سەرۆكێ حوكمەتا هەرێما كوردستانێ رۆژا جیهانییا مامۆستایان پیرۆزكر و دیاركر: سوپاسییا وان دكەم بۆ درێژەدانێ ب ئەركێ خوە یێ پیرۆز.
دوهی ئێكشەمبی 5/10/2025، مەسرور بارزانی، سەرۆكێ حوكمەتا هەرێما كوردستانێ د پۆستەكیدا ل تۆرا جڤاكییا (ئێكس) رۆژا جیهانییا ماموستایان ل ماموستایێن خوەشتڤی یێن كوردستانێ پیرۆزكر.
سەرۆكێ حوكمەتا هەرێما كوردستانێ سوپاسییا مامۆستایان كر بۆ درێژەدانا وان ب ئەركێ خوە یێ پیرۆز و پێگەهاندنا نڤشێن مە.
پێشتر ژی ل 21/9/2025، مەسرور بارزانی، سەرۆكێ حوكمەتا هەرێمێ د پەیڤەكێدا ب هەلكەفتا سالا نوو یا خواندنێ 2025- 2026 سوپاسییا مامۆستایان كربوو و راگەهاندبوو» سەرەرای هەمووئاستەنگ و نەخوەشییان و بێ مووچەییێ، بەردەوام بوون د خواندنێ دا. ئەو مامۆستایێن كەوردپەروەر و نیشتمانپەروەر و دلسۆز رێ نەدا خواندن ب راوەستیت یان قوتابی بێبەهر ببیت ژ خواندنێ، دەستخوەشییەكا زۆر ل وان مامۆستایان دكەم، ب راستی نموونەیێن خەلكێ دلسۆز و نیشتمانپەروەر، ئەو مامۆستانە كو سەرەرای وان هەموو نەخوەشییان دیسان بەردەوام بوون».
ب گۆڕەی ئامارێن وەزارەتا پەروەدەیێ ل حوكمەتا هەرێما كوردستانێ، زێدەتر ژ 148 هزار مامۆستایێن دامەزراندی ل سەر میلاكی و گرێبەست و زێدەتر ژ 33 هزار فەرمانبەران، پرۆسەیا خواندنا ئەڤسالە ل هەرێما كوردستانێ ب ڕێڤە دبەن.

دوهی ئێكشەمبی 5/10/2025، مەسرور بارزانی، سەرۆكێ حوكمەتا هەرێما كوردستانێ، پێشوازی ل شاندەكێ رەڤەندا كوردستانی ل ئۆرۆپا كر كو ژ 100 گەنجێن كورد و هەژمارەكا گەنجێن بیانی پێكهاتبوو.
سەرۆكێ حوكمەتا هەرێما كوردستانێ د پەیڤەكێدا سەرەرای ب خێرهاتنێ ل وان، ئاماژە ب گرنگییا رۆلێ رەڤەندا كوردستانی ل دەرڤەی وەلاتی كر د دانەنیاسینا زێدەتر یا پرسا كوردی و پشتەڤانیكرنا مافێن رەوا یێن خەلكێ كوردستانێ.
سەرۆكێ حوكمەتا هەرێمێ داخواز ژ گەنجێن كورد كر كو كەلتوور و زمان و ناسنامەیا خوە یا نەتەوەیی بپارێزن و ببنە پرا هەڤبەندیێ ل گەل كوردستانێ، هەروەسا داخواز ژێ كر كو نموونەیەكا باش و جوان و سەركەفتی بن د ناڤ وان جڤاكێن تێدا دژین و مفای ژ وان دەلیڤەیان وەربگرن كو ل دەرڤە هەین بۆ خوە پێگەهاندن و پێشئێخستنا شیانێن خوە.
هەروەسا مەسرور بارزانی رۆناهی ئێخستە سەر چاكسازیێن حوكمەتا هەرێما كوردستانێ ل هەموو كەرتان ژ پێخەمەت دروستكرنا ژێرخانەیەكا ئابۆری یا ب هێز ل هەرێما كوردستانێ.

