ئه‌ڤرۆ نيوز:

د ھەیڤا رەمەزانێ دا دێ چەوا زانین رۆژی ب چ دکەڤیت، ئەرێ بەس خوارن و ڤەخوارنن؟ بۆ ھشیاربوون ژ رۆژی و نەداکەتنا ئاستێ خێرا رۆژیێ ل دەڤ خودای و خوە دوورخستن ژ ئەوان تشتێن کاریگەریێ ل قیمەت و بھایێ رۆژیێ دکەن، مەلا ئەحمەد حەسەن خوتبەخوین و پێشنڤێژێ مزگەفتا جودی دیار کر رۆژی بھا و گرانیا خوە یا خێرێ ھەیە و ب ھندەک تشتان و بھا و گرانیا وێ نامینیت یان خێرا وێ کێمتر لێ دھێت.
مەلا ئەحمەد حەسەن خوتبەخوین و پێشنڤێژێ مزگەفتا جودی دیار کر رۆژی بھا و گرانیا خوە یا خێرێ ھەیە و ب ھندەک تشتان و بھا و گرانیا وێ نامینیت یان خێرا وێ کێمتر لێ دھێت، دەما ھەرتشتەکێ بچیتە د ناڤ گەدەیا مرۆڤی دا چ خوارن بیت یان ڤەخوارن بیت ھەتا حەبەک ژی بیت کو کاریگەریێ ل سەر گیانی و گھۆرینەکێ بکەت ئەڤە رۆژی پێ دکەڤیت و قەبیل نینە، ئانکو ھەر تشتەکێ بچیتە د ناڤ گیانێ مرۆڤی دا رۆژی پێ دکەڤیت، دەربارێ جنسی و چەوانیا کەتنا وێ ب کریارا جنسی تەئکید پێ دکەڤیت ئەوی دەمی زەلامەک بچیتە دەڤ ژنکا خوە یێ ب رۆژی ئەڤە رۆژی پێ دکەڤیت یان زەلامەک ئاڤا خوە بینیت یان ژنک ل دەمێ دکەتە د بێ نڤێژیێ دا ئەڤان حالەتان رۆژی پێ دکەڤیت.
مەلا ئەحمەد حەسەن خوتبەخوین و پێشنڤێژێ مزگەفتا جودی گۆت “ژبلی ئەوان رۆژی پێ ناکەڤیت، لێ ب دیتن و بەرێ خوەدانا دیمەنەکێ ھوسا ھەتا کاریگەریێ ل سەر بکەت و ئەو دیمەن نەیێ شەرعی بیت چ تەماشەکرنا ڤیدویەکا جنسی یان تەماشەکرنا ژنەکێ ب ئاوایەکی نەئەنیەتەکا ساخلەم بەلکو پتر بۆ حەز و ڤیانا جنسی بیت ئەڤە خێرا وێ کێم دبیت ھەتا ئەوی رادەی کو بەس ئەداکرنا رۆژێ دمینیت و چ خێر تێدا نامینیت، گوھدان و گۆھداریکرنا تشتەکی کو کاریگەری و کارتێکرنا خوە ھەبیت ئەوی دەمی خێرا وێ رۆژی پێ کێم دبیت و ھەتا کریار و رەفتارێن مرۆڤەکی ل گەل سلوکێ رۆژیگرتنێ نەگۆنجیت و نەخۆشی و بێزاریێ بۆ مرۆڤێن دەوروبەرێ خوە چێ بکەت ئەوی دەمی بھایێ رۆژیا وی ژی دھێتە خوارێ.
دەربارێ جگارەکێشانێ ناڤبری دیار کر رۆژی ب جگارەکێشانێ ژی دکەڤیت و دبیتە تشتەک کو جۆرەکێ مادەیەکێ پاڤێژتە د ناڤ گەدەیا مرۆڤی دا و دبیتە ئەگەرەک مرۆڤ ھند ھەست ب برسێ نەکەت، قەترا دفنا دەمێ مرۆڤ یێ نەخۆش رۆژی پێ دکەڤیت.
