ئه‌ڤرۆنیوز:
یانا هه‌ولێر ئه‌ڤرۆ دوشه‌مبى 25/2/2019 ل سه‌ر یاریگه‌ها خوه دچارچۆڤێ خۆلا عیراقێ یا یانێن پلا نایاب، سه‌ركه‌فتنه‌كا مه‌زن ب ئه‌نجامێ 4-0 ل سه‌ر یانا زه‌ورا تۆماركر.
گۆلین یانا هه‌ولێر ل خۆله‌كێن 58 و61 و79 و85 هاتن تۆماركرن.
ب ڤى ئه‌نجامى یانا هه‌ولێر ب 26 پێشڤه هاته رێزێ حه‌فتێ ل سه‌رێ رێزبه‌ندا خۆلێ ویانا زه‌ورا ب36 خالان ل رێزا چارێ دهێت.
ئەڤرۆ نیوز:
ئەڤرۆکە سەرۆک مەسعود بارزانی پێشوازی ل سەرۆکێ بەرێ یێ فرەنسا فرانسوا هۆلاند و شاندێ د گەل دا کر و د هەڤدیتنێ دا سەرۆک بارزانی راگەهاند کو سەرۆکێ بەرێ یێ فرەنسا د قۆناغەکا گەلەک دژوار دا کو ئەو ژی شەرێ ل دژی تیرۆرستان داعشێ بوو هاریکاریا کوردستانێ کریە و هۆلاند دوستەکێ نێزیکی گەلێ کوردستانێ یە و ئەم چو دەمەکێ هاریکاریێن هۆلاندی ژبیر ناکەین.
سەرۆک بارزانی هەروەسا دیار کر کو حوکمەت و گەلێ فرەنسا دوستێ نێزیکی گەلێ کوردستانێ نە و ئەم شانازیێ ب فرەنسا و گەلێ وێ دکەین.
سەرۆک مەسعود بارزانی ئەو یەک ژی دیار کر کو هەرچەندە سەرۆکێن فرەنسا بهێنە گوهۆرین ژی لێ هەموو دەمەکێ هەلویستێ فرەنسا ل هەمبەر گەلێ کوردستانێ باش بوویە و ئەو یەک ژی جهێ شانازیێ یە.
ئەڤرۆ نیوز:
ته‌رمێ ره‌وشه‌نبیر فه‌وزى ئه‌ترووشى ئه‌ڤرۆ سپێدێ ل گورستانا شاخكێ ل باژێرێ دهۆكێ ب ئاماده‌بوونا فه‌رهاد ئه‌مین ئه‌ترووشى پارێزگه‌رێ دهۆكێ و عەلى حسێن ئه‌ندامێ سه‌ركردایه‌تیا پارتى دیموكراتى كوردستان و جێگرێن پارێزگه‌رێ دهوكێ وچه‌ند به‌رپرسێن حكومى و جه‌ماوه‌رى د رێورەسمەکی دا هاته ڤه‌شارتن.
عەلى حسێن ئه‌ندامێ سه‌ركردایه‌تیا پارتى دیموكراتى كوردستان ب ناڤێ سه‌ركرداتیا پارتى و مه‌كته‌با سیاسى یا پارتى په‌یڤه‌ك پێشكێشكر وگوت: ئه‌ڤرو مه ئێك ژكادر ونیشتمان په‌روه‌رێن ملله‌تێ كورد وخه‌لكێ دهوكێ و هه‌موو كوردستانێ ژ ده‌ست دا ئه‌و ژى كاك فه‌وزى ئه‌ترووشى بوو، ره‌حمه‌تى ئێك ژكادرێن پارتى بو و ژ بنه‌ماڵه‌كا نیشتمان وكورد په‌روه‌ربوو وشوون دەستێن وان ل شوره‌شا ئه‌یلول وگولان و سەرھلدان وپشتى سەرھلدان ددیاربون.
هه‌روه‌سا گوت كاك فه‌وزى ده‌سته‌كێ نڤێسین وشعرێ یێ به‌رچاڤ هه‌بویه وگوتار ونڤێسین ل دور دوزا گه‌لێ كورد وئه‌زمونا هه‌رێما كوردستانێ دكوڤار وروژنامه‌یێن وه‌لاتێن عه‌ربى دا هه‌بوینه‌ن و ب ناڤێ پارتى دیموكراتى كوردستان ومه‌كته‌با سیاسى سه‌رخوشیێ ل بنه‌مالا ره‌حمه‌تى كرن وخواست خودێ جهێ ره‌حمه‌تى بكه‌ته به‌هه‌شتا به‌رین و سه‌بر وهه‌دارێ بده‌ته خێزان وبنه‌مالا وى.
