ئه‌ڤرۆ نيوز:
نێچيرڤان بارزانى سه‌رۆك وه‌زيرێن هه‌رێما كوردستانێ د گۆتاره‌كێ دا د رێوره‌سمێن ڤه‌كرنا پێشانگه‌ها گه‌شتيارى يا رۆژهه‌لاتا ناڤه‌راست ل هه‌ولێرا پايته‌خت راگه‌هاند كو هه‌رێما كوردستانێ ئه‌رده‌كێ گۆنجاى و مادده‌كێ خاڤ يێ گه‌شتيارى يه و پێدڤيه مفا ژ وێ ده‌رفه‌تێ بهێته ديتن و ببيته ناڤه‌نده‌كا گه‌شتيارى بۆ كوردستان و عيراقێ.
ئه‌ڤرۆ نيوز:
ژ ئه‌نجامێ وێ پێلا سه‌رمايێ يا ب سه‌ر ده‌ڤه‌رێ دا هاتى و ل گه‌له‌ك ده‌ڤه‌ران ژ ئه‌نجامێن باران بارينا زێده له‌هى دروست بووين و زيان ب چه‌ندين جهان كه‌فتين، ل سارترين ده‌ڤه‌را پارێزگه‌ها دهۆكێ و هه‌رێما كوردستانێ ژى به‌فر بارى.
ئه‌ڤێن ل خوارێ چه‌ند ديمه‌نێن وێ به‌فر بارين و باران بارينێ نه ل ئێك ژ گۆندێن ده‌ڤه‌را به‌روارى بالا كو گۆندێ “گه‌ليكى” يه وه‌كو ديار به‌فره‌كا زۆر لێ باريه.
وێنه و ڤيديۆ ژ لايێ عيماد ئاليخان ڤه هاتينه ره‌وانه‌كرن.
ئه‌ڤرۆ نيوز، نيوار محه‌مه‌د سه‌ليم:
رێڤه‌به‌ريا به‌ره‌ڤانيا باژێرى ل پارێزگه‌ها دهۆكێ راگه‌هاند كو شڤێدى ژ ئه‌نجامێ باران بارينا زۆر چه‌ندين روودانێن نه‌خواستى په‌يدا بووينه و ئه‌و شياينه كونترۆلا وێ ره‌وشێ بكه‌ن.
رائيدێ ماف بێوار عه‌بدولعه‌زيز، به‌رپرسێ راگه‌هاندنا رێڤه‌به‌ريا باژێرى ل دهۆكێ بۆ ئه‌ڤرۆ نيوز گۆت: “شڤێدى ژ ئه‌نجامێ باران بارينا زۆر ل گه‌له‌ك ده‌ڤه‌ران روودان په‌يدا بووينه، به‌لێ خۆشبه‌ختانه ئه‌ڤ روودانه ب تنێ ب زيانێن ماددى ب دووماهى هاتينه و زيانێن گيانى نه‌بووينه”.
زێده‌تر گۆت: “ل سه‌ر رووبارێ هشكه‌ڕۆ جادده‌ك هاتبوو گرتن و رێيا هاتنوچوونێ نه‌بوو، ل ليناڤا يا ده‌ڤه‌را دۆسكيان ژى ترۆمبێله‌ك بۆ ماوه‌كى د ناڤ ئاڤێ دا بوو و سێ كه‌س تێدا بوون، هه‌كه به‌ره‌ڤانيا باژێرى نه‌بايه، دبيت وان كه‌سان گيانێ خوه ژ ده‌ست دابايه، به‌لێ شياين ژ مرنێ رزگار بكه‌ين”.
دا زانين ژى كو ل مه‌رينا ژى شه‌ش ترۆمبێل بن ئاڤ ببوون و ل مسريكێ ژى ئاڤ چووبوو ناڤ 16 مالان و تيمێن به‌ره‌ڤانيا باژێرى ل ڤان جهان ژى ئاماده بوون و روودان كۆنترۆل كرن.
هه‌ر ب گۆره‌ى مالپه‌رێ رێڤه‌به‌ريا هاتنوچوونا پارێزگه‌ها دهۆكێ ژى، دوهى بۆ ماوێ زێده‌تر ژ ده‌مژمێره‌كێ پرا حسێنيێ يا ل سه‌ر رێيا دهۆك بۆ هه‌ولێر هاتبوو گرتن و ل ئامێديێ ژى ژ ئه‌نجامێ باران بارينا زۆر بۆ ماوه‌كێ درێژ سێ پر هاتبوونه گرتن.
ئه‌ڤرۆ نيوز:
پێشانگه‌ها رۆژهه‌لاتا ناڤه‌راست بۆ گه‌شتوگۆزارێ كو مه‌زنترين كۆمپانيا گه‌شتيارى يه، ب پشكداريا ب ده‌هان كۆمپانيێن ناڤخۆى و بيانى ل پايته‌ختێ هه‌رێما كوردستانێ هاته ڤه‌كرن.
