ب هەلكەفتا سالڤەگەڕا 80 یا دامەزراندنا پارتی دیموكراتی كوردستان، ئالییێن سیاسی و سەركردەیێن هەرێما كوردستانێ و ئیراقێ پەیامێن پیرۆزباهیێ ئاراستەی سەركردایەتی و جەماوەرێ پارتی كرن و د پەیامێن خۆ دا دوپاتی ل سەر دیالۆگ و تەباییێ كر بۆ دەربازكرنا ئاستەنگان.
عەلی زەیدی: دیرۆكا سیاسی یا پارتی د پرۆسەیا نیشتمانی دا بلند د هەلسەنگینین
عەلی زەیدی، سەرۆك وەزیرێن ئیراقێ، پەیامەكا پیرۆزباهییێ ئاراستەی سەركردایەتی، كادر و جەماوەرێ پارتی كر. سەرۆك وەزیرێن ئیراقێ د پەیاما خۆ دا گۆت»جوانترین پیرۆزباهی و هیڤییا سەركەفتنێ ئاراستەی سەركردایەتی، كادر و جەماوەرێ پارتی دیموكراتی كوردستان دكەین ب هەلكەفتا 80 سالییا دامەزراندنا پارتییا وان، هیڤییا سەركەفتنا بەردەوام بۆ وان دخوازین.
د ڤێ هەلكەفتێ دا، دیرۆكا سیاسی یا پارتی و پشكداریێن وان یێن نیشتمانی د ژیانا نیشتمانی دا ل گەل هێزێن دی یێن سیاسی یێن ئیراقێ ب بلند د هەلسەنگینین. دوپات دكەین ل سەر بەردەوامبوونا كاركرنا هەڤپشك بۆ چەسپاندنا پرەنسیپێن هەڤپشكیێ د نیشتمانی دا، بهێزكرنا ئارامیێ، پاراستنا ئێكپارچەیی و سەروەرییا ئیراقێ و ئاڤاكرنا پاشەڕۆژەكێ كو خواستا هەموو پێكهاتەیان بجهـ بینیت.».
ئێكەتی: پێدڤییە خەبات ل سەر بنەمایێ ئارمانجێن نەتەوەیی و دیموكراتی بیت
مەكتەبا سیاسی یا ئێكەتی نشتیمانی كوردستانێ د پەیامەكا فەرمی دا پیرۆزباهی ل مەكتەبا سیاسی و ئەندامێن پارتی كر. ئێكەتیێ هیڤیخواست كو خەباتا هەموو ئالییان ل سەر بنەمایێ ئارمانجێن نەتەوەیی و دیموكراسی بیت بۆ دەربازكرنا ڤێ ڕەوشا نوكە بەرەڤ ڕوویێ كوردستانێ و دەڤەرێ بووی. هەروەسا دوپاتی ل سەر وێ چەندێ كر كو پێكڤەكاركرن دڤێت پێخەمەت ب هێزكرن و ڕاستكرنەڤەیا ڕێڕەوێ ئەزموونا هەرێمێ بیت.
سەلاحەدین محەمەد بەهائەدین: رێكخستنا ناڤمالا كوردی و كاراكرنا سازییان گرنگترین ئەركە بۆ دەربازكرنا قووناغێ
سەلاحەدین محەمەد بەهائەدین، ئەمینداری گشتی یێ ئێكگرتوویا ئیسلامییا كوردستانێ، د پەیامەكێ دا بۆ سەرۆك بارزانی، سەرەڕای پیرۆزباهیێ، ئاماژە ب ڕەوشا هەستیار و دژوار یا دەڤەرێ و هەرێمێ كر. ناڤبری داخوازی ژ پارتی كر كو د ئاستێ بەرپرسایەتیێ دا بن بۆ دەربازكرنا ڤێ قووناغێ و دوپاتی ل سەر كاراكرنا سازیێن یاسایی و نشتیمانی و ڕێكخستنا ناڤمالا كوردی و بیراقی كر دا كو وەلات ژ ڕوودانێن نەچاڤەڕێكری دوور بیت.
عەممار حەكیم: دامەزراندنا پارتی وەستگەهەكا دیار بوو د ژیانا سیاسی یا ئیراقێ دا
عەممار حەكیم، سەرۆكێ ڕەوتا حیكمە یا نشتیمانی ل ئیراقێ، پیرۆزباهی ل سەرۆك بارزانی و سەركردایەتییا پارتی كر. حەكیمی ڕاگەهاند كو دامەزراندنا پارتی وەستگەهەكا دیار بوو د ژیانا سیاسی یا ئیراقێ دا و ڕۆلێ وێ د چەسپاندنا مافێن گەلێ كوردستانێ و ب هێزكرنا دیموكراسیێ دا ب بلند هەلسەنگاند. هەروەسا دیالۆگ و تێكگەهشتن وەك تەنێ ڕێكا چارەسەركرنا كێشەیان ل قەلەم دا.
