ئه‌ڤرۆنيوز:

باليۆزخانا ئه‌مريكا ل به‌غدا ل سه‌ر ده‌نگوباسێ كۆمبوونا دناڤبه‌را برێت ماكگۆرك هنارتيێ تايبه‌تێ سه‌رۆكێ ئه‌مريكى بۆ هه‌ڤپه‌يمانيا شه‌رێ دژى داعشێ  وقاسم سلێمانى فه‌رماندێ فه‌يله‌قا قودس يا سه‌ر ب له‌شكرێ پاسداران يێ ئيرانى، رۆهنكرنه‌كێ به‌لاڤ دكه‌ت.

رۆژناما (الجريده‌) يا كوه‌يتى، ئه‌ڤرۆ شه‌مبيێ 15/9/2018 ل سه‌ر زارێ چه‌ند ژێده‌رێن ئاگه‌هدار دناڤ له‌شكرێ پاسداران يێ ئيرانى دا، به‌لاڤكربوو كو ل رۆژا سێشه‌مبيا بۆرى قاسم سلێمانى وبرێت ماكگۆرك كۆمبوونه‌كا نهينى ئه‌نجامدايه‌ وتێدا ل سه‌ر چاره‌سه‌ركرنا كێشا پێكئينانا حوكمه‌تا عيراقێ وراگرتنا زێده‌بوونا ناكۆكيێن دناڤبه‌را وان دا رێككه‌فتينه‌.

شارلز كوول، په‌يڤدارێ باليۆزخانا ئه‌مريكى ل به‌غدا، درۆهنكرنه‌كێ دا ل سه‌ر تۆرا جڤاكى يا تويته‌رى، سه‌باره‌ت وى ده‌نگوباسى به‌لاڤكر” ئه‌و ده‌نگوباسه‌ يێ دووره‌ ژ راستيێ وكۆمبوونا ب وى شێوه‌ى نه‌هاتيه‌ ئه‌نجامدان”.

ئەڤرۆ نیۆز، قائید میرۆ:

پەرلەمانتارەکێ پارتی ل بەغدا ئاشکراکر، رێکەفتنا ناڤبەرا پارتی و لایەنێن سونی ھاتە پێشێلکرن و بۆ ئەگەرێ سەرنەکەفتنا بەربژێرێ پارتی بۆ پۆستێ جێگرێ سەرۆکێ پەرلەمانێ عێراقێ.

محەمەد ئەمین مزیری، پەرلەمانتارێ پارتی ل پەرلەمانێ عێراقێ بۆ ئەڤرۆ نیۆز دیارکر” ئەڤرۆ ئەم گەل لایەنێن سونی گەھشتبووینە رێکەفتنێ، کو ئەم دەنگ بدەینە بەربژێرێ وان محەمە حەلبووسی بەربژێری سونی بۆ پۆستێ سەرۆکێ پەرلەمانی و ھەمبەردا ئەو دەنگی بدەنە بەربژێرێ پارتی دکتۆر بەشیر خەلیل بۆ پۆستێ جێگرێ سەرۆکێ پەرلەمانی.

مزیری گۆت: “مخابن پشتی مە دەنگ دايی بۆ بەربژێرێ سونی و سەرکەتی، دەمێ سێ بەربژێرێن کورد ھاتینە بەردەنگدانێ لایەنێ سونی وەک پێدڤی دەنگ نەدا بەربژێرێ پارتی و ئەڤەژی بۆ ئەگەر دکتۆر بەشیر خەلیل نەشیا رێژا قانوونیا دەنگان ب دەستڤە بینیت، خۆلا دویێ یا دەنگدانێ دێ سبەی ئێک شەمبیێ ھێتە رێڤەبرن.

ژ لایێ خۆڤەژی ژێدەرەکی لپەرلەمانێ عێراقێ بۆ ئەڤرۆ نیۆز خویاکر” لایەنێ سونی خیانەتکر و سۆزا خوە بجە نە ئینا بۆ دەنگدانێ ب بەربژێرێ پارتی دکتۆر بەشیر خەلیل.

