ئه‌ڤرۆ نيوز:

ئه‌ڤرۆ رۆژا ئه‌بنى رێكه‌فتى 5ى خزيرانا 2015ێ چه‌كدارێن داعش هێرش بۆ سه‌ر ده‌رگه‌هێن باشوورێ حه‌سه‌كه دژوارتر لێ كر و نوكه‌ شه‌ره‌كێ دژوار ل وێ ده‌ڤه‌رێ بۆ گرتنا وى باژێرێ پتريا خۆجهێن وێ كورد ژ لايێ چه‌كدارێن داعش ڤه‌ يێ دهێته‌ كرن.

ره‌وانگه‌ها سۆرى بۆ مافێن مرۆڤى، د راگه‌هاندنه‌كێ دا ئه‌و چه‌ند ئاشكه‌را كر كو فرۆكێن شه‌رى يێن رژێما سوريا وكه‌تيبێن به‌ره‌ڤانيا نشتيمانى، زۆر ب دژوارى به‌ره‌ڤانى ژ هێرشا چه‌كدارێن داعش دكر.

هه‌ر ديسا د وێ راگه‌هاندنێ دا هاتيه‌ ژى: “بۆردومانا چرا فرۆكان ناڤه‌راستا حه‌سه‌كه‌ و پشكێن باشوورى ب خوه‌ ڤه‌ گريته‌”،  ئه‌ڤه‌ ژ هه‌يڤا گۆلانێ و هه‌تا نوكه‌ جارا سيێ يه‌ چه‌كدارێن داعش بزاڤێن گرتنا ڤى باژێرى دكه‌ن.

ب گۆره‌يى ژێده‌رێن ده‌نگوباسان ئه‌وێن ئه‌ڤرۆ نيوز ب ده‌ست خوه‌ خستين، ئه‌ڤرۆ رۆژا ئه‌ينى چه‌كدارێن داعش به‌ر ب ناڤ باژێرێ حه‌سه‌كه‌ ڤه‌ چووينه‌.

ئەڤرۆ نیوز:

شیار ئاراس چاڤدێرێ سیاسی ل رۆژئاڤایێ کوردستانێ بۆ رۆژناما ئەڤرۆ دیار کر کو سێ رۆژن ل گۆندێن رەخ باژارێ حەسەکێ شەرەکی گران د ناڤبەرا چەکدارێن داعشێ ل گەل لەشکرێ سووریێ دا دھێتە کرن و ھەتا نھا ژ ھەر دو ئالیان ب دەھان کەسان گیانێ خوە ژ دەست داینە و داعشێ نەشیایە کو ھەتا نھا چو دەڤەرەکێ کۆنترۆل بکەت و گۆت: (دوھی ئێڤارێ چەکدارێن داعشێ خواستن ھێرشی چەندین گۆندێن کوردان ل رەخ حەسەکێ بکەن و پشتی وێ یەکێ ژی یەکینەیێن پاراستنا گەل بەرسڤا وان دان و شەرەکی گران د ناڤبەرا وان دا دەرکەڤت و ھەتا نھا ژی شەر بەردەوامە و د ئەنجاما شەری دا چەند شەرڤانێن کورد شەھید بوون و ب دەھان چەکدارێن داعشێ ژی ھاتنە کوشتن، بەس داعش نەچار ما کو پاشکەشە بکەت).
ناڤھاتی د بەردەوامیا ئاخڤتنا خوە دا ئەو یەک ژی دیار کر کو نھا سێ ھێز ل حەسەکێ شەری دکەن، داعش نھا ھەم شەرێ یەکینەیێن پاراستنا گەل دکەت و ھەم ژی شەرێ لەشکرێ سووریێ دکەت، لێ داعشێ ھەتا نھا نەشیایە چو پێشڤەچوونێن بەرچاڤ بکەت و د ناڤ سێ رۆژێن بۆری دا چەندین جاران فرۆکێن رژێما سووریێ ھێرشی ناڤەندێن داعشێ کرینە و ب دەھان چەکدارێن وێ رێکخراوا تیرۆرستی ھاتینە کوشتن و ل ئالیێ دی ژی شەرڤانێن کورد ب چەکێن گران ل رەخ حەسەکی د ئامادەباشیێ دانە دا نەھێلن کو داعش خوە نێزکی حەسەکێ بکەت و گۆت: (بەری سێ رۆژان چەند گۆندێن کوردان کەڤتبوونە دەستێ داعشێ، لێ شەرڤانێن کورد شیان ھێرشی چەکدارێن داعشێ بکەن و وان ل وێرێ دەربخینن و ژ بەر ھندێ ژی نھا ئەو گوند ھاتینە ئازادکرن، لێ شەرەکی گران ل رەخ حەسەکێ ھەیە و پرانیا وێ شەری ژی د ناڤبەرا سەربازێن رژێما ئەسەدی و چەکدارێن داعشێ دایە).
ل ئالیێ دی رێکخراوا چاڤدێریا مافێ مرۆڤی یا سووریێ کو ناڤەندا وێ ل لەندەنێ دایە دوھی د داخۆیانیەکێ دا راگەھاند کو چەکدارێن داعشێ فرۆکێن رژێما سووریێ و چەکدارێن داعش ژی ل رەخ حەسەکێ چەکێن قەدەغەکری بکار ئیناینە و ژ بەر وێ یەکێ ژی چەند کەسێن مەدەنی گیانێ خوە ژ دەست داینە.
ل ئالیێ دی ھاتە زانین کو شەرێ د ناڤبەرا چەکدارێن داعشێ ل گەل شەرڤانێن کورد ل دەڤەرێن جودا جودا یێن رۆژئاڤایێ کوردستانێ بەردەوامە و ل دەڤەرێن کۆبانێ و جزیرێ د ماوەیێ ٢٤ دەمژمێرێن بۆری شەرڤانێن کورد شیاینە کو ١٣ گۆندان ژ چەکدارێن داعشێ پاقژ بکەن و د وان شەران دا ب دەھان چەکدارێن داعشێ ھاتینە کوشتن و چەند شەرڤانێن کورد ژی شەھید بووینە و شەر ب دژواری بەردەوامە و داعش رۆژ ب رۆژێ ل رۆژئاڤایێ کوردستانێ لاواز دبیت و د پاشڤەچوونێ دایە.
ل ئالیێ دی رۆژناما رادیکال یا تورکیا ژی د راپۆرتەکێ دا راگەھاند کو داعش خوە نێزیکی سنۆرێ تورکیا کریە و شاندەکێ تورکیا سەرەدانا ئەمریکا کریە و ھەر دو وەلات پێکڤە بەرنامەکێ بۆ پاراستنا سنۆری و وەلاتێین سووریێ یێن ل سەر سنۆرێ تورکیا و سووریێ دا ئامادە بکەن و بەرپرسێن ئەمریکی ژی دیار کرینە کو ئەمریکا ب چو رەنگەکێ رازی نابیت ھەرێمەکا دژە فرینێ بھێتە ئاڤاکرن و ئەو دێ بۆ پاراستنا سنۆران ھاریکاریا تورکیا کەن.