ئەڤرۆ نیوز، سالار دۆسکی:
ژ بەر راگرتنا گەشتێن ئەسمانی ل فرۆکخانێن کوردستانێ، دەستەیا گەشت و گوزارێ ئەڤرۆ دیارکر کو کونفرانسێ گەشتیاری ھاتە پاشخستن.
نادر روستی پەیڤدارێ دەستەیا گەشت و گوزارێ ل ھەرێما کوردستانێ بۆ ئەڤرۆنیۆز ئاشکرا کو پشتی گەشتێن ئەسمانی ل ھەر دو فرۆکخانێن ھەولێر و سلێمانیێ ب بریارەکا حوکمەتا عیراقێ ھاتینە راگرتن، کاریگەری ل سەر ھاتن وچوونا گەشتیاران ل دەرڤە بۆ ناڤ ھەرێما کوردستانێ کریە.
روستی ئاشکراکر ژی کو لژنا بلند یا کونفرانسێ گەشتیار بریاردا کونفرانس بھێتە پاشخستن، کو ژڤان بوو ١/١٢/ ٢٠١٥ ل باژێرێ ھەولێرێ و ب بەرھەڤبوونا ب سەدان کومپانیێن بیانی و نافخو ھاتبا بەستن.

ئه‌ڤرۆ نيوز:

به‌رى نيڤرۆيا ئه‌ڤرۆ رۆژا سێشه‌مبى رێكه‌فتى 24ى چريا دويێ 2015 مه‌كته‌با سياسى يا پارتى ديموكراتى كوردستان ب سه‌رپه‌رشتيا مه‌سعود بارزانى سه‌رۆكێ پارتى كۆمبوو.

ب گۆره‌يى وان پێزانينێن ل به‌ر ده‌ست به‌رى نيڤرۆيا ئه‌ڤرۆ ل پيرمام، مه‌كته‌با سياسى يا پارتى ديموكراتى كوردستان ب سه‌رپه‌رشتيا مه‌سعود بارزانى سه‌رۆكێ وێ حزبێ كۆمبوو.

هه‌ر ب گۆره‌ى وان پێزانينان كو ژ مه‌كته‌با سياسى يا پارتى ب ده‌ست كه‌فتينه‌: كۆمبوون دێ يا تايبه‌ت بيت ب به‌رسڤدانا پێشنيازا ئێكه‌تى نشتيمانى كوردستان كو د دووماهى كۆمبوون دا دانابوو به‌ر سينگێ پارتى.

بڕياره‌ ل دووڤ وان پێزانينێن ل به‌ر ده‌ست پشتى كۆمبوونێ، پارتى به‌رسڤا ئێكه‌تيێ بكه‌ت و ئه‌و ژ لايێ خوه‌ ڤه‌ ل گه‌ل گۆڕان كۆم ببيت و به‌رسڤا پارتى بگه‌هينيتێ.

ژێده‌ر: باسنيوز

ئه‌ڤرۆ نيوز:

ئاخفتنكه‌رێ ب ناڤێ وه‌زاره‌تا خواندنا بلند و ڤه‌كۆلينێن زانستى ل هه‌رێما كوردستانێ راگه‌هاند كو ژ ئه‌گه‌رێ ده‌ركرنا بڕياره‌كا وه‌زاره‌تا وان، زێده‌ترى 10 هزار قوتابيان مفاداربوون.

عه‌باس ئه‌كره‌م ئاخفتنكه‌رێ ب ناڤێ وه‌زاره‌تا خواندنا بلند و ڤه‌كۆلينێن زانستى ل حوكمه‌تا هه‌رێما كوردستانێ بۆ خه‌ندان راگه‌هاند: “د كۆمبوونا جڤاتا وه‌زاره‌تا وان دا ل رۆژا 26ى چريا ئێكێ 2015ێ هاتبوو ئه‌نجام دان، تێدا داخوازيا كۆمه‌كا قوتابيێن زانكۆيێن هه‌رێما كوردستانێ و داخوازيێن لژنا په‌روه‌ردێ و خواندنا بلند ل په‌رله‌مانێ كوردستانێ كه‌فته‌ به‌ر دانوستاندنێ، سه‌رئه‌نجامێ ڤێ چه‌ندێ وه‌زاره‌تێ بڕيار دا ب پێدانا 10 نمران ب قوتابيان و بكه‌ڤنه‌ سه‌ر ئه‌نجامێن ئه‌زموونێن وان، دا كو هه‌ردو حاله‌تێن باگوهۆڕين و بارسڤڤكرن مفاى ژێ وه‌رگرن و د وى چارچۆڤه‌ى دا جڤاتێن زانكۆيان راسپاردن دا ده‌قێ بڕيارێ ب جهـ بينن”.

گۆتژى: د ئه‌نجام دا ل زانكۆ و په‌يمانگه‌هێن حكومى ل هه‌رێما كوردستانێ شه‌ش هزار و 701 قوتابى ژ ڤێ بڕيارێ مفادار بوون و ل زانكۆيێن ئه‌هلى ژى سێ هزار و 411 قوتابى، سه‌رجه‌مێ گشتى 10 هزار و 112 قوتابى بوون”.

ئاخفتنكه‌رێ وه‌زاره‌تا خواندنا بلند و ڤه‌كۆلينێن زانستى ئاماژه‌ ب وێ چه‌ندێ ژى كر كو ره‌زامه‌ندى ل سه‌ر داخوازا عبورى ژ وانه‌كێ بۆ دو وانا ژ لايێ جڤاتا ڤه‌ نه‌هاته‌ دان، به‌لێ ئه‌ڤ بڕيارا 10 نمران قوتابى پتر مفادار كرن و گۆت: “بێ جوداهى ژ قوتابيێن ئه‌هلى و حكومى گرت”.