بەرپرسێ‌ دەستەیا كارگێڕی یا مەكتەبا سیاسی یا پارتی دیموكراتی كوردستان د پەیامەكێ‌ دا پیرۆزباهیا فێستیڤالا خانی 3 كر.
فازل میرانی گۆت: «ب هەلكەفتا بەستنا سێیەمین فێستیڤالا رەوشەنبیری (فێستیڤالا خانی) گەرمترین پیرۆزباهییان ئاراستەیی هەوەیێن هێژا دكەین، گرنگیدان و دانوستاندن ل سەر بابەتێن جودا یێن میدیایی جهێ خوەشحالیێ یە».
ئاشكەرا ژی كریە كو میدیا هەر د كەڤن دا وەكو چاڤدێرەكی ب دووڤچوون و كۆنترۆلكرنێ و رێكەكا گران بۆ داخوازكرنا مافان و بەرچاڤكرنا راستییان رابوویە.
فازل میرانی گۆتژی: «میدیا ل كوردستانێ، ب هەموو باشی و خرابی و كێماسییێن خوە یێن میدیایی ڤە، گەلەك پێدڤی ب بابەتێن ب ئەڤی رەنگی هەیە و كارێ وە جهێ رێزگرتنێ یە، سەركەڤتنێ بۆ هەوە و پشكدار و مێهڤان و پەنەلیستێن هەوە دخوازم هەردەم سەركەڤتیبن».

نێچیرڤان بارزانی، جێگرێ سەرۆكێ پارتی دیموكراتی كوردستان دوهی چارشەمبی 1/10/2025 ل گەل هەڤالێن كۆمیتەیا ناڤەندی و لژنەیا كۆنفرانسێ ئێكێ یێ ئافرەتێن كوردستانێ كۆمبوو.
ئامینا زكری، ئەنداما مەكتەبا سیاسی یا پارتی دیموكراتی كوردستان د بەرپەرێ خوە دا ل سەر تۆرا جڤاكییا فەیسبووكی ل دۆر وێ كۆمبوونێ گوت» د دیدارێدا نێچیرڤان بارزانی دوپاتی ل سەر وێ چەندێ كر كو پشتەڤانیێ ل ئافرەتان دكەت و ئاماژەكر كو گرنگییەكا تایبەت ددەینە پشتەڤانی و ب هێزكرنا ئافرەتان بۆ گەهشتنا وان ب پێگەهێن هەژی كو ل گەل ماف و كەرامەتا وان دگونجیت و جڤاكێ مە تنێ ب پشكدارییەكا تمام د ناڤبەرا زەلام و ئافرەتاندا، هەروەسا ب گرنگیدانێ ب گەنجان، بلند دبیت و پشتەڤانییا ئافرەتان دكەم و رێزێ ل كار و بزاڤێن هەوە دگرم و دەستخوەشیێ ل هزرا وی كۆنفرانسی دكەم و پشتڕاستم هوون دشێن گوهۆڕینێ دروست بكەن و بەردەوام بن وداخوازی و پێنگاڤێن هەوە بلند د هەلسەنگینم».
ئامینا زكری ئاماژەكر كر كو جێگرێ سەرۆكێ پارتی دوپاتی ژی ل سەر وێ چەندێ كر» ژ پێخەمەت پاراستنا مافێن ئافرەتان و ئاڤاكرنا جڤاكەكێ پێشكەفتیتر، هەر چ د شیانێن من دا بیت دێ ئەنجام دەین».
وێ ئەنداما مەكتەبا سیاسی یا پارتی گوت ژی» وەك لژنەیا كۆنفرانسێ ئێكێ یێ ئافرەتان، سوپاسییا نێچیرڤان بارزانی، جێگرێ سەرۆكێ پارتی هاتە كرن بۆ پشتەڤانییا وی ل ئافرەتان و پەیداكرنا دەلیڤەیەكا باش بۆ ئافرەتان دەزگەهێن جودا جودا دا و پشتێن سەرۆكاتییا هەرێمێ و حوكمەتێدا، هەروەسا مە سوپاسییا وی كر بۆ پشتەڤانییا وی یا مەعنەوی ل كۆنفرانسێ ئافرەتان».
د وێ كۆمبوونێدا، لژنەیێ راسپاردە و پێشنیازێن كۆنفرانسێ ئێكێ یێ ئافرەتان دانا بەردەستێن جێگرێ سەرۆكێ پارتی و دوپاتی ل وێ چەندێ كر كو دێ پشتەڤانێ ئافرەتان بیت و دێ هاریكار بیت د بكارئینانا شیانێن ئافرەتان».

