ئەڤرۆ نیۆز، قائید میرۆ:
کۆمسیۆنا بلندا ھەلبژارتنان یا بەردەوامە لسەر ئێکلاکرنا ئەنجامێن ھەلبژارتنێن پەرلەمانێ کوردستانێ و بەرپرسەکێ کۆمسیۆنێ ژی پێشبینی کر حەفتیا بھێت ئەنجامێن دوماھیێ بھێنە راگەھاندن.
دکتۆر جووتیار ئاکرەیی، ئەندامێ کۆمسیۆنا ھەلبژارتنێن ھەرێما کوردستانێ بۆ ئەڤرۆ نیۆز دیارکر” کۆمسیۆن یا بەردەوامە لسەر ئێکلاکرنا سکالا و دەنگێن ھەلبژارتنێن پەرلەمانێ کوردستانێ کو زێدەتری ٢٠٠ سندۆقا قڕدێلەیێن سۆر پێڤەنە و پێدڤیە کۆمسیۆن گورەی قانوونێ ئێکلا بکەت، ھەر سندۆقەکا پێدڤی ب سووتنێ بکەت دێ دەنگێن سندۆقێ ھێنە ھەلوەشاندن.
ئەڤی بەرپرسێ کۆمسیۆنێ ئاماژەکر” گیربوونا راگەھاندنا ئەنجامێن دوماھیێ یێن ھەلبژارتنانژی بۆڤێ چەندێ ڤەدگەڕیت کۆمسیۆن دخوازیت ب ئێکجاری سکالایا ئێکلا بکەت و دووڤدا ئەنجامێن دوماھیێ یێن ھەلبژارتنان بھێنە راگەھاندن.
دکتۆر جووتیار ئاکرەیی دبێژیت” پێشبینی دکەین حەفتیا بھێت کارێن کۆمسیۆنێ دوماھی بھێن و ئەنجامێن دوماھیێ یێن دەنگدانا ٣٠ی ئیلوونا بۆری بھێنە ئاشکراکرن.
تێتە زانین ئەڤە ١٢ رۆژ بۆرین لسەر رێڤەچوونا ھەلبژارتنان ھێشتا کۆمسیۆنێ ٨٥%ێ یا ئەنجامێن دەنگان ئاشکراکرینە و ١٥%ێ یا ئەنجامان مایە بھێتە راگەھاندن.
ئەڤرۆ نیۆز، قائید میرۆ
شەڤا بۆری به‌له‌مه‌كا پەنابەران بن ئاڤا دەریایێ ئیجەی کەفت و سەرۆکێ فیدڕاسیۆنا سەرتاسەریا پەنابەران ژی دبێژیت، ھژمارەک قوربانیێن روودانا شەڤا بۆری خەلکێ پارێزگه‌ها دھۆکێ نە.
ئامانج عەبدولا، سەرۆکێ فیدراسیۆنا پەنابەران بۆ ئەڤرۆ نیۆز دیارکر” ل وەلاتێ تورکیا یەختەکا تژی پەنابەر بن ئاڤێ کەفتیە و د ئەنجامدا ھژمارەکا پەنابەران بووینە قوربانی کو ھژمارەکا قوربانیان خەلکێ ھەرێما کوردستانێ و پارێزگەھا دھۆکێ نە”.
ئامانج عەبدولا ی ئاشکراکر” ھێشتا زپێزانينێن دروست نەگەھشتینە فیدڕاسیۆنێ و ئەم مژوولی ئەنجامان دکەین، بەلێ ب گۆرەی پێزانينێن دەستپێکی خێزانەکا دھۆکی دناڤا به‌له‌مێ دابوویە و ژنەک و دو زارۆک خەندقینە کو تەرمێ زارۆیان ھاتیە دیتن، بەلێ ھێشتا چارەنڤیسێ دایکا وان دیار نینە”.
ئه‌ڤرۆ نیوز، نه‌وزاد هلۆرى:
وه‌زاره‌تا خواندنا بلند و ڤه‌كولینێن زانستى د كونگره‌یه‌كێ رۆژنامه‌ڤانى دا ناڤێن قوتابیێن وه‌رگرتى ل زانكۆ و په‌یمانگه‌هان راگه‌هاندن.
