ئه‌ڤرۆ نيوز:
ئاخفتنكه‌رێ ب ناڤێ حوكمه‌تا هه‌رێما كوردستانێ راگه‌هاند كو ئه‌و هيڤى دكه‌ن روونشتنێن لايه‌نێن سياسى پێشڤه‌چوونێ د به‌رژه‌وه‌ندا وه‌لاتيان دا ب خوه ڤه ببينن و هه‌تا نوكه چو ئه‌گه‌ر بۆ بهێنڤه‌دانێ ژ به‌ر بلندبوونا پلێن گه‌رمێ نينن.
د داخۆيانيه‌كا رۆژنامه‌ڤانى دا، سه‌فين دزه‌ى، ئاخفتنكه‌رێ ب ناڤێ حوكمه‌تا هه‌رێما كوردستانێ راگه‌هاند كو وه‌سان دياره كه‌شوهه‌وايه‌كێ ئه‌رينێ دێ ب دووڤ ڤان پێشڤه‌چوونێن لايه‌نێن سياسى هه‌بيت و ب هيڤيا وێ چه‌ندێ كو لايه‌نێن سياسى بگه‌هنه رێكه‌فتنه‌كێ د به‌رژه‌وه‌نديا وه‌لاتيان دا.
ده‌رباره‌ى ته‌قاندنا بۆريێن په‌ترۆلێ يێن باى حه‌سه‌ن ژى گۆت: “راسته ژ ئه‌گه‌رێ په‌قاندنا بۆريێن په‌ترۆلێ يێن باى حه‌سه‌ن، هنارتنا په‌ترۆلێ هاتيه راوه‌ستاندن، لێ هێشتا نوزان ب چ رێژه‌يه و كه‌نگى دێ هێته چاره‌كرن”.
ده‌رباره‌ى بهێنڤه‌دانێ ژى ژ ئه‌گه‌رێ هاتنا پێلا گه‌رمێ گۆت: “هه‌تا نوكه ل گه‌ل رێڤه‌به‌ريا سه‌قاناسيێ ل سه‌ر خه‌تين و پلا گه‌رمێ ژ 46ێ نه‌بۆريه و هه‌رده‌ما گه‌هشته 50يێ دێ بڕيارا بهێنڤه‌دانێ راگه‌هينين”.
ئه‌ڤرۆ نيوز:
سه‌رۆكێ ته‌ڤگه‌را سه‌در، موقته‌دا سه‌در راگه‌هاند كو كه‌ركووك بۆ هه‌موو عيراقيانه ب هه‌موو پێكهات ڤه.
د به‌رسڤا ئێك ژ دووڤكه‌ڤتيێن ته‌ڤگه‌را وى دا، سه‌رۆكێ ته‌ڤگه‌را سه‌در، نڤيسايه: “كه‌ركووك بۆ هه‌موو عيراقيانه ب هه‌موو پێكهاته ڤه”.
ئێك ژ دووڤكه‌فتيێن موقته‌دا سه‌در پرسيار كريه: “مه‌زن و فه‌رماندێ من، ده‌سته‌يا ده‌ڤه‌رێن كوردستانى راگه‌هانديه كو پلان بۆ كۆنگره‌كى هه‌يه كو تێدا پاشه‌رۆژا كه‌ركووك بهێته دياركرن و ئاماژه ب وێ چه‌ندێ كريه كو واقعێ ئيدارا پارێزگه‌هێ د ده‌ستێ كوردان دايه و هه‌موو لايه‌نێن كوردى دخوازن كه‌ركووك ڤه‌گه‌ريته سه‌ر هه‌رێما كوردستانێ، بۆچوونا ته چيه ل سه‌ر ئه‌وى كۆنگرێ دڤێت كه‌ركووكێ ڤه‌گه‌ريننه سه‌ر هه‌رێما كوردستانێ؟”.
د به‌رسڤا پرسيارا وى دا، موقته‌دا سه‌در نڤيسيه: “كه‌ركووك بۆ هه‌موو عيراقيانه ب هه‌موو پێكهات ڤه”.