ئەیاد عەلاوی: پارتی خوەدان دیرۆكەكا پڕ ژ خەبات و قوربانیدانێ یە
ئەیاد عەلاوی، سەرۆك وەزیرێن پێشتر یێ ئیراقێ و سكرتێرێ گشتی یێ بزاڤا نیشتمانییا ئیراقی، ب هەلكەفتا 80 سالڤەگەڕا 80 یا دامەزراندنا پارتی دیموكراتی كوردستان، پەیامەكا پیرۆزباهییێ ئاراستەی سەرۆك مەسعود بارزانی و سەركردایەتی و ئەندامێن پارتی كر.
عەلاوی د پەیاما خۆ دا، ئاماژە ب دیرۆكا خەبات و قوربانیدانا پارتی دا و رۆلێ پارتی د چەسپاندنا دیموكراسیێ و هەڤپشكییا نیشتمانی د ئیراقێ دا ب بلند هەلسەنگاند.
سوودانی: دیرۆكا سیاسی یا پارتێ د قووناغێن جودا یێن ئیراقێ دا كاریگەرە
محەمەد شیاع سوودانی، سەرۆك وەزیرێن بەرێ یێ ئیراقێ، ب هەلكەفتا 80 سالییا دامەزراندنا پارتی دیموكراتی كوردستان، پەیامەكا پیرۆزباهییێ ئاراستەی سەركردایەتی، كادر و جەماوەرێ پارتی كر. سوودانی د پەیاما خۆ دا ئاماژە ب دیرۆكا سیاسی یا پارتی و رۆلێ وێ د رووبڕووبوونا دیكتاتۆرییەتێ دا كر، هەروەسا دوپاتی ل سەر گرنگییا بهێزكرنا پەیوەندیێن د ناڤبەرا بەغدایێ و هەولێرێ دا كر.
هەڤپەیمانییا سیادە: پارتی خودان دیرۆكەكاكا سیاسی و نیشتمانییا مەزنە
د پەیاما سەرمەد خەنجەر، سەرۆكێ هەڤپەیمانییا «سیادە» دا هاتییە « پارتی خودان ئامادەبوونا كاریگەرە د دیرۆكا سیاسی یا ئیراقێ دا و قوربانیێن مەزن داینە و رووبڕووی ئاستەنگ و وەستگەهێن دژوار بوویە».
هەروەسا سەرۆكێ هاوپەیمانییا سیادە، ، ئاماژە ب رۆلێ پارتی كر د «بەرگریكرنێ ژ داخوازێن گەلێ كورد و بهێزكرنا رێڕەوێ هەڤپشكییا نیشتمانی ل وەلاتی».
سەرمەد خەنجەر دوپاتی ل سەر گرنگییا گاڤهاڤێتنێ بەر ب ئیراقەكا ئارامتر، ئێكگرتیتر و گەشەكری كر، كو تێدا مافێن هەموو پێكهاتەیان پاراستی بن.
هەڤپەیمانییا عەزم: پارتی د كاروانێ نیشتمانیێ ئیراقێ دا خودان پشكدارییا كارا یە
هەڤپەیمانییا عەزم ب بەیاننامەیەكێ پیرۆزباهی ل سەرۆك بارزانی و تەڤاییا گەلێ كوردستانێ كر. ئاماژە ب وێ چەندێ كر كو ئەڤ هەلكەفتە ب بیرئینانەڤەیا كاروانێ سیاسی یێ مستەفا بارزانییێ نەمرە ژ سالا 1946ێ ڤە. هەروەسا دەستخۆشی ل قوربانییێن پارتی و پشكدارییا وێ یا كارا د كاروانێ نشتیمانی یێ ئیراقێ دا كر.
بەرەیێ توركمانی: پێدڤییە 80 سالییا پارتی ببیتە دەلیڤەیەك بۆ بهێزكرنا دیالۆگ و رێزگرتنا دەستووری
محەمەد سەمعان ئاغا، سەرۆكێ بەرەیێ توركمانی یێ ئیراقێ، د پەیاما خۆ دا پیرۆزباهی ل سەرۆك مەسعود بارزانی كر. ناڤبری ئەڤ هەلكەفتە وەك دەلیڤەیەك بۆ ب هێزكرنا دیالۆگێ و ڕێزگرتن ل دەستووری زانی، ب شێوەیەكێ كو مافێن هەموو پێكهاتەیان و ب تایبەت توركمانان پاراستی بن. هەروەسا دەربارەی كەركووكێ دوپاتی ل سەر پاراستنا برایەتیێ د ناڤبەرا كورد، توركمان و ئەرەبان دا كر دا كو باژێڕێ كەركووكێ ببیتە نموونەیا دادیێ.
