ئه‌ڤرۆ نيوز:

شه‌ر و پێكدانان د ناڤبه‌را شه‌رڤانێن يه‌په‌گێ و چه‌كدارێن داعش ل ده‌وربه‌رێن كۆبانێ يێ به‌رده‌وامه‌ د پێنگاڤه‌كێ دا كو داعش يا بزاڤا كۆنترۆلكرنا كۆبانێ دكه‌ت وه‌كو رێيه‌كا گرنگ ژ ره‌قه‌ بۆ حه‌له‌با پايته‌ختێ سوريا.

ئه‌ڤ شه‌ر و پێكدادانه‌ ئه‌ڤه‌ ژ نيڤا هه‌يڤا بۆرى وه‌ره‌ يێ به‌رده‌وامه‌ كو د ڤان شه‌ران دا، چه‌كدارێن داعش شياينه‌ ده‌ستێ خوه‌ بداننه‌ سه‌ر هژماره‌كا مه‌زن يا گوندێن ده‌وروبه‌رێن كۆبانێ كو ب ڤێ چه‌ندێ ژى زێده‌ترى 160 هزار كه‌سان ژ وان ده‌ڤه‌ران ئاواره‌ بووينه‌.

ژبلى كو ئه‌مريكا ل ڤان رۆژێن بۆرى چه‌ند هێرشێن ئه‌سمانى كرينه‌ سه‌ر مولكێن داعش ل ده‌وروبه‌رێن كۆبانێ، فرۆكێن له‌شكرى يێن توركيا ژى بۆ جارا ئێكێ د هێرشكرنا له‌شكرى دا، مولكێن داعش ل ده‌وروبه‌رێن كۆبانێ تۆپبارانكرن.

په‌يامنێرێ ئاژانسا ئه‌سۆشيه‌يت پرێس دا زانين كو ئه‌وى گوهـ ل شه‌ره‌كێ دژوار بوويه‌ ل باكوورێ باژێرێ، به‌لێ نه‌هاتيه‌ زانين كا ئايا چه‌كدارێن داعش شيانه‌ باژارى كۆنترۆل كه‌ن يان نه‌، ئه‌ڤێ به‌ره‌ڤانى ژ لايێ شه‌رڤانێن يه‌په‌كێ ڤه‌ ژێ دهێته‌ كرن.

په‌يامنێرێ بى بى سى ل ناحيه‌كا باكوورێ كوردستانێ يا سه‌ر سنورى ژى دا زانين كو ژ بوو كۆنترۆلكرنا كۆبانێ، ب ره‌نگه‌كێ به‌رده‌وام تۆپارانكرنا ناڤ باژێرى يا دهێته‌ كرن ژ بوو.

ژێده‌رێن ده‌نگوباسان وێ چه‌ندێ ژى ئاشكه‌را دكه‌ن كو ب ده‌هان چه‌كدارێن داعش ژ ئه‌نجامێ هێرشێن فرۆكه‌ڤانى يێن هێزێن هه‌ڤپه‌يمانان گيانێ خوه‌ ژ ده‌ست داينه‌.

ئه‌ڤرۆ نيوز، نيوار محه‌مه‌د سه‌ليم:

ئه‌ندامه‌كێ لژنا ده‌ڤه‌رێن كوردستانى يێن ده‌رڤه‌ى ئيدارا هه‌رێما كوردستانێ ل په‌رله‌مانێ كوردستانێ داخوازێ دكه‌ت ل سه‌ر ده‌ركرنا فۆرمێن ئاهێن خوارنێ و ده‌ركرنا كارتا پێزانينان بۆ وه‌لاتيێن عه‌ره‌ب ل كه‌ركووك ڤه‌كۆلين ل گه‌ل نجه‌مه‌دين كه‌ريم بهێته‌ كرن.

د نڤيسينه‌كێ دا كو ل په‌يچێ خوه‌ يێ فه‌يسبۆكى به‌لاڤكريه‌ په‌رله‌مانتارێ فراكسيۆنا گۆڕان و ئه‌ندامێ لژنا ده‌ڤه‌رێن كوردستانى يێن ده‌رڤه‌ى ئيدارا هه‌رێما كوردستانێ، بێستۆن فايق، راگه‌هاند كو ب گۆره‌ى گۆتنێن قايمقامێ كه‌ركووكێ، كامل ساله‌ى، ئاشكرا كريه‌ كو هژماره‌كا زۆر يا عه‌ره‌بان هاتينه‌ كه‌ركووك و كارتا پێزانينان و فورما ئاهێن خوارنێ پێ دايه‌ و هژماره‌كا شوقه‌ و جهێن بنه‌جهبوونێ بۆ تاپۆكرينه‌ و بووينه‌ وه‌لاتيێن كه‌ركووك.

بێستون فايق دبێژيت: “دبيت ئه‌ڤ گۆتنێن قايمقامێ پارتى ل كه‌ركووك په‌يوه‌ندى ب ڤێ هه‌ڤركيا د ناڤبه‌را پارتى ديموكراتى كوردستان و د. نه‌جمه‌دين كه‌ريم پارێزگارێ كه‌ركووك ڤه‌ هه‌بيت كو ماوه‌كه‌ ئاخفتنان ل سه‌ر دكه‌ت و تۆمه‌تێن جودا يێن گه‌نده‌ليێ دئێخنه‌ پال وى، به‌لێ ئه‌ڤه‌ يا جودايه‌ و نابيت ب تنێ وه‌كو دوسه‌كێ گه‌نده‌ليێ بهێته‌ ديتن، پێدڤيه‌ سه‌رۆكايه‌تيا هه‌رێمێ و په‌رله‌مانێ كوردستانێ دووڤچوونێ بۆ بكه‌ن وهه‌موو پێنگاڤان به‌ر ب ڤى بابه‌تى ڤه‌ ب هاڤێژن”.

د پشكه‌كا دى يا گۆتنێن خوه‌ دا ئاماژه‌ دايه‌ وێ چه‌ندێ كو ژ به‌ر كو ئێكه‌تى نشتميانى كوردستان هێزا ئێكێ يا كه‌ركووكێ يه‌ و خودان پتريا ده‌نگێن وى باژێرى يه‌، پێدڤيه‌ ب هوورى ل سه‌ر ڤى بابه‌تى ڤه‌كۆلينان بكه‌ت و رێ نه‌ده‌ت ب ده‌ستێ ئه‌ندامه‌كێ مه‌كته‌با سياسى يا وان ڤه‌ كارتا پێزانينان و فورما ئاهێن خوارنێ بۆ وه‌لاتيێن عه‌ره‌ب يێن هاورده‌ بهێته‌ دروستكرن و كه‌ركووك بهێته‌ ته‌عريبكرن.

دايه‌ زانين ژى كو چه‌ندين ساله‌ كورد هه‌موو بزاڤێن ڤه‌گه‌راندنا هاوردێن عه‌ره‌به‌ بۆ جهێ وان، ئه‌ڤجا د پرۆسه‌كا گۆماناوى دا، عه‌ره‌ب ل جهێ كوردان بهێنه‌ بنه‌جهكرن و دبێژيت: “هه‌كه‌ ئه‌ڤه‌ راست بيت قايمقامى ژى پشكه‌كا ڤێ تاوانێ ب به‌ر دكه‌ڤيت چونكو قايمقامێ قه‌زا ناڤه‌ندى يه‌ و رێڤه‌به‌ر و به‌رپرسێن دى ژى يێن كه‌ركووك د پشكدارن، به‌لێ د. نه‌جمه‌دين كه‌ريم به‌رپرسيارێ سه‌ره‌كى يێ ڤێ كێشێ يه‌، چونكو كه‌سێ ئێكێ و سه‌رۆكێ يه‌كا ئيدارى يا پارێزگه‌ها كه‌ركووكه‌”.