ئه‌ڤرۆ نيوز:
فه‌رمانگه‌ها راگه‌هاندنێ ل جڤاتا نوونه‌رێن عيراقێ راگه‌هاند كو د كۆمبوونا ئه‌ڤرۆ يا جڤاتا نوونه‌رێن عيراقێ دا چه‌ندين پرسيار و تێبينيان د ده‌رباره‌ى وه‌زاره‌تا به‌ره‌ڤانيێ دا ئاراسته‌ى خالد عوبێدى وه‌زيريێ به‌ره‌ڤانيێ هێته كرن.
بڕياره د كۆمبوونا ئه‌ڤرۆ يا جڤاتا نوونه‌رێن عيراقێ دا، خالد عوبێدى، وه‌زيرێ به‌ره‌ڤانيێ بهێته گازيكرن بۆ جڤاتا نوونه‌ران و پرۆژێ قانوونا ئه‌ردو و خانيان ژى بكه‌ڤيته به‌ر ده‌نگدانێ.
د راگه‌هاندنه‌كێ دا، فه‌رمانگه‌ها راگه‌هاندنا جڤاتا نوونه‌ران، كو وێنه‌ك ب ده‌ست ئه‌ڤرۆ نيوز كه‌فتيه، كۆمه‌كا پرسيار و تێبينيان ژ لايێ په‌رله‌مانتاران ڤه دێ ئاراسته‌ى وه‌زيرێ به‌ره‌ڤانيا عيراقێ هێنه كرن.
ئه‌ڤرۆ نيوز، نيوار محه‌مه‌د سه‌ليم:
رێڤه‌به‌را هاتنوچوونێ ل پارێزگه‌ها دهۆكێ راگه‌هاند كو دوهى د ماوێ سێ ده‌مژمێران دا ل ده‌وروبه‌رێن پارێزگه‌ها دهۆكێ 20 كه‌س بووينه قوربانى.
رائيدێ مافپه‌روه‌ر ئازاد تاها، به‌رپرسێ راگه‌هاندنێ ل رێڤه‌به‌ريا هاتنوچوونا پارێزگه‌ها دهۆكێ د داخۆيانيه‌كێ دا بۆ ئه‌ڤرۆ نيوز گۆت: “دوهى رۆژا ئێكشه‌مبى رێكه‌فتى 30ى تيرمه‌ها 2016ێ د ماوێ سێ ده‌مژمێران دا ل جهێن جودا يێن ده‌وروبه‌رێن پارێزگه‌ها دهۆكێ 20 كه‌س بووينه قوربانى روودانێن ترافيكێ”.
رائيدێ مافپه‌روه‌ر زێده‌تر گۆت: “ل ده‌مژمێر 4:00ى ئێڤارى ل دوريانا ناحيا گرده‌سين ترۆمبێله‌كا ژ جۆرێ تويوتا تايبه‌ت پيكاچۆ ره‌نگێ سپى وه‌رگه‌ريا و د ئه‌نجام دا ب مخابنى ڤه كه‌سه‌كى گيانێ خوه ژ ده‌ست دا و دو كه‌س ژى ب گرانى بريندار بوون”.
دا زانين ژى كو هه‌ر دوهى ل ده‌مژمێر 4:45 ده‌قيقه ل سه‌ر رێيا مرنێ د ناڤبه‌را كه‌له‌ك بۆ به‌رده‌ره‌ش دا ل نێزيك گۆندێ گه‌ويلان دو ترۆمبێلان لێكدا و د ئه‌نجام دا د ناڤ ڤان هه‌ردو ترۆمبێلان دا 10 كه‌س ب برينێن سڤك و گران بريندار بوون.
ب گۆره‌ى گۆتنێن ئازاد تاها رێيا مرنێ د ماوێ كێمتر ژ سێ ده‌مژمێران دا زێده‌تر ژ روودانه‌كێ تێدا هاتيه ئه‌نجام دان و گۆت: “روودانه‌كا دژى ل سه‌ر رێيا مرنێ ل ده‌مژمێر 7:00ى ئێڤارى د ناڤبه‌را به‌رده‌ره‌ش و رۆڤيا دا ل نێزيك گۆندێ ئاميانۆك د ناڤبه‌را دو ترۆمبێلان دا روودايه و د ئه‌نجام دا 7 كه‌س ب گرانى بريندار بووينه”.
