ل رۆژا سێشەمبی 23/12/2025، مەسرور بارزانی، سەرۆكێ حوكمەتا هەرێما كوردستانێ، پێشوازی ل سەرمەد خەمیس خەنجەر، سەرۆكێ هەڤپەیمانییا سیادە كر.
ب گۆرەی بەیاننامەیەكا حوكمەتا هەرێما كوردستانێ» د دیدارەكێدا، رەوشا گشتییا ئیراقێ و بزاڤ و دانوستاندنێن ئالیێن سیاسی بۆ پێكئینانا كابینەیا نوو یا حوكمەتا ئیراقێ هاتە گەنگەشەكرن».
د بەیاننامەیا حوكمەتا هەرێما كوردستانێدا هاتیە ژی» هەردو ئالییان دووپاتی ل وێ چەندێ كر، پێدڤییە د پێكئینانا حوكمەتا نوو یا ئیراقێدا پرنسیپێن هەڤپشكیێ و هەڤسەنگیێ و لهەڤهاتنێ ل بەرچاڤ بهێنە وەرگرتن و بێی جوداهی، خزمەتا هەموو وەلاتیێن ئیراقێ و هەموو پێكهاتەیان بهێتە كرن».

ل رۆژا سێشەمبی 23/12/2025، مەسرور بارزانی، سەرۆكێ حوكمەتا هەرێما كوردستانێ، پێشوازی ل محەمەد ئەلحەسان، نوونەرێ تایبەتێ سكرتێرێ گشتیێ نەتەوەیێن ئێكگرتی ل ئیراقێ و سەرۆكێ تیما (یۆنامی) ل ئیراقێ كر ب هەلكەفتا ب دووماهیهاتنا ئەركێ وی.
ب گۆرەی بەیاننامەیەكا حوكمەتا هەرێما كوردستانێ» سەرۆكێ حوكمەتا هەرێمێ سوپاسییا نوونەرێ تایبەتێ سكرتێرێ گشتیێ نەتەوەیێن ئێكگرتی ل ئیراقێ كر بۆ رۆلێ وی یێ ئەرێنی د هاریكاریكرنا پرۆسەیا سیاسی ل ئیراقێ و هەرێما كوردستانێ دا و كاركرنا وی ژ پێخەمەت ئارامییا ئیراقێ و هەرێما كوردستانێ».
نوونەرێ تایبەتێ سكرتێرێ گشتیێ نەتەوەیێن ئێكگرتی ل ئیراقێ، رێز و سوپاسیێن خوە بۆ هاریكاری و هەماهەنگییا باش یا حوكمەتا هەرێما كوردستانێ ل گەل ئاژانسێن نەتەوەیێن ئێكگرتی دیاركرن.
هەروەسا دووماهی پێشهات و گوهۆڕینێن رەوشا گشتییا ئیراقێ و دەڤەرێ، پشكەكا دی یا دانوستاندنێن دیدارێ بوو.

ل ئێڤارییا رۆژا دوشەمبی 22/12/2025، شاندەكێ بلند یێ دانوستاندكارێ پارتی دیموكراتی كوردستان ب سەرۆكایەتییا فازل میرانی، بەرپرسێ دەستەیا كارگێرییا مەكتەبا سیاسی ل بەغدایە، ب مەبەستا دانوستاندنێ ل گەل ئالیێن سیاسی یێن ئیراقی بۆ پێكئینانا حوكمەتا نوو یا ئیراقێ.
ل رۆژا سێشەمبی 23/12/2025، شاندێ دانوستاندكارێ پارتی دیموكراتی كوردستان وەك ئێكەم وێستگەه، سەرەدانا كۆچكا (سەلام) ل بەغدا كر و ژ ئالیێ لەتیف رەشید، سەرۆككۆمارێ ئیراقێ پێشوازی لێهاتە كرن.
هەر ل هەمان رۆژ، نوری مالكی، سەرۆكێ هەڤپەیمانییا دولەتا قانوونێ، ل نڤیسینگەها تایبەت یا خوە ل بەغدا، پێشوازی ل شاندێ بلند یێ پارتی دیموكراتی كوردستان ب سەرۆكایەتییا فازل میرانی كر.
