ئه‌ڤرۆنیوز:
سه‌رۆك مه‌سعود بارزانى، ئه‌ڤرۆ سێشه‌مبى 5/3/2019 ب هه‌لكه‌فتا 28 سالیا سه‌رهلدانا گه‌لێ كوردستانێ دژى رژێما به‌عس وبیره‌وه‌ریێن ئادارێ په‌یامه‌ك به‌لاڤكر.
سه‌رۆك بارزانى دپه‌یاما خوه دا گۆت” ئادار هه‌یڤا سه‌ركه‌فتن ونه‌هامه‌تیێن گه‌لێ كوردستانێ یه، پشكا مه‌زن یا سه‌ركه‌فتن ووه‌رچه‌رخانێن دیرۆكا گه‌لێ كوردستانێ دهه‌یڤا ئادارێ دا رووداینه، ئادار هه‌یڤا سه‌رهلدان وقوربانیدانێ ونووبوونا هیڤیانه بۆ خه‌لكێ كوردستانێ، د ئادارێ دا گه‌لی كوردستانێ دژى سته‌مكاریێ وداگیركاریێ راوه‌ستا وقۆناغه‌كا نوو دژیانا سیاسى یا بزاڤا رزگاریخوازا كوردستانێ هاته هه‌بوونێ، كو دسه‌رهلدانا مه‌زن یا ئادارا 1991 دیاربوو”.
سه‌رۆك بارزانى گۆت ژى”سه‌رهلدان په‌یاما رۆهن یا كوردستانیان بوو بۆ هه‌موو جیهانێ، كو بن ده‌ستیێ قبوول ناكه‌ت وهه‌كه كوردستان ئێكده‌نگ بیت، هه‌میشه سه‌ركه‌فتن ب سه‌ر سته‌مێ وداگیركاریێ دا دێ مسوگه‌ر بیت”.
دیاركر ژى” خۆراگریا خه‌لكىوشوره‌شێ، رژێما عیراقى نه‌چاركر كو ل 11 ئادارا 1970 بۆ جارا ئێكێ دانپێدانێ ب پشكه‌كا مافێن گه‌لێ بكه‌ت، به‌یانناما 11 ئادارێ به‌لگه‌یه‌كا رۆهنه ل سه‌ر سه‌ركه‌فتنا شوره‌شا ره‌وا یا گه‌لێ كوردستانێ به‌رابنه‌ر بزاڤا حه‌لاندنا گه‌لی مه ژلایێ داگیركه‌ران ڤه، ل 11 ئادارێ ول شه‌روه‌شا مه‌زن یا ئه‌یلوولێ دوژمن هاته نه‌چاركرن ده‌ستبه‌ردارى لۆژیكا هێزێ بیت ورێیا دانوستاندنێ بگریته‌به‌ر”.
دبه‌رده‌وامیا په‌یاما خوه‌دا، سه‌رۆك بارزانى گۆت” هه‌ر ل هه‌یڤا ئادارێ هه‌لكه‌فتا شه‌هیدێن هه‌له‌بجه دكه‌ین، هه‌له‌بجه برینه‌كا كووره دله‌شێ ملله‌تێ مه دا ونیشانا درونده‌یى وبێ ویژدانیا دوژمنانه هه‌له‌بجه ده‌نگێ مه‌زلومیه‌تا گه‌لێ كوردستانێ یه دچه‌رخێ بۆرى دا وهه‌موو مرۆڤایه‌تى به‌رپرسه ل ئاستێ وێ تاوانا مه‌زن ئه‌وا دژى گه‌لێ كوردستانێ هاتیه ئه‌نجامدان”.
دیاركر ژى” ل هه‌یڤا ئادارێ هه‌لكه‌فتا نه‌ورۆزێ دهێته ساخكرن، كو بۆگه‌لی كوردستانێ سیمبوولا سه‌ركه‌فتنا ژیانێ وئازادیێ یه ل سه‌ر سته‌م وتاریێ دا، نه‌ورۆز مزگینیا نووبوونێ یه وده‌ستپێكه‌كا نوویه بۆ وه‌لاتیێن كوردستانێ”.