مەلا ئەحمەد ل مەزگەفتا جودی دیار کر ئارمانج ژ رۆژیگرتنێ رێکەکە بۆ خوە پاراستن ژ ئەوان گونەە و حەزان بھێتە پاراستن، خودایێ مەزن چ پێدڤی و ھەوجەی ب مە نینە بەس رابین خوە برسی و تێنی بکەین، بەلکو مە پێدڤی و ھەوجەی ھەیە بۆ خێر و بھا و گرانی و پاداشت و چوونا بەھەشتێ یە، ھەکە رۆژیگر نەھێتە پاراستن ژ ئەوا کریار و گونەھا وەک وی کەسی یێ سەرێ خوە دشووت و دچیتە سەرگیڤکەکێ گلێشی دروونتە خوارێ ئەڤە چ مفا ژ وێ پاقژیێ وەرنەگرت.

ئەڤرۆ نیوز ، نەوزاد ھلۆری:
ماوەیێ چەند رۆژەکایە میدیایێن سەر ب پارێزگەھا سلێمانیێ و پشکەک ژ لایەنێن سیاسی لێکدانەڤەیەکا شاش بۆ رستەیەکا بارزانی دکەن ئەوا کو د ددیارەکی َدا لگەل گوڤارا فوکس پولیس ئەنجامدای ، و ددەن دیارکرن کو بارزانی گوتیە ئەگەر ھەرێما کوردستانێ سەربخوەیێ رابگەھینیت دێ گەلێ کوردستانێ ژ برسان دا مرن ، بەرپرسەکێ پارتی ددەتن دیارکرن کو ئەڤە چوار سالە حکومەتا عیراقێ بودجەیێ ھەرێمی بری و کەس برسان دا نەمریە و ئەگەر ئەو لایەنێن سیاسی ب ڤی رەنگی ھزرێن ژەھراوی ل سەربخویا کوردستانێ بکەن دێ چاڤەرێ خێرێن داگیرکەران بن.
دکتور عەلی تەتەر بەرپرسێ لقێ ٨ێ پارتی دیموکراتی کوردستان ل قەزا زاخۆ دیارکر کو و پێدڤی یە گەلێ کوردستانێ بۆ خوونا شەھیدان سەربخویێ ھەلبژێرن و گۆت: (جھێ داخێ یە ھندەک رەوشەنبیر و سیاسەتڤان و سەرکردەیێن ھندەک لایەنێن سیاسی دناخێ خوە دا دژی سەربخوەیا ھەرێما کوردستانێ نە ، ب بھانەیا وێ یەکێ ئەگەر کوردستان سەربخوەیێ رابگەھینین دێ گەلێ کوردستانێ ژ برسان دا مرن ، ئەگەر ب ئەڤێ ھزرا ژەھرگرتی ھزر بکەین گەلێ کوردستانێ بو ھەتا ھەتایێ ھزرێ د ئازادی و سەربخوەیێ ناکەت و دێ چاڤەرێ داگیرکەران بیت کو خێرەکێ ل گەل بکەن داکو ئەو دلوڤانیێ ب مە ببەن و مە ژ سەربخوەیێ بێ بەھر بکەن کو ئەڤ یەک ژی تەمام وەکو دانوستاندنا سالا ١٩١٩-١٩٢٠ یە دناڤبەرا رەوشەنبیر و سیاسەتمەدارێن کوردان بوویە ل ئیستەنبولێ ، کو ھندەک ژ وان ھزردکر ئەگەر تورک و عەرەب ژ ئاریشەیێن نافخوەیی رزگار ببن بێی دودلی دێ مافێن برایێن کورد ژی ھێتەدان و نھا دەمێ داخوازکرنا مافان نینە کورد بکەن ، ژبەرکو ل وی دەمی عیراق و تورکیا د دەردەسەریێ دا دژیان ، ئەو دەما کو ل سالا ١٩٩١ گەلێ کوردستانێ سەرھلدان دژی رژێما بەعس