د كۆمبوونەكێدا، ب هووری باس ل دووماهی پێشهاتێن سیاسی و دانوستاندنێن تایبەت ب پێكئینانا حوكمەتا نوو یا ئیراقێ هاتە كرن. هەردو ئالی هەڤڕابوون ل سەر پێدڤییا ب لەزكرنا پێنگاڤان و پێگیریبوون ب ژڤانێن دەستووری بۆ تمامكرنا پێڕابوونێن پێكئینانا كابینەیا نوو یا حوكمەتا ئیراقێ.
تەوەرەكێ سەرەكیێ كۆمبوونێ، گەنگەشەكرنا میكانیزمێن پراكتیكی بوو بۆ ئێكلاكرنا پۆستێن سێ سەرۆكایەتییان ( كۆمار، جڤاتا نوونەران و جڤاتا وەزیران) د چارچۆڤەیێ شایستەیێن دەستووریدا.
ل دووماهییێ دووپاتی هاتە كرن كو پێدڤییە حوكمەتا داهاتییا ئیراقێ ل ئاستێ داخوازیێن گەلێ ئیراقێ بیت و هەماهەنگی و كارێ هەڤپشك د ناڤبەرا ئالیێن سیاسی ببیتە بنەمایەك بۆ ب هێزكرنا ئارامیێ و خزمەتگوزاریێ ل وەلاتی.
هەر د بەردەوامییا كۆمبوونێن خوەدا ل بەغدا بۆ پێكئینانا حوكمەتا نوو یا ئیراقێ، شاندێ دانوستاندكارێ پارتی دیموكراتی كوردستان ب سەرۆكایەتییا فازل میرانی، سكرتێرێ دەستەیا كارگێرییا مەكتەبا سیاسی، جودا ل گەل عەمار ئەلحەكیم، سەرۆكێ باسكێ حیكمە یێ نیشتمانی و موسەننا سامەرائی، سەرۆكێ هەڤپەیمانییا عەزم كۆمبوو.
بەری سەرەدانا خوە بۆ بەغدا، فازل میرانی، بەرپرسێ دەستەیا كارگێرییا مەكتەبا سیاسی یا پارتی و سەرۆكێ شاندێ دانوستاندكارێ د داخۆیانییەكێدا راگەهاندبوو» دانوستاندنێن سەركەفتییانە پێدڤی ب بەرهەڤییەكا راستەقینەیە بۆ گوهدارییا هەڤدو د ناڤبەرا ئالییاندا».
میرانی گوتبوو ژی» دانوستاندنان پێدڤی ب هەلوەستكرنا ئالیێن كاریگەرە ل سەر پرسێن دیار، بۆ وێ چەندێ كاریگەرییا راستەقینە ل سەر بڕیاردانێ هەبیت و دانوستاندن تنێ پێڕابوونەكا پرۆتۆكۆلی نینە، بەلكو پێدڤی ب سەقایەكێ گونجای، كو شیانان بدەتە ئالییان ئاستەنگان دەربازبكەن، ئەڤە ژی ب رێكا دەستنیشانكرنا ئارمانجان دبیت، بۆ وێ چەندێ هەموو پێڕابوون ل سەر رێكا راست بهێنە ئەنجامدان».
بەرپرسێ دەستەیا كارگێرییا مەكتەبا سیاسی یا پارتی و سەرۆكێ شاندێ دانوستاندكارێ پارتی ل بەغدا دووپاتكر ژی» ناسنامەیا نەتەوەیی، هێزا رایا گشتی و هەلسەنگاندنێن نێڤدەولەتی هەموو هۆكارن بۆ سەرئێخستنا دانوستاندنان».
دهێتە زانین شاندێ دانوستاندكارێ پارتی دیموكراتی كوردستان پێك دهێت ژ ف
-فازل میرانی، بەرپرسێ دەستەیا كارگێرییا مەكتەبا سیاسی.
-فوئاد حسێن، ئەندامێ مەكتەبا سیاسی.
-نەوزاد هادی، ئەندامێ مەكتەبا سیاسی.