میسال ئالوسی: شانازیێ ب خەباتا پارتی د ئاڤەدانكرن و پاراستنا مافێن گەلێ كوردستانێ دكەم
سیاسەتمەدارێ ئیراقی میسال ئالوسی، د پەیامەكێ دا بۆ سەرۆك مەسعود بارزانی، ڕێزا خۆ بۆ خەباتا گەلێ كورد و ڕۆلێ پارتی د ئاڤەدانكرن و پاراستنا مافان دا دیار كر. ئالوسی د پەیاما خۆ دا گۆت»شانازیێ دكەم كو گەرمترین پیرۆزباهیێ ئاراستەی كەسایەتییێ خەباتكەرێ جەنابێ هەوە و نەتەوەیێ كورد و بنەمالێن شەهیدان و جەماوەرێ پارتییا هەوە دكەم». هەروەسا هیڤی خواست كو ئالایێ كوردستانێ هەر ب بلندی بمینیت و ئاسایشا وەلاتییان و مافێن وان پاراستی بن.

ل رۆژا شەمبی، 15/8/ 2026، ل پیرمام، سەرۆك مەسعود بارزانی پێشوازی ل قاسم عەبوودی، شیرەتكارێ ئاسایشا نیشتمانییا ئیراقێ كر.
بارەگەهێ بارزانی د بەیاننامەیەكێ دا بەلاڤكر» د دیدارێ دا، بیروڕا ل دۆر بارودۆخ و دووماهی پێشهاتێن ئەمنی و سیاسی یێن دەڤەرێ هاتنە لێكگۆهارتن و باس ل هەماهەنگییا د ناڤبەرا حوكمەتا هەرێما كوردستانێ و حوكمەتا ئیراقا فیدرال دا هاتە كرن، ب مەرەما ئارامیێ و رووبڕووبوونا هەر ئەگەر و گەفەكێ».

سەرۆكێ هەرێما كوردستانێ پێشوازی ل یاسایا «ب هێزكرنا تەبایییا نیشتمانی و تێكەلڤەبوونا جڤاكی» ل توركیایێ كر.
نێچیرڤان بارزانی، سەرۆكێ هەرێما كوردستانێ د پەیامەكێ دا راگەهاند «ب گەرمی پێشوازیێ ل پەسەندكرنا یاسایا ‹ب هێزكرنا تەبایییا نیشتمانی و تێكەلڤەبوونا جڤاكی› ل پەرلەمانێ توركیایێ دكەم. ئەڤ پێنگاڤا ئازایانە، وەرچەرخانەكا گرنگە بەر ب بجهئینانا ئاشتییەكا بەردەوام و ئارامیێ ل توركیایێ و هەموو دەڤەرێ».
گۆت ژی «مە بەردەوام باوەری ب وێ چەندێ هەبوویە كو ئاشتی و دیالۆگ دروستترین بژاردەنە و سەردەمێ چەك و چارەسەرییا سەربازی ب سەرڤەچوویە. ئەڤ یاسایە دەرفەتەكا مەزنە بۆ دروستكرنا باوەریێ و پێكڤەژیانا ئاشتییانە یا هەموو پێكهاتەیێن توركیایێ. پێدڤییە هەموو پشتەڤانییا وێ بكەن و كار بۆ سەرئێخستنا ئاشتیێ بكەن».
نێچیرڤان بارزانی د پەیاما خۆ دا ئاماژە كر «پێزانین و دەستخۆشیێ بۆ جەنابێ سەرۆككۆمارێ توركیایێ بەرێز رەجەب تەیب ئەردۆغان و هەموو وان سەركردە و ئالیێن كو د بجهئینانا یاسایێ دا پشكدار بووین، دووپات دكەم. وەك بەردەوام پشتەڤانییا تەماما هەرێما كوردستانێ بۆ سەرئێخستنا ئاشتی وئارامیێ دوپات دكەین».

ژبەر مالئاڤاهیكرنا خودێ ژێ رازی (نەهیلا رەئووف)، هەڤژینا فەرماندە و پێشمەرگە و خەباتكەرێ دێرین، خودێ ژێ رازی (مستەفا نێروەیی)، سەرۆك بارزانی، مەسرور بارزانی و نێچیرڤان بارزانی د پەیامێن جودا دا بەهیداری ل بنەمالا وان كرن.
سەرۆك مەسعود بارزانی د پەیاما خۆ دا راگەهاند: «ب مخابنییەكا مەزن ڤە مە دەنگوباسێ وەغەرا دووماهیێ یا خودێ ژێ رازی (نەهلا رەئووف) بهیست. ب ڤێ هەلكەفتا خەمگین، بەهی و سەرەخۆشیێ ل مالبات و كەسۆكارێن وان دكەم و خۆ ب هەڤپشكێ خەما وان دزانم. خودێ مەزن گیانێ وێ ب بەهەشتا بەرین شاد بكەت و سەبر و هەدارێ بدەتە هەموو ئالییەكی».
هەروەسا، نێچیرڤان بارزانی، سەرۆكێ هەرێما كوردستانێ د پەیوەندییەكا تەلەفۆنی دا ل گەل (سالح مستەفا نێروەیی) كورێ خودێ ژێ رازیێ، بەهی و سەرەخۆشییا خۆ ئاراستەی مالبات و كەسوكار و دۆستێن وان كر و هیڤیخواست خودایێ مەزن گیانێ وێ بێخیتە بەر دلوڤانییا خۆ و ئارامیێ ب هەموو ئالییەكی ببەخشیت.