کری و ل سالا ١٩٩٢ ژی ھەلبژاردنێن پەرلەمانی ئەنجامدای و حکومەت پێکئینایی و د ھەمان سالێ ژی فیدرالی راگەھاندی خەلکەکێ زور ھزر دکر کو کورد دێ ژ برسان دا مرن بەلێ ئەڤ یەک چێنەبوو ، ئەو دەما کو ئالایێ کوردستانێ ھاتیە بلندکرن ھەمان دەنگێن نەشاز و ھەمان کەنالێن نەبەرپرسیار بەلاڤکر کو گەلێ کورد دێ ژ برسان مرن بەلێ دیسان ئەو یەک ژی چێنەبوو ، زێدەباری ڤێ یەکێ ئەڤە چوار سالە حکومەتا عیراقێ موچە و بودجا ھەرێما کوردستانێ بری بەلێ نە ل وی دەمی و نەژی نھا کەس ژ برسان دا نەمریە )
زێدەتر گۆت: (پێدڤی بو ئەو دەما کو حکومەتا عیراقێ موچە و بودجە برین ھەر ل وی دەمی سەربخوە ھاتبایە راگەھاندن ، بەلێ دیارە شەرێ داعش بو سەر ھەرێما کوردستانێ ئەڤ دەرفەتە تێکدا ، ل ڤێرە من دڤێت ژ وان کەسانێن رەشبین ل نافخوە و دەرڤەیێ ھەرێمێ ب پرسم ئەرێ تشتەک مایە کو عیراقێ ل گەل ھەرێما کوردستانێ نەکری مینا جینوساید و ئەنفال و تەعریبکرن و ب بەعسکرن و ڤەگوھاستن و دەرکرن و بن ئاخکرنا ب ساخی و وێرانکاریا گوند و باژێران و ژ ناڤبرنا ژێرخانا سروشتی و ئابووری و ھەتا داویێ و ئەو کەسانێن کو ھەتا نھا ئومێدەک ب عیراقێ مای و دژی گەلێ خوە کار دکەن نە بلا ب فەرموون رێیێن دن ژی نیشا عیراقێ بدەن داکو ئەوان ژی لسەر گەلێ مە تاقی بکەن )
ناڤبری د درێژاھیا ئاخفتنێن خوە دا لسەر پەیجێ خوە گوت ژی: (پشتەڤانیکرنا پرسا سەربخوەیێ ئەرکێ ھەموو کەسان نینە و ھەموو کەس ژ ھەژی نینن پشتەڤانیێ بکەن ، نیشتمان پەروەری و دلسووزی لسەر کەنالێن راگەھاندنێ و فێسبوکێ ناھێتەکرن بەلکو وەکو ژوزف مازینی بیرمەندێ ناسیونالیزمی یە کو ددەتن دیارکرن کو نیشتمان پەروەری و دلسووزی ئەو کەسە کو بەرھەڤ بیت بۆ نیشتمانێ خوە قوربانیێ بدەت ، بەلێ ئەوێن مە گوتی بەرھەڤ نینن ل پێناڤ ئازادی و سەربخوە یا کوردستانێ چو قوربانیان بدەن )

ئەڤرۆ نیوز ، نەوزاد ھلۆری:
ل ھەموو پارێزگەھێن ھەرێما کوردستانێ فرەژنی ھاتیە مەرجدارکرن ، بەلێ ئەڤ یەک نەبوویە سەدەم کو زەلام ژنا دوویێ بو سەری نەئینن ژبەرکو بو مەھرکرنا ژنا دوویێ ژن و زەلام پەنایێ بۆ دادگەھا شێخان دبەن ، پارێزەرەکێ دادگەھا شێخان دیارکر کو 80% ژ وان کەسانێن کو دڤێت ژنەکا دن لسەر ھەڤژینا خوە بینن ژ پارێزگەھێن ھەرێما کوردستانێ دھێنە شێخان.