-ئومێد سەباح، ئەندامێ كۆمیتەیا ناڤین.
-فارس عیسا، سەرۆكێ نوونەرایەتییا حوكمەتا هەرێما كوردستانێ ل بەغدا.

دیدار/ دلۆڤان ئاكرەیی

بەربژارەكا سەركەفتییا پارتی دیموكراتی كوردستان بۆ خولا شەشێ یا جڤاتا نوونەرێن ئیراقێ دیاركر، ل دووڤ دەستووری و فەرمانا سەرۆكایەتییا كۆمارا ئیراقێ، بەرهەڤیێن سەرۆكایەتییا جڤاتا بلند یا دادوەری ل ئیراقێ بۆ رۆژا 29 ێ كانوونا ئێكێ 2025 تمام بووینە و بڕیارە ل رۆژا دووشەمبییا حەفتییا بهێت روونشتنا ئێكێ یا خولا نوو یا جڤاتا نوونەرێن ئیراقێ بهێتە ئەنجامدان و چاڤەڕێ ناهێتە كرن ئەو روونشتن بهێتە پاشئێخستن.
د. ئەشواق جاف، بەربژارا سەركەفتییا پارتی دیموكراتی كوردستان بۆ خولا شەشێ یا جڤاتا نوونەرێن ئیراقێ ژ پارێزگەها سلێمانیێ بۆ رۆژنامەیا (ئەڤرۆ) گوت» رۆژا دووشەمبییا داهاتی روونشتنا ئێكێ یا خۆلا شەشێ یا جڤاتا نوونەران دێ بڕێڤەچیت، پشتی كو دادگەها فیدرالی ئەنجامێن هەلبژارتنێن جڤاتا نوونەرێن ئیراقێ پەسەندكرین و سەرۆكایەتییا كۆمارێ داخواز كریە كو ل 29 ێ ڤێ مەهێ روونشتنا ئێكێ یا جڤاتا نوونەران بهێتە كرن و سەرۆكێ جڤاتا بلند یا دادوەری ل ئیراقێ، فایەق زێدان، دوپات كریە كو هەموو بەرهەڤیێن قانوونی بۆ روونشتنێ هاتینە كرن، و ل دووڤ دەستووری، روونشتنا ئێكێ یا جڤاتا نوونەران دێ ب سەرۆكایەتییا ب تەمەنترین ئەندامێ جڤاتا نوونەران روونشتنا ئێكێ یا جڤاتێ دێ دەست پێ كەت، كو تێدا دێ دەستەیا سەرۆكایەتییا جڤاتا نوونەران (سەرۆك و هەردو جێگر) هێنە هەلبژارتن».
د. ئەشواق جاف دیاركر ژی» هەتا نوكە ئالیێن سیاسی ل سەر بەربژارەكێ دیار یێ پێكهاتەیا سوننی بۆ پۆستێ سەرۆكێ جڤاتا نوونەران رێكنەكەفتینە، كو زێدەتر ژ 70 پەرلەمانتارێن سوننە د ناڤ جڤاتا نوونەراندا ل سەر دو بەربژارێن جودا بۆ پۆستێ سەرۆكێ جڤاتا نوونەران بەلاڤبووینە ول دووڤ عورف و قانوونا سیاسییا ئیراقێ، دێ پۆستێ سەرۆكێ جڤاتا نوونەران بۆ پێكهاتەیا سوننی بیت، بەلێ هەتا نوكە، هەڤپەیمانییا تەقەدووم ب سەرۆكایەتییا محەمەد حەلبووسی و هەڤپەیمانییا عەزم ب سەرۆكایەتییا موسەننا سامەڕائی، هەر ئێك ژوان بەربژارێ خوە یێ هەی و ململانێ ل سەر پۆستێ سەرۆكێ جڤاتا نوونەران د ناڤبەرا بەربژارێن هەردوو ئالییاندا یە، حەلبووسی چەندین جاران ئاماژە ب وێ چەندێ كریە هەكە ئالیێ سامەڕائی بەربژارێ خوە یێ پۆستێ سەرۆكێ جڤاتا نوونەران ڤەكێشیت، دێ پرۆسە ب ساناهیتر بیت و ژئالییەكێ دی ڤە ، ئالیێن سیاسی یێن شیعی د جڤاتا نیشتمانیدا كوۆم بووینە دا كو ناڤێ بەربژارەكێ سوننی یێ ب هێز بۆ پۆستێ سەرۆكێ جڤاتا نوونەرێن ئیراقێ ئێكلا بكەن ود وەختێ رێكنەكەفتنێدا، دێ پەرلەمانتار ب دەنگدانێ ئێك ژ بەربژاران بۆ وی پۆستی هەلبژێرن».