پاش په‌یڤا بنه‌مالێ ژلایێ (لقمان عزیز میرزا)هاته خاندن تێدا سوپاسیا هه‌موو لایه‌نان كر یێن ل رێ ورسمێن ڤه‌شارتنا خودێ ژێ رازى ئاماده‌بوین.
خودێ ژێ رازى فه‌وزى ئه‌ترووشى بریكارێ وه‌زاره‌تا ره‌وشه‌نبیرى یا عیراقا فیدرال بوو ل سالا 1953 ل ناحیا ئه‌ترووش سه‌ر ب قه‌زا شێخان سه‌ر ب پارێزگه‌ها دهوكێ ژدایك بویه و ل روژا 24-2-2019ژئه‌گه‌رێ نه‌خوشییه‌كێ چویه به‌ردلوڤانیا خودێ.
ئەڤرۆ نیوز:
شیرەتکارێ جڤاتا ئاسایشا هەرێما کوردستانێ مەسرور بارزانی پێشوازی ل بالیۆزێ روسیا ل عیراقێ مەکسیم ماکسیۆڤ و شاندێ د گەل دا کر و د هەڤدیتنێ دا بەحسێ رەوشا دەڤەرێ ب گشتی و یا سووریێ و رۆژهەلاتێ فراتێ هاتە کرن و شیرەتکارێ جڤاتا ئاسایشا هەرێما کوردستانێ ژی راگەهاند کو دڤێت پرسا سووریێ ب رێیا سیاسی و ب پشکداریا نوونەرێن هەموو پێکهاتێن ل سووریێ بهێتە چارەکرن.
مەسرور بارزانی ئەو یەک ژی دیار کر کو دڤێت نوونەرێن کوردان ل سووریێ ژی د دانوستاندنان دا پشکدار بن و دڤێت مافێن گەلێ کورد ل سووریێ بهێنە گەرەنتیکرن.
هەروەسا بەحسێ رەوشا عیراقێ و پەیوەندیێن هەرێما کوردستانێ و بەغدا ژی هاتە کرن و مەسرور بارزانی راگەهاند کو هەرێما کوردستانێ دڤێت پەیوەندیێن خوە ل گەل بەغدا باشتر لێ بکەت و گۆت: (مە دڤێت ب رێیا دستووری هەموو ئاریشێن ل گەل بەغدا بهێنە چارەکرن).
ئه‌ڤرۆ نيوز، نيوار محه‌مه‌د سه‌ليم:
به‌ره‌ڤانيا باژێرى ل ئاكرێ راگه‌هاند كو ئه‌ڤرۆ ل قه‌زا ئاكرێ د روودانه‌كا ئاگر به‌ربوونێ دا، ژنه‌كێ و دو زارۆيان گيانێ خوه ژ ده‌ست دا.
رائيد به‌هزاد محه‌مه‌د سه‌عيد ئه‌فسه‌رێ بنگه‌هێ پۆليسێن گۆلان يێ به‌ره‌ڤانيا باژێرى ل ئاكرێ بۆ ئه‌ڤرۆ نيوز گۆت: “هاتينه ئاگه‌هداركرن ل سه‌ر روودانه‌كا ئاگر به‌ربوونێ ل تاخێ ئاله‌ييێ يێ ئاكر كو ئاگر به‌ربوويه ماله‌كێ”.
زێده‌تر گۆت: “ئه‌ڤ روودانا ئاگر به‌ربوونێ ل ده‌مژمێر 9:45 ده‌قيقه‌ى سپێدێ بوو و زوو گه‌هشتينه جهێ روودانێ و شياين كونترۆلا ئاگرى بكه‌ين”.
ئه‌فسه‌رێ بنگه‌هێ پۆليسێن گۆلان يێ به‌ره‌ڤانيا باژێرى ل ئاكرێ دا دا زانين ژى كو د ڤێ روودانێ دا دايكه‌كێ ب ناڤێ ئه‌فراح و دو زارۆيێن خوه يێن جێمك ب ناڤێ حه‌سه‌ن و حسێن ژ دايكبوويێن 2011 گيانێ خوه ژ ده‌ست دايه.
خۆيا ژى كر كو هێشتا ئه‌گه‌رێن روودانێ نه‌هاتينه زانين و گۆت: “ل ده‌مێ روودانێ بابێ زارۆيان كو كارمه‌ندێ باژێرڤانيێ يه ل سه‌ر كارى بوويه”.
