ئه‌ڤرۆ نيوز:

ب مەرەما دیتنا چارەکێ بۆ بەرھەمێ جۆتیارێن کوردستانێ وەکو گەنم و شتی ئەڤرۆ 9-8-2018 كۆمبوونا په‌رله‌مانێ كوردستانێ ده‌سپێكر و تەوەرکێ کۆمبوونا پەرلەمانێ کوردستانێ ل سەر بابەتێ ناڤبری بیت، ھەروەسا دێ د ھەمان کۆمبوون دا پرسا ھەلبژارتنان ژی ھێتە گەنگەشەکرن.

د. خەلف ئەحمەد، ئەندامێ لژنا چاندنێ ل پەرلەمانێ کوردستانێ بۆ رۆژناما ئەڤرۆ دیار کر کو پەرلەمانێ کوردستانآَ ئەڤرۆ دێ ل دۆر ئەگەرێ ئەرزانبوونا بھایێ گەنمی و شتی کۆمبیت داکو رێیە چارەک بۆ بھێتە دیتن و بۆ حوکمەتا ھەرێما کوردستانێ بھێتە بلندکرن و گۆت: “نوکە وەرگرتنا گەنمێ ھەرێمێ ھاتیە سنووردارکرن و ل باشوور و ناڤەراستا عیراقێ جوتیارێن عەرەب دھێن گەنمێ جۆتیاران ئەڤێ مایی ب ئەرزانی دکرن و دبەن ددەنە سایلویێن باشوور و ناڤەراستا عیراقێ و چو سنوور بۆ نەھاتینە دەست نیشانکرن”.

ناڤھاتی ئاماژە دا وێ چەندێ کو نوکە کیلۆیا شتی ب 250 دیناران دھێتە فرۆتن و جۆتیار چو مفایی ژێ نابیت ژ بەر ڤێ چەندێ دڤێت حوکمەت چارەکێ بۆ جۆتیاران ببینیت و گۆت: “دڤێت کەرتێ تایبەت بھێتە د ناڤ کەرتێ حوکمەتێ دا و رێکەک بھێتە دیتن کو بەرھەمێ جۆتیاران پووچ نەبیت و چارەک بۆ بھێتە دیتن”.

ژ ئالیێ خوە ڤە جۆتیار ئاکرەیی، ئەندامێ جڤاتا کۆمسیاران ل کۆمسیۆنا ھەلبژارتنێن ھەرێما کوردستانێ بۆ رۆژناما ئەڤرۆ دیار کر کو کۆمسیۆن یا خوە بەرھەڤ دکەت بۆ ب رێڤەبرنا ھەلبژارتنێن پەرلەمانێ کوردستانێ یێن کو بڕیارە ل رۆژا 30ی ھەیڤا ئیلوونا داھاتی بھێنە ئەنجامدان و بۆ ڤێ مەرەمێ ئەڤرۆ رۆژا دوشەمبی کۆمسیۆن و پەرلەمانێ کوردستانێ دێ کۆمبونەکێ ئەنجامدەن و گۆت: “وەسا بڕیارە نوونەرێن لایەنێن سیاسی ژی تێدا پشکداریێ بکەن و ب ھووری ل دۆر ب رێڤەچوونا شێوازێ ھەلبژارتان دانوستاندن بھێتەکرن، ھەر لایەنەکێ پێشنیار و رەخنە ل کارێ کۆمسیۆنێ ھەبن د کۆمبوونێ دا دشێن بێخنە ھەمبەر نوونەرێن کۆمسیۆنا بلندا ھەلبژارتنان”.