ناڤبری گوت ژی» پێشتر وەك عورفەكێ سیاسی، دەستوور و قانوون د رێكا روونشتنا ئێكێ یا جڤاتا نوونەران دا د هاتنە پەیڕەوكرن، كو دێ جێگرێن سەرۆكێ جڤاتا نوونەران ژی هێنە هەلبژارتن، بەلێ ب باوەرییا من كو د روونشتنا كانوونا ئێكێ دا زێدەتر دێ دانوستاندن ل سەر پۆستێن سیاسی یێن گرنگ هێنە كرن و پێدڤییە سەرۆكێن بەربژاركری یێن هەر سێ ئالییان (پارتی، ئێكەتی، وئالیێن شیعی و سوننی) رێكنەكەفتنەكا بهێز بكەن دا كو د رونشتنا ئێكێدا دەستەیا سەرۆكایەتییا جڤاتا نوونەران بهێتە دیاركرن و پاشان ل دووڤ دەستووری پێنگاڤێن دی یێن حوكمەتێ بهێنە هاڤێتن».

بەرپرسەکێ رێڤەبەریا خوەسەر دیار کر، پشتی ئێرشا چەکدارێن سووریێ بۆ سەر هەر دو تاخێن کوردان ل حەلەبێ ئەمریکا  هەر زوو هاتە سەرخت و بۆ شامێ دیار کریە شەرەک وەسا دێ بیتە ئەگەرێ ئالۆزیێن زێدەتر و ئەو یەک د بەرژەوەندیا سووریێ دا نینە.

بەرپرسەکێ رێڤەبەریا خوەسەر یا رۆژئاڤایێ کوردستانێ دیار کر، ئێرشا ل سەر هەر دو تاخێن کوردان پشتی سەرەدانا شاندێ تورکیا بۆ شامێ هات، ئانکو ب کورتی مرۆڤ دشێت بێژیت ئێرشا ل سەر هەر دو تاخێن کوردان ل سەر داخوازیا تورکیا بوویە و د ئەنجاما ئێرشێ دا وەلاتیەکێ سڤیل شەهید کەفت و پتر ژ بیست کەسان ژی بریندار بوون، لێ هێزێن ئاسایشێ هەر زوو بەرسڤا ئێرشێ دان و چەندین چەکدارێن سەر ب وەزارەتا بەرگریێ یا سووریێ هاتنە کوشتن و زیانێن مەزن گەهشتینە چەکدارێن سووریێ.
هەمان بەرپرسی ئەو یەک ژی دیار کر، ل گۆر رێککەفتنا کو بەری نها د ناڤبەرا هەسەدێ و شامێ دا هاتیە کرن، دڤێت رێڤەبرنا هەر دو تاخان د دەستێ هێزێن ئاسایشێ دا بن و نابیت هێزێن سووریێ دەستێوەردانێ بکەن، مخابن هەتا نها چەندین جاران هێزێن سووریێ رێککەفتن بنپێکرینە و ئێرشی هەر دو تاخێن کوردان کرینە، لێ ئێرشا ڤێجارێ پتر ل سەر داخوازیا تورکیا بوو و ژ بەر ڤێ یەکێ ژی ئەمریکی گەلەک توورە بوون و هەر زوو ئەمریکا هاتە سەرخت و فشارێن مەزن ل شامێ کرن.