نه‌ڤه‌شارت ژى كو روودانه‌كا دژى د هه‌مان ده‌م دا و ل سه‌ر جادا داڕهۆزان و گڕك سندى روودا كو ترۆمبێله‌كا كرێ ته‌كسى وه‌رگه‌ريا، لێ خۆشبه‌ختانه گيان ب سلامه‌ت بوون.
به‌رپرسێ راگه‌هاندنێ ل رێڤه‌به‌ريا هاتنوچوونا پارێزگه‌ها دهۆكێ هيڤى ژ شوفێران كر كو پێگريێ ب رێنمايێن هاتنوچوونێ بكه‌ن و له‌زاتيێ ب كار نه‌ئينن دا گيانێن وان و يێن ل گه‌ل وان د پاراستى بن.
ئه‌ڤرۆ نيوز:
بزاڤا گۆڕأن ب گۆڕينا يوسف محه‌مه‌د سه‌رۆكێ په‌رله‌مانێ كوردستانێ رازى بوويه، به‌لێ مه‌رجه‌كێ گران ژى يێ داناى، سه‌ركرده‌كێ وێ ته‌ڤگه‌رێ ئاماژه ب وێ چه‌ندێ ژى دكه‌ت كو هه‌تا په‌رله‌مان ل سه‌ر ده‌ستێ يوسف محه‌مه‌د ئاسايى نه‌بيت، بۆ دانوستاندنان گۆڕان ژ جهێ خوه نالڤيت.
ئێك ژ ئه‌ندامێن دياريێن بزاڤا گۆڕان كو هاريدارى هه‌موو بڕيارێن ئێكلاكه‌رێن وێ ته‌ڤگه‌رێ يه و نه‌ڤيا ناڤێ خوه ئاشكه‌را بكه‌ت، ده‌رباره‌ى داخوازيا ژ رێيا فوئاد حسێن نوونه‌رێ تايبه‌تێ سه‌رۆكێ بارزانى ده‌رباره‌ى پۆستێ يوسف محه‌مه‌د بۆ رووداو گۆت: “يوسف محه‌مه‌د يێ ئاماده‌يه بۆ گوهۆڕينێ، به‌لێ ب مه‌رجه‌كى، دێ سه‌رۆكاتيا په‌رله‌مانى كه‌ت هه‌تا قانوونا سه‌رۆكاتيا هه‌رێمێ دهێته گوهۆڕين، ب ره‌نگه‌كى سيسته‌مێ سياسى يێ كوردستانێ په‌رله‌مانى بيت، هه‌ر ديسا ماوێ سه‌رۆكاتيا بارزانى بۆ ساله‌كێ دێ هێته درێژكرن ب كێمكرنا هنده‌ك ده‌سته‌لاتان، پشتى وێ چه‌ندێ هه‌كه سه‌رۆكێ په‌رله‌مانى بهێته گوهۆڕين ژى چو كێشه نابن”.
هه‌ڤده‌م ئاواتێ شێخ جه‌ناب ئه‌ندامێ ديارێ بزاڤا گۆڕان ده‌رباره‌ى ده‌ستپێشخه‌ريا بازانى گۆت: “هه‌تا پارتى پێنگاڤێن كريارى نه‌هاڤێژيت، 100 ده‌سپێشخه‌رى و كۆمبوونان بكه‌ت، گۆڕان پێنگاڤه‌كێ ژى ژ جهێ خوه نالڤيت”.
ئه‌ڤرۆ نيوز:
رێکخراوا ئایی بی سی کوردی یا بەرنیاس ب (ھەیڤا شین) گرێبەستەک بۆ دەمێ 15 ھەیڤان ل قەزا شێخان ئیمزاکریە بۆ دابینکرنا ئاھێن خوارنێ بۆ ئاواران و نووژەنکرنا 11 قوتابخانێن سنوورێ قەزا ناڤھاتی و دروستکرنا 15 پارکان ژ دەرڤەی سەنتەرێ قەزا ناڤبری.
