ئه‌ڤرۆ نيوز:

بسپۆرەکێ کاروبارێن سیاسی یێن تورکیا دیار دکەت کو ئەمریکا ب سالان تورکیا مەزن کر و ئەمریکا ھەتا نھا ژی تورکیا وەکو زارۆیێ خوە دبینیت، لێ پشتی ئەردۆگان ھاتە سەر دەستھەلاتێ رۆژ ب رۆژێ تورکیا ژ ئەمریکا دوور کەفتیە و نھا ژی مەترسیێن مەزن بۆ بەرژەوەندیێن ئەمریکا ل رۆژھەلاتا ناڤین دروست کریە و ژ بەر ھندێ ژی نھا پتر ژ ھەر دەمەکێ تورکیا و ئەمریکا ژێک دوور کەفتینە و ئەو یەک د بەرژەوەندیا کوردان دا نینە.

عەبدوللا حیجاب بسپۆرێ کاروبارێن سیاسی یێن تورکیا ل وەلاتێ نەرویج د دیدارەکا تایبەت دا ل گەل رۆژناما ئەڤرۆ دیار کر کو ئەمریکا د گەلەک بیاڤان دا پشتی شەرێ جیھانێ یێ دویێ ھاریکاریا تورکیا کر، وی دەمی تورکیا وەلاتەک لاواز بوو، لێ ئەمریکا د بیاڤێ سەربازی دا گەلەک ھاریکاریا تورکیا کر، ھەروەسا ژ بۆ ئارامیا سیاسی ل تورکیا ژی ئەمریکا گەلەک ھاریکاریا تورکیا کر و گۆت: (د راستی دا ئەمریکا ھەتا نھا ژی تورکیا وەکو زارۆیێ خوە دبینیت و ناخوازیت چو دەمەکێ تورکیا ئاریشان بۆ بەرژەوەندیێن وێ دروست بکەت، پشتی ئەردۆگان ھاتە سەر دەستھەلاتێ رۆژ ب رۆژێ ئاریشە بۆ بەرژەوەندیێن ئەمریکا ل رۆژھەلاتا ناڤین دروست کرن و نھا پتر ژ ھەر دەمەکێ تورکیا و ئەمریکا ژێک دوور کەفتینە و ژ بەر ھندێ ژی نھا ئەمریکا ژ ھەلویستێ تورکیا دلگرانە و دەست ب سزادانا تورکیا یا کری).

ناڤبری د بەردەوامیا ئاخڤتنا خوە دا ئەو یەک ژی دیار کر کو بەری کو ئاکپارتی ل تورکیا ببیتە دەستھەلاتدار تورکیا دەرگەھێ رۆژھەلاتا ناڤین بۆ ئورۆپا بوو، تورکیا بزاڤ دکر ب ھەموو رەنگەکێ خوە بکەتە پشکەک ژ ئورۆپا و گەلەک گوھۆڕین د بیاڤێن سیاسی و جڤاکی و ھەتا سیستەمێ ئابووری یێن تورکیا ژی ھاتنە کرن، لێ مخابن نھا تورکیا ب سەرۆکاتیا ئەردۆگانی سەرکێشیا بەرەیەکێ سوننە یێ ھشکباوەر ل دەڤەرێ دکەت و ژ بەر ھندێ ژی نە تنێ ئەمریکا بەلکو وەلاتێن دی یێن رۆژئاڤایی ژی ژ ھەلویستێ تورکیا دلگرانن و گۆت: (خالا دی یا گرنگ ژی تورکیا ب ھەموو رەنگەکێ ھێرشی ھەڤپەیمانێن ئەمریکا ل دەڤەرێ دکەت، وەکو ئیسرائیل کو ھەڤپەیمانێ ستراتیژی یێ ئەمریکا یە، تورکیا رێ بۆ چووینا گرۆپێن ھشکباوەر وەکو داعشێ ڤەکر دا بچنە سووریێ و شەری بکەن، ئەڤ ھەموو خالە ژی وەسا کرن کو ڤێ دووماھیێ ئێدی ئەمریکا نەچار بیت دەست ب سزادانا تورکیا بکەت و بابەتێ قەشەیی ژی بەھانە یە و ئەز باوەرم ھەکە تورکیا نھا قەشەیی ئازاد بکەت ژی پەیوەندیێن ئەمریکا و تورکیا وەسا زوو ئاسایی نابن و ھەر دو ئالی ژی ڤێ یەکێ باش دزانن).