ژ ئالییەكێ دی ڤە، مەسرور بارزانی، سەرۆكێ حوكمەتا هەرێما كوردستانێ د پەیامەكا سەرەخۆشیێ دا گۆت «بۆ وەغەرا دووماهیێ یا خودێ ژێ رازی (نەهلا رەئووف)، بەهی و سەرەخۆشیێ ل مالبات و كەسوكارێن وێ یێن بەرێز دكەم و هەڤپشكێ خەما وانم. خودایێ مەزن گیانێ وێ ب بەهەشتێ شاد بكەت و سەبر و هەدارێ ب هەموویان ببەخشیت».

دامەزراندنا پارتی دیموكراتی كوردستان ل (16) تەباخا (1946) ب سەرۆكایەتییا بابێ‌ روحی یێ‌ نەتەوێ كورد بارزانیێ‌ نەمر، وەك پێدڤییەكا دیرۆكی یا كوردستانەكا پارچەكری و مللەتەكێ هەژار و ستەم لێكری بوو، پارتی ب مەرەما بەلاڤكرنا هەستا نیشتیمانپەروەری و رێكخستن و كومكرنا تەڤایا خەلكێ‌ كوردستانێ‌ ب جوداهیێن خۆ یێن جوگرافی و نەتەوەیی و ئۆلی ڤە خەبات كریە و پێنگاڤێن بەرچاڤێن دیرۆكی هاڤێتینە.
پارتی شۆڕش و قوربانی دایە ژبۆ ئاڤاكرنا جڤاكەكێ‌ ئازاد و دیموكراتیخواز و پاراستنا ناسنامەیا نەتەوەیی و بەرگری ژ ئاخا كوردستانێ‌ كریە و دژی سیاسەتێن شوفینیست و دیكتاتۆر بوویە.
پارتی (80) سال ژ خەباتا بەردەوام و پری گیانفیدایی ژ دیرۆكا خەلكێ‌ كوردستانی تۆمار كریە و سەرەرایی هەموو جۆرێن كارەسات و پیلانێن ب سەر دا هاتین نەهێلایە د هیچ قووناغەكێدا بێ‌ ئومێدی د ناڤ ناخێ‌ تاكێ‌ كورد دا شین ببیت.
پارتی دیموكراتی كوردستان ب سەرۆكایەتییا بارزانیێ‌ نەمر شۆڕشا ئیلۆنێ وەكو مەزنترین و بەرفرەهترین شۆڕش د دیرۆكا بزاڤا رزگاریخوازا كوردستانێ‌ دا هەلكر، و رێككەفتنا خیانەتكارییا جەزائیرێ نەشیا ببیتە رێگر ل سەرهەلدانا شۆڕشا گۆلانا پێشكەفتنخواز و سەرهلدانا بهارا سالا 1991 ێ‌.
پارتی ب بەرچاڤترین فیرگەها كوردپەروەریێ‌ و دیموكراسیێ‌ دهێتە هەژمارتن، ئەڤرۆ ژی ب سەرۆكایەتییا سەرۆك مەسعود بارزانی د سەنگەرێن بەراهیێ دایە بۆ بدەستڤەئینانا مافێن دەستووری یێن خەلكێ هەرێما كوردستانێ ، پارتی نە بتنێ‌ ل سەر ئاستێ‌ هەرێمێ‌ بەلكو ل سەر ئاستێ‌ ئێراقێ و نێڤدەولەتی ژی دا رۆلەكێ‌ سەرەكی هەیە د ئاڤاكرنا دیموكراسیێ‌ و پاراستنا ئاشتیێ دا، و هەردەم رێز ل خەباتا هەموو هێز و ئالیێن سیاسی یێن كوردستانێ‌ گرتییە، و بوویە بنگەهێ‌ ئێكڕێزیێ و خەباتا هەڤپشك و ئاراستەكرنا هەموو هێزان بەر ب ئارمانجا نیشتیمانی و دیموكراسی و مەدەنی. پارتی داكۆكیكارە د پاراستنا ئاشتیێ و برایەتیێ و پێكڤەژیانێ‌ ل گەل نەتەوەیێن دی ل رۆژهەلاتا ناڤین ل سەر بنەمایێ‌ هەڤدوو قەبوولكرن و رێزگرتن ل ئیرادە و مافێن هەموو ئول و نەتەوەیان، پارتی نەبتنێ‌ وەكو پارتەكا شۆڕشگێر و سیاسی یە بەلكو بزاڤەكا رزگاریخوازییا نیشتیمانی بوویە ژبۆ ئاڤاكرنا جڤاكەكێ دیموكراسی و پێشئێخستنا كوردستانێ‌ و گەشەكرنا هەموو بوارێن ژیانێ‌ و مفا وەرگرتنێ ژ هەموو سامانێن كوردستانێ‌ و پێشڤەبرنا ئاستێ‌ رەوشەنبیری و زانستی یێ‌ خەلكێ‌ كوردستانێ‌، پارتی سەرفەرازیێ ب رۆلێ‌ خۆ د ئەزموونا دیموكراسی و دامەزراندنا سیستەمێ‌ پەرلەمانی و ئازادییا ئەڤرۆ ل هەرێما كوردستانێ‌ دا دبەت.