ل دووماهیا په‌یاما خوه دا، سه‌رۆك بارزانى گۆت” ب هه‌لكه‌فتا سه‌رهلدانێ وبیره‌وه‌ریێن ئادارێ، سلاڤان بۆ شه‌هیدێن سه‌رهلدانێ وشه‌هیدێن هه‌له‌بجه وهه‌موو شه‌هیدێن كورد وكوردستانێ دهنێرین، ده‌ستكه‌فتێن نوكه یێن گه‌لێ مه وپێشكه‌فتن وئاڤه‌دانى وپێگه‌ها دیار یا هه‌رێما كوردستانێ، هه‌موو به‌رهه‌مێ خوینا شه‌هیدێن مه یێن سه‌ربلندن، ب وان هه‌لكه‌فتان دا سلاڤ وسوپاس بۆ هه‌موو وه‌لاتیێن كوردستانێ كو ل قۆناغێن دژوار دا دخۆراگر بوون وچو جاران سته‌م وبن ده‌ستى قبوول نه‌كریه، سلاڤ بۆ قاره‌مانیا پێشمه‌رگه‌ى كو بۆ گیانفیداییێ وجوامێریێ وان ب خوه دیرۆك بۆ گه‌لێ خوه تۆماركر”.
ئەڤرۆ نیوز:
ئەندامێ پەرلەمانێ کوردستانێ دیارکر بریاربوو سوبەھی رۆژا چارشەمبی رێککەفتی ٦-٣-٢٠١٩ پەرلەمانێ ھەرێما کوردستانێ روونشتبا و دانانا لژنەیێن خوە تمام کربایە لێ ھاتە پاشخستن.
زێدەتر ئومێد خوشناو دیارکر کومبوونا سوبەھی رۆژا چارشەمبی بۆ حەفتیا بھێت ھاتە پاشخستن داکو ھەموو حزب نوونەرێن خوە بۆ لژنەیێن پەرلەمانی دیاربکەن تایبەت پشتی ڤەگەریانا حزبا ئێکەتیێ بۆ ناف روونشتنێن پەرلەمانی.
ھەژی گۆتنێ یە ھەتا نوکە تنێ لژنەیا قانوونی ھاتە پێکئینان ل پەرلەمانێ کوردستانێ و رازەمەندی ژ ل سەر ھاتیە کرن.
ئەڤرۆ نیوز:
سەلاحەدین دەمیرتاش هەڤسەرۆکێ بەرێ یێ هەدەپێ کو ئەڤ دو سالن ل زیندانێ دایە داخواز ژ سەرۆک بارزانی دکەت کو ل سەر بزاڤێن خوە بۆ ئێکەتیا نەتەوی بەردەوام بیت، دەمیرتاش دیار دکەت کو تنێ سەرۆک بارزانی دشێت ئێکەتیا کوردان دروست بکەت و سەرۆک بارزانی هەتا نها گەلەک بزاڤ بۆ هندێ کرینە و هێڤیدارە کو سەرۆک بارزانی بشێت هەموو هێز و ئالیێن سیاسی یێن کوردستانێ ل دۆر بەرژەوەندیێن نەتەوی کۆم بکەت و ئێکەتیا کوردان دروست بکەت.
هەڤسەرۆکێ بەرێ یێ هەدەپێ سلاڤێن خوە بۆ وەلاتیێن کورد ل هەرێما کوردستانێ فرێ دکەت و دیار دکەت کو ئێدی سەردەمێ هندێ چوویە کو دوژمن ب زیندانکرنا سەرکردێن کورد بشێن بزاڤا ژناڤبرنا کوردان بکەن و دبێژیت: ئەڤ سەردەمە سەردەمێ کوردانە و کورد دێ هەر گەهنە ئازادیا خوە.
ئەڤرۆ نیوز،بارزان مزووری:
ئەڤرۆ نیڤرۆ 4/3/ 2019ی “ل بەردەرگەهێ ئاڤاهیێ قایمقامیا شێخان ب پشكداریا قائیمقامێ قەزا شێخان و كارگێرو كادرو لقا 20 یا شێخان یا پارتی دیموكراتی كوردستان و جڤاتا ئافرەتێن شێخان و قوتابیان و لاوان و كولیژو پەیمانگەها تەكنیكی شێخان دگەل رێڤەبەرێن میری و جەماوەرێ شێخان خرڤەبوونەكەكا نەرازیبوونێ ل دۆر كریارا بەرامبەری 50 كچێن ئێزدی ئەوێن ژلایێ رێكخراوا تیرۆرستی یا داعش ل باژێرێ باغوز هاتینه سەرژێكرن هاته ئەنجامدان وتیدا بەیاننامەك هات خواندن كو ئه‌و كریارا هوڤانە شه‌رمزاركر وداخواز ژ حوكمەتا بەغدا كر كو لاشێن وان كچان بۆ مالباتێن وان ل كوردستانێ ڤەگوهێزیت .
ئه‌ڤرۆنیوز:
وه‌زیرێ دارایى یێ عیراقێ فوئاد حسێن بریارا خه‌رجكرنا مووچێ فه‌رمانبه‌رێن هه‌رێما كوردستانێ ده‌ركر.
