ئەڤرۆ نیوز:

تیما تەپا پێ یا یانا دھۆک نەشیا مفای ژ یاریگەھا خوە وەرگریت دەمێ وەکھەڤ بووی دگەل یانا ھندرین ب گۆلەکێ و سەرکێشا خولێ ژدەست دا، نوونەرا دویێ یا پارێزگەھێ یانا زاخۆ ژی ب سێ خالان ژ ھەولێرێ ڤەگەریا ژ چارچوڤێ یاریێن گەرا ١١ یا خولا ھەرێما کوردستانێ یا تەپا پێ بۆ یانێن نایاب.

یاریا ئێکێ دا ئەوا ل یاریگەھا دھۆک یا وەرزشی ھاتیە کرن تیما تەپا پێ یا یانا دھۆک نەشیا ڤێ گەرێ سەرکەفتنێ تومار بکەت دەمێ ب گۆلەکێ وەکھەڤ بووی دگەل یانا ھندرین د نیڤائێکێ دا ل خولەکا شەشێ ماجد راشد گۆلا پێشکەفتنێ بۆ یانا ھندرین تومارکر پشتی ڤێ گۆلێ یاریزانێن یانا دھۆک فشارەکا مەزن ل سەر گۆلا ھندرین پەیداکر بۆ راستڤەکرنا ئەنجامێ یاریێ و ئەڤ چەندە ژی ل خولەکا ٢٤ ب دەستڤەھات دەمێ یاریزانێ وێ موئەید عەبدولباست شیای گۆلەکێ بۆ یانا خوە دھۆک تومار بکەت.

د نیڤا دویێ دا سەرەرای فشارا یانا دھۆک و پەیداکرنا دەلیڤەیان چو ژ ئەنجامێ یاریێ نەھاتە گوھۆرین و یاری ب وەکھەڤی ب گۆلەکێ ب دووماھی ھات، ب ڤی ئەنجامی دھۆک سەرێ لیستا خۆلێ ژ دەست دا بۆ یانا پێشمەرگەیا ھەولێر.

ژلایێ خوە ڤە یانا زاخۆ شیا سەرکەفتنەکا گرنگ ژ دەرڤەی یاریگەھا خوە ل سەر یانا برایەتی تومار بکەت ب گۆلەکێ بێ بەرامبەر گۆلا زاخۆ ژلایێ یاریزانێ وێ نیھاد عەبدولکەریم ڤە ھاتە تومارکرن.

ئەڤرۆ نیوز:

سالەکا نوو، یانا ریال مەدرید چوو د ئارمانجەکا نوو دا و یاریا وێ یا شڤێدی دگەل یانا ڤیاریال ل یاریگەھا لاسیرمیکا مادریگال ژ چارچوڤێ یاریێن گەرا ١٧ یا لالیگایێ دا، لێ بێ ئومێدی دوبارە ل یانا مەلەکی پەیدابوو پشتی وەکھەڤ بووی ب دو گۆلان.

رۆژناما مارکا ئسپانی د راپورتەکێ دا بەحس ل وەکھەڤیا یانا ریال مەدرید کریە کو ھەتا رادەیەکێ مەزن پشتەڤانێن خوە بێ ئومێد کرن پشتی یا ب سەرکەفتی بوو ب دو گۆلان بەرامبەر گۆلەکێ لێ ستێرا یانا ڤیاریال سانتی کازورلا شیا وەکھەڤیێ تومار بکەت و یاریێ ب خالەکا گرنگ بۆ یانا خوە ب دووماھی بینت.

ب ڤێ چەندێ ریال مەدرید یا بەردەوامە ل سەر ئەنجامێن خراب یێن دەسپێکا سالا نوو تایبەت ل یاریێن دەرڤەی یاریگەھا خوە کو ل دەسپێکا سالا ٢٠١٢ ژی ٤١ یاری کرن تنێ شیا ھەشت سەرکەفتنا بینت ژ دەرڤەی یاریگەھا خوە، ھەمان ژێدەر دیارکر نوکە ئەنجامێن یانا مێرێنگێ د باش نینن ژ بەرکو ژ سەرجەمێ ١٧ یاریان د خولا ئسپانیا دا ٩ سەرکەفتن و سێ وەکھەڤی و ٥ خوسارەتی دەستڤەئیناینە، تۆرا گۆلا یانا مەلەکی ٢١ گۆل ل سەر ھاتینە تومارکرن بەرامبەر تومارکرنا ٢٦ گۆلان تنێ و ریال مەدرید یا بەردەوامە ل سەر ژ دەستدانا خالان و ئاستێ خراب ژ دەسپێکا وەرزێ ئەڤ سالە.