پێشانگه‌ها مێتێكس ده‌مژمێر 10:00ى ئه‌ڤرۆ 17ى ئادارا 2019ێ ژ لايێ نێچيرڤان بارزانى، سه‌رۆكێ حوكمه‌تا هه‌رێما كوردستانێ هاته ڤه‌كرن پاشان ژى سه‌ره‌دانا پشكێن ڤێ پێشانگه‌هێ كر.
پێشانگه‌ها رۆژهه‌لاتا ناڤه‌راست يا دويێ بۆ گه‌شتوگۆزار “مێتێكس” ده‌ره‌فه‌ته‌كه دا كو هه‌رێما كوردستانێ زێده‌تر ب كۆمپانيان بده‌ته نياسين دا كو وه‌به‌رهێنانا زێده‌تر تێدا بكه‌ن.
هه‌رێما كوردستانێ ژماره‌كا زۆر يا ده‌ڤه‌رێن گه‌شيتارى هه‌نه، هه‌روه‌سا گه‌له‌ك جهێن شوونوارى ژى تێدانه كو مێژوويا هنده‌ك ژ وان بۆ سه‌دان سالان به‌رى نها د ڤه‌گه‌ريت.
عه‌بدولره‌حمان عه‌بدولره‌حيم، رێڤه‌به‌رێ پێشانگه‌ها نێڤده‌وله‌تى يا هه‌ولێر دبێژيت: “250 كۆمپانيا ژ 20 وه‌لاتێن جيهانێ دڤێ پێشانگه‌هێ دا د پشكدارن. ژ وان وه‌لاتێن دڤێ پێشانگه‌هێ دا د پشكدار ژى، 10 وه‌لاتێن عه‌ره‌بى، پێنج ژ وان وه‌لاتێن ئورۆپى و ئه‌وێن دژى كۆمپانيێن توركى و ئيرانى و چه‌ند كۆمپانيێن باشوورێ رۆژهه‌لاتێ ئاسيا نه.
كۆمپانيا د ڤێ پێشانگه‌هێ دا د پشكدارن دا كو به‌رهه‌م و ئوفه‌رێن خوه پێشكێش بكه‌ن و بزاڤێ په‌يداكرنا هه‌ڤپشكێن نوو و ب هێزكرنا په‌يوه‌نديان بده‌ن.
د پێشانگه‌هێ دا چه‌ندين ئيڤێنت و پانێل دێ هێنه پێشكێشكرن بۆ پێشخستنا وارێ گه‌شتوگۆزارێ ل هه‌رێما كوردستانێ ب تايبه‌ت هه‌رێما كوردستانێ چاوان دشێت مفاى ژ ئه‌زموونا وان وه‌لاتان مفاى ژێ وه‌ربگريت د وارێ گه‌شتوگۆزارێ دا، پێشانگه‌هـ هه‌تا ئێڤاريا نه‌ورۆزێ دێ يا به‌رده‌وام بيت و رۆژانه ل ده‌مژمێر 10:00 بۆ 19:00 دێ يا ڤه‌كرى بيت.
هه‌ر پشكداريا كۆمپانيا ب خوه ده‌رفه‌ته‌كه بۆ به‌ر ب پێشڤه‌چوونا كه‌رتێ گه‌شتيارى ل هه‌رێما كوردستانێ و ئاگه‌هداربوونا زێده‌تر ل سه‌ر نووكاريان د وان كه‌رتان دا.
ب گۆره‌ى ئامارێن ده‌سته‌يا گشتى يا گه‌شتوگۆزارێ ل هه‌رێما كوردستانێ، سالا بۆرى ب تنێ دو رۆژان به‌رى جه‌ژنا نه‌ورۆزێ 76 هزار گه‌شتياران روو كريه هه‌رێما كوردستانێ كو هه‌تا دووماهيا هه‌يڤا ئادارێ ژماره گه‌هشته 234 هزار گه‌شتياران.
حوكمه‌تا هه‌رێما كوردستانێ د رێيا ڤێ پێشانگه‌هێ دا، پلان هه‌يه سه‌رنجا گه‌شتياران زێده‌تر ب هه‌رێما كوردستانێ ب راكێشيت و ئه‌ڤ ساله سێ مليۆن و 500 هزار گه‌شتار روو بكه‌نه هه‌رێما كوردستانێ.
ئه‌ڤرۆ نیوز:
بنگه‌هێ هاتنوچوونا ناحیا زاویته هوشداریه‌كێ ئاراسته‌ى شۆفێران دكه‌ت ژبه‌ر پێلا بارانێ ئه‌وا ئه‌ڤرۆ پارێزگه‌ها دهۆكێ ڤه‌گرتى وب تایبه‌تى ناحیا زاویته.