سەرۆكێ هەرێما كوردستانێ ل گەل شاندەكێ كەنیسەیا ئەرتۆدۆكسی یا رووسی ب سەرۆكایەتییا مەتران ئەنتۆنی كۆمبوو و رەوشا پێكهاتەیان، ب تایبەتی پرسێن گرێدای ب كریستیانێن هەرێما كوردستانێ و ئیراقێ هاتنە گەنگەشەكرن.
دوهی چارشەمبی 1/10/2025، نێچیرڤان بارزانی، سەرۆكێ هەرێما كوردستانێ پێشوازی ل شاندەكێ كەنیسەیا ئەرتۆدۆكسی یا رووسی ب سەرۆكایەتییا مەتران ئەنتۆنی، بەرپرسێ هەڤبەندیێن دەرڤە و هەژمارەكا زەلامێن ئایینی یێن كەنیسەیێ كر.
سەرۆكایەتییا هەرێما كوردستانێ ئاماژە ب وێ چەندێ كر» د كۆمبوونەكێدا كو قونسلێ رووسیا ل هەرێما كوردستانێ بەرهەڤبوو، رەوشا پێكهاتەیان ب تایبەتی كریستیانان ل هەرێما كوردستانێ، هەڤبەندیێن كەنیسەیا ئۆرتۆدۆكسی یا رووسی ل گەل جڤاك و كەنیسەیێن كریستیان ل هەرێما كوردستانێ و ئیراقێ و هەڤبەندیێن رووسیا ل گەل ئیراقێ و هەرێما كوردستانێ، هاتنە گەنگەشەكرن».
هەر د بەیاننامەیا سەرۆكایەتییا هەرێما كوردستانێدا هاتیە» شاندێ ناڤبری كو ل حەفتییا بۆری بۆ پشكداریێ د كۆنفرانسێ كەنیسەیا رۆژهەلاتا ئاشۆری سەرەدانا هەولێرێ كربوو، خوەشحالییا خوە ب سەرەدانا خوە دیاركر، هەروەسا پێكڤەژیانا د ناڤبەرا پێكهاتەیێن ئایینی و نەتەوەیی ل هەرێما كوردستانێ بلند هەلسەنگاند و رێز و سوپاسی بۆ پاراستنا ماف و ئازادیێن وان دوپاتكر».
سەرۆكێ هەرێما كوردستانێ سەرەرای ب خێرهاتنێ و دەربڕینا خوەشحالیێ ب سەرەدانا وان ئەو سەرەدان ب «نیشانەكا گرنگ یا پشتەڤانیێ ل هەرێما كوردستانێ» هەژمارت. هەروەسا دوپاتكر، هەرێما كوردستانێ شانازیێ ب كەلتوورێ پێكڤەژیانێ و هەڤدوقەبوولكرنێ و لێبۆرینێ د ناڤبەرا پێكهاتەیاندا دكەت و هەردەم دێ پارێزەرا وی كەلتووری بیت.
دیدار و چاڤپێكەفتنێن شاندی ل گەل نوونەرێن پێكهاتەیێن ئایینی ل هەرێما كوردستانێ، قووناغێن هەڤبەندییا دیرۆكی یا هەرێما كوردستانێ ل گەل رووسیا، گرنگییا دانوستاندن و دیداران د ناڤبەرا پێكهاتەیێن ئایینی و نەتەوەیی دا و هەڤبەندیێن وان ل گەل دەرڤە، تەوەرەكێ دی یێ دیدارێ بوو.

