه‌رۆكێ هه‌رێمێ، دێ سه‌رۆكێ هه‌رێمێ به‌ربژارێ ده‌ستنیشانكرى راسپێریت بۆ پێكئینانا كابینا نه‌هێ یا حوكمه‌تا هه‌رێما كوردستانێ وسه‌رۆكێ راسپاردى یێ حوكمه‌تێ 30 رۆژان یێ ل به‌رده‌ستێ وى بۆ پێكئینانا حوكمه‌تێ وب بۆچوونا مه ل ناڤه‌راستا هه‌یڤا شه‌ش دێ كابینا نوو یا حوكمه‌تێ هێته پێكئینان”.
ئه‌ڤرۆ نیوز:
د فه‌توایه‌كێ دا بۆ هه‌موو موسلمانێن هه‌رێما كوردستانێ، جڤاتا بلند یا فه‌توایێ ل هه‌رێما كوردستانێ، بازرگانیكرن هه‌ره‌مه‌كى دئێخیته لیستا بازرگانیا حه‌رام.
د وێ فه‌توایێ دا هاتیه” مامه‌لا بازرگانى یا هه‌ره‌مى ب گشتى ومامه‌له‌كرن ل گه‌ل هه‌ردو كۆمپانیێن فۆرئێڤه‌ر وكیۆنیت وهه‌ڤشێوێن وان ب تایبه‌تى ب هه‌موو شێوه‌كى حه‌رامه”.
ئەڤرۆ نیوز٬عەلی حاجی :
گەنجەکێ خه‌لكێ زاخۆ د ژیێ 33 سالیێ دا ئەڤرۆ ئەینیێ ۱۷/٥/۲۰۱۹خوە ژ سه‌ر پرا ده‌لال هاڤێت و هەتا نوکە لێگەریان ل لاشێ وی گەنجی یا بەردەوامە.
بێوار عبدولعەزیز، بەرپرسێ راگەهاندنا بەرەڤانیا باژێری ل پارێزگەها دهوکێ بۆ ئەڤرۆ نیوز دیار کر ئەڤرۆ تیمێن مە هاتنە ئاگەهدارکرن کو گەنجەک بناڤێ (کاروان جمغە حەیدەر) ل پرا دەلال دناڤ ئاڤا خابیری دا خەندقی یە؍ ب گورەی پێزانێن ل بەر دەستێن مە کو وی گەنجی ڤیایه دووماهیێ ب ژیانا خوه بینیت و خوە هاڤێتیه دناڤ ئاڤێ دا؍هەتا نوکە ژی تیمێن مە یێن نقومەڤانی بەردەوامن ل سەر لێگەریانێ ل لاشێ وی گەنجێ ژ دایكبوویێ 1986 و ب مخابنی ڤە هەتا نوکە ژی نەهاتیە دیتن .
زێدەتر گوت : ئەڤە دووەم روودانە ل باژێرێ زاخۆ رووددەت كو به‌رى ۲۰ رۆژان کچەکا ۱۹ سالی خوە ژ پرا خانی هاڤێت بوو و هەتا نوکە لاشێ وێ نەهاتیە دیتن و لێگەریان ژی ل سەر دیتنا لاشێ وان هەردو کەسان دێ یا بەردەوام بیت.
نيشاندان