ژێده‌ره‌كێ نێزیك ژ وه‌زیرێ دارایی یێ عیراقێ فوئاد حسێن بۆ سایتێ (سۆمه‌ریه نیوز) دیاركر كو وه‌زاره‌تا دارایى یا عیراقێ بریارا خه‌رجكرنا مووچێ فه‌رمانبه‌رین هه‌رێما كوردستانێ ده‌ركر.
به‌لاڤكر ژى”وه‌زیرێ دارایى یێ عیراقێ بریارا خه‌رجكرنا شایستێن داریى ومووچێ فه‌رمانبه‌رین هه‌رێما كوردستانێ بۆ ئه‌ڤ ساله ل دووڤ پشكا دیاركرى دقانوونا بودجا گشتى یا عیراقێ دا بۆ سالا 2019″.
وى ژێده‌رى ژڤانێ به‌لاڤكرنا وى مووچه‌ى ومیكانیزما به‌لاڤكرنێ دیارنه‌كر.
گۆت ژى كو شایستین دارایى یێن سێ هه‌یڤێن دووماهیا سالا 2017 یێن فه‌رمانبه‌رێن رێڤه‌به‌ریێن پاسه‌پۆرت وفه‌رمانبه‌رێن سكرێن ئاڤێ ل هه‌رێما كوردستانێ ژى هاتن خه‌رجكرن”.
ئه‌ڤرۆنیوز:
رۆژنامه‌كا ئیسپانى به‌لاڤكر كو یانا ریال مه‌درید سێ راهێنه‌ر به‌رچاڤ كرینه تاكو پشتى ب دووماهى هاتنا ڤى وه‌رزى، گرێبه‌ستا ل گه‌ل گرێده‌ت ل شوونا راهێنه‌رێ ئه‌رجه‌نتینی سانتاگۆ سولارى كو چاڤه‌رێ دهێته كرن ل دووماهیا ڤى وه‌رزى بهێته لادان.
رۆژناما (ئاس) یا ئیسپانى به‌لاڤكر كو سه‌رۆكێ یانا ریال مه‌درید سێ ناڤ دیاركرینه بۆ ئیمزاكرنا گرێبه‌ستێ دگه‌لدا بۆ وه‌رگرتنا ئه‌ركێ راهێنه‌رایا ریال ئه‌وژى هه‌ر ئێك ژ یواكیم لۆف راهێنه‌رێ هه‌لبژارتیێ ئه‌لمانیا وماسیمیلیانۆ ئه‌لیگرى راهێنه‌رێ یانا یوڤه‌نتۆس یا ئیتالى وماوریسیۆ بوتشیتینۆ راهێنه‌ری یان توتنهام یا ئینگلیزى.
ئه‌ڤرۆنیوز:
ژێده‌ره‌كى ژ ده‌زگه‌هێ (مه دا) یێ ره‌وشه‌نبیرى وراگه‌هاندنێ بۆ ئه‌ڤرۆنیوز دیاركر كو ل ده‌ستپێكا هه‌یڤا نیسانا داهاتێ دێ گه‌را 14 یا پیشانگه‌ها هه‌ولێر یا نێڤده‌وله‌تى یا په‌رتۆكێ هێته ڤه‌كرن.
وى ژێده‌رى زێده‌تر گۆت” ل رۆژا چارشه‌مبى 3/4/2019 دێ پیشانگه هێته ڤه‌كرن وهه‌تا رۆژا شه‌مبیێ 13/4/2019 دێ به‌رده‌وام بیت”.
ئه‌ڤرۆنیوز:
مه‌كته‌با سیاسى یا پارتى دیموكراتى كوردستان ب هه‌لكه‌فتا 28 سالیا سه‌رهلدانا گه‌لێ كوردستانێ په‌یامه‌ك به‌لاڤكر.
مه‌كته‌با سیاسى یا پارتى دپشكه‌كا په‌یاما خوه دا دبێژیت”به‌رى 28 سالان ودرۆژه‌كا وه‌كو ئه‌ڤرۆ دا گه‌لێ مه ب هه‌موو چین وته‌خێن خوه‌ڤه، چریسكا ئێكێ یا سه‌رهلدانێ ل باژیرێ رانیه دژى زۆلم وسته‌م وبن ده‌ستیێ هه‌لكر وبه‌رپه‌ره‌كێ نوو یێ سه‌روه‌ریان ددیرۆكا خه‌باتا رزگاریخوازا گه‌لێ مه دا تۆماركر”.