مه‌كته‌با سياسى يا پارتى ديموكراتى كوردستان ب هه‌لكه‌فتا هه‌شتێ ساليا دامه‌زراندنا پارتى ديموكراتى كوردستان به‌ياننامه‌يه‌ك به‌لاڤكر و تێدا ئاشكه‌را كر كو ئه‌و پەیمانێ بۆ گەلێ کوردستانێ و سەرۆک (مەسعود بارزانی) دوپات دکەن کو ل سەر رێبازا رەسەنا کوردایەتیێ بەردەوام بن بۆ پاراستنا قەوارێ هەرێمێ و ب هێزکرنا بنەمایێن دیموکراسیێ و پێکڤەژیانێ.
ئه‌ڤه‌ ژى ده‌قێ به‌ياننامێ يه‌:
بەیاننامەیا مەکتەبا سیاسی يا پارتى ب هەلکەفتا (16)ێ تەباخێ، 80 سالیا دامەزراندنا پارتیا دیموکراتا کوردستانێ
جەماوەرێ خواڕاگر، خێزانێن سه‌ربلندێن شەهیدان و پێشمەرگەیێن قارەمان
ئەڤرۆ ب شانازی ڤە بيره‌وه‌ريا دامەزراندنا پارتیا خۆ دکەین، ئەو پارتیا بەرەڤانەکا راستی یا بەرژەوەندییێن گەلێ مە، ئەو بيره‌وه‌ريا کو وێستگەکا گەلەک گرنگا خەباتا دیرۆکی یا بزاڤا رزگاریخوازییا کوردستانێ و کاروانەکێ بێ راوه‌ستيان یێ تێکۆشانا سیاسی یە بۆ بەرەڤانیکرنێ ژ مافێن نەتەوەیی و نیشتیمانی و بنەمایێن دیموکراسیێ، هەروەسا بیرئينانا خەباتەکا هەشتێ سالی یا وەرچەرخان و قوربانیدان و ئەزموون و ژێده‌رێ ئیلهاما بهایێن ئازادی و دیموکراسیێ یە.
ئەڤ هه‌لكه‌فته‌ تەنێ بیرەوەرەکا دەربازبووى یا دامەزراندنا پارتیەکا سیاسی نینە، بەلکو بەرجەستەکرنا ئیرادەیا ئازادیخوازیێ یە بۆ رەتکرنا پلانێن دوژمنان و زۆرداریێ ل سەر رێبازا حەکیمانەیا «بارزانیێ نەمر» کو ل وی دەمی زەمینەکا سەردەمیانە بۆ چەمکێ کوردایەتیێ دارشت و ب جێبەجێکرنا بهایێن شۆرەشگێری، گەشە ب بزاڤا رزگاریخوازییا کوردستانێ دا. خەباتا هەمەلایەنە یا پارتیا مە د شۆرەشێن ئیلۆن، گولان، رێککەفتننامەیا 11ی ئادارێ و سه‌رهلدانا 1991ێ دا، ديده‌ڤانێن وێ چەندێ نە کو هێزەکا پێشەنگ و پشتستوور ب جەماوەری و هەموو پێکهاتەیێن نەتەوەیی و ئایینی یە و هەر دەم ب کلتوورێ دیالۆگێ بزاڤ بۆ ب دەستڤەئینانا ئارمانجێن نەتەوەیی داینە.
د بيره‌وه‌ريا هەشتێ سالیا دامەزراندنا پارتیا مە دا رژديێ ل سەر وێ چەندێ دکەین، کو وەفاداری بۆ دیرۆکا پارتی و قوربانیدانا تێکۆشەران تەنێ بیرئانين نینە، بەلکو ئەزموونا وی رابردووی و وێ دیرۆکێ، بەرپرسیارەتییەکا نەتەوەیی و نیشتیمانی یە بەرامبەر نوکە و پاشەرۆژێ ب رێيا پاراستنا دەستکەفتێن مە و دوورخستنا هەرێما کوردستانێ ژ وان ئالۆزییێن سیاسی و گرژی و شەڕێن ل دەوروبەرێن مە، هەروەسا پاراستنا کوردستانێ و رێگریکردن ل وێ چەندێ کو ببیتە جهەک بۆ کارتێکرنێ ل سەر ئێمناهییا جیرانێن مە و رێزگرتنا دولایەنا بەرژەوەندییان و ب هێزکرنا پێگەهێ دەستووری یێ هەرێمێ و کاراکرنا پەرلەمانی وەک ئەرکەکێ دیرۆکی و پێکئینانا کابینەیا دەهێ و حکومەتەکا ب هێز، هەروەسا ب هێزکرنا ئێکڕیزیێ و رێزگرتن ل فرەرهەنگییا پێکهاتەیان و جێگیرکرنا ئارامی و ئاشتیێ ل هەرێمێ. خەلکێ خۆراگر و بێهنفەرهێ هەرێما کوردستانێ د وان سالێن دەربازبووی دا سەلماندیە کو حەژێکرنا نیشتیمان و گەلێ وان ل سەری هەمی تشتەکی یە، لەوما ب ئەرکێ خۆ دزانین ب هەمی شیانێن خۆ کار بۆ چارەسەرکرنا کێشە و گرفتان بکەین ب ئاراستەیا دابینکرنا ئاسایش و پێدڤییێن ژیانەکا سەرفرازانە.