خەتاب شێخانی، رێڤه‌به‌رێ گشتیێ كارگێرى ل وه‌زاه‌رتا خواندنا بلند و ڤه‌كولینێن زانستى د كونكره‌یێ رۆژنامه‌ڤانى دا دیاركر كو ب رێژا 53% ژ سه‌رجه‌م قوتابیێن ده‌رچوى ل رێزا 12ێ ئاماده‌یى دێ هێنه وه‌رگرتن و گۆت: (وه‌رگرتنا قوتابیان ل زانكو و په‌یمانگه‌هان ب گوره‌ى نمره‌یێ بویه ، و ئه‌ڤ ساله 39 هزار قوتابى هاتینه وه‌رگرتن، و ل هنده‌ك پشكان قوتابیان پێشكێش نه‌كریه و كورسى ب ڤالا ماینه و ره‌نگه وه‌زاره‌ت كار لسه‌ر وه‌رگرتنا هێشتا قوتابیان بكه‌ت).
زێده‌تر گۆت: (داخوازێ ژ هه‌موو قوتابیان دكه‌ین كو هه‌تا روژا 20ێ هه‌یڤێ سه‌ره‌دانا وان جهان بكه‌ن یێن كو ناڤێن وان هاتى ، و سوبه‌هى مالپه‌رێ وه‌زاره‌تێ دێ ڤه‌بیت و قوتابى دشێن سه‌ه‌ردانێ بو بكه‌ن بو دیتنا ناڤێن خوه ، و هه‌ر قوتابیه‌كێ كو نه‌رازیوبن ژى هه‌یى دشێت نه‌رازیبونێ ئاراسته بكه‌ت).
ل ھەرێما کوردستانێ قەبارێ خێزانێ بەرەڤ کێمیێ دچیت و ئاستێ خواندەڤانیێ ژی بەرەڤ زێدەوونێ دچیت، ئەڤە د دەمەکی دایە کو ھەتا سالا 2004 ژی قەبارێ خێزانێ یێ مەزن و بێ سنووری بوو و ئاستێ خواندنێ ل ھەرێما کوردستانێ ب تنێ 54% بوو و نھا گەھشتیە 79%.
رێڤەبەرێ گشتیی وەزارەتا پلاندانانێ ل ھەرێما کوردستانێ ئاشکرا کر کو پتریا خێزانێن گەنج یێن نھا دھێنە پێکئینان ئێک ھەتا سێ زارۆیان زێدەتر نائینن و ئەڤە ژی وێ دگەھینیت کو رەنگە ل سالێن بھێت قەبارێ خێزانێ ل ھەرێما کوردستانێ ھێشتا کێمتر ژی لێ بھێت.
زاگرۆس فەتاح، رێڤەبەرێ گشتیی وەزارەتا پلاندانانێ ل ھەرێما کوردستانێ بۆ ئەڤرۆ دیار کر، قەبارێ خێزانێ ل ھەرێما کوردستانێ ھەتا سالێن ھەشتیێیان ژی نێزیکی6.5 کەسان بوو د ئێک خێزان دا، بەلێ نھا قەبارێ خێزانێ بۆ ژێر 5 کەسی دا د ئێک خێزان دا بەرەڤ کێمبوونێ چوویە و ئەڤە ژی بۆ چەند ئەگەران ڤەدگەریت، ئەو ژی بۆ ھندێ ڤەدگەریت کو پێدڤیێن ژیانێ نھا زۆر و ب تەکلیفە کەفتینە و فرەژنی ل ھەرێما کوردستانێ ھاتیە سنووردارکرن و رێژەیا خواندەڤانیێ دناڤ ئافرەتان دا زێدەتر لێ ھاتیە و گۆت: ئەگەر ل ھەر وەلاتەکی قەبارێ خێزانێ ژ شەش کەسان زێدەتر بیت، ئەو وەلات دێ ھێتە ھژمارتن ژ وەلاتێن ھەژار ل جیھانێ.