زێدەتر رۆژناما مارکا دیارکریە سالا نوو ریال مەدرید چو تشتێ نوو پێشکێش نەکر و ئاستێ تیمێ یێ خراب یێ بەردەوامە ب ڤێ چەندێ مفای ژ دەلیڤەیا گەھشتنا سەرێ لیستا خولێ و ھەڤرکیا یانا بەرشەلونە ژ نا بینت و جوداھی ناڤبەرا وێ و یانا کەتالونی بوونە ٧ خال.
دەربارەی یاریا شڤێدی رۆژناما مارکا دیارکر ریال مەدرید دوبارە نەشیا یاریێ زوو ئێکلا بکەت دەمێ رووبەرێ ل چەند جھەکا بۆ یانا ڤیاریال ڤەکری کو بشێت پاراستنا ئەنجامی بکەت، رۆژناما مارکا ئەو چەندە ژی دیارکریە ھێشتا دەسپێکا سالێ یە و دەلیڤا دەستڤەئینانا ناسناڤێ خولا ئسپانی بۆ یانا مەلەکی ب زەحمەت کەفت ژ بەرکو ئاست و ئەنجامێن یانا بەرشەلونە ل ڤی وەرزی جێگرن.

ئەڤرۆ نیوز:

ل دەمژمێر دو پشتی نیڤرۆ بریارە ئەڤرۆ بەردەوامی ب یاریێن گەرا یازدێ یا خولا ھەرێما کوردستانێ بھێنەدان و تێدا تیما تەپا پێ یا یانا دھۆک ل یاریگەھا خوە مێڤانداریا یانا ھندرین بکەت و زاخۆ ژی دێ بیتە مێڤانا یانا برایەتی.

یانا دھۆک نوکە سەرکێشا خولا ھەرێما کوردستانێ بۆ یانێن نایاب دکەت ب ٢٠ خالان و پێدڤی ب سەرکەفتنێ ھەیە د یاریا ئەڤرۆکە دا ھەمبەر یانا ھندرین یا ھەولێرێ داکو بەردەوامیێ بدەتە پێشەنگیا رێزبەندا خولێ ل ڤی وەرزی.

ل دۆر ڤێ یاریێ راگەھاندنا یانا دھۆک داخواز ژ پشتەڤانێن یانێ دکەت ئەڤرۆکە ل یاریگەھێ ئامادەبن بۆ پشتەڤانیا یانا خوە یا دایک ژبەرکو ئەو دێ بنە ئەگەر مورالا یاریزانان بلند بیت و ھەست ب گیانێ ھەڤرکیێ کەن دیسان مفای ژ یاریگەە و جەماوەرێ خوە بینن بۆ بەردەوامی دان ب ئەنجامێن باش.

ژلایێ خوە ڤە نوونەرا دویێ یا پارێزگەھێ یانا زاخۆ دێ ئەڤرۆکە یاریەکا بھێز دگەل یانا برایەتی یا ھەولێر کەت ژ دەرڤەی یاریگەھا خوە، یانا زاخۆ ژبلی سەرکەفتنێ چو ئەنجامێن دی د بەرژەوەندیا وێ دا نینن ژبەرکو دێ کەڤیتە د مەترسیا داکەفتنێ دا بۆ خولا پلە ئێک.

ژ یاریێن دی یێن ئەڤرۆکە ژ ھەمان گەر دێ ھێنە کرن شێروانە دگەل ئارارات و دەربەندیخان دگەل غاز شیمال و پێشمەرگەیا ھەولێر ژی ھەمبەر پێشمەرگەیا سلێمانیێ دێ یاریا خوە کەت.