سالح جه‌میل ژراگه‌هاندنا هاتنوچوونا ناحیا زاویته بۆ ئه‌ڤرۆ نیوز گۆت” نوکە جادا کەلیێ زاویتە یا تژى بووى ژ ئاڤا بارانان، له‌وما داخازێ ژ هەموو شوفێران دکەین کو پێگیریێ ب رێنمایێن هاتنوچوونی بکەنە و لەزاتیا ترومبێلێن خوه کێم بکە دا تووشی چو گرفتێن هاتنوچوونێ نەبن”.
ئه‌ڤرۆ نيوز:
كۆمسيۆنا بلند يا هه‌لبژارتنان وراپرسى ل هه‌رێما كوردستانێ راگه‌هاند، هه‌موو پێرابوون يێن هاتينه ئه‌نجامدان بۆ به‌لاڤكرنا پارێ كارمه‌ندێن رۆژا هه‌لبژارتنان ل هه‌رسێ پارێزگه‌هێن هه‌وڵێر وسلێمانيێ ودهۆكێ.
زه‌رده‌شت مه‌لا حه‌سه‌ن، رێڤه‌به‌رێ گشتيێ دارايى ل كۆمسيۆنا بلند يا هه‌لبژارتنان وراپرسى ل هه‌رێما كوردستانێ دداخۆيانيه‌كا رۆژنامه‌ڤانى دا گۆت” ژئه‌گه‌رێ بێهنڤه‌دانان ونه‌هێلانا پاشكه‌فتا مووچێ فه‌رمانبه‌ران، وه‌زاره‌تا دارايى مژوولى وێ چه‌ندێ يه كو به‌رى نه‌ورۆزێ مووچێ فه‌رمانبه‌ران به‌لاڤ بكه‌ت، له‌وما پارێ كارمه‌ندێن رۆژا هه‌لبژارتنان ل وان هه‌ر سێ پارێزگه‌هان دێ پشتى نه‌ورۆزێ هێته به‌لاڤكرن”.
گۆت ژى” پارێ كارمه‌ندێن رۆژا هه‌لبژارتنان ل پارێزگه‌ها هه‌له‌بجه يێن هاتينه به‌لاڤكرن”.
كۆمسيۆنا بلند يا هه‌لبژارتنان وراپرسى بۆ رێڤه‌به‌رێ بنگه‌هى ورێڤه‌به‌رێ ويستگه‌هێ 200 هزار ديناران دێ مه‌زێخيت وبۆ كارمه‌ندێن دى 150 هزار ديناران دێ مه‌زێخيت”.
ئه‌ڤرۆ نيوز:
برياره سوباهى ئێكشه‌مبى 17/3/2019 مووچێ هه‌يڤا 12 يا سالا 2018 بێ پاشكه‌فت يێ ڤان جهان بهێته به‌لاڤكرن:
1- وه‌زاره‌تا پيشه‌سازى وبازرگانى
2- وه‌زاره‌تا ره‌وشه‌نبيرى ولاوان
3- وه‌زاره‌تا ئاڤه‌دانكرنێ
4- سه‌رۆكايه‌تيا په‌رله‌مانێ كوردستانێ
5- سه‌رۆكايه‌تيا هه‌رێمێ
6- جڤاتا وه‌زيران
7- خانه‌نشينێن پێشمه‌رگه
ئه‌ڤرۆ نیوز:
سه‌رۆكێ فراكسیۆنا پارتی دیموكراتی كوردستان ل په‌رله‌مانێ كوردستانێ راگه‌هاند، ئه‌م بزاڤێ دكه‌ین ب زووترین ده‌م ده‌زگه‌هێ سه‌رۆكایه‌تیا هه‌رێما كوردستانێ بهێته كاراكرن ومه ده‌مه‌كێ ڤه‌كری نینه تاكو چاڤه‌رێی ئێكه‌تیێ بكه‌ین.
ئومێد خوشناو، سه‌رۆكێ فراكسیۆنا پارتی دیموكراتی كوردستان ل په‌رله‌مانێ كوردستانێ گۆت” ئێك ژ بابه‌تێن سه‌ره‌كی یێن په‌رله‌مانی، پرسا قانوونا سه‌رۆكایه‌تیا هه‌رێما كوردستانێ، ل دۆر ڤێ چه‌ندێ دانوستاندنێن مه دبه‌رده‌وامن تاكو دگه‌هینه ئه‌نجامه‌كی، بزاڤی دكه‌ین ب زووترین ده‌م ده‌زگه‌هێ سه‌رۆكایه‌تیا هه‌رێما كوردستانێ بهێته كاراكرن، چونكی ئه‌و بابه‌ت پێدڤی ب ل هه‌ڤهاتنا نیشتمانی یه”.