ئاشکرا ژی کر کو پتریا خێزانێن گەنج یێن نھا دھێنە پێکئینان ئێک ھەتا سێ زارۆیان زێدەتر نائینن و ئەڤە ژی وێ دگەھینیت کو رەنگە ل سالێن بھێت قەبارێ خێزانێ ل ھەرێما کوردستانێ ھێشتا کێمتر ژی لێ بھێت.
زاگرۆس ئاماژە دا وێ یەکێ ژی کو ھەتا سالا 2004ێ ژی ل ھەرێما کوردستانێ ئاستێ خواندەڤانیێ 54%ێ بوو، بەلێ نھا بۆ 76%ێ زێدەتر لێ ھاتیە و ئەڤە ژی وێ دگەھینیت کو حۆکمەتا ھەرێما کوردستانێ بەرنامەیەکێ باش دانایە بۆ نەھێلانا نەخواندەڤانیێ و گۆت: ل ھەرێما کوردستانێ 72% ژ رەگەزێ مێ و 86% ژ زەلامان د خواندەڤانن.
زاگرۆس فەتاح، رێڤەبەرێ گشتیی وەزارەتا پلاندانانێ ل ھەرێما کوردستانێ خویا کر کو ل ھەرێما کوردستانێ رێژەیا مرنێ دناڤ زارۆیان دا کێمتر لێ ھاتیە، چونکو ل سالا 2011 د رێژەیا 1000 زارۆیان دا 28 زارۆیان سالانە گیانێ خوە ژ دەست دا و نھا بۆ 23 زارۆیان کێمتر لێ ھاتیە.
ئەڤرۆ نیوز ، زنار تۆڤی:
پشتی عادل عەبدولمەهدی راسپاردیێ پێکئینانا حوکمەتا نوو یا عیراقێ دەرگەھێ خوە بەربژارکرنێ ژبۆ پۆستێن وەزارەتان ڤەکرین، هەتا نوکە 36 ھزار کەسان سیڤیێن خوە پێشکێشکرینە و داخواز کریە ببنە وەزیر و 96 کەس ژ وان وەلاتیێن دهۆكێ نه.
بەری دو رۆژان عادل عەبدولمەھدی راسپاردیێ پێکئینانا حوکمەتا نوو یا عیراقێ دەرگەھێ خوە بەربژارکرنێ بۆ پۆستێ وەزارەتان ڤەکریە و لدووڤ راگەھاندنەکا نڤێسینگەھا عەبدولمەھدی، هەتا نوکە 36 ھزار کەسان سیڤیێن خوە پێشکێش کرینە و داخواز کریە ببنە وەزیر د حوکمەتا نوودا، کو ژنان 15% ژ وێ هژمارێ سیڤیێن خوە پێشکێش کرینە.
هەروەسا نڤێسینگەھا عادل عەبدولمەھدی دیارکریە ژی: کو پتری 9 ھزاران ژ وێ هژمارا سیڤیێن وان هاتین د تەمامن لدووڤ وان رێنمایێن پێشتر ھاتینە راگەھاندن و لدووڤ وان داتایێن ھاتینە بەلاڤکرن ژ ھەر چار پارێزگەھێ ھەرێما کوردستانێ 448 کەسان سیڤیێن خوە پێشکێش کرینە کو ببنە وەزیر د حوکمەتا داهاتی دا.
ئه‌ڤرۆ نيوز:
بەرپرسەکێ وەزارەتا ئەوقاف و کاروبارێن ئایینی یا حوکمەتا ھەرێما کوردستانێ دیار کر کو وەزارەت مژوولی پێداچوونێ یە د حوجرە و قوتابخانێن ئایینی دا و گۆت: “ئاستێ مامۆستایێن ئایینی دێ ھێتە بلندکرن و پێدڤیە مامۆستایێن ئایینی رۆل د ھشیارکرنا وەلاتیان ھەبیت، ب تایبەتی بۆ پتر بەلاڤکرنا ئاشتیا جڤاکی.