ل ئالیێ دی فەرماندارەکێ هەسەدێ ژی دیار کر، جهێ داخێ یە چەندین جاران چەکدارێن سەر ب وەزارەتا بەرگریێ ئێرشی تاخێن کوردان کرن و مخابن هێشتا ژی مەترسی هەیە، نها ژی هەر دو تاخێن کوردان ل حەلەبێ ژ ئالیێ چەکدارێن سەر ب وەزارەتا بەرگریێ یا سووریێ ڤە هاتینە دۆرپێچ کرن، مخابن سەرەرای کو شەر هاتیە راگرتن لێ دیسان ژی مەترسیا شەڕی هەیە، ئەمریکی ژ رەوشا نها گەلەک دلگرانن و ئەمریکا هۆشداری ژی دایە سووریێ هەکە جارەکا دی ئێرشی کوردان و پێکهاتەیێن دی بهێتە کرن دێ سزایێن کو بەری نها ل سەر سووریێ هەبوون جارەکا دی هەمان سزا دێ هێنە ڤەگەراندن، چونکی ئەمریکا پاراستنا نەتەوەیێن ل سووریێ وەکو مەرجێ سەرەکی یێ راکرنا سزایان دیار کریە و گرنگە بەرپرسێن نها یێن شامێ ژی پێگیریێ ب سۆزێن خوە بکەن.
چاڤدێرێن سیاسی ژی دیار دکەن، هەتا دەستهەلاتا شامێ هەبوونا کوردان ب فەرمی ل سووریێ قەبوول نەکەت و رێککەفتنەکا نوو نەهێتە کرن و هەموو مافێن گەلێ کورد د دستوورێ نوو یێ سووریێ دا نەهێنە گەرەنتیکرن، مەترسیا ئێرشێن وەسا ل سەر کوردان دێ بەردەوام بیت، چونکی تورکیا فشارێن مەزن ل شامێ دکەت دا رێ نەدەت کورد ل سووریێ بگەهنە مافێن خوە یێن رەوا.

سەرۆكێ هەرێما كوردستانێ پێشوازی ل قونسلێ نوو یێ پۆلەندا ل هەولێرێ كر و پشتەڤانییا خوە بۆ سەرئێخستنا ئەركێ وی دیاركر.
ل رۆژا ئێكشەمبی 21/12/2025، نێچیرڤان بارزانی، سەرۆكێ هەرێما كوردستانێ پێشوازی ل ماچێی زایدل، قونسلێ گشتیێ نوو یێ پۆلەندا ل هەولێرێ كر.
سەرۆكێ هەرێما كوردستانێ سەرەرای پیرۆزباهیێ بۆ دەستبكاربوونێ، هیڤییا سەركەفتنێ بۆ خواست و پشتەڤانییا خوە بۆ سەرئێخستنا ئەركێ وی دیاركر.
ب گۆرەی بەیاننامەیەكا سەرۆكایەتییا هەرێما كوردستانێ» نێچیرڤان بارزانی، خواستا هەرێما كوردستانێ بۆ پێشڤەبرنا هەڤبەندیێن خوە ل گەل پۆلەندا و بەرفرەهكرنا هاریكارییا هەڤپشك د ناڤبەرا واندا د وارێن جودا جودا دا دوپاتكر» .
د بەیاننامەیا حوكمەتا هەرێمێدا هاتیە ژی» قونسلێ گشتیێ نوو یێ پۆلەندا ل هەولێرێ، خوەشحالییا خوە ب دەستبكاربوونێ ل هەرێما كوردستانێ دیاركر و خواستا وەلاتێ خوە بۆ پێشڤەبرنا هەڤبەندییان ل گەل هەرێما كوردستانێ نیشادا».

ل رۆژا ئێكشەمبی 21/12/2025، مەسرور بارزانی، سەرۆكێ حوكمەتا هەرێما كوردستانێ، ل كۆچكا كۆماری ل قاهیرە، ل گەل عەبدولفەتاح سیسی، سەرۆككۆمارێ مسرێ كۆمبوو.
ب گۆرەی بەیاننامەیەكا حوكمەتا هەرێما كوردستانێ»سەرۆكێ مسرێ خوەشحالییا خوە ب سەرەدانا سەرۆكێ حوكمەتا هەرێما كوردستانێ نیشادا و بەرهەڤییا وەلاتێ خوە بۆ پێشڤەبرنا هەڤبەندیێن دو ئالییانە دوپاتكر».