ئەڤرۆ نیوز، لەزگین جوقی:
رێڤەبەرێ نڤێسینگەھا رزگارکرنا رەڤاندیێن کوردێن ئێزدی دیارکر کو 14 رەڤاندیێن کوردێن ئێزدی کو پتریا وان ژی د ژیێ د ناڤبەرا پێنچ ھەتا 15 سالیێ دانە ژ باغوز یا وەلاتی سوریا ژبن دەستی رێکخراوا تیرۆرستێن داعش رزگاربوونە.
حسێن کۆرۆ قائیدی رێڤەبەرێ نڤێسینگەھا رزگارکرنا رەڤاندییان یا ب سەر نڤێسینگەھا سەرۆکێ حکومەتا ھەرێما کوردستانێ ڤە بۆ ئەڤرۆ نیوز دیارکر کو د ئەڤ سالە دا ھەتا نوکە 45 رەڤاندیێن کوردێن ئێزدی ژ دەستێن رێکخراوا تیرۆرستێن داعش رزگار بووینە و گەلەک ژ وان ژی ب تایبەتی ژی زارۆکان زمانی خوە یێ دایکێ ژبیرکرینە کو ھەر ژ دەستپێکێ و ھەتا نھا بەردەوام دەنگێ خوە دگەھینینە جیھانێ کو چەرخێ 21ێ یە و مرۆڤ د ڤی چەرخی دا ب کۆم ھاتنە بن ئاخکرن، ھاتنە شەواتاندن، کڕین و فرۆتن وەکی بەری ھزاران سالان پێ ھاتەکرن، کۆێلاتی و ئۆل گوھۆڕین ب چاڤ ھاتنە دیتن، لەو د خوازین زێدەتر گرنگی ب رزگاربوویان بھێتە دان و ھەموو جیھان ب چاڤێ قوربانی تەماشەی وان رزگاربوویان بکەت.
ناڤھاتی ئەو ژی ئاشکرا کر کو سالا 2014ێ ھەتا نوکە سێ ھزار و 369 رەڤاندیێن کوردێن ئێزدی ب ھەردوو رەگەزان ژ دەستێن تیرۆرستێن داعش رزگاربووینە ئەم د ھەولێن بەردەوامداینە بۆ رزگارکرنا ھەموو رەڤانیێان ھەتا ئێک مابیت دێ کار یێ رزگارکرنێ بەردەوام بیت.
دەرباری بەلاڤبوونا دەنگویێ گورەکێ ب کۆم یێن کوشتنا 50 ئافرەتێن ئێزدی ل باغوز وەلاتی سوریا، حسێن کورۆی گۆت: مە چو پێزانین ل سەر نینن ھێشتا ئەڤ دەنگویە پشت راست نەبوویە، “ئەم ھیڤدارن وەسا نەبیت”.
ئەڤرۆ نیوز، نەوزاد ھلۆری:
کولیژا پەروەردا بنیات ل ئامێدیێ دیدارەکا ئەکادیمی و سیاسی بو سیاسیێن کوردستانێ ل بارا رەوشا سیاسیا کوردستان و عیراقێ یا نوکە رێکخستیە، دچوارچوڤێ دیدارێ دا دلشاد شەھاب ئەندامێ شاندێ دانوستاندنان یا پارتی بو پێکھێنانا کابینا نوو یا حکومەتا ھەرێما کوردستانێ دیارکر کو پارتی ھەتا نوکە چ نیەتێن وەسا نینە کو بێ ئێکەتی کابینا نوو یا حکوومەتا ھەرێما کوردستانێ پێکبینیت.
دلشاد شەھاب ددرێژاھیا ئاخفتنێن خودا گۆت ی: (بو ھەمووان ئەو یەک روون بوو کو باشترین ھەلبژارتن ھاتنە ئەنجامدان و پارتی شیا زورینەیێ دەستخوڤە بینیت، ددەما سێ ھەیڤێن بوری دا دانوستاندنێن پێکئینانا کابینا نوو یا حوکمەتا ھەرێما کوردستانێ دھێنەکرن و پارتی چو نیەت ژی نینن کو لایەنەکێ سیاسی پشت گوھڤە بھاڤێژیت ب تایبەتی ئێکەت، ئەگەر پارتی ئەو نیەت ھەبایە دشیا بەری سێ ھەیڤان 50+1 دروست بکەت و حوکمەتێ پێکبینیت، پارتی جارەکا دی دێ گەرەکا دی یا دانوستاندنان کەت ڤە بو پێکئینانا حوکمەتێ و پارتی ئێدی نەڤێت زێدەتر خەلک و دەنگدەر باجا گیروبوونا حوکمەتێ بدەن).