دکتۆر سەباح بەرزنجی، ئەندامێ بۆردا وەزارەتا ئەوقاف و کاروبارێن ئایینی بۆ رۆژناما ئەڤرۆ دیار کر کو وەزارەت نوکە مژوولی رێکخستنا حوجرە و قوتابخانێن ئایینی یە ل سەرتاسەری ھەرێما کوردستانێ بشێوەیەکی ھەر کەسەکێ بسپۆری نەبیت نەشێت ببیتە مامۆستا ل قوتابخانە و حوجرەیێن ھەرێما کوردستانێ، ھەروەسا دانا مۆلەتا مامۆستایێن ئاینی دێ ھێتە رێکخستن و نابیت ھەر کەسەک سەر بخوە مۆلەتا پێشنڤێژی و گۆتار خوینیێ بدەتە قوتابیێن حوجرە و قوتابخانێن ئایینی و گۆت: “یا ئاشکرایە ھژمارەکا مەزن یا حوجرە و قوتابخانێن ئایینی ل ھەرێما کوردستانێ ھەنە و پێدڤی ب پێداچوون و رێکخستنێ ھەنە”.
ناڤھاتی ئاماژە دا وێ چەندێ کو وەزارەتا ئەوقاف و کاروبارێن ئایینی دخوازیت ل داھاتی کار بۆ ڤێ چەندێ بکەت مامۆستا پێگیریێ ب ئەڤێ پەیاما خوە بکەنبۆ پێکڤەژیانێ و زێدەتر پیشەیانە کار بکەن و گۆت: “ئاستێ مامۆستایێن ئایینی دێ ھێتە بلندکرن داکو رۆل د ھشیارکرنا وەلاتیان دا ھەبیت و بۆ ڤێ مەرەمێ دێ پێداچوون ب پڕۆگرامێن حوجرە و قوتابخانێن ئایینی دا ھێتەکرن”.
ئه‌ڤرۆ نیوز، زنار تۆڤى:
لدووڤ پێشبینیا ده‌سته‌یا گشتى یا گه‌شتوگۆزارێ ل هه‌رێما كوردستانێ ئه‌ڤ ساله دێ دو ملیۆن نیڤ گه‌شتیارى سه‌ره‌دانا هه‌رێما كوردستانێ كه‌ن و ل سالێن بهێت دێ ئه‌ڤ رێژه گه‌له‌ك زێده‌تر لێ هێت.
نادر روستى په‌یڤدارێ ده‌سته‌یا گشتى یا گه‌شتوگۆزارێ ل هه‌رێما كوردستانێ بۆ ئه‌ڤرۆ نیوز دیاركر: ئه‌ڤ ساله پترى دو ملیۆن گه‌شتیاران سه‌ره‌دانا هه‌رێما كوردستانێ كریه و ئه‌ڤ هژماره ژى گه‌له‌ك یا دلخۆشكه‌ره، هه‌ر چه‌نده گه‌شتیاران سه‌ره‌دانا هه‌رسێ پارێزگه‌هێن هه‌رێما كوردستانێ كریه، لێ پرانیا وان گه‌شتیاران سه‌ره‌دانا پایته‌ختێ هه‌رێما كوردستانێ كریه، هه‌روه‌سا ل سالا بورى دو ملیۆن و سه‌د هزار گه‌شتیاران هه‌تا دوماهیا سالێ سه‌ره‌دانا هه‌رێما كوردستانێ كربوو، هه‌ر چه‌نده نوكه ئه‌م د هه‌یڤا چریا ئێكێ داینه و ئه‌ڤ ساله لدووڤ پلانا