هه‌ر د وێ پیامی دا هاتیه” سه‌رهلدان درێژه‌پێده‌را زنجیره‌كا شوره‌ش وبه‌رخودانا گه‌لێ مه بۆ ره‌تكرنا هه‌موو جۆره چه‌وسانه‌وه‌كێ وگه‌هشتن ب ئازادیێ وبده‌ستڤه‌ئینانا مافێن ره‌وا، له‌وما گه‌لێ كوردستانێ شیا وێ قۆناغێ ژى ده‌ربازبكه‌ت وبنه‌مایێن ده‌زگه‌هكرنێ دامه‌زرینیت وچه‌ندێن ده‌ستكه‌فتێن گرنگ یێن دى ژى بده‌ستڤه‌بینیت دئاڤه‌دانكرن وڤه‌ژاندنێ دا ژبۆ گه‌هشتن ب پاشه‌رۆژه‌كا گه‌ش بۆ كوردستانیان”.
د پشكه‌كا دى یا وێ په‌یامێ دا هاتیه” پارتیا مه دوێ باوه‌ریێ دایه بۆ چاره‌كرنا كێشان وبده‌ستڤه‌ئینانا ئارمانجێن مه پێدڤى ب ئێك ده‌نگیا نیشتمانیه وپێدڤیه ئه‌م هه‌موو ل ده‌وروبه‌رێن ئێك ئارمانج كۆمبین وكارێ سه‌ره‌كیێ مه ژبۆ گه‌هشتن ب ئارماجێن خوه ئه‌و ناڤمالا كوردى بهێته رێكخستن وگاڤێن جدى بهێنه هاڤێتن بۆ پاراستنا كوردستانێ ژ حه‌ز وسیاسه‌تا پیلانگێرانه وچاره‌كرنا كێشان”.
په‌یاما پارتى ئاماژه كر” جاره‌كادى دووپات دكه‌ین كو ئه‌ڤرۆ ل به‌رده‌م ئه‌ركه‌كێ نه‌ته‌وى ونیشتمانى یێ گرنگداین ئه‌وژى پاراستنا ده‌ستكه‌فتێن مه وده‌ربازربوونا ڤێ قۆناغێ یه، ئه‌و ئه‌ركه ژى ب هه‌ماهه‌نگى ورێككه‌فتن وپێكڤه‌یا هێزێن دلسۆز ونیشتمان په‌روه‌ر دهێته دێ ب پێكئینانا حوكمه‌ته‌كا ب هێز وسه‌ركردایه‌تیه‌كا سیاسى یا ئێكده‌ست وپه‌رله‌مانه‌ك دخزمه‌تا وه‌لاتیان وده‌سته‌به‌ركرنا مافێن وان بیت، هه‌روه‌سا دێ رژد بین ل سه‌ر زێده‌تر خزمه‌تكرنا گه‌لێ خوه وباشتركرنا ره‌وشا ژیانا وان وبه‌ر ب پێشڤه‌برنا گوزه‌رانیا وان وچاره‌كرنا كێشه وگرفتێن وان وزێده‌تر ئاڤه‌دانكرن وڤه‌ژاندنا هه‌رێما كوردستانێ ژ هه‌موو روویه‌كى ڤه”.
ئه‌ڤرۆنیوز:
وه‌زاره‌تا په‌روه‌ردێ ل هه‌رێما كوردستانێ راگه‌هاند، رۆژا ئێكشه‌مبیا داهاتى قوتابى دشێن ب جلكێن خوه یێن نیشتمانى بچنه قوتابخانان.
وه‌زاره‌تا په‌روه‌ردێ درۆهنكرنه‌كێ دیاركر كو ل ده‌ستپێكا حه‌فتیا داهاتى رۆژا جلكێن نیشتمانى یه ل هه‌رێما كوردستانێ.
به‌لاڤكر ژى”بۆ رێزگرتن ل جلكێن هه‌موو نه‌ته‌وێن جودا یێن هه‌رێما كوردستانێ ونیشاندانا جوانیا ره‌نگێن جلكێن ئاكنجیێن هه‌رێما كوردستانێ، رۆژا ئێكشه‌مبی 10/3/2019 رۆژا جلكێن نیشتمانى یه وقوتابى ومامۆستا دشێن دڤێ رۆژێ دا ب جلكێ نه‌ته‌وى یێن خوه بچنه قوتابخانان”.
ل سالێن بۆرى ئه‌و رۆژه ب رۆژا جلكێن كوردى هاتبوو ناڤكرن، به‌لێ ئه‌ڤ ساله ب رۆژا جلكێن نیشتماتى هاتیه ناڤكرن، ب ڤێ چه‌ندێ ژى كورد، توركمان، عه‌ره‌ب، ئه‌رمه‌ن وكلدوسریان ئاشوورى دشێن جلكێن خوه ب ڤێ هه‌لكه‌فتێ بكه‌نێ.
نيشاندان