ئەڤرۆ نیۆز، قائید میرۆ
ئەندامەکێ فڕاکسیۆنا پارتی دیموکراتی کوردستان لپەرلەمانێ کوردستانێ داخواز دکەت پارچەیێن ئەردی بسەر پێشمەرگەیاندا بھێنە بەلافکرن.

دکتۆر فرسەت سۆفی، پەرلەمانتارێ پارتی دیموکراتی کوردستان ب ئەڤرۆ نیۆز راگەھاند” من داخوازەکا پێنج خالی بۆ خزمەتکرنا ھێزێن پێشمەرگەی دایە لایەنێن پەیوەندیدار و کۆ پێکھاتیە ژ پێدانا پارچەیەکا ئەردی بۆھەر پێشمەرگەیەکی د سەنگەراندا شەڕی دکەت، ھەروەسا پاشخستنا پێشینەیێن ئاڤاھی و ھەڤژینیێ بۆ دەمێ سالەکێ.
سۆفی دیارکر، من داخوازکریە، زێرەڤانێن دەستەیا زێرەڤانیێ ئەڤێن دچنە بەروکێن شەڕی دگەل پێشمەرگەی موچێ وان بھێتە مەزاختن، ھەروەسا ئەف پێشمەرگەیێن پلەیێن وانا ھاتینە بلندکرن زێدەھیا موچەی بۆ بھێتە مەزاختن ژبەرکوبەری نوکە یێن ئەفسەران ھاتینە مەزاختن.

ئه‌ڤرۆ نيوز:

سەلاحەدین دەمیرتاش ھەڤسەرۆکێ پارتیا دیموکراتیک یا گەلان د بەرنامەکێ تەلەفزیونا خەبەر تورک دا دیار کر کو تورکیا بەر ب چارەنڤیسەکێ نە دیار ڤە دچیت و ئەم ھیڤیدارین کو سەرکردێن تورکیا ب رەنگەکێ باش ھزرا خەلکی بکەن و بریارەکا راست و دروست بۆ تورکیا بدەن و گۆت: (پشتی ھەلبژارتنان ئەم دێ دەست ب دانوستاندنان ل گەل ئاکپارتی و پارتیا کۆماری یا گەل کەین و مە دڤێت حوکمەتەکا ھەڤپەیمانی ل گەل وان ھەر دو پارتیان دروست کەین، لێ ئەم ب چو رەنگەکێ ل گەل پارتیا بزاڤا نەتەوەپەرست د ئێک حوکمەتێ دا جە ناگرین، چونکو باوەریا وان ب مافێن رەوا یێن گەلێ کورد نینە و ئەم ژی نەشێین ل گەل ھزرەکا وەسا تاری و دوور ژ راستیێ کار بکەین).
د پشکەکا دی یا ئاخڤتنا خوە دا ھەڤسەرۆکێ پارتیا دیموکراتیک یا گەلان راگەھاند کو د رەوشا نھا ل تورکیا دا چو پارتیەک ب تنێ نەشێت وەلاتی برێڤە ببەت و ھەکە ئەم بشێین پرانیا کورسیێن پەرلەمانی ژی بدەستڤە بینین دیسان نەشێین رێڤەبەریا تورکیا بکەین، چونکو نھا پارچەبوونەک د ناڤ جڤاکێ تورکیا دا دروست بوویە و ئاکپارتی ژی ئێدی نەشێت وەک بەرێ تورکیا برێڤە ببەت، چونکو کورد و گەلەک نەتەوە و کێم نەتەوێن دی نھا ب ھەموو رەنگەکێ ل دژی سیاسەتا شەری یا ئەردۆگانی نە و ژ بەر ھندێ ژی ئەز وەسا دبینم کو ئێدی دەم ھاتیە ل تورکیا حوکمەتا ھەڤپەیمانی ب پشکداریا چەندین پارتیان بھێتە ئاڤاکرن دا کو ئەو حوکمەتە بشێت خزمەتا ھەموو گەلێن تورکیا بکەت و گۆت: (پشتی ھەلبژارتنێن دی دەرگەھێ مە بۆ ئاکپارتی و پارتیا کۆماریا گەل ڤەکری بیت و مە دڤێت ل گەل وان ھەر دو پارتیان دانوستاندنان بکەین دا کو بشێین حوکمەتا ھەڤپەیمانی دروست بکەین، چونکو ئەز ب باوەرم ب ئاڤاکرنا حوکمەتەکا وەسا دێ دووماھی ب شەری ھێت و حوکمەتەکا وەسا مەزن و ب ھێز دێ شێت پرسا کوردی و ھەموو پرسێن دی یێن تورکیا ژی چارە کەت و ژ بەر ھندێ ئەز ھیڤیدارم کو بەرپرسێن ھەر دو پارتیێن دیتر ژی ب نێرینەکا وەسا فرەە بەرێ خوە بدەنە رەوشا نھا و تنێ ھزرا بەرژەوەندیێن خوە یێن تەنگ نەکەن).
سەلاحەدین دەمیرتاشی د پشکەکا دی یا ئاخڤتنا خوە دا ئەو یەک ژی دیار کر کو رەوشا نھا یا تورکیا نیشا ددەت کو ب شەری چو پرسەک چارە نابیت، ئەردۆگانی و ھەڤالێن خوە گەلەک بزاڤ کرن کو ب رێیا شەری جارەکا دی دەنگێ خەلکی بۆ خوە کۆم بکەن، لێ راپرسیێن ھەتا نھا نیشا ددەن کو خەلک ب ھەموو رەنگەکێ ل دژی شەری یە، مە بەری نھا ژی دیار کربوو کو نابیت ژ بۆ کورسیا کەسەکێ خوین بھێتە رێتن و ئێدی خەلکێ تورکیا ب گشتی ھشیارە و وەک بەرێ سەرەدەریێ ل گەل روودانان ناکەت و دڤێت ئێدی بەرپرسێن ئاکپارتی ژی راستیا نھا ل تورکیا ببینن و ل گۆر وێ راستیێ ژی سەرەدەریێ ل گەل رەوشا نوو بکەن و گۆت: ( ل گۆر نێرینا من باشترین چارە بۆ قەیرانا نھا یا تورکیا ئەوە کو حوکمەتەکا ھەڤپەیمانی ب پشکداریا مە و ھەر دو پارتێن دی بھێتە ئاڤاکرن و حوکمەتەکا وەسا ب ھێز دێ شێت ھەموو پرسێن تورکیا چارە کەت و ئەم بۆ حوکمەتەکا وەسا بەرھەڤین).