ئه‌ڤرۆنيوز:

ئه‌ندامه‌كێ جڤاتا كۆمسياران ل كۆمسيۆنا بلند يا هه‌لبژارتن وراپرسيان ل هه‌رێما كوردستانێ راگه‌هاند، به‌رهه‌ڤى بۆ هه‌لبژارتنين په‌رله‌مانێ كوردستانێ يێن دهێنه‌ كرن وحوكمه‌تا هه‌رێمێ كۆژمێ 30 مليار ديناران بۆ وان هه‌لبژارتنان ته‌رخان كرينه‌.

جوتيار عادل،ئه‌ندامێ جڤاتا كۆمسياران ل كۆمسيۆنا بلند يا هه‌لبژارتن وراپرسيان ل هه‌رێمێ گۆت” نوكه‌ ئه‌م مژوولى به‌رهه‌ڤيێن هه‌لبژارتنێن په‌رله‌مانێ كوردستانێ نه‌ و نووكرن وپاككرنا تۆمارا ده‌نگده‌ران قۆناغێن باش هاڤێتينه‌ وژنوكه‌ وپێڤه‌ دێ ده‌ست ب پێرابوونێن ئه‌نجامدانا هه‌لبژارتنان كه‌ين، له‌وما دده‌مێ بۆمه‌ هاتيه‌ دياركرن دا ئه‌م دشيين به‌رهه‌ڤيان تمام بكه‌ين”.

جوتيارى زێده‌تر بۆ وشه‌ گۆت” ل دو رۆژێن داهاتى دا دێ ده‌ست ب ژڤانێ تۆماركرنا قه‌وارێن سياسى بۆ هه‌لبژارتنێن په‌رله‌مانێ كوردستانێ هێته‌ كرن”.

ئاماژه‌ دا، حوكمه‌تا هه‌رێمێ كۆژمێ 30 مليار ديناران بۆ ئه‌نجامدانا هه‌لبژارتنان ته‌رخان كرينه‌ ووه‌كو قۆناغا ئێكێ كوژمێ 10 مليار ديناران چووينه‌ سه‌ر حسابا كۆمسيۆنا بلند يا هه‌لبژارتن وراپرسيان.

برياره‌ ل رۆژا 30/9/2018 هه‌لبژارتنێن په‌رله‌مانێ كوردستانێ بهێنه‌ ئه‌نجامدان.

ئه‌ڤرۆنيوز:

به‌غدا دده‌مێ ڤێ حه‌فتيێ دا دێ گۆژمه‌كێ پاره‌ى بۆ مووچێ هه‌يڤا ئادارێ يێ فه‌رمانبه‌رێن هه‌رێما كوردستانێ هنێريت.

ل دووڤ پێزانينان، وه‌زاره‌تا دارايى يا عيراقێ رازيبوونا خوه‌ ل سه‌ر خه‌رجكرنا كوژمێ 317 مليار و545 مليۆن ديناران دايه‌ كو يێ تايبه‌ته‌ ب مووچێ فه‌رمانبه‌رێن هه‌رێما كوردستانێ بۆ هه‌يڤا ئادارێ

ئه‌ڤرۆنيوز:

سه‌رۆك بارزانى ئه‌ڤرۆ دوشه‌مبى 21/5/2018  ل گه‌ل هه‌موو به‌ربژارێن ليستا 184 يا پارتى كۆمبوو وتێدا گۆتاره‌ك پێشكێشكر ورۆناهى خسته‌ سه‌ر ره‌وشا سياسى وهه‌روه‌سا قۆناغێن به‌رى ريفراندۆمێ وروودانێن پشتى ريفراندۆمێ وسوپاسيا خوراگريا پێشمه‌رگه‌ى وگه‌لێ كوردستانێ كر ل قۆناغێن سه‌خت ودژوار دا.

