ئەڤرۆ نیوز، نەوزاد ھلۆری:
وەلاتیێن دەڤەرا بارزان پارسا بو وەرگرتنا گازا سپى کوژمەکێ پارەی دابویە دەست لایەنێن شولەژێ، بەلێ ھەتا نوکە گازا سپى ب وان نەھاتیەدان و پارێ وان ژی نەھاتیە زڤراندن.
ئەنوەر ھوستانی وەلاتیەکێ دەڤەرا بارزانە و ل ناحیا بلێ ئاکنجیە بو ئەڤرۆ نیوز گۆت: (زستانا سالا بوری حوکمەت و لایەنێن شولەژێ پلێتا گازا سپى ل سەر ھەموو مالان دابەشکر و ئەو کەسێ ئەو پلێت وەرگرتی کوژمێ 50 ھزار دیناران دایە دەست وان دا کو د بەرامبەر دا بەرمیلەکا گازێ وەربگریت، بەلێ ب مخابنی ڤە ل پارسال وەرە ئەم چاڤەرێ وەرگرتنا پهترۆلێ و ھەتا نوکە ژی مە وەرنەگرتیە).
زێدەتر گۆت: (دەڤەرا بارزان، دەڤەرەکا چیایی یە و زستانەکا سەخت و دژوار ھەیە، پێدڤی یە ھەر ژ دەستپێکا زستانێ گازا سپى ل سەر وەلاتیان بھێتە دابەشکرن، زێدەباری کو نەفت ل سەر وەلاتیان نەھاتە دابەشکرن ب مخابنی ڤە پارێ وەلاتیان ژی نەھاتە زڤراندن).
ژ لایەکێ دی ڤە غەفور ئەحمەد قائیمقامێ قەزا مێرگەسوور بۆ ئەڤرۆ نیوز گۆت: (راستە و سالا بوری کوژمێ 50 ھزار دیناران ژ وەلاتیان بەرامبەر پێدانا بەرمیلەکا گازا سپى ھاتیە وەرگرتن، ھەتا نوکە ژی پهترۆل ب وان نەھاتیەدان، ئەڤێ یەکێ وەلاتی دلگران کرینە).
زێدەتر گۆت: (ئەم یێ بزاڤێن خورت دکەین کو ددەمێن بھێت دا بەرمیلەکا گازا سپى ل سەر وەلاتیان دابەش بکەین و چو کوژمێن پاران ژی ژ وان وەلاتیان ناھێته وەرگرتن یێن کو پێشتر کوژمێ پارەی دایی و پهترۆل وەرنەگرتین و پارێ وەلاتیان ناھێتە خوارن).
دەڤەرا بارزان ژ 72 گوند و پێنج ناحی و قەزایەکێ پێکدھێت و زێدەتر ژ 70% ژ دەڤەرەکا چیایی پێکدھێت، ب درێژاھیا زستانێ سەرمایەکا دژوار ھەیە و پرانیا دەڤەرێن وێ بەفرەکا زور لێ دباریت.
نيشاندان