حسێن سلێمان عیسا، ژ رێکخراوا ئایی بی سی کوردی یا بەرنیاس ب (ھەیڤا شین) بۆ رۆژناما ئەڤرۆ ئاشکرا کر کو رێکخرا وان ئەڤ گرێبەستە بۆ دەمێ 15 ھەیڤان ئیمزاکریە و د ڤێ گرێبەستێ دا رۆژانە ئاھێن خوارنێ ل دووڤ خشتەکی دێ ل سەر ئاوارێن ل قەزا شێخان بنەجە بووین ھێنە بەلاڤکرن و گۆت: “د بەرنامێ مەدایە 11 قوتابخانێن سنوورێ پەروەردا قەزا شێخان نووژەن بکەین و سەرەرایی ڤێ چەندێ کاری ل سەر وان ئاڤاھیێن حوکمەتێ ژی بکەین یێن کو ژ ئەگەرێ قەیرانا دارایی ھاتینە راوەستاندن و بۆ ڤێ مەرەمێ رازەمەندیا قائیمقامێ قەزا شێخان ھاتیە وەرگرتن”.
ناڤھاتی ئاماژە دا وێ چەندێ کو رێکخراوا وان دێ 15 پارکێن بھێنڤەدانێ ژ دەرڤەی سەنتەرێ قەزا شێخان ل سەر رووبەرێ 150 مەترێن دوجا دروست کەن و گۆت: “یاریێن زارۆیان دێ د ناڤ ڤان پارکان دا ھێنە دابینکرن”.
ل دووماھیێ ناڤبری خویا کر کو وان ل بەرە ھاریکاریا جۆتیارێن دەڤەرا شێخان بکەن ژ لایێ نووژەنکرن جووکێن ئاڤدانێ ڤە و ئەو زەڤیێن ھەتا نوکە نەھاتینە سەخبێرکرن.
ئەڤرۆ نیوز:
راگەھاندکارەکێ باژێرێ کەرکووکێ دبێژیت حزبا بەعس د 35 سالێن حوکمرانیا خوەدا تنێ 125 ھزار عەرەب ئینابوونە کەرکووکێ، بەلێ تنێ ددو سالێن بۆری دا 350 ھزار عەرەب لێ ئاکنجی بووینە و ل دووڤ دستوورێ عیراقێ ھەر کەسێ پێنج سالان د باژێرەکی دا بمینیت دێ بیتە وەلاتیێ وی باژێری، ئاماژێ ددەت ژی کو تورکمان و عەرەب داخوازا ب ھەرێمکرنا کەرکووکێ دکەن و نەبوونا گۆتارەکا کوردی یا ئێکگرتی د مفایێ پاشەرۆژا کەرکووکێ دا نینە.
عوبێد رەشید سالەیێ، راگەھاندکارەکێ باژێرێ کەرکووکێ یە، بۆ رۆژناما ئەڤرۆ دبێژیت”دھەموو دەمەکی دا رەوشا کەرکووکێ دمفایێ عەرەبان دابوو، ل دووڤ ئاماران نێزیکی 125 ھزار وەلاتیێن عەرەب ددەمێ حوکمرانیا 35 سالان یا حزبا بەعس ل کەرکووکێ ھاتبوونە ئاکنجیکرن، سەرەرای مادێ 140 ژ دستوورێ بەردەوامێ عیراقێ، بەلێ پتریا وان وەلاتیێن عەرەب یێن بووینە وەلاتیێن پارێزگەھا کەرکووکێ و کەس نەشێت ب وەلاتیێن (ھاوردە) ب ھەژمێریت، دیسا ل دووڤ دووماھی ئامار، ئەڤە پتر ژ دو سالانە پتر ژ 350 ھزار وەلاتی ل کەرکووکێ یێن ئاکنجی بووین و ل دووڤ برگەکا دستوورێ عیراقێ ھەر وەلاتیەک بۆ دەمێ پێنج سالان ل ھەر باژێرەکی بمینیت، بۆ وی ھەیە ببیتە وەلاتیێ وی باژێری، ئانکو ل ڤێ جارێ و ل بن سیبەرا کوردان تەعریبەکا بەرفرەە ل کەرکووکێ یا ھاتیە کرن کو ھەتا سەدام حسێنی ب خوەژی نەشیایە وێ ھژمارا مەزن یا عەرەبان ھاوردە بکەت و ل کەرکووکێ ئاکنجی بکەت و ئەڤ چەندە ژی کارەساتە”.