ئه‌ڤرۆنيوز:

ژێده‌ره‌كى ژ ناڤ ئاڤاهيێ په‌رله‌مانێ عيراقێ بۆ ئه‌ڤرۆنيوز دياركر كو پشتى به‌شير حه‌داد په‌رله‌مانتارێ پارتى 152 ده‌نگێن په‌رله‌مانتاران ب ده‌ستڤه‌ئيناين د هه‌لبژارتنا جێگرێ دويێ يێ سه‌رۆكێ په‌رله‌مانێ عيراقێ، سه‌رۆكێ ده‌مكى يێ په‌رله‌مانى بريارا دووباره‌كرنا پرۆسا هه‌لبژارتنا جێگرێ دويێ يێ سه‌رۆكێ په‌رله‌مانى ده‌ركر.

وى ژێده‌رى زێده‌تر بۆ ئه‌ڤرۆ نيوز گۆت” به‌شير حه‌داد 152 ده‌نگ ب ده‌ستڤه‌ئينان وئه‌حمه‌د حه‌مه‌ ره‌شيد 45 ده‌نگ وموسه‌نا ئه‌مين 21 ده‌نگ و22 ده‌نگ ژى هاتن هه‌لوه‌شاندن و29 كاغه‌زێن ده‌نگدانێ ژى سى بوون”.

دياركر ژى” ژبۆ وێ چه‌ندێ كه‌سه‌ك بهێته‌ هه‌لبژارتن پێدڤيه‌ 166 ده‌نگان ب ده‌ستڤه‌ بينيت، له‌وما دێ هه‌لبژارتنا جێگرێ دويێ يێ سه‌رۆكێ په‌رله‌مانى هێته‌ دووباره‌كرن”.

ئه‌ڤرۆنيوز:

به‌شير حه‌داد په‌رله‌مانتارێ پارتى وبه‌ربژارێ پارتى وئێكه‌تيێ بۆ پۆستێ جێگرێ دويێ يێ سه‌رۆكێ په‌رله‌مانێ عيراقێ ب كۆمكرنا 152 ده‌نگان پۆستێ جێگرێ دويێ يێ سه‌رۆكێ په‌رله‌مانى ب ده‌ستڤه‌ئينا.

ئه‌ڤرۆنيوز:

وه‌زيرێ به‌رگريێ به‌رێ يێ عيراقێ كو به‌ربژار بوو بۆ پۆستێ سه‌رۆكێ په‌رله‌مانێ عيراقێ، ل دۆر وى پۆستى دبێژيت ب 30 مليۆن دۆلاران هاته‌ كرين.

خالد عوبه‌يدى سه‌رۆكێ ليستا (بيارق الخير) ل ده‌نگدانا نهێنى دا ئه‌ڤرۆ شه‌مبيێ 15/9/2018 ب ده‌ستڤه‌ئينانا 89 ده‌نگان به‌رامبه‌ر محه‌مه‌د حه‌لبوسى هاته‌ دوراندن كو حه‌لبوسى 169 ده‌نگ بده‌ستڤه‌ئينان وبوو سه‌رۆكێ په‌رله‌مانێ عيراقێ.

عوبه‌يدى دئێكه‌م كارڤه‌دان دا ل به‌رامبه‌ر هه‌لبژارتنا حه‌لبوسى ل تۆرا جڤاكى يا فه‌يسبووكى به‌لاڤكر” بلا ئه‌و خێزانا گه‌نده‌ل ب كه‌ره‌ستێ خوه‌ يا دلخوه‌ش بيت كو (وه‌كو دبێژن) ئه‌و پۆسته‌ ب 30 مليۆن دۆلاران هاتيه‌ كرين، هه‌روه‌سا بلا ئه‌و گه‌نده‌ل دلخوه‌ش بن كو نوكه‌ پيرۆزباهيێ ل هه‌ڤدو دكه‌ن، سه‌باره‌ت عيراقێ وعيراقيان ژى دبێژم، خودێ ل پشتا هه‌وه‌ بيت.

ژلايێ خوه‌ڤه‌ مه‌شعان جبوورى په‌رله‌مانتارێ به‌ري يێ عيراقێ به‌لاڤكر”ئه‌حمه‌د حبوورى پارێزگه‌رێ سه‌لاحه‌دين ل به‌رامبه‌ر 10 مليۆن دۆلاران ل به‌رامبه‌ر حه‌لبوسى خوه‌ ڤه‌كێشا”