سەرۆكێ هەرێما كوردستانێ و وەزیرێ دەرڤەیێ فرەنسا پەیوەندییەكا تەلەفۆنی ئەنجامدا و تێدا وەزیرێ فرەنسی هەