ئەڤرۆ نیوز، بارزان مزووری:
ژێدەرەکێ دناڤ کەمپا ئێسیان بۆ ئەڤرۆ نیۆز دیار کر کو ئەڤرۆ سپێدێ رێککەفتی 4/1/2021 ل کەمپا ئێسیان ل سنۆرێ قەزا شێخان کچەک بناڤێ”ئەسمەهان خدر”د ژیێ 22 سالیێ دا دناڤ خیڤەتێ دا خوە خەندقاندیە.
ل گۆر زانیاریان “ئەسمەهان خدر” خەلکا کۆمالگەها سیباشێخدرێ یە ل قەزا شەنگال ئەڤە چەند سالە ئاوارە بوویە قەزا شێخان.
ئەڤرۆ نیوز:
وەزارەتا ساخلەمیا هەرێما کوردستانێ راگەهاند کو د ماوەیێ ٢٤ دەمژمێرێن بۆری دا ل هەرێما کوردستانێ ٩٧ کەسێن دی تووشی ڤایرۆسێ کۆرۆنایێ بووینە و نەخوشەک ژی مریە.
ل گۆر ئامارا وەزارەتا ساخلەمیێ ٩٩٥ نەخوشێن کۆرۆنایێ ژی ب تەمامی چارەسەر بووینە.
ل پارێزگەها دهۆکێ ژی ٢٦ کەسێن دی تووشی کۆرۆنایێ بووینە و هەمان دەمی دا ٣٧٧ نەخوش ژی ب تەمامی چارەسەر بووینە و چ حالەتێن مرنێ نەهاتینە تۆمارکرن.
ئەڤرۆ نیوز، عەلی حاجی :
رێڤەبەرێ گشتیێ گەشەپێدانا جڤاكی ل پارێزگەها دهوكێ دیار كر ب رێیا كاراكرنا سەنتەرێن جڤاكی پروژەیێ خوە كارا كرن ل دور نەهێلانا دیاردەیا زارویان ل سەر جاددەیان و دێ ب رێیا رێكخراوەكا نێڤدەولەتی كار ل سەر پروژەیی كەن .
زێدەتر دكتور شێرزاد هروی گۆت: (پێشتر وان پروژەیەك پێشكێشكر بوو ل دور دانانا پلانەكێ بۆ نەهێلانا زارویان ل سەر جاددەیان و هەر دیسان ئەو زارویێن كو ژبەر رێگریا خێزانێ ژ قوتابخانێ هاتیە دابرین، ئەم دێ ل دویڤ ئەگەران چین و هەر دەما بزانین زاروك ژ بەر هەژاریێ كار دكەت یان ژی ژبەر نەبوونا پارەیی نەشیایە بچیتە قوتابخانێ دێ ناڤێ وی ل رێكخراوا یونسێڤ هێتە تومار كرن دا كو موچەیەك بۆ خێزانا وی بهێتە دان و دوبارە ئەو زارویە دێ چیتە قوتابخانێ و نابیت ل سەر جادەیان كار بكەت و هەكە بەروڤاژی وێ چەندێ كو توندوتیژی ژلایێ مالان ڤە دگەل دا دهێتە كرن د وی دەمی دا سەمیانێن وی زاروكی دێ روو ب روویی دادگەهێ كەن، سەنتەرێن جڤاكی ل هەمی قەزایێن سەر ب پارێزگەها دهوكێ هاتینە كارا كرن ب مەرەما دوبارە كاراكرنا پروژەیێ وان) .
ناڤهاتی ئەو چەندە ژی دیار کر ب رێیا تیمێن تایبەت دێ چاڤدێری هێتە كرن و هەر دیسان مە پولیسێن توندوتیژی و جڤاكی هەنە كو ئەو ژلایێ خوە ڤە ل سەر ڤان كەیسان مە ئاگەهدار دكەن و ئەم ژی ب رێیا وی پروژەی دێ وان كێشەیان چارەسەر كەین پێخەمەتی وێ چەندێ مافێ زاروكی نەهێتە خوارن.
ئەڤرۆ نیوز:
وەزارەتا ساخلەمیا هەرێما کوردستانێ راگەهاند کو د ماوەیێ ٢٤ دەمژمێرێن بۆری دا ٦٨ کەسێن دی ل هەرێما کوردستانێ تووشی کۆرۆنایێ بووینە و دو نەخوشێن کۆرۆنایێ ژی مرینە.
وەزارەتا ساخلەمیێ ئەو یەک ژی دیار کریە کو ٩٦٣ نەخوشێن کۆرۆنایێ ژی ل هەرێما کوردستانێ ب تەمامی چارەسەر بووینە.
ل پارێزگەها دهۆکێ ژی ٥٧ کەسێن دی تووشی کۆرۆنایێ بووینە و نەخوشەک ژی مریە هەروەسا ل پارێزگەها دهۆکێ ٣٧٤ نەخوشێن کۆرۆنایێ ژی ب تەمامی چارەسەر بووینە.
ئەڤرۆ نیوز:
ژ ئەگەرێ شورتا کارەبێ ئاگر بەربوو هژمارەک ژ خیڤەتێن کەمپا چەمشکۆ ل سنورێ قەزا زاخۆ و ١٢ خیڤەت سوتینە و نها ١٢ خێزان بجه ماینە و تیمێن هەوارهاتنێ ژی دیار دکەن کو ژ بەر شورتێ کارەبێ ئاگر بەربوویە کەمپی و وان ژی شیاینە ئاگری کۆنترۆل بکەن.
کەمپا چەمشکۆ دکەڤیتە سنورێ قەزا زاخۆ و پرانیا ئاکنجیێن وێ ژی خەلکێ شنگالێ نە.
ل گۆر زانیاریان ژ بەر ئاگری زیانەکا مەزن یا ماددی گەهشتیە خەلکی لێ چو زیانێن جانێ نەبووینە.
ئەڤرۆ نیوز:
مەسرور بارزانی سەرۆکێ حوکمەتا هەرێما کوردستانێ ب هەلکەفتا سەرێ سالا نوو یا زایینی پەیامەک بەلاڤکر و راگەهاند کو ئەو ل گەل بەغدا ل دۆر بۆدجێ سالا ٢٠٢١ گەهشتینە رێککەفتنێ و هێڤی خواست کو ئالیێن سیاسی ل پەرلەمانی بابەتێ موچەی و شایستێن دارایی یێ خەلکێ کوردستانێ وەکو کارتەکا فشارێ ل دژی هەرێما کوردستانێ بکار نەئینن، ئەڤە ژی دەڤێ پەیاما سەرۆکێ حوکمەتا هەرێما کوردستانێ یە:
بەبۆنەی سەری ساڵی نوێی زایینی 2021 ، گەرمترین پیرۆزبایی لە هاونیشتمانیانی کوردستان بەگشتی و پێشمەرگە قارەمانەکان و بنەماڵە و کەسوکاری سەربەرزی شەهیدان بە تایبەتی دەکەم . هیوادارم ساڵێکی پڕ لە کامەرانیی و ئاشتی و ئارامیی و کۆتایی هاتنی نەهامەتی و قەیرانەکان بێت لە کوردستان و عێراق و جیهاندا.
کوردستانییانی خۆشەویست :
لەکاتێکدا پێ دەنێینە ساڵی نوێوه، هەرێمی کوردستان و جیهان به‌گشتی، ساڵێكی زۆر سه‌ختی به‌ڕێكرد، ئەویش بەهۆی بڵاوبوونەوەی پەتای ڤایرۆسی کۆرۆنا و لێکەوتە ئابوورییە سەختەکانی و نەناردنی شایستە داراییەکانی هەرێمی کوردستان لە لایەن کاربەدەستانی حکومەتی فیدراڵی لە بەغدا ، کە لە ئەنجامدا قەیران ودۆخێکی دارایی سەخت و بارگرانییەکی زۆر لە سەر هاونیشتمانیانی خۆشەویستی هەرێمی کوردستان دروستبوو ، ئێستا کە له‌سه‌ر بودجه‌ی 2021 له‌گه‌ڵ حكومه‌تی عێراق گه‌یشتووینه‌ته رێککەوتن. هیوادارم ڕێککەوتنەکە وەکو خۆی جێبەجێ بکرێت و لایەنە سیاسییەکانی عێراق، چیتر رێگە نەدەن ماف و شایستە داراییەکانی خەڵکی کوردستان، بکرێتە کارتێکی فشاری سیاسی لە دژی خەڵکی مافخوراوی کوردستان . دووپاتیشی دەکەینەوە کە ئێمە هەرگیز دەستبەرداری مافە دەستوورییەکانمان نابین.
گەلی کوردستان خاوەن پرسێکی نەتەوەیی و نیشتمانییە و قوربانییەکی زۆری لەم پێناوە داوە و قەوارەی هەرێمی کوردستان، بەرهەمی خەبات و تێکۆشانی سەدان هەزار شەهیدە و پێویستە بە هەموومان داکۆکی لێ بکەین و بیپارێزین ، چونکە کەرامەت و سەربەرزی خەڵکی کوردستان، بەندە بە هەبوون و بەهێزبوونی ناسنامەی نیشتمانیی و نەتەوەییمان و ڕێزگرتن لە مافە دەستوورییەکانمان. داوا لە هەموو هێز و لایەنە سیاسییەکان و خەڵکی خۆڕاگری کوردستان دەکەم، هەموو جیاوازیی و ناکۆکییەک بەلاوەبنێن و بەرگری لە خاک و قەوارەی فيدراڵی هەرێمی کوردستان و دەسکەوتەکان بکەن و یەکگرتووانە، ڕووبەڕووی هەموو هەڕەشەکان ببنەوە و داکۆکی لە مافە ڕەوا و دەستوورییەکانیان بکەن . دڵنیام بە یەکڕیزی و یەکگرتوویی، دەتوانین هەموو قەیران و ئاستەنگەکان تێپەڕینین.
لێرەدا جەخت لە هەوڵە بەردەوامەکانمان بۆ درێژەدان بە چاکسازی و باشترکردنی ژیان و گوزەرانی خەڵکی هەرێمی کوردستان و سەروەری یاسا و دادپەروەریی و سەقامگیرکردنی زیاتری ئاسایش و ئارامی دەکەینەوە.
ئێمە بە گەشبینی و ئومێدەوە، دەڕوانینە داهاتوو، بەو هیوایەی هەرێمی کوردستان پێ بنێتە قۆناغێکی نوێی گەشەکردن و پڕ دەستکەوت و ئاوەدانی و دووربێت لە هەموو ناخۆشی و دۆخێکی نەخوازراو.
ساڵی نوێ لە هەموو لایەک پیرۆز بێت و کوردستانیش هەمیشە، بەهێزتر و سەرفرازتر و ئاوەدانتر بێت.
مەسرور بارزانی
سەرۆکی حکومەتی هەرێمی کوردستان
2020/12/31
ئەڤرۆ نیوز:
مالپەرێ ت٢٤ یێ تورکیا د راپۆرتەکێ دا دیار کریە کو شاندەکێ تورکیا ل سەر فەرمانا رەجەب تەیب ئەردۆگانێ سەرۆک کۆمارێ تورکیا و ب ناڤبژیڤانا روسیا سەرەدانا شامێ کرینە و ل گەل بەرپرسێن حوکمەتا سووریێ دەست ب هەڤدیتنان کرینە.
ئەو یەک پشتی هندێ هات کو بەری چەند رۆژان سەرۆک کۆمارێ تورکیا راگەهاند کو ئەو بەرهەڤن هەموو ئاریشێن هەی ب رێیا دانوستاندنان چارەسەر بکەن.
ئەڤرۆ نیوز:
دەزگەهێن راگەهاندنا ئەمریکا دیار دکەن کو پشتی سعوودیێ هەر یەک ژ وەلاتێن مسر و کوێت ژی داخوازا چەکێن گران و پێشکەفتی ژ ئەمریکا کرینە و ئەمریکا دێ ب گۆژمێ پتر ژ ٤ ملیار دۆلاران چەکی ددەتە وان وەلاتان.
دەزگەهێن راگەهاندنا عەرەبی ژی دیار دکەن کو وەلاتێ کوێت داخوازا کڕینا هەشت کۆپتەرێن مودێرن ژ ئەمریکا کریە و ئەمریکا ژی رازیبوونا خوە دیار کریە.
ئەڤرۆ نیوز:
بەرپرسەکێ رژێما سووریێ بۆ ئاژانسا سپوتینگ یا روسی دیار کریە کو دوهی کۆمبوونەک د ناڤبەرا وان و هێزێن سووریا دیموکرات دا ب ناڤبژیڤانیا شاندەکێ روسی هاتیە کرن و د کۆمبوونێ دا رێککەفتن هاتیە کرن کو هێزێن سووریا دیموکرات باژێرکێ عەین عیسا یێ سەر ب پارێزگەها رەققە رادەستی رژێما سووریێ بکەن.
هەتا نها ب فەرمی هێزێن سووریا دیموکرات ئەو یەک پشتراست نەکرینە لێ چاڤدێرێن سیاسی ژی دیار دکەن کو روسیا فشارێن خوە ل سەر هێزێن سووریا دیموکرات زێدەتر لێ کرینە دا عەین عیسا رادەست بکەت، چونکو هەکە تورکیا هێرشی عەین عیسا و دەڤەرێن دی بکەت چو هێزەک نەشێت رێگریێ ل تورکیا بکەت.
نيشاندان