ب نوونەرایەتییا سەرۆك بارزانی، هشیار زێباری پشكداری د رێوڕەسمێ زانكۆیا كاسولوكی دا ل هەولێرێ كر ب هەلكەفتا سالڤەگەرا 10 یا دامەزراندنا وێ و دەرچوونا خولا 2025 یا قوتابیێن مەسیحی و موسلمان و ئێزدی.
ل باژێرێ هەولێرێ، هشیار زێباری، ئەندامێ دەستەیا كارگێرییا مەكتەبا سیاسی یا پارتی دیموكراتی كوردستان، ب نوونەرایەتییا سەرۆك مەسعود بارزانی پشكداری كر د رێوڕەسمێ زانكۆیا كاسولوكی دا ل هەولێرێ ب هەلكەفتا سالڤەگەرا 10 یا دامەزراندنا وێ و دەرچوونا خولا 2025 یا قوتابیێن وێ زانكۆیێ كو پێكهاتبوون ژ قوتابیێن مەسیحی و موسلمان و ئێزدی.
هشیار زێباری ب ناڤێ سەرۆك بارزانی پەیاما پشتەڤانیێ ل زانكۆیا ناڤبری ل دۆر پێكڤەژیانێ ل هەرێما كوردستانێ بۆ بەرێز مەتڕان بەشار مەتی وەردە، سەرۆكێ دەستەیا بڕێڤەبرنا زانكۆیێ و بەرهەڤبوویان و زەلامێن ئایینێ مەسیحی و حكومی گەهاند.

دیدار/ دلۆڤان ئاكرەیی

رێڤەبەرێ راگەهاندنا پەرلەمانێ كوردستانێ دیاركر: ستافێ پەرلەمانێ كوردستانێ هەموو بەرهەڤی كرینە، بۆ بڕێڤەچوونا تەمامكارییا روونشتنا ئێكێ یا پەرلەمانێ كوردستانێ كۆ دهێتە پێشبینیكرن ل دو حەفتیێن بهێتدا دەست ب روونشتنێن خوە بكەت.
سامان ئەحمەد، رێڤەبەرێ راگەهاندنا پەرلەمانێ كوردستانێ بۆ رۆژنامەیا (ئەڤرۆ) گۆت» هەر دەمێ ئالیێن سیاسی هەڤ بكەن، ب رێیا دیوانا پەرلەمانێ كوردستانێ ڤە دێ بەرهەڤی ب دووماهی هێن بۆ بڕێڤەچوونا روونشتنا پەرلەمانێ كوردستانێ و د نوكەدا دەمەكێ گەلەك كێم مایە و د رۆژێن بهێتدا دێ هەموو بەرهەڤی ب دووماهی هێن»
سەبارەت ب روونشتنا ئێكێ یا پەرلەمانێ كوردستانێ د ڤێ خولێدا، ئاماژە ب وێ چەندێ كر» روونشتنا ئێكێ یا خولا شەشێ یا پەرلەمانێ كوردستانێ ب ڤەكری مایە و روونشتنا بهێت دێ تەمامكەریا هەمان روونشتنێ بیت و دەستەیا سەرۆكاتیا پەرلەمانێ كوردستانێ دێ هێتە دیاركرن».
رێڤەبەرێ راگەهاندنا پەرلەمانێ كوردستانێ ئاشكرا كر» ل دووڤ مادەیێ 48 ژ قانوونا هەلبژارتنێن پەرلەمانێ كوردستانێ د ئێكەم روونشتنا خوە دا ب دەنگدانەكا نهێنی و راستەوخوە، سەرۆك و جێگرێ سەرۆكی و سكرتێرێ پەرلەمانی ب زۆرینەیا رەهایا دەنگێن ئەندامێن پەرلەمانێ كوردستانێ دێ هەلدبژێریت» هەروەسا پێشبینی كر «وەكۆ گاڤا ئێكێ د ڤان دو حەفتیاندا پەرلەمانێ هەرێما كوردستانێ دەست ب كار و چالاكیێن خوە بكەت و پاشی گاڤێن پێكئینانا حوكمەتا هەرێما كوردستانێ دێ هێنە تەمامكرن».

هاریكارێ بەرپرسێ مەكتەبا رێكخستنا پارتی دیموكراتی كوردستان ل پارێزگەها نەینەوا راگەهاند: ل رۆژا سێشەمبی 30/9/2025 بارەگەهێ پارتی ل قەزا تەلەعفەر هاتە ڤەكرن. هەروەسا ئاماژە ب وێ چەندێ ژی كر، ب چەند قووناغان بارەگەهێن دی ژی ل سنوورێ نەینەوا دێ هێنە ڤەكرن.
مەحموود ئێزدی، هاریكارێ بەرپرسێ مەكتەبا رێكخستنا پارتی دیموكراتی كوردستان ل پارێزگەها نەینەوا گوت
« ل قەزا تەلەعفەر سەر ب پارێزگەها نەینەوا ڤە ب بەرهەڤبوونا بەرپرسێ مەكتەبا رێكخستنا نەینەوا و هەژمارەكا بەرپرسێن پارتییا مە و خەلكێ باژێرێ تەلەعفەر، بارەگەهێ لژنەیا ناوچا پارتی ل تەلەعفەر هاتە ڤەكرن، پێشتر بارەگەهێ پارتی ل تەلەعفەر هەبوو، بەلێ ژ ئەگەرێ رەوشا دەڤەرێ و روودانێن سالێن بۆری بارەگەهێ مە ل وی باژێری نەمابوو، لەوما دوبارە پارتی ب فەرمی بارەگەهێ خوە ل وێ قەزایێ ڤەكر».
مەحموود ئێزدی گوت ژی» تەلەعفەر هەم باژێرەكێ مەزنە و هەم دەڤەرەكا گرنگە ل نەینەوا، مە ژی وەك پارتی، رێكخستن و جەماوەرێ خوە ل قەزا تەلەعفەر هەیە، لەوما ل سەر داخوازا خەلكی مە بارەگەهێ خوە ڤەكر و دەمەكە وەك پارتی بەرهەڤییان بۆ ڤەكرنا بارەگەهی ل تەلەعفەر دكەین».
هاریكارێ بەرپرسێ مەكتەبا رێكخستنا پارتی دیموكراتی كوردستان ل پارێزگەها نەینەوا ئاماژە ب وێ چەندێ ژی كر» پێدڤییە ل هەموو جهەكی بەرهەڤ بین و مە بارەگەه هەبیت، پلان هەیە ل هەموو دەڤەرێن پارێزگەها نەینەوا بارەگەهێن پارتی ڤەكەین، ل گەل ئیدارەیا پارێزگەها نەینەوا ژی د بزاڤان داینە بۆ وێ چەندێ جهێن پێشتر بارەگەهێن مە لێ هەین، دوبارە بهێنە ڤەكرن، بەلێ دێ ب چەند قووناغان بیت و وەك مەكتەبا رێكخستنا پارتی كاری ل سەر دكەین».

سالار محەمەد دۆسكی:

زێدو باعەدری، چاڤدێرێ‌ سیاسی بۆ رۆژنامەیا (ئەڤرۆ) راگەهاند: حوكمەتا بەغدا چاڤ ب ئاڤەدانی و پێشكەفتنا كوردستانێ‌ نارابیت و نەڤێت كوردستان ئاڤەدان و پێشكەڤیت، عەرەبان چ زمان نەزانینە ل گەل مە كوردان و بتنێ‌ زمانێ‌ شەڕی نەبیت و دەمێ‌ دهێن ڤێ‌ ئازادیێ و دیموكراسیێ و ئازادییا رۆژنامەڤانی و ئاڤەدانیێ‌ دبینن و ئەو هەر ب چاڤێ‌ نزم دنێرنە خەلكێ‌ كوردستانێ‌ و ئاستەنگ بۆ هەموو كابینەیێن حوكمەتا هەرێما كوردستانێ‌ دروستكرینە بەلێ‌ كابینەیا نەهێ‌ یا خوراگربوو و كابینەیا ئاڤاكرنێ‌ بوو.
زێدو باعەدری، گوت ژی» تێكهەلیێن كەڤنار د ناڤبەرا لالشێ‌ و سەركردایەتییا كوردستانێ‌ هەنە و ئەڤە ژی بۆ سەردەمێ‌ بابە چاویشێ‌ پێشتر ڤەدگەریت ل گەل ئەنوەر مایی و دروستكرنا شانێن رێكخستنا پارتا هیوا ڤەدگەرن و ئێكەمین شانا پارتێن كوردی ل لالەشێ‌ دورست بوویە، ل دەستپێكا شورەشا ئیلونێ‌ ل سالا1962 (بارزانیێ‌ نەمر) ل گەل 500 پێشمەرگان سەرەدانا لالەشێ‌ كر و ل بەیانا 11ی ئادارێ‌ ژی سەرۆك (مەسعود بارزانی) ل گەل رەحمەتی (ئدریس بارزانی) سەرەدانا لالەشێ‌ كر، دیسا 29/9/1991 سەرۆك بارزانی ل گەل میرێ‌ ئێزدییان ل وی سەردەمی (خەیری بەگ) هاتنە لالشێ‌ و خەلكێ‌ دەڤەرێ‌ پێشوازی لێكر و پشتی دامەزراندنا پەرلەمان و حوكمەتا هەرێما كوردستانێ‌ نێچیرڤان بارزانی چەندین جاران سەرەدانا ڤی جهێ‌ پیرۆز كریە و خزمەتگوزاری پێشكێشكرینە، دیسا هەر ل هەمان سالان سەرۆك بارزانی هاتیە دەڤەرێ‌ وگوهدارییا خەلكی كریە، جارا دویێ‌ یە ژی مەسرور بارزانی، سەرۆكێ‌ حوكمەتا هەرێمێ سەرەدانا لالەشێ‌ دكەت و ئەڤ جارە پرۆژەیەكێ‌ هەرە ستراتیژی ل دەڤەرێ‌ ڤەكر».
زێدو باعەدری، ئاماژە ب وێ‌ چەندێ‌ ژی كر كو پشتەڤانی ل گەشتیارییا ئاینی گەلەك یا گرنگە و ئەف خزمەتگوزاریێن ل جهێن ئایینی دهێنەكرن جهێ‌ سەرفەرازییا خەلكێ‌ كوردستانێ‌ و دەڤەرێیە».
باعەدری پتر گوت» ژ حوكمەت و پارتێن سیاسی و پەرلەمانێ‌ دخوازین لەزێ د پێكئینانا كابینەیا دەهێ‌ بكەن و ببیتە تەمامكەرا كابینەیا نەهێ‌ و كەسانێن بسپور و ئەكادیمی رۆلێ‌ خوە د حوكمەتا داهاتی دا ببینن دا تەمامكەرێن ئاڤەدانكرنێ‌ بن و مافێ‌ ئافرەتێ‌ و زارۆك و پێكهاتەیێن كوردستانێ‌ زێدەتر گرنگی پێ‌ بهێتەدان چونكە مللەت ب ئەڤان تەخا دهێنە نیاسین».
ل دووماهیێ گوت» هیڤیدارێن ئەم ئێزدی بێ بەهر نەبین ژ كابینەیا دەهێ یا حوكمەتا هەرێما كوردستانێ».