د بيره‌وه‌يا (16)ێ تەباخێ دا، دەستێ هەڤالیینیێ و پێکڤەکارکرنێ بۆ هەموو لایەنێن سیاسی یێن پشکدار د پرۆسەیا سیاسییا ئيراقێ دا درێژ دکەین، ئەرکێ مە هەموویانە ب جوداهییا بیر و بۆچوونێن سیاسی، باوەریا ئایینی و مەزهەبی ڤە پێکڤە بزاڤێ بدەین ئيراق بۆ هەمییان بیت و دوور بێخین ژ تێکەلبوونێ د شەڕ و ئالۆزییێن دەڤەرێ دا، و هەموو پێکهاتە پێکڤە ب بەرپرسیارەتی ڤە شێوازەکێ حوکمرانیێ یێ دروست و سەردەمیانە بگرنە بەر، ئەڤە ژی پێخەمەت بەرژەوەندییا خەلکێ ئيراقێ یە، هەر وەک مە ب ئاشکرا گۆتی ئيراق تووشی کێشەیێن گەلەک هاتیە کرن، یا رەوا نینە پتر د ڤێ بازنەیێ دا ب زڤریت، چونکو خەلکێ ئيراقێ پتر خوه‌ ل به‌ر ڤان هەموو نەهامەتییان ناگریت، ئەڤە ژی بەرپرسیارەتییەکا ئەخلاقی، نیشتیمانی و ئایینی یە.
ب ڤێ هەلکەفتا دیرۆکی قوربانیدانا تێکۆشەران و پێشمەرگە و شەهیدان بلند د نرخینین و ئەوێن گیانێ خۆ پێخەمەت ماف و ئازادی و سەروەرییا نەتەوە و خاک و گەلێ مە بەخشی، هەروەسا تێکۆشان و خه‌باتكارى ل دووڤ نڤشێ رێيا پارتایەتیێ و رێبازا بارزانیێ نەمر.
د ڤێ بيره‌وه‌يا تژی شکۆ دا، پەیمانێ بۆ گەلێ کوردستانێ و سەرۆک (مەسعود بارزانی) دوپات دکەین کو ل سەر رێبازا رەسەنا کوردایەتیێ بەردەوام بین بۆ پاراستنا قەوارێ هەرێمێ و ب هێزکرنا بنەمایێن دیموکراسیێ و پێکڤەژیانێ.
سلاڤ بۆ دامەزرێنەر و رێبەرێ رێبازا کوردایەتیێ (مستەفا بارزانیێ نەمر) و کاک (ئدریسێ هه‌رده‌م ل بير) و هەموو شەهیدێن کوردستانێ.
سوپاس و پێزانین بۆ کادر، ئەندام و لایەنگرێن پارتیا مە، هەروەسا گەرمترین پیرۆزباهی ل پێشمەرگەیێن قارەمان و خەلکێ خۆراگرێ کوردستانێ دکەین.
سەرکەفتن بۆ خەباتا رەوا یا گەلێ مە یە، بلند و شەکاوە بیت ئالایێ کوردستانێ.
مەکتەبا سیاسی
پارتیا دیموکراتا کوردستانێ
16ێ تەباخا 2026

هێمن هەورامی، ئەندامێ مەكتەبا سیاسی و بەرپرسێ پشكا رێكخستنا پارتی دیموكراتی كوردستان د چارچۆڤەیێ كار و بەرنامەیێن خۆ دا بۆ دووڤچوونا كاروبارێن رێكخستنی و ئۆرگانێن پارتی سەردانا لقا 14 یا پارتی ل مووسلێ كر و د دیدارەكێ دا ل گەل كادر و بەرپرسێن لق و ناڤچەیان سەرەرای دەستخۆشییا ب دەستڤەئینانا 200 هزار دەنگان ل پارێزگەها نەینەوا رێنمایی و بەرچاڤرۆهنیێن پێدڤی ل دۆر كارێن رێكخستنی و پاراستنا ناسنامەیا كوردستانییا دەڤەرێ دان.