ل دۆر پرسا ب ھەرێمکرنا کەرکووکێ، عوبەید سالەیی گۆت” ستەمەکا مەزن ل کوردان ھاتیە کرن ژلایێ دوژمن و داگیرکەران ڤە، بەلێ ڤێ جارێ ب تایبەت پشتی پرۆسا ئازادکرنا عیراقێ و ھەتا نوکە ھۆکارێ سەرەکی یێ وێ ستەما ل گەلێ کورد دھێتە کرن، ھەر کورد بخوەنە و ب شێوەکێ نەراستەوخوە بوویە تمامکەرێ پیلانا دوژمنان، ئەوژی ژ ئەگەرێ وێ چەندێ کو کورد نەشیاینە بەرنامەکی بۆ پاشەرۆژا کەرکووکێ دانن، بەلکو ھەتا نوکە سیاسەتا کوردی یا پێکھاتیە ژ کارڤەدانان ل شوینا نەخشە و پلانێن ستراتیژی کو ئەڤ چەندە ژی مەترسیێ ل سەر ب ھەروەدانا خوینا شەھیدان ژی دکەت کو ھەر ژ دەستپێکا شۆرەشا کوردی رووبارێن خوینێ ژبۆ کەرکووکێ رێتینە و د ئەنجام دا دەرز یا کەفتیە د ناڤمالا کوردی دا و ژ ئەگەرێ گرێدانا لایەنێن سیاسی ب وەلاتێن ھەرێمی ڤە کو ناکۆکی د ناڤبەرا وان وەلاتان دا ھەیە و لایەنێن کوردی ژی ل شوینا وان ناکۆکیێ دکەن و ئەڤ چەندە ژی کارەساتە و ئەڤ دوبەرەکیە ژی کاریگەریەکا خراب ل سەر پاشەرۆژا کەرکووکێ یا کری و پرسا ب ھەرێمکرنا کەرکووکێ ژیپشکەکە ژ وی حالەتی کو سیاسەتا لاوازیا سەرکردایەتیا کوردی تێدا دەرباز دبیت”.
سەبارەت وان لایەنێن داخوازا ب ھەرێمکرنا کەرکووکێ دکەن، خویاکر” پرسا ب ھەرێمکرنا کەرکووکێ وەلاتیێن کورد یێن تووشی گریەکا دەروونی کرین و گەلەک کوردێن کەرکووکێ ژئەگەرێ پشت گوە ھاڤێتنا کەرکووکێ ناڤبەرا بەغدا و ھەرێما کوردستانێ،خەلکەک وەسا تێگەھشتیە کو ھەکە کەرکووک ببیتە ھەرێم باشترە، ھەرچەندە ئەو داخوازیەکا سەرەکی یا عەرەب و تورکمانایە، چونکی ئەو ئێک ژ خەونێن تورکمانایە و دیارە نوکە دەلیڤە ل بارە بۆ وێ داخوازیێ ژ ئەگەرێ نەبوونا ئێک گۆتارا کوردی و ھەروەکو ل سەر ئەردی، دەستھەلاتا کوردی نەشیایە نەکو تورکمان و عەرەبان رازی بکەت، بگرە کوردێن کەرکووکێ ژی یێن ژ خوە تۆرە کرین، ئەو کوردێن ھەتا نوکە داخوازا ڤەگەراندنا کەرکووکێ بۆ ھەرێما کوردستانێ دکەن ژ روانگەھا رروحا نەتەوی یە، نەکو ژ خوەشتڤیا سیاسەتا سەقەتا نوکەیە، لەوما پێدڤیە لایەنێن کوردی ب خوەرا بگەھن و لێزڤرینێ دسیاسەتا خوەدا بکەن، ھەکە نە دیرۆک دلۆڤانیێ ب کەسێ نابەت”.
ئه‌ڤرۆ نیوز:
هه‌رمان سدقى د په‌یجێ خوه‌یێ فێسبوكێ دا به‌لاڤكریه كو وان گوندێ هاریكا ئاغا ده‌ست ب دروستكرنا رێكا گه‌لیێ شێرانكى ، كانیێن گیرا كریه ژبه‌ر كو گه‌شتيار گه‌له‌ك دچوونه سه‌ر شيرانكێ و نه‌دشيان ب ترۆمبێلێن خوه بگه‌هنێ و ل ٢٠١٦/٨/١٠ گه‌شه‌تيار دشێن ترۆمبێلێن خوه د رێیا گوندێ هاریكارا ئاغا بچین و بگه‌هنه سه‌ر ئاڤا شیرانكى.
نيشاندان