بەیاننامەیا حوكمەتا هەرێما كوردستانێ دیاركر ژی» سەرۆكێ حوكمەتا هەرێمێ رۆلێ مسرێ و سەرۆك سیسی ژ پێخەمەت چەسپاندنا ئاشتیێ و ئارامیێ ل دەڤەرێ بلند هەلسەنگاند».
ئاماژە ب وێ چەندێ ژی هاتیە كرن» د كۆمبوونێدا دووپاتی ل گرنگییا ب هێزكرنا هەڤبەندیێن هەرێما كوردستانێ و مسرێ د وارێن جۆراوجۆردا، ب تایبەتی وەبەرهێنانێ و لێكگۆهارتنا بازرگانی هاتە كرن».
د پشكەكا دی دی یا دانوستاندناندا» هەردو ئالی هەڤڕا بوون ل سەر پێشڤەبرنێ ب هەماهەنگیێ و هاریكاریێ بۆ پاراستنا ئاسایش و ئارامییا هەرێما كوردستانێ و ئیراقێ و دەڤەرێ».

مەسرور بارزانی، سەرۆكێ حوكمەتا هەرێما كوردستانێ، بەهیداری و سەرەخوەشییا خوە ل ئانۆ جەوهەر عەبدۆكا، وەزیرێ ڤەگوهاستن و گوهاندنێ كر بۆ وەغەركرنا مامێ وی، هونەرمەندێ ناڤدارێ كوردستانێ، زوهێر عەبدولمەسیح.
مەسرور بارزانی د پەیاما خوە یا سەرەخوەشیێدا دبێژیت» زوهێر عەبدولمەسیح ئەكتەر و دەرهێنەرەكێ نیشتمانپەروەرێ دیارێ كوردستانێ بوو كو خزمەتەكا مەزن یا سینەما و دراما و شانۆیا كوردی كریە. خودایێ مەزن گیانێ وی ب بەحەشتێ شاد بكەت و ئارامیێ ب هەوە ببەخشیت».

ژێدەرەكی ژ لیژنەیا چارچۆڤەیێ هەماهەنگیێ شیعی ئاشكراكر، هێزێن سیاسی د ناڤ لیژنەیێدا داخوازا ناڤبرییا نێڤدەولەتی كریە بۆ دابینكرنا گەرەنتیێ، تاكو گرۆپێن چەكدارێن ئیراقێ ل وەختێ پرۆسەیا هەلوەشاندن و تێكهەلكرنا وان ب دەزگەهێن ئەمنی یێن فەرمی ڤە نەبنە ئارمانج. ژێدەرەكی ژ لیژنەیا چارچۆڤەیێ هەماهەنگیێ شیعی ئاشكراكر، هێزێن سیاسی د ناڤ لیژنەیێدا داخوازا ناڤبرییا نێڤدەولەتی كریە بۆ دابینكرنا گەرەنتیێ، تاكو گرۆپێن چەكدارێن ئیراقێ ل وەختێ پرۆسەیا هەلوەشاندن و تێكهەلكرنا وان ب دەزگەهێن ئەمنی یێن فەرمی ڤە نەبنە ئارمانج. وی ژێدەری رۆهنكر، ئەڤ گەرەنتییە داخوازا پێگیریبوونێیە ب هێرش نەكرنێ ل سەر وان گرۆپان و سەركردەیێن وان ژی بخوەڤە دگریت، ل گەل پاراستنا دارایی و سامانێن وان ژ هەر دەستێوردانەكێ، ل بەرامبەر وێ چەندێ چەكێن خوە بێخنە بن كۆنترۆلا دەولەتێ و پرۆسە ژی وەك بابەتەكێ ناڤخوەیی و ڤەكری بمینیت. ژ ئالییەكێ دی ڤە، پترییا فراكسیۆنێن چەكدار وەك عەسائیب ئەهلولحەق، لیوایێن ئیمام عەلی و لیوایێن سەیدولشوهەدا رازیبوون دیاركریە بۆ تێكهەلبوونێ ل گەل وەزارەتێن ناڤخوە و بەرگریێ و حەشدا شەعبی، ئەڤە ژی پشتی وێ چەندێ چارچۆڤەیێ هەماهەنگیێ سەرۆكێن گرۆپێن چەكدار