هێمن هەورامی د دیدارەكێ دا كو هەموو بەرپرس و كارگێرێن لق و ناڤچەیان و رێكخراوێن سنۆرێ لقا 14 پشكدار بوون ب هووری باسێ رەوشا كارێن رێكخستنی ل سنۆرێ لقێ 14 كر و كۆمەكا رێنماییان پێشكێشی بەرهەڤبوویان كر.
هەورامی د پەیڤا خۆ دا گۆت: بۆ وێ ئەنجامێ مەزن یا پارتی كو وەكو سەركەفتییا ئێكێ ل سەر ئاستێ هەموو پارێزگەها نەینەوا ل هەلبژاردنێن دوماهییێ ب دەست ڤە ئینای و زێدەتر ژ 200 هزار دەنگ كۆمكرین سوپاسییا هەموو هەڤالان كر كو پێكڤە ل گەل لقا 17 یا شنگالێ و مەكتەبا رێكخستنا پارێزگەها نەینەوا یا پارتی شیاینە وێ سەركەفتنا مەزن تومار بكەن.
دیسان هەورامی ل سەر گرنگییا دەڤەرێن كوردستانی یێن سنۆرێ پارێزگەها نەینەوا و ئەركێ پارتی د بەرپرسیارەتیێن نیشتمانی و پێكڤەژیانێ و مسۆگەركرنا پاراستنا ناسنامەیا كوردستانییا وان دەڤەران و پلان و روانگەها پارتی ل گۆرەی وێ نێڕینێ شرۆڤەكرنێن پێدڤی بۆ بەرهەڤبوویان كرن.
د پشكەكا دی یا دیدارێ دا چەندین پرسیار و سەرنج و پێشنیاز ژ ئالیێ هەڤالان ڤە هاتنە پێشكێشكرن و بەرسڤێن پێدڤی بۆ وان هاتنە دان.

رێبەر ئەحمەد، وەزیرێ ناڤخۆیێ حوكمەتا هەرێما كوردستانێ د داخۆیانییەكا رۆژنامەڤانی دا، كۆمەكا پرسێن گرنگێن گرێدایی ب رەوشا دارایی، ئەمنی و سیاسی یێن هەرێمێ و ئیراقێ باسكرن.
وەزیرێ ناڤخۆ راگەهاند كو ب سەرپەرشتییا راستەوخۆ یا مەسرور بارزانی، سەرۆكێ حوكمەتا هەرێما كوردستانێ و پشتی چەندین كۆمبوونان، رێككەفتنا دوماهییێ ل سەر بجهئینانا سیستەمێ گومرگی یێ «ئەسیكۆدا» هاتییە كرن.
ناڤبری تەكەز كر كو ب گوڕەی دەستووری بڕیار هاتییە دان داهاتێ خالێن سنۆری ب رێژەیا 50% بۆ هەولێرێ و 50% بۆ بەغدایێ بهێتە دابەشكرن و ب بجهئینانا ڤی سیستەمی دێ بساناهی ئێخستنا تەمام بۆ بازرگانان هێتە كرن و كاری بازرگانی دێ هێتە ڤەژاندن.
رێبەر ئەحمەد دیسان ب پێدڤی زانی كو دووماهی ب وان بازگەهێن نەیاسایی و نەدەستووری بهێت كو د ناڤبەرا باژێڕێن ئیراقێ و هەرێما كوردستانێ دا هاتینە دانان.
ل دۆر قەرەبووكرنا زیانلڤێكەفتیێن هێرشێن درۆنی و مووشەكی ل سەر هەرێما كوردستانێ، رێبەر ئەحمەد رۆهنكر كو وان راپۆرتەكا هوور ل دۆر قەبارەیێ زیانان بەرهەڤ كرییە و پێشكێشی حوكمەتا فیدڕالی كرییە، لێ رەخنە ل بەغدایێ گرت كو تا نهۆ چو پێنگاڤێن كریاری بۆ قەرەبووكرنا وان وەلاتییان نەهاڤێتینە و تنێ سۆز داینە.
وەزیرێ ناڤخۆ ئەگەرێ راگرتنا بەرهەمئینانا پەترۆلێ ژ ئالیێ كۆمپانیێن بیانی ڤە ڤەگەڕاند بۆ وان گەفێن ل ناڤ ئاخا ئیراقێ ڤە دهێنە كرن ل سەر هەرێما كوردستانێ و داخواز ژ سەرۆك وەزیرێن ئیراقێ كر سنۆرەكێ بۆ وان گەفان دابنیت.
ل دۆر سیستەمێ بەرگرییا ئەسمانی، ناڤبری ئاشكرا كر كو د دانوستاندنێن بەردەوام دانە ل گەل كۆمپانییان و سەرۆكایەتییا دەستەیا ئەركانێن لەشكەرێ ئیراقێ وسۆز دایە كو حوكمەتا فیدڕالی رێگە بدەت كۆمپانی ب خۆ سیستەمی بینن بۆ پاراستنا سامانێن نیشتمانی.