ناڤھاتی خویا کر کو ھەر دچارچوڤێ خوە بەرھەڤکرنا کۆمسیۆنێ دا بڕیارە سوبەھی رۆژا سێشەمبی دەرگەھێ بنگەھێن کۆمسیۆنێ بھێنە ڤەکرن بۆ پشتڕاستبوونا ناڤێن دەنگدەران و ھەر دەنگدەرەکێ بخوازیت ژ ناڤێ خوە پشتڕاستبیت دڤێت سەرەدانا کۆمسیۆنێ بکەت، ھەروەسا بۆ ئەڤێن دخوازن ناڤێن خوە ڤەگوھێزن یان کارەکێ پێدڤی بیت ددەمێ ھەیڤەکێ دا دێ دەرگەھێ بنگەھێن کۆمسیۆنێ د ڤالا بن ھەمبەر دەنگدەران.

ئه‌ڤرۆ نيوز:

ژێدەرەکێ ئاگەھدار بۆ مالپەرێ خواکورک راگەھاند، چیا نەوشێروان موستەفا ب رێیا کۆمپانیا فریاد مۆبایل و برێیا خالێ وی (د.شۆرەش) ب کۆژمێ 45 ملیۆن دۆلاران، دوکانێن بازارێ زێنکرانێن حەوزە و شەکەکەی دەڤەرا بازارێ سلێمانیێ کڕینە، کو بوویە جھێ رەنکڤەدانەکا توند دناڤا کۆڕانێ دا.

ژێدەرێ نەڤیایی ناڤێ خوە ئاشکرا بکەت گۆت: کورێ نەو شێروان رێکخەرێ بەرێ یێ گۆڕان دناڤا جەرگێ بازارێ سلێمانیێ دا، زێدەتر ژ 100 دوکان کڕینە، ب کۆژمێ 45 ملیۆن دۆلاران، کڕینا وان دوکام ژی برێیا خالێ وی (د. شۆرەش) وی ژی برێیا فریاد خودانێ کۆمپانیا فریاد مۆبایل ئەنجامدایە، کو پشکەک ژکۆمپانیا ناڤبری ژ یا محەمەد توفیق و چیا نەوشێروانی یە.

ژێدەری ھەروەسا دیارکر، پشتی نەرازیبوونا ھندەک ژ ئەندامێن بزاڤا گۆڕان ، چوونە لایێ چیا نەوشێروان و گۆتنێ، ئەو پارە یێن بزاڤا گۆرانن و تۆ یێ بازرگانیێ و وەبەرھێنانێ پێ دکەی، ئەڤ چەندێ دێ ناڤێ بابێ تە نەشرین کەت، بەلێ وی بەرسڤا وانا دا و گۆت: ( بزاڤا گۆڕان و ھەموو داھاتێن مولکێ بابێ منن، وبابێ من بۆ من ھێلایە، زێدەباری وێ ژی دیارکر، ھەکە ئەو پارە یێ بابێ من نەبا ھەموو بناڤێ خوە نەدکرن وەک ملک و ئەملاک، بەلێ لەورا بناڤێ خوە کرینە دا وەکی میرات بۆ من بھێلیت).

کێشە و ئالۆزیا بزاڤا گۆڕانێ زێدەبوویە و ھەلوسوڕاوێن کۆڕانێ ژی دخوازن بەردەرگەھێ مەکۆیا سەرەکی یا گۆڕان خوەپێشاندانان بکەن، ھەتا ئەو کێشە ب دووماھی بھێت.

ھەر ب ھەمان مەرەم پێچ و مالپەرێن بزاڤا گۆڕان ھەوەکا توند بۆ لێپرسینا وێ کێشێ ب راستەوراست و ھندەک ژی ب نەراستەوراست دکەن، کو ل گردێ زەرتەک خڕڤەبوونێن جەماوەری بکەن، دا وێ کێشێ چارە بکەن.

د چارچۆڤێ بەرنامەکێ تلفزیۆنی دا ژی، ھوشیار عەبدوللا پەرلەمانتارێ بزاڤا گۆڕان د حڤاتا نوونەرێن عیراقێ دا، ھندەک کێشێن ناڤخوەیی یێن بزاڤا گۆڕان دیارکرن، و گۆت: ھەکە ئەو کێشە ب ڤی رەنگی بەردەوام بن ئەڤە دێ پاشەرۆژا بزاڤا گۆرانێ بەر ب خرابیێ ڤە چیت، نەخاسمە بۆ ھەلبژارتنێن بھێت و دێ باجا وان کێشێن ناڤخوەیی دەت.