مه دێ دو ملیۆن و نیڤ گه‌شتیار هه‌تا دووماهیا سالێ بهێنه هه‌رێما كوردستانێ، ناڤهاتى زێده‌تر گۆت: مه پلانه‌كا ستراتیجى هه‌یه و ئه‌م لدووڤ وێ پلانا ستراتیجى كارێ خوه دكه‌ین، دیسا لدووڤ وێ پلانێ دڤێت ئه‌م هژمارا گه‌شتیاران بۆ هه‌رێما كوردستانێ زێده بكه‌ین و دڤێت ئه‌م كه‌رتێ گه‌شتیارى به‌ره‌ف پێشڤه ببه‌ین، هه‌روه‌سا ئه‌و پلانا مه یا ستراتیجى پترى 10 ته‌وه‌ران ب خوه‌ڤه دگریت، هه‌ر ته‌وه‌ره‌ك ژى یێ تایبه‌ته ب واره‌كێ تایبه‌ت یێ گه‌شتیارى ڤه، هه‌ر سال ئه‌م ل سه‌ر وان هه‌موو ته‌وه‌ران كار دكه‌ین، هه‌روه‌سا ئه‌م دخوازین كو په‌رله‌مانێ نوو و حوكمه‌تا نوو یا هه‌رێما كوردستانێ هاریكاریا مه بكه‌ن و ده‌ستێ وان یێ ڤه‌كرى بیت د وارێ گه‌شتیارى دا، ژ پێخه‌مه‌ت بشێین زێده‌تر كه‌رتێ گه‌شتیارى به‌ره‌ف پێشڤه ببه‌ین،بتایبه‌تى كو مه ره‌شنڤیسه‌كێ قانوونى د وارێ گه‌شتیارى به‌رهه‌ڤكریه، ئه‌م داخواز دكه‌ین كو حوكمه‌تا هه‌رێمێ و په‌رله‌مان ره‌زامه‌ندیێ ل سه‌ر بده‌ت، چونكى ئه‌ڤه دێ هوكاره‌كێ ستراتیجى یێ گرنگ بیت بۆ پێشخستنا كه‌رتێ گه‌شتیارى ل كوردستانێ.
نادر روستى ئه‌و ژى گۆت: پێدڤیه هه‌موو داموده‌زگه‌هێن حوكمه‌تا هه‌رێما كوردستانێ پشته‌ڤانیێ ل مه بكه‌ن، بۆ دابینكرنا بوودجه‌كێ ژبۆ جێبه‌جێكرنا وێ پلانا مه ل ده‌سته‌یا گه‌شتوگۆزارى ئاماده‌كرى، چونكى هه‌كه بوودجه‌ك ل به‌ر ده‌ستێ مه‌بیت، ئه‌م دێ شێین پلانا خوه یا درێژخایه‌ن گه‌له‌ك باش برێڤه به‌ین، دیسا هه‌كه ئه‌و قانوونا مه دارێژتى ل په‌رله‌مانى بهێته په‌سه‌ندكرن، ئه‌م دێ پێشكه‌فتنه‌كا باش ئێخینه كه‌رتێ گه‌شتیارى ل كوردستانێ، هه‌روه‌سا هه‌كه گه‌شتوگۆزار ببیته خودان ده‌زگه‌هه‌ك و خودان ده‌ستهه‌لاته‌كا سه‌ربه‌خۆ بیت، دێ ڤێ چه‌ندێ كاریگه‌ریه‌كا باشتر هه‌بیت بۆ پێشخستنا ڤى كه‌رتى ل هه‌رێما كوردستانێ، له‌وما هه‌كه ئه‌ڤ پێنگاڤه هه‌موو بهێنه بجهئینان دێ كه‌رتێ گه‌شتیارى پێشڤه‌چوونه‌كا به‌رچاڤ ب خوه‌ڤه بینیت.