عەبدوللا حیجاب ئەو یەک ژی دیار کر کو سیاسەتا دەرڤە یا تورکیا وەسا کریە کو ئەمریکا و وەلاتێن رۆژئاڤایی خوە ژ تورکیا دوور بکەن، د بابەتێ پرسا کوردی و دیموکراسیێ دا ژی تورکیا وەکو بەرێ نەمایە، بەری نھا ھندەک پێنگاڤێن باش ھاتنە ھاڤێتن لێ نھا بابەت ب تەمامی ھاتیە راگرتن و تورکیا بەر ب سیستەمەکێ ھشک ڤە دچیت کو مخابن ئەو یەک د بەرژەوەندیا گەلێن تورکیا دا نینە و گۆت: (تورکیا دخوازیت پێشەنگیا سوننان ل رۆژھەلاتا ناڤین بکەت، ھەکە تورکیا ل سەر ھەلویستێ خوە یێ نھا بەردەوام بیت دێ تووشی چارەنڤیسێ ئیرانێ بیت. چونکو نھا تورکیا ب ھەموو رەنگەکێ دژبەریا جیھانا رۆژئاڤا دکەت).

ناڤھاتی د دووماھیا ئاخڤتنا خوە دا ئەو یەک ژی دیار کر کو تورکیا شەرێ داعشێ و گرۆپێن دی یێن ھشکباوەر نەکر، ئەو گرۆپ ببوونە مەترسیەکا مەزن بۆ ئاشتیا جیھانی، تورکیا ب رەنگەکێ نەراستەوخوە ھاریکاریا وان ژی دکر و ھەموو وەلاتێن جیھانێ ب تایبەتی ژی یێن رۆژئاڤایی ئەو یەک دیتن و رۆژ ب رۆژێ خوە ژ تورکیا دوور کرن و گۆت: (لاوازبوونا تورکیا بۆ کوردان ژی باش نینە، چونکو تورکیا جیرانێ کوردستانێ یە و ب تایبەتی ژی ھەکە تورکیا بەر ب سیستەمەکێ وەکو ئیرانێ ڤە بچیت بۆ چارەکرنا پرسا کوردی ل تورکیا و پەیوەندیێن ل گەل ھەرێما کوردستانێ ژی ئەو یەک باش نینە، ئانکۆ لاوازبوونا تورکیا د بەرژەوەندیا کوردان دا نینە و کوردان جیرانەکا باش و ئارام و دیموکرات دڤێت، ژ بەر ھندێ ژی دڤێت بەرپرسێن تورکیا ھەلویستێ خوە ل دۆر ئەمریکا و وەلاتێن دی یێن دیموکراتیک ب گوھۆڕین، چونکو ھەتا ئەو یەک نەھێتە کرن پرسا کوردی و پرسێن دی یێن تورکیا ژی ناھێنە چارەکرن و تورکیا دێ رۆژ ب رۆژێ تووشی ئالۆزیێن مەزنتر بیت).

ئه‌ڤرۆ نيوز:

کەساتیەکێ سیاسی وئەکادیمی ئاماژە بوێ چەندێ دکەت، بۆ پێک ئینانا حوکمەتا نوویا عیراقێ دێ کوردان رۆلەکێ مەزن ھەبیت، و دبێژیت ئەمریکا پشتەڤانیا کوردان دکەت و دیارکر، پێدڤیە لایەنەکێ نێڤدەولەتی بھێتە ناڤا رێککەفتنا ناڤبەرا ھەرێم و بەغدا، چونکە کوردان ئەزموونەکا تاک ل گەل لایەنێن عیراقی ھەیە و دەمێ دچنە سەر دەستھەلاتێ سۆزێن خوە ھەمبەری کوردان بجە نائینن.