ئاگەهداركرین، بەردەوامییا وان د پرۆسەیا سیاسیدا گرێدایە ب هەلوەشاندنا بالێن خوە یێن چەكداری. سەرەرای ڤان بزاڤان، هێشتا هندەك ژ گرۆپان وان دژایەتییا وان بڕیاران دكەن، ب جۆرەكی كەتائیبێن حزبوللا مەرجێ پاراستنا سەروەریێ و نەمانا دەستێوەردانا دەرەكی دانایە بۆ هەر دانوستاندنەكێ ل سەر پرسا چەكی، بزاڤا نوجەبا ژی دووپاتی ل بەردەوامییا بەرهنگاربوونا هێزێن ئەمریكی كریە. پێشتر فائیق زێدان، سەرۆكێ جڤاتا بلند یا دادوەریێ ل ئیراقێ و نوری مالكی، سەرۆكێ هەڤپەیمانییا دەولەتا قانوونێ، ئاماژە ب هەبوونا رێككەفتنێ و پێنگاڤێن جدی كربوو بۆ وێ چەندێ چەك تنێ د دەستێ دەولەتێدا بیت ودووماهی ب دیاردەیا چەكداری ژ دەرڤەی قانوونێ بهێت.ئەو بزاڤە د وەختەكیدانە كو گڤاشتنێن ئەمریكا ل سەر حوكمەتا ئیراقێ زێدەبووینە هەتا دوومهای ب رۆلێ وان گرۆپان بینیت و رێگریێ د پشكدارییا وان د حوكمەتا نوو یا ئیراقێدا بكەت.

هەولێر، قائید میرۆ

جێگرێ بەرێ یێ سەرۆكێ جڤاتا نوونەرێن ئیراقێ ئاشكراكر، پێكئینانا حوكمەتا نوو یا ئیراقێ دێ بۆ چەند مەهان گیرۆبیت و دبێژیت: پێدڤییە كورد ب ئێكگرتی بچنە و كار ل سەر پەیاما سەرۆك بارزانی بۆ ئێكگرتنا كوردان ل بەغدا.
د. بەشیر حەداد، جێگرێ بەرێ یێ سەرۆكێ جڤاتا نوونەرێن ئیراقێ بۆ رۆژنامەیا (ئەڤرۆ) دیاركر»هەتا نوكە چو حوكمەتەك ل ئیراقێ د وەختێ خوە یێ قانوونی دا نەهاتینە پێكئینان، هەردەمێ هەلبژارتن هاتبنە ئەنجامدان ل ئیراقێ پرۆسەیا پێكئینانا حوكمەتێ گیرۆبوویە هەرجارێ چەند وەخت ڤەكێشایە هەتا ئالیێن سیاسی گەهشتینە رێككەفتنێ، ئەز باوەرم ڤێجارێ دێ پێكئینانا حوكمەتێ گیرۆبیت و چەند مەهەكا دێ ڤەكێشیت، ئەڤەژی چو ب ئەگەرێ هەڤڕكییا د ناڤبەرا پێكهاتەیەكێ بیت یان ژی د ناڤا چەند پێكهاتەیاندا بیت، ب دیتنا من هەكە كۆمبوونا جڤاتا نوونەرێن ئیراقێ ل دووماهییا ڤێ مەهێ بڕێڤەبچیت دبیت سەرۆكێ جڤاتا نوونەران بهێتە هەلبژارتن، چونكە سوننەیان كێمتر ئاریشە هەنە، بەلێ هەلبژارتنا سەرۆككۆماری و پێكئینانا حوكمەتێ دێ پاشكەڤیت، ئەگەر ژی گەلەكن ژوان ژی رێكنەكەفتنا ناڤمالا شیعی و ناڤمالا كوردییە، مخابن هەتا نوكە كورد ل دۆر دیاركرنا بەربژارەكی بۆ پۆستێ سەرۆككۆماری نەگەهشتینە رێككەفتنێ، هەروەسا شیعەیان ژی خوە ئێكلا نەكریە كا دێ سودانی دووبارە بیتە سەرۆك وەزیر یان ژی گەلەك ناڤێن دی دهێنە گوتن ببنە بەربژار بۆ پۆستێ سەرۆك وەزیران».