سەرۆك مەسعود بارزانی، پێشوازی ل شاندەكێ كەنیسەیا ئەرتۆدۆكسی یا رووسی ب سەرۆكاتییا مەتڕان ئەنتۆنی، بەرپرسێ هەڤبەندیێن دەرڤە یێن كەنیسەیا ئەرتۆدۆكسی یا رووسی كر، شاندێ ناڤبری رۆلێ سەرۆك بارزانی د بهێزكرنا پێكڤەژیانێ، بلند هەلسەنگاند.
دوهی سێشەمبی 30/9/2025، سەرۆك مەسعود بارزانی، پێشوازی ل شاندەكێ كەنیسەیا ئەرتۆدۆكسی یا رووسی ب سەرۆكاتییا مەتڕان ئەنتۆنی، بەرپرسێ هەڤبەندیێن دەرڤە یێن كەنیسەیا ئەرتۆدۆكسی یا رووسی كر.
د دیدارێدا ماكسیم رۆبین، قۆنسلێ گشتیێ رووسیا ل هەولێرێ بەرهەڤبوو، شاندێ كەنیسەیا ئەرتۆدۆكسی یا رووسی سەرەرای دەربڕینا خوەشحالییا خوە بۆ سەرەدانا كوردستانێ، رێز بۆ رۆلێ سەرۆك بارزانی هەبوو د بهێزكرنا پێكڤەژیانێ و ئەو ئاشتی و تەباییا د ناڤبەرا پێكهاتەیێن ئایینی و نەتەوەیی یێن كوردستانێدا هەی.
شاندێ ناڤیری ئەوژی دوپاتكر كو ب گرنگییەكا مەزن دنێرنە هەرێما كوردستانێ كو ل دەڤەرەكێیە دهێتە هەژمارتن ژێدەرێ مرۆڤایەتیێ و باوەرییەكا كوور ب پێكڤەژیانێ هەیە.
هەروەسا شاندێ مێهڤان خوازیاریێن وێ چەندێ بوون هەڤبەندیێن وی ل گەل هەموو ناڤەندێن ئایینی یێن كوردستانێ بەردەوام بن وپێشڤە بچن.