سه‌باره‌ت رژدیا ئێكه‌تیێ ل سه‌ر چه‌ند داخوازیه‌كا، ئومێد خوشناو زێده‌تر بۆ باسنیوز گۆت” هیڤیدارم بێ فراكسیۆنا ئێكه‌تیێ گاڤ بۆ وی بابه‌تی نه‌هێنه هاڤێتن، هیڤیدارین ئه‌وژی بهێنه پێش وگاڤێن ب له‌زتر د دانوستاندنێن پێكئینانا حوكمه‌تێ دا بهێنه هاڤێتن، به‌لێ مه ده‌مه‌كێ ڤه‌كری ل به‌رده‌ست نینه تاكو چاڤه‌رێی فراكسیۆنا ئێكه‌تیێ بكه‌ین”.
ئەڤرۆ نیوز، عەلی حاجی :
دداخویانیەکێ دا ئەندامەکا پەرلەمانێ عێراقێ بۆ ئەڤرۆ نیوز دیار کر دو پەرلەمانتارێن ھەڤپەیمانیا سائیرون پێشنیار کری یە سرودا نیشتیمانیا عێراقێ بناڤێ مەوتنی بھێتە گوھۆرین ل جھێ وێ ئێکا دی بھێتە دانان.
وەسفیا شێخو زێدەتر گۆت: ھەردو پەرلەمانتارێن ھەڤپەیمانیا سائیرون ل گورەی ماددەیا ٦٠ یا دەستورێ عێراقێ و ماددەیا ١٢٠ یا سیستەمێ ناڤخویی، پێشنیارەک پێشکێشی لژنا رەوشەنبیری و راگەھاندنێ کو سرودا نوکە یا عێراقێ بھێتە گوھۆرین و ل جھێ ئێکا دی بھێتە دانان و نوکە ئەو پەرلەمانتار مژوولی کومکرنا ئیمزانە بۆ وێ پێشنیارێ و ھەر پێشنیارەکا زێدەتری ٥٠ ئیمزایێن پەرلەمانتارا ل سەر نەبیت دێ ھێتە لادان.
ناڤھاتی زێدەتر گۆت: نوکە دا ژمارەیەکا پەرلەمانتارێن کورد ئیمزا ل سەر وێ پێشنیارێ کرینە لێ ب مەرج ، مەرجێ پەرلەمانتارێن کورد ژی ئەوە کو سرودا نوو دەربرینێ ژ ھەمی پێکھاتەێن عێراقێ بکەت و نابیت دناڤ وێ سرودێ دا چو پێکھاتەیەک بھێتە پشت گوە خستن ژبەر کو ھەر پێکھاتەیەک بھێتە پشت گوە خستن ئەو سرود دێ ھێتە لادان.
ئەڤرۆ نیوز:
ئەڤرۆ ١٦-٣-٢٠١٩ ل بیرەوریا دەربازبوونا ٣١ سالیا کارەساتا کێمیا بارانا باژێرێ حەلەبچە، سەرۆک مەسعود بارزانی رادگەھینت، پێدڤیە مروڤایەتی ژ بەر کارەساتا کێمیا بارانا حەلەبچە شەرمێ ژ خوە بکەت.
زێدەتر سەرۆگ بارزانی برێکا پەیجێ خوە یێ تورا کومەلایەتی یا تویتەری راگەھاند کێمیا بارانا حەلەبچە بیرەوەریەکە ێدڤیە مروڤایەتی ژ بەر کارەساتا کێمیا بارانا حەلەبچە مروڤایەتی شەرمێ ژ خوە بکەت و جڤاتا نێڤدەولەتی ژی ب رژدی ل سەر راوەستیت و ھەلویستێ خوە ھەبیت بۆ ناساندنا جینوسایدکرنا ڤێ تاوانا درندانە و قوربانیێن وێ ژی بھێنە قەرەبووکرن و دەڤەرا وێ ژی بھێتە ئاڤەندان کرن کو ل ئاستێ قوربانیدانا ڤێ دەڤەرێ و مێژوویا وان یا پر سەروەری.
ژلایەکێ دی ڤە ھەر ئەڤرۆ ١٦-٣-٢٠١٩ سەرۆک مەسعود بارزانی ھەڤخەمیا خوە ھەمبەر بەرامبەر گیان ژدەستدانا سەرۆکێ دەستەیا دەسپاکیا عیراقێ حاکم عزەت توفیق ربەتکی ئەوێ ب ئەگەرێ روودانەکا دلتەزین گیانێ خوە ژ دەست دای، و سەرەخوشیا خوە ئاراستەی بەرێز و کەسوکارێن خودێ ژێ رازی کر و جھێ وی ل بەھەشتا بەرین شاد بکەت.
نيشاندان