زێدەتر گۆت: (بارودوخێ نوکەیێ پارێزگەھا کەرکوک جودایە و وەکو بەرێ نینە، نوکە کەرکوک ھێزێن داگیرکەر ھەنە و تەعریب ھەیە و نەدادپەروەری ھەیە و کورد ھاتیە پشتگوە ھاڤێتن، ژبەرڤێ ھەتاکو رەوشا کەرکوکێ نەھێتە ئاسایکرن پارێزگار ژی نابیت بھێتە دانان، ئێکەتی نابیت کەرکوکێ بکەت مەرج بو پێکئینانا کابینا نوو یا حوکمەتێ).
ئه‌ڤرۆ نيوز:
بنه‌مالا ميرێ ئێزديان كه‌سه‌ك وه‌كو ئاخفتنكه‌رێ ب ناڤێ بنه‌مالێ ده‌ست نيشانكر، كۆمبوون بۆ هه‌لبژارتنا ميره‌كى بۆ ئێزديان ئه‌ڤرۆ دێ ده‌ست پێ كه‌ن و هه‌شت كه‌سان حه‌ز هه‌يه ببنه مير بۆ ئێزديان.
عامر مه‌حمود ميرزا به‌گ وه‌كو ئاخفتنكه‌رێ ب ناڤێ بنه‌مالا ئێزديان هاته ده‌ستنيشانكرن و د داخۆيانيه‌كێ دا بۆ ئه‌ڤرۆ نيوز گۆت: “ده‌نگدان د ناڤ مالا ميرێ ئێزديان دا هاته كرن بۆ دانانا ئاخفتنكه‌رێ فه‌رمى، شيام باوه‌ريا هه‌موويان ب ده‌ست خوه ڤه بينم و ببنه ئاخفتنكه‌رێ ب ناڤێ بنه‌مالا ئێزديان”.
ئاشكه‌را ژى كر كو ئه‌و نها كار ژبۆ وێ چه‌ندێ دكه‌ن كو پشتى مرنا ميرێ ئێزديان كه‌سه‌كى ژ بنه‌مالا ميرى وه‌كو ميرێ ئێزديان ده‌ست نيشان بكه‌ن كو ب ره‌نگه‌كى جڤاتا رۆحانى يا ئێزديان ل سه‌ر يا رازى بيت.
عامر مه‌حمود ميرزا به‌گ ئاماژه ب وێ چه‌ندێ ژى كر كو ئه‌و كه‌سێ دێ بيته ميرێ ئێزديان دێ نوونه‌راتيا هه‌موو ئێزديێن كوردستانێ و جيهانێ كه‌ت.
نه‌ڤه‌شارت ژى كو ئه‌ڤرۆ پشتى نيڤرۆ دێ كۆمبوونه‌ك ب مه‌ره‌ما هه‌لبژارتنا ميرێ ئێزديان هێته كرن و هه‌ر كه‌سه‌ك دێ بير و بۆچوونێن خوه ده‌ت و هنده‌ك كه‌س دێ هنده‌ك كه‌س هێنه هه‌لبژارتن، “هێشتا ب ته‌مامى نه‌هاتينه پشت راست كرن، به‌لێ هه‌شت ناڤ نها يێ ل ده‌ف مه هه‌ين و هه‌موو ژى پسمامێن ئێكن”
مير ته‌حسين به‌گ ميرێ ئێزديێن جيهانێ، ل رۆژا 28ى كانوونا دويێ 2019ێ و دژيێ 86 ساليێ ل ئێك ژ نه‌خۆشخانێن باژێرێ هانۆڤه‌ر ل ئه‌لمانيا چوو به‌ر دلۆڤانيا خودێ و د مه‌راسيمه‌كێ تايبه‌ت دا ته‌رمێ وى هاته ڤه‌گوهاستن بۆ هه‌رێما كوردستانێ.
ئەڤرۆ نیوز، نەوزاد ھلوری:
ب مەرەما شرۆڤەکرنا رەوشا نوکە یا سیاسی یا کوردستان و عیراقێ، کولیژا پەروەردا بنیات رابویە ب رێکخستنا دیدارەکا سیاسی و ئەکادیمی بو ھژمارەکا ئەندامێن سەرکردایەتێن ھێز و لایەنێن سیاسی ل کوردستانێ، ددیدارێ دا ھژمارەکا بەرپرس و ئەندامێن پەرلەمانێ کوردستانێ پشکداربوینە.