جەلال عەبدلکەریم وەلاتیەکێ باژێرێ دھۆکێ یە و ل گەل نیاسەکێ خوە ھاتبویە دادگەھا شێخان بۆ مەھرکرنا ژنا دوویێ گۆت: (ئەم چوینە دادگەھێن دھۆک و باژێرێن دن یێن دھۆکێ بەلێ چوو ژ وان دادگەھان ژنا دوویێ بو ئەوی نیاسێ مە مەھرنەکر ، ژبەر ڤێ نەچاربوین کو بچینە دادگەھا شێخان و ل وێرێ ب ساناھی ب پارە گرێبەسەتا مەھرکرنێ درۆست بکەین ، ئەڤە د دەمەکێ دایە کو دادگەھێن ھەرێمێ چوو پارەی ژ وەلاتیان وەرناگرن)
زێدەتر گۆت: (ئەگەر حکومەت نەشێت چارەسەریا فرەژنیێ بکەت بلا رێکێ نەدەت کو وەلاتیێن مە نەچنە شێخان ژی ب پارە ژنا دوویێ بینن ژبەرکو شوونا ئەو پارەیێ زور بو عیراقێ بچیت بلا ھەر بوو ھەرێما کوردستانێ بیت)
ژنەکا بەردایی نەڤیا ناڤێ خوە بێژیت و دڤیا سەر ھەوی شوو بکەت و بەرامبەر دادگەھا شێخان یا بەرھەڤ بوو گۆت: (ئەز وەلاتیەکا ئێک ژ باژێرێن سەر ب پارێزگەھا ھەولێرێ مە و چویمە دادگەھێن باژێرێ خوە بەلێ ئەوان ئەز ل گەل زەلامەکێ دن کو ھەڤژینا وی یا ساخە مەھر نەکرم ، بھانەیا وان ئەو بو کو فرەژنی ل ھەرێما کوردستانێ ل گورەی قانونێ قەدەغەیە و مەرجدارە ، ئەوان گوتە مە دڤێت ژنا ئێکێ ل گورەی راپورتەکا نوژداری بھێتە سەلماندن کو ژ روویێ ساخلەمیێ ڤە نەیا درۆستە ب تایبەتی ژی ئەگەر زاروک نەبن ، بەلێ ژنا ئێکێ یا درۆستە و ئەڤ یەک ھاتە رەتکرن ژبەرڤێ نەچاربوین بھێنە دادگەھا شێخان و ل ڤێرە ب 600 دولاران گرێبەستا مارەبرینێ ل دادگەھێ چێبکەین)
کاوە زبێر بەرواری پارێزەر ل دادگەھا شێخان بۆ ئەڤرۆ نیوز گۆت: (مارەبرینا ژنا دوویێ و سێیی و چوارێ ل دادگەھا شێخان ژلایێ قانونی ڤە نورمال و رێپێدایە ژبەرکو سەر ب عیراقێ یە و ھەموو کەس دکارن ل ڤێرە ژنا دوویێ مەھر بکەن بێی مەرج ، نوکە ب رەنگەکێ بەرفرەە ژن و زەلامێن ھەرێما کوردستانێ ب پارێزگەھێن دھۆک و ھەولێر و سلێمانی بەرێ خوە دایە دادگەھا شێخان بۆ مەھرکرنا ژنا دوویێ بو سەری ، و دکارم بێژم زێدەتری 80% ژ وان ژن و زەلامێن ژنا دوویێ بو سەری ل دادگەھا شێخان دھێنە مەھرکرن خەلکێ ھەرێما کوردستانێ یە کو ئەڤ یەک ژی خویا دکەت قانونا فرەژنیێ ل ھەرێما کوردستانێ نەبوویە رێگر بو مەھرنەکرنا ژنا دوویێ بو سەری)
زێدەتر گۆت: (ھەر چەندە ل دادگەھا شێخان مامەلە ب رەنگەکێ قانونی ب رێڤەدچن و مافێن ھەردوو ژنان دھێنە گەرنتیکرن ، بەلێ پێدڤی یە کو دادگەھا شێخان ژی بھێتە سەر ھەرێما کوردستانێ)
پارێزەرێ ناڤبری دیارکر ژی کو قەیرانا دارایی ب رێژا 70% فرەژنی ل دادگەھا شێخان کێمکریە و زێدەتر گۆت: (بەری کو قەیرانا دارایی ب سەر ھەرێما کوردستانێ بھێت رۆژانە زێدەتری 20ژن وەکو ژنا دوویێ بو سەری دھاتنە مەھرکرن بەلێ نھا رۆژانە ئێک ھندەک جاارن دوو دھێنە مەھرکرن)
ل گورەی زانیاریێن کو ل دادگەھا شێخان دەست ئەڤرۆ نیوز کەفتین سالانە ل دادگەھا ناڤبری زێدەتر ژ ھزار ژن وەکو ژنا دوویێ بو سەری دھاتنە مەھرکرن کو ھەموو ژی خەلکێ دھۆک و ھەولێر و پشکەک ژی ژ سلێمانیێ بوون.