دکتۆر سامان شالی، کەسایەتیێ سیاسی و ئەکادیمی بۆ رۆژناما ئەڤرۆ گۆت: پێکئینانا حوکمەتا نوویا عیراقێ دێ ھەر وەکی حوکمەتێن بەرێ بشێوەیێ تەوافووق د ناڤبەرا کورد و سونە و شیعەیان دابیت، چو گۆھۆڕین تێدا ناھێنەکرن، ژبەرکو حوکمەتا زۆرینە ل عیراقێ سەرناگریت و دڤێت بشێوەیێ تەوافووق رێککەفتن ل سەر بێھەکرن، چونکە ھیچ لایەنەکی زۆرینەیا کۆرسیان د ھەلبژارتنێن بۆری دا ب دەستڤە نەئینایە، ھەتا بشێت حوکمەتا زۆرینە پێک بینیت، تنێ د ب رێیا پێک ئینانا کۆتلەکا مەزنا پەرلەمانی شێن کابینا نوویا حوکمەتێ پێکئینن، ئەز باوەرم نێزیک دێ لایەنێن سەرکەفتی گەھنە رێککەفتنێ بۆ پێکئینانا کابینا نوویا حوکمەتێ و تنێ 75 رۆژ پێدڤینە ھەتا رێو جھێن قانوونی تێنە تەمام کرن.

دکتۆر سامان شالی خویاکر، کوردان رۆل ھەیە د پێکئینانا حوکمەتا نوویا عیراقێ دا، چونکە ئەمریکا پشتەڤانیا ھەرێما کوردستانێ دکەت، ئەمریکا دخوازیت و ئەف خواستا خوە نەڤەشارتیە پێدڤیە کوردان رۆلەکێ سەرەکی دناڤا عیراقێ دا ھەبیت، ھەکە ئەم وەک کورد ناڤمالا خوە رێکپێخین و ئێک ھەلویست ھەبیت ھەمبەر لایەنێن بەغدا، ئەڤە لایەنێن کوردی 58 کۆرسیێن پەرلەمانێ عیراقێ د ھەلبژارانێن دوازدەی ئایارا بۆری دا برینە و ژبلی کۆرسیێن کۆتا دێ بیتە ھێزەکا مەزن بۆ ب دەستڤە ئینانا داخوازیێن خەلکێ ھەرێما کوردستانێ و مافێ کوردان د چوار چوڤێ عیراقێ دا، بەلێ ھەکە گەرەنتیەک نەبیت د ناڤبەرا بەغدا و ھەرێما کوردستانێ دا ددەمێ رێککەفتن دھێتەکرن، ئەڤە زەحمەتە دەستھەلاتدارێن بەغدا سۆزێن خوە بۆ بجە ئینانا مەرجێن کوردا ببەنە سەر، لەوڕا یا پێدڤیە لایەنەکێ نێڤدەولەتی و دەرڤە ببیتە گەرەنتی ھەتا بەغدا وەک سالێن بۆری پشتی پێکئینانا حوکمەتێ عیراق خوە نەڤەدزیت ل رێککەفتنا دگەل ھەرێما کوردستانێ، چونکی بڤی دەستو داری بیت تنێ دو سێ ھەتا سێ ھەیڤان دێ بەغدا سۆزێن بن پێکەت و بجە نائینیت، بتایبەتی ھەکە حەیدەر عەبادی ب بیتە سەرۆک وەزیرێن عیراقێ دێ ھەمان سترانا بەرێ بۆمە بێژیت.

ئەڤرۆ نیوز ، زنار تۆڤی:

د هەر چار رۆژێن جەژنا قوربانێ دا 16 روودانێن هاتنوچوونێ ل سەرانسەری پارێزگەها دهۆکێ رووداینە و موقەدەمێ مافپەروەر ئازاد تاها بەرپرسێ هوبا پەیوەندی و راگەهاندنێ ل رێڤەبەریا هاتنوچوونا پارێزگەها دهۆکێ بۆ ئەڤرۆ نیوز دا خویاکرن: کو د هەر چار رۆژێن جەژنا قوربانێدا سێ کەسان گیانێ خوە ژ دەستدایە.

ناڤهاتی زێدەتر ئامارێن چار رۆژێن جەژنا قوربانێ ل سەرانسەری پارێزگەها دهۆکێ ئاشکرا کرن و گۆت ژی: د هەر چار روژێن جەژنا قوربانێ دا 16 روودانێن هاتنوچوونێ ل پارێزگەها دهۆکێ رووداینە و ژ وان ژی حەفت حالەتێن لێگدانێ بووینە ل گەل چار حالەتێن لێدانێ، هەروەسا پێنج حالەتێن وەرگەریانێ ژی رووداینە و د وان هەموو روودانان دا سێ کەسان گیانێ خوە ژ دەستدایە و 18 کەس ژی بریندار بووینە.