ل دەستپێکێ راگرێ کولیژا پەروەردا ئامێدیێ پروفیسور کەرەڤان ئامێدی، دیارکر کو ئامێدیێ ھەر دکەڤن دا پرا ئاڤاکرن و پێکڤە ژیانێ بویە و ھەردەم ب دیدارێن خوە شیایە بوشایا سیاسی پر بکەت و گۆت: (ب مەرەما شرۆڤەکرنا رەوشا سیاسی یا کوردستان و عیراقێ ئەم رابوینە ب دیدارەکا سیاسی و ئەکادیمی بو سیاسیێن کوردستانێ داکو ئێدی حوکمەت بھێتە پێکئینان و رەوشا کوردستان و عیراقێ ژی بەر ب باشتر ڤە بچیت).
زێدەتر گوت: (سیاسیێن کوردستانێ ل سایا پێشمەرگێ قارەمانژیانەکا خوش دبورینن ژبەرڤێ گرنگە کو ئەڤرۆ وێڤە رێز ل خوینا وان بھێتەگرتن).
پروفیسور موسلح دھوکی سەرۆکێ زانکویا دھۆک د دیدارێ گۆت: (زانکو و ناڤەندێن ڤەکولینان دارێژەر و دەستپێشخەربوویە داکو پلانەکا رێژخایەن و ئەکادیمی و زانستی بدانن، زانکو ئەگەر بەرنامەیەکێ رێک و پێکبدانن سیاسی ژی دێ پشتەڤان بن، بەلێ ناڤەندێن ڤەکولینێ وەکو پێدڤی کارنەکریە، دڤێت زانکو ب رێیێن زانستی باشترین خزمەت بو ڤاکی بکەت، زانکویا دھوک ژی گرنگی دایە بابەتێن گەرمێن روژانە ب رێیا دیدار و ورگ شوپ و دانوستاندن کریە و بو جھێن شولەژێ ھنارتینە).
زێدەتر گۆت: (ئەڤرۆ دێ لسەر رەوشا سیاسی یا عیراق و کوردستانێ ب تایبەتی ئەگەرێن گیروبونا حوکمەتێ و جورێ وێ ھێتەکرن و دخوازین حوکمەتەکا بھێز بھێتە ئاڤاکرن و پەیوەندیێن مە ل گەل ھەرێمێ باشتر بن و بودجە و موچە و ژیانا خەلکی بھێتە دابینکرن، چونکی رەوشا سیاسی کارتێکرن ل رەوشا جڤاکی و ئابووری یا خەلکی کریە).
ئه‌ڤرۆ نیوز، ئازاد نسری:
ئه‌ندامه‌كێ تۆرا خودان پێدڤیێن تایبه‌ت ل دهۆكێ بۆ ئه‌ڤرۆ نیوز راگه‌هاند، رێڤه‌به‌ریا گشتی یا ساخله‌میا پارێزگه‌ها دهۆكێ دێ كار ب قانوونا هژماره 22 یا ماف و ئمتیازاتێن كێم ئه‌ندامان و خودان پێدڤیێن تایبه‌ت ل هه‌رێما كوردستانێ كه‌ت.
حه‌مید تاهر محه‌مه‌د ئه‌ندامێ تۆرا خودان پێدڤیێن تایبه‌ت ل دهۆكێ ئاشكرا كر كو رێڤه‌به‌ریا گشتی یا ساخله‌میا دهۆكێ ل رۆژا 2019/2/24 نڤیسارا هژماره 2410 ل سه‌ر هه‌موو نه‌خۆشخانه و بنگه‌هێن ساخله‌میێ به‌لاڤكر كو هه‌موو خزمه‌تێن ساخله‌میێ بێ به‌رامبه‌ر بۆ كێم ئه‌ندامان و خودان پێدڤیێن تایبه‌ت ئه‌نجامدان و گۆت:( 22 هزار و 802 كه‌س ل سه‌رانسه‌ری پارێزگه‌ها دهۆكێ دێ مفای ژ بجهئینانا ڤێ بڕیارێ بینن).
ناڤبری ئاماژه ب وێ چه‌ندی ژی كر كو ئه‌ڤه ده‌ستكه‌فته‌كه بۆ كێم ئه‌ندامان و خودان پێدڤیێن تایبه‌ت و سوپاسیا وان هه‌موو لایه‌نان كر یێن هاریكاری و پشته‌ڤانیا وان بۆ بجهئینانا ڤێ بڕیارێ كری و گۆت:(هیڤیدارین هه‌موو رێڤه‌به‌ریێن دی ژی هه‌ر ئێك ل دووڤ تایبه‌تمه‌ندیا خۆ چاڤ ل رێڤه‌به‌ریا ساخله‌میێ بكه‌ت و خزمه‌تێن باش پێشكێشی مه بكه‌ن).
نيشاندان