ل دۆر هەرێما كوردستانێ ژی جێگرێ سەرۆكێ بەرێ یێ جڤاتا نوونەرێن ئیراقێ گوت» ئەندامێن كورد ل جڤاتا نوونەرێن ئیراقێ گرێدای بڕیارا ئالیێن سیاسی نە، هەكە ل هەرێما كوردستانێ ئالیێن سیاسی لێكنێزیك ببن ب تایبەتی پارتی و ئێكەتی ئەڤە بێگومان پەرلەمانتارێن وان ژی ل بەغدا دێ هەمان هەلوەست هەبیت، بەرۆڤاژی هەكە ل هەرێما كوردستانێ رێككەفتن و تێكگەهشتن نەبیت دێ كاریگەری ل سەر نوونەرێن كورد ل بەغدا هەبیت، خەلكێ كوردستانێ یێ دلگرانە هەتا نوكە كورد نەشیاینە ئیكبگرن ل بەغدا، شیعەیان چوارچوڤەیەك هەیە و بۆ هەر پرسەكێ كۆم دبیت و هەلوەستێ خوە دیار دكەن سوننەیان ب هەمان شێوە جڤاتەك پێكئینایە و بۆچۆنا وان یا خۆیایە تنێ كورد ماینە چو جڤات نینن، ئەڤە سالەك زێدەترە هەلبژارتن ل هەرێما كوردستانێ هاتینە ئەنجامدان و حوكمەتا هەرێما كوردستانێ نەهاتیە پێكئینان و پەرلەمان نەهاتیە كاراكرن ئەڤەژی دبیتە فاكتەرەكێ خراپ بۆ كوردان ل بەغدا، چونكە هەكە حوكمەتا هەرێما كوردستانێ نەهێتە پێكئینان دێ پێگەهێ كوردان ل بەغدا لاوازبیت».
د. بەشیر حەداد ئاماژەكر» هەردەم سەرۆك بارزانی خواستییە كورد ئێكدەنگ بن و ب ئێكگرتی بچنە بەغدا و بهێزڤە سەرەدەریێ ل گەل بەغدا بكەن، هەر ئاریشەیەك ل هەرێما كوردستانێ هەیە نەبەن بۆ بەغدا و ئاریشەیێن هەرێمێ ل گەل یێن بەغدا نەهێنە تێكهەلكرن، ژ بەر كو بەغدا نەشێت ئاریشەیێن خوە چارەسەر بكەت دێ چاوا ئاریشەیێن كوردان چارەسەر كەت، كارەكێ شاشە پێكئینانا حوكمەتا هەرێمێ بهێتە گرێدان ب پێكئینانا حوكمەتا ئیراقێ ڤە و چو ئەنجام نابن، لەوڕا پێدڤییە بادەكا هەرێمێ و بەغدا بهێتە جوداكرن و تێكهەلكرنا هەردوو بادەكان ئاریشەیان ئالۆزتر دكەت ئەز سەدێ سەد ل گەل بۆچوونا سەرۆك بارزانی مە كورد ب ئێكگرتی بچنە بەغدا، ئەڤەژی رامانا وێ چەندێ د دەت ل دەستپێكێ ئاریشەیێن ناڤخوە بهێنە چارەسەركرن و كابینەیا حوكمەتا هەرێمێ بهێتە پێكئینان د دووڤدا ژی ب ئێكگوتار بچینە بەغدا وی وەختی دێ كاریگەریێن زێدەتر هەبن هەمبەری شیعە و سوننەیان، هەروەسا ئێكگرتنا كوردان دێ كاریگەری هەبیت ل سەر مالا شیعی و سوننی كو نەشێن گڤاشتنان ل سەر كوردان بكەن».