په‌یڤدارێ ده‌سته‌یا گشتى یا گه‌شتوگۆزارێ ل هه‌رێما كوردستانێ ئه‌و ژى دیاركر: مه گه‌له‌ك كێشه و ئاسته‌نگ د كه‌رتێ گه‌شتیارى دا هه‌نه، نوكه ئه‌م ل ده‌ستپێكا پێشخستنا كه‌رتێ گه‌شتیارى داینه ل هه‌رێما كوردستانێ، دیسا هنده‌ك بابه‌ت هه‌نه دبنه رێگر ل پێشیا كارێ مه و ئه‌م نه‌شیاینه ب دروستى كارێ خوه بكه‌ین، هه‌روه‌سا ناڤوده‌نگیا عیراقێ ئێكه ژ كێشێن هه‌ره سه‌ره‌كى بۆ كه‌رتێ گه‌شتیارى ل هه‌رێما كوردستانێ و چونكى ئه‌م ژى پشكه‌كین ژ عیراقێ، دیسا هه‌تا نوكه لده‌ف خه‌لكێ جیهانێ عیراق ب ده‌ڤه‌ره‌كا نه ئارام و جهێ شه‌ر و ته‌قین ئالۆزیان دهێته نیاسین، له‌وما ژبه‌ر ڤێ چه‌ندێ گه‌شتیار نه‌شێن قه‌ستا هه‌رێما كوردستانێ ژى بكه‌ن، كوردستانێ ژى وه‌كو عیراقێ دهژمێرن، ئه‌ڤێ وه‌كریه كو گه‌شتیارێن بیانى نه‌هێنه كوردستانێ، هه‌روه‌سا ل سه‌ر ئاستێ نافخۆ، ئه‌و پرۆژێن مه دڤێت چێكه‌ین و ئه‌وێن ژلایێ كه‌رتێ تایبه‌ت ڤه بهێنه جێبه‌جێكرن، به‌رده‌وام روو ب روو كێشا زه‌ڤى و زاران دبیت ل گه‌ل وه‌لاتیان و هه‌تا نوكه حوكمه‌تا هه‌رێما كوردستانێ چو بوودجه بۆ ته‌رخان نه‌كرینه، كو خودانێن وان زه‌ڤى و زاران بهێنه قه‌ره‌بۆكرن، ل ده‌مێ ئه‌و پرۆژه دهێنه چێكرن، ئه‌ڤه ژى ئێكه ژ كێشێن هه‌ره مه‌زن، دیسا هشیاریا گشتى ل سه‌ر هه‌موو ئاستان دا وه‌كو پێدڤى نینه، له‌وما هندى هشیاریا گه‌شتیارى زێده ببیت، دێ وه‌به‌رهێنان د كه‌رتێ گه‌شتیارى دا زێده‌تر لێ هێت و دێ هه‌موو جۆرێن گه‌شتیارى و كه‌لتۆرێ گه‌شتیارى ژى به‌ره‌ف پێشڤه‌چوونێ ڤه چن، هه‌روه‌سا ل هنده‌ك ده‌ڤه‌ران رێكێن هاتنوچوونێ وه‌كو پێدڤى نینن و دیسا ل هنده‌ك ده‌ڤه‌رێن دوور پێدڤیه قه‌رێن گه‌شتیارى بۆ وه‌لاتیان بهێنه‌دان، داكو بشێن پرۆژێن باش ل وان جهان ژى ڤه‌كه‌ن.
ئەڤرۆ نيوز:
سەرۆکێ لیژنا پیشەسازی و سۆتەمەنیێ ل جڤاتا پارێزگەھا دھۆکێ بۆ رۆژناما ئەڤرۆ دیار کر کو حوکمەتا ھەرێما کوردستانێ دشێت نوکە بھایێ لترا پانزینێ وەکو باژێرێ مووسل بکەتە 450 دینار، لێ جڤاتا پارێزگەھا دھۆکێ چو دەستھەلات نینن کو دەستکاریێ د گرانکرن و ئەرزانکرنا بھایێ لترا پانزینێ دا بکەت.
عەبدولسەمەد تێلی، سەرۆکێ لیژنا پیشەسازی و سۆتەمەنیێ ل جڤاتا پارێزگەھا دھۆکێ ئاشکرا کر کو پشتی ل رۆژێن بۆری بھایێ لترا پەنزینا نۆرمال بوویە 790 دینار و یا محەسن بوویە 890 دینار، بھا ھەر وەکو خوە مایە و جڤاتا پارێزگەھا دھۆکێ چو کۆمبوون بۆ ئەرزانکرنا بھایێ لترا پانزینێ ئەنجام نەداینە، چونکی جڤاتا ناڤھاتی نەشێت دەستکاریێ د گرانکرن و ئەرزانکرنا بھایێ لترا پانزینێ دا بکەت.