پەرلەمانتارێ گۆڕان ھەروەسا گۆت: دناڤا گۆڕانێ دا ئێک ژ کێشێن سەرەکی کێشا دناڤا سەرکردێن پلە بلندە ھەڤدەم نەدیتنا میکانیزمەکێ بۆ دیتنا چارەکی بۆ کێشێن ناڤخویا گۆڕان، زێدەباری نەشفافیەتا داھاتێ بزاڤا گۆڕان کێشەکا دیترە کو بزاڤا گۆڕان لبەر دنالیت.

ئەندامەکێ جڤاتا سەرکرداتیا بزاڤا گۆڕان عەبدوللا کۆیخا موبارک ل سەر مالپەرێ خویێ تایبت رەخنەیێن توند ل بنەمالا نەوشێروان موستافا دگریت و دبێژیت، نابیت نوشێروان موستەفا و گۆڕان مولکێ گۆڕانخوازبیت و کۆمپانی و سامان بتنێ مێراتێ خێزانا وی بن.

عەبدولا کۆیخا ھەروەسا چەندێن پرسان ئارساتەی بنەمالا نەوشێروانی دکەت و دبێژیت، ئەرێ کاک نەوشێروان کۆمپانیا ووشە بۆ بازرگانیێ و کومکرنا پارەی دروست کریە؟ ، ئەرێ ب کوشتن و چوونا دناڤا مەترسیان دا کارێ خوبەخشێ ب پارێ بەریکا خوە، ژبۆ سەرکەفتن و پاراستنا رێبارز و بەرنامێ کاک نەوشێروان بتنێ بۆ گۆڕان خوازان بیت؟ ، چونکی کاک نوشێروان و گۆڕان مولکێ گۆڕانخوازایە، بەلێ کۆمپانی و سامان بتنێ بەھر و مولکێ چەند کەسێن خێزانا وی بیت؟.

ھەروەسا کویخا موبارکی گۆت: ئەرێ کاک نەوشێروان دەلیڤە دایە گەنجان بۆ ھندێ بەرەڤانیێ ژ مافێن خەلکی بکەن؟، یان ژی پیلانگیری و ملشکاندن و لادانا ھەڤالێن خوە و بچوککرنا گۆڕان ژبۆ پێگە و پۆستێن تایبەتێن ھەوە دانایە؟.

بەرپرسێ گۆڕانخواز ئاماژەدا بنەمالا نەوشێروان موستەفایی و دووپاتکر، کۆڕ و کچێن کاک نەوشێروان مافێ وانایە و ھەژی وێ چەندێ نە بۆ ھەر پلە و پۆستەکێ حوکمی ، پەرلەمانی، حزبی ھەتا رێکخەرێ گشتی ژی خو بەربژار بکەن، و ل گۆڕ بەرپرسیا خوە مایتێکرنان دکارۆبارێن ئەو ژێ بەرپرس بکەن، بەلێ دڤێت داھاتێ کۆمپانیا ووشە و ھەر ژێدەرەکێ دارایی یێ گۆڕان دڤێت ددەستێن لیژنەکا تایبەت دا بیت، کو ژئالیێ جڤاتا نشتیمانیا گۆڕانێ ھاتبیتە ھەلبژارتن و ئەندامێن ھەموو ئالیێن گۆڕانێ تیدا ھەبن.

ئەنداما جڤاتا بزاڤا گۆڕان دووپاتکر، ھەکە ژبۆ دەستھەلات و پارە کومکرنێ بیت، ئەڤە بزاڤا گۆڕان دێ بیتە ھێزەکا لاواز و کارتێکرنا خوە نابیت.