ل دوماهییێ ژی وەزیرێ ناڤخۆ ئاماژە ب رێككەفتنا د ناڤبەرا ئیراقێ و هێزێن هەڤپەیمانان دا كر بۆ دوماهیئینانا ئەركێ هەڤپەیمانیا نێڤدەولەتی یا دژی داعشێ و رۆهنكر كو د قووناغا داهاتی دا پەیوەندیێن ئیراقێ ل گەل ئەمریكا و وەلاتێن ئۆرۆپا دێ بنە پەیوەندیێن دووقۆلی.
رێبەر ئەحمەد دوپاتی ل سەر وێ چەندێ ژی كر كو ئارامییا ئیراقێ و هەرێما كوردستانێ بۆ جڤاكا نێڤدەولەتی جهێ گرنگیێ یە.

زنار تۆڤی:

ئەندامەكێ فراكسیۆنا پارتی دیموكراتی كوردستان ل جڤاتا نوونەرێن ئیراقێ راگەهاند كو ئیمزایێن زێدەتر ژ 130 پەرلەمانتارێن ئیراقێ هاتینە كۆمكرن بۆ وێ چەندێ گڤاشتنێ ل سەر حوكمەتا فیدڕالی بكەن تا كێشەیا بەنزینا هەرێما كوردستانێ چارەسەر بكەت، د هەمان دەم دا ئاخڤتنێن وەزیرێ پەترۆلا ئیراقێ ل دۆر هنارتنا بەنزینێ رەت دكەت و ب دوور ژ راستیێ ناڤ دكەت.
سیپان شێروانی، ئەندامێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان د داخۆیانییەكا رۆژنامەڤانی دا راگەهاند كو وان یاداشتەكا فەرمی بۆ عەلی زەیدی، سەرۆك وەزیرێن ئیراقێ بەرهەڤ كرییە، تا نهۆ ژی ئیمزایێن زێدەتر ژ 130 پەرلەمانتاران بۆ كۆم كرینە، چاڤەڕێ دهێتە كرن هەژمارا ئیمزایان بگەهیتە 160 تا 170 ئیمزایان، ب ڤێ چەندێ دێ بیتە زۆرینەیا جڤاتا نوونەران.
ڤی پەرلەمانتاری رۆهنكر كو یاداشتا وان پالپشتە ب بڕگەیێن 14 و 111 و 121 یێن دستوورێ ئیراقێ، دیسان دوپاتیێ ل سەر وەكهەڤییا هەموو پارێزگەهان د بەلاڤكرنا سامانان دا دكەن. د یاداشتێ دا دو بژاردە ل بەر دەستێ بەغدایێ دانە:
1- پشكا هەرێما كوردستانێ ژ پەترۆلا خام بۆ پارزینگەهان ل گۆرەی رێژەیا ئاكنجییان (14%) بهێتە دابینكرن كو دبیتە 140 هزار بەرمیل ل جهێ وان 50 هزار بەرمیلێن نوكە كو تنێ 6% ژ وێ پشكێ یە.
2-حوكمەتا فیدڕالی راستەوخۆ بەنزینا بەرهەڤكری بۆ پارێزگەهێن هەرێما كوردستانێ دابین بكەت.
د بەرسڤا داخۆیانیێن وەزیرێ پەترۆلا ئیراقێ دا كو گۆتبوو بەغدا یا بەرهەڤە بەنزین و پەترۆلێ بۆ هەرێما كوردستانێ بهنێریت، سیپان شێروانی ئەو ئاخڤتن رەت كرن و گۆت»ئەو ئاخڤتنێن ل میدیایان دهێنە كرن راست نینن. حەفتییا بۆری من ب خۆ ل بەغدایێ سەرەدانا رێڤەبەرێ گشتی یێ كۆمپانیێن بەلاڤكرنا بەرهەمێن پەترۆلی و پارزینگەهان كر، ئیراق ب خۆ رۆژانە پێنج ملیۆن لترێن بەنزینێ دكڕیت چنكی بەرهەمێ ناڤخۆ تێرا ناكەت، ئێدی چەوا دێ شێت بەنزینێ بۆ مە دابین كەت؟»
شێروانی راگەهاند ژی»هەكە ئەو ئاخڤتن راست بن و بەرهەڤی هەبیت، فەرمۆ بلا سوبەهی چار ملیۆن لترێن بەنزینێ یان وێ 50 هزار بەرمیلێن پەترۆلا خام بهنێرن كو دبیتە نێزیكی ملیۆنەك و 750 هزار لترێن بەنزینێ».
ل دووماهییێ، وی ئەندامێ جڤاتا نوونەرێن ئیراقێ دوپاتی ل سەر وێ كر كو ل گۆرەی پێزانینێن وان، پالرزینگەهێن ناڤەڕاست و باشوورێ ئیراقێ ب چو شێوازەكێ شیانێن وێ چەندێ نینە بەنزینێ بۆ هەرێما كوردستانێ دابین بكەن، ئەوا بەرپرسێن ئیراقێ دبێژن ل گەل راستییان ئێكناگرن.