ناڤھاتی ئاماژە دا وێ چەندێ کو د شیانێن جڤاتا وەزیران و وەزارەتا سامانێن سرۆشتی دایە بھایێ لترا پەنزینێ کێم بکەن، وەکو سالا 2013 و 2014 حوکمەتێ پەترۆلا خام ددا پارزینگەھێن ھەرێمێ و ھەمبەر پارزنینا ھەر بەرمیلەکێ ژی 17 دۆلار ددانێ و حوکمەتێ ئەو پانزین دئینا پانزینخانێن ھەرێمێ و د فرۆت و ئەو پارە دھاتە کۆمکرن و بۆ وەزارەتا سامانێن سرۆشی دھاتە رەوانەکرن، بەلێ نوکە باژێرێ مووسل مفایی ژ ڤێ چەندێ دبینیت و پەترۆلا خام د دەتە پارزینگەھێن ھەرێمێ و پشتی دھێتە پارزنین لترا پانزینێ ب 450 دیناران ددەتە وەلاتیان ژ بەر ڤێ چەندێ ھەکە جڤاتا وەزیرێن ھەرێمێ بڤێت دشێت نوکە پەترۆلا خام بدەتە پارزینگەھان و بھایێ لترا پانزینێ ل ھەرێمێ ژی بکەتە 450 دینار”.
ئەڤرۆ نيوز:
ئەندامەکێ مەکتەبا سیاسی یا پارتی دیموکراتی کوردستان دیارکر، بۆچوونا پارتی دیموکراتی کوردستان ئەوە، کو پێدڤیە حوکمەتەک بھێتە پێکئینان شاشیێن بەرێ دووبارە نەبنەڤە،پارتی دخوازیت حوکمەتا نوو د بەرژوەندیا مللەتێ کوردستانێ دابیت، وان سۆزان بجە بینیت، ئەوێن د دەمێ ھەوا ھەلبژارتنان دا ب خەلکی ھاتیە دان ،پێدڤیە حوکمەتەکا کارا و بھێز بیت، حوکمەتا نوویا کوردستانێ ھەموو بزاڤێن پارتی دیموکراتی کوردستان ژ بۆی وێ چەندێ بن حوکمەتەکا ب ھێز ل کوردستانێ ھەبیت.
ئەحمەد کانی ئەندامێ مەکتەبا سیاسی یا پارتی دیموکراتی کوردستان و بەرپرسێ لقێ دو بۆ روژناما ئەڤرۆ گوت: پارتی رێزێ ل ئەنجامێن ھەلبژارتنان و کورسیێن لایەنێن سیاسی دگریت، ل ھەلبژارتنان ل گوری ئەنجامێن ھەلبژارتنان ھەر لایەنەکێ بڤێت پشکداری حوکمەتا نوویا کوردستانێ بیت، دەرگەھێ پارتی دیموکراتی کوردستان وەک ئێکەما ھەلبژارتنان دەرگەھێ ڤەکریە دێ پێشوازیێ ل ھەموو لایەنان کەت یێن بڤێت پشکداربن ل پێکئینانا کابینەیا نوویا حوکمەتا ھەرێما کوردستانێ ل گوری ئەنجامێن ھەلبژارتنا.
ئەحمەد کانی دووپاتکر، ھەبوونا ئۆپۆزسیۆنەکا ساخلەم یا پێدڤی و فەرە، د دبەرەژوندیا گشتی دا بیت، بەلێ ھەکە کارێ ئۆپۆزسیۆنێ ژ بۆی بەرژەوەندیا پارتەکا سیاسی بیت، بجھکرنا بەرنامێ وێ پارتێ بیت، ب ناڤێ ئۆپۆزوسیۆنێ دێ ئالۆزیان وەک ل دەمێ بۆری مە دیتی دروستکەت، ئۆپۆزسیۆن پێنگاڤەکا ساخلەمە ل پرۆسا سیاسی ل ھەموو وەلاتێن دونیایی، تایبەت ل وەلاتێن پێشکەفتی ئەم ژ ی ل کوردستانێ حەز دکەین ئۆپۆزسیۆنەکا ساخلەم مە ھەبیت، ژ بۆی بەرژەوەندیا خەلکێ کوردستانێ ل گورەپانا سیاسی دابیت،ھەبوونا ئۆپۆزسیۆنێ خالەکا باشە ل پرۆسا سیاسی بۆ ب ھێزکرنا ھەر حوکمەتەکێ بەلێ ھەکە کارێ ئۆپۆزسیۆنێ بۆ تێکدان و رەخنەیا تێکدەرانە نەبیت، کراێ چاڤدێریکرن و چارەکرنا ئاریشان ئەو ئۆپۆزسیۆن بکەت .
نيشاندان