ئەڤرۆ نیوز:
پەیڤدارێ کۆمسیۆنا بلندا سەربخۆیا ھەلبژارتنان و راپرسیا ھەرێما کوردستانێ ئاشکرا کر کو دامەزراندنا 535 کەسان ل کۆمسیۆنێ دێ پاش کەڤیت و گۆت “مە پێشبینی دکر کو 20 ھزار کەس دێ فۆڕمان پڕ کەن، نەکو 108 ھزار کەس”.
شێروان زرار، پەیڤدارێ کۆمسیۆنا بلندا سەربخۆیا ھەلبژارتنان و راپرسیا ھەرێما کوردستانێ د داخویانیەکێ دا بۆ (تۆڕا میدیا رووداو) دان ب وێ ئێکێ کر کو دامەزاندنا ئەوان 535 کەسان زۆر گیرو بوویە و گۆت “ئەم نەشێین ھیچ دەمەکی بۆ جوداکرنا تماما فۆرمان دیار بکەین، داکو ناڤێن کەسێن دامەزراندی بھێنە ئاشکراکرن”.
پەیڤدارێ کۆمسیۆنا بلندا سەربخۆیا ھەلبژارتنان و راپرسیا ھەرێما کوردستانێ ئاشکرا کر کو ل گۆر وان دەلیڤێن کاری کو بەری نھا کۆمسیۆنێ راگەھاندین، کۆمسیۆنێ 12 ڕێڤەبەرێن گشتی دڤێن کو ھەشت ژ وان بۆ ناڤ کۆمسیۆنێ نە و چارێن دی بۆ چار پارێزگەھێن ھەرێمێ نە و گۆت “نھا ئەم مژوولی جوداکرنا ناڤێن وان کەسانین کو بۆ وان 12 پۆستان فۆڕم پڕ کرینە”.
دەربارەی ئەگەرێن پاشکەفتنا راگەھاندنا ئەنجامان شێروان زرار گۆت “مە پێشبینی دکر کو 20 ھزار کەس دێ بۆ وان (535) فۆڕمان پڕ کەن، نەکو 108 ھزار کەس، ھەروەسا ھندەک حالەت ھەنە کو کەسەکی 12 جاران فۆرم پڕ کرینە، ئەڤە د دەمەکی دایە کو بەری نھا کۆمسیۆمێ تێکەست کربوو، کو ھەر کەسێ حەزا دامەزراندنێ ل کۆمسیۆنێ ھەبیت پێدڤیە ب تنێ ئێک جار فۆرمێ پڕ بکەت”.

ئەڤرۆ نیوز:
وەزارەتا خواندنا بلند و ڤەکۆلینێن زانستی بڕیار دا حەفت پەیمانگەھێن تایبەت ل ھەرێما کوردستانێ بھێنە ڤەکرن و پەیڤدارێ وەزارەتێ ژی رادگەھینە، ئەڤ سالە دێ ل پەیمانگەھێن نوو دەست ب خواندنێ ھێتەکرن و ئەڤە دەلیڤەکا باشە بۆ قوتابیێن تێکرایێ وان کێمتر ژ (55)ێ.
عەباس ئەکرەم، پەیڤدارێ وەزارەتا خواندنا بلند و ڤەکۆلینێن زانستی بۆ رۆژناما ئەڤرۆ گۆت “ھژمارەکا زۆرا داخوازیان ھەنە بۆ ڤەکرنا پەیمانگەھان ل ھەرێما کوردستانێ و چەندین داخوازی گەھشتبوونە وەزارەتێ، لەوڕا پشتی پێداچوون و پشتڕاستبوونێ ژلایێ پشکا دلنیایی یا جۆری، دوھی رۆژا دوشەمبی وەزیرێ خواندنا بلند ئیمزا ل سەر ڤەکرنا حەفت پەیمانگەھێن نوو ل ھەرێما کوردستانێ کر و ئێک ژ وان دێ ل پارێزگەھا دھۆکێ ھێتە ڤەکرن، ئەڤژی ب مەرەما وەرگرتنا قوتابیان ب تایبەت ئەو قوتابیێن پۆلا 12ێ ئامادەیی کو تێکرایێ وان کێمتر ژ (55)ێ و دکارن بۆ ئەڤ سالەیا خواندنێ داخوازیێن خوە ئاراستەی ئەڤان حەفت پەیمانگەھان بکەن و دەلیڤا خواندنێ بۆ ھاتیە ڤەکرن، بەرچاڤکرنا پێدڤیێن ھەرێما کوردستانێ بووینە ئەگەر بۆ ڤەکرنا ئەڤان پەیمانگەھان و ئەڤ سالە دێ دەست ب کارێ خوە کەن و قوتابیان وەرگرن”.
عەباسی گۆت ژی “ھەر حەفت پەیماگەھێن مۆلەتێ وەرگرن دێ یێن کەرتێ تایبەتن و ل گۆر رێنمایێن ھژمارە پێنج مۆلەتا ڤەکرنێ وەرگرتیە و ل گۆر رێنمایی و بڕیارێن وەزارەتا خواندنا بلند و ڤەکۆلینێن زانستی دێ کار کەن و ب ڤەکرنا ئەڤان حەفت پەیمانگەھا دێ ھژمارا پەیمانگەھێن ئەھلی ل ھەرێما کوردستانێ بیتە نەە پەیمانگەە و بێگومان دێ خزمەتەکا بەرچاڤ بیت بۆ تەخا قوتابیان”.