سه‌رۆك بارزانى ده‌ستخوه‌شى ل هه‌موو كادر وئه‌ندام ولايه‌نگر وته‌خێن جودا وگه‌نجێن دناڤ پارتى دا ل ناڤخوه‌ وده‌رڤه‌ كر كو هه‌موو ب ئێك ده‌نگ وب گيانه‌كێ هه‌ڤپشك كار بۆ سه‌رخستنا ليستا پارتى دهه‌لبژارتنێن جڤاتا نوونه‌رين عيراقێ دا كر.

سه‌رۆك بارزانى به‌رچاڤكر كو سه‌ره‌راى هه‌بوونا رێگرى وئاسته‌نگان بۆ وێ چه‌ندێ ليستا پارتى ده‌نگان نه‌ئينيت، به‌لێ جه‌ماوه‌رێ پارتى ب ئيراده‌كا بلند شيان سه‌ركه‌فتنێ بده‌ستڤه‌بينن ول ئاستێ كوردستانێ وعيراقێ وده‌رڤه‌ى وه‌لاتى پارتى حزبا ئێكێ ده‌رچوو وئه‌و ژى بۆ وێ چه‌ندێ ڤه‌دگه‌ريت كو پارتى خودان دوزه‌.

سه‌رۆك بارزانى دگۆتارا خوه‌دا ئاماژه‌ كر كو پارتى ل هه‌موو ئه‌زموونان ب سه‌ربلندى ده‌رچوويه‌، پارتى بۆ وێ چه‌ندێ نه‌هاتيه‌ دامه‌زراندن ململانێ ل گه‌ل لايه‌نان بكه‌ت، به‌لكو هاتيه‌ دامه‌زراندن دا به‌رگريێ ژمافێن گه‌لێ كوردستانێ بكه‌ت، هه‌روه‌سا سه‌ركه‌فتن بۆ وان كه‌سانه‌ يێن باوه‌رى ب دوزا ره‌وا يا گه‌لێ خوه‌ هه‌ى ونابيت ملله‌ته‌ك بهێته‌ چه‌وساندن ونوونه‌رێن وى هزر د پله‌ وپۆست وده‌ستكه‌فتان بكه‌ن، له‌وما پێدڤيه‌ ئارمانجا سه‌ره‌كى يا نوونه‌رێن پارتى ل به‌غدا به‌رژه‌وه‌نديێن بلند يێن ملله‌تێ خوه‌ بيت ونابيت ل ده‌مێ سه‌ركه‌فتنێ دا مه‌غروور بن ول ده‌مێ شكه‌ستنێ وپاشه‌كه‌شێ بێ ئومێد بن.

سه‌رۆك بارزانى، ره‌خنه‌ ل كارێ كۆمسيۆنا هه‌لبژارتنان گرت كو بوويه‌ ئه‌گه‌رێ كێشێن مه‌زن بۆ ده‌نگده‌ران ودووپاتى ل وێ چه‌ندێ كر هژمارنه‌كرنا ده‌نگێ خوووشك وبرايێن ئێزدى ئه‌نفالكرنا ده‌نگێن وانه‌ ومه‌ره‌م پێ ئه‌و بوو كو پارتى ل پارێزگه‌ها نه‌ينه‌وا وه‌كو ليستا ئێكێ نه‌بيت.

ئاماژه‌ ب وێ چه‌ندێ ژى كر كو پێدڤيه‌ بنه‌مايێن هه‌ڤپشكيێ وته‌وافوقێ ويه‌كسانيێ دناڤبه‌را پێهاتان دا ل پرۆسا سياسى يا عيراقێ ل به‌رچاڤ بهێته‌ وه‌رگرتن ول سه‌ر وى بنه‌ماى پێدڤيه‌ هه‌موو لايه‌ن كاربكه‌ن، داخواز ژى كر كو لايه‌نێن كوردستانى ل به‌غدا ب ئێكرێزى وئێك گوتارى ل پرۆسا سياسى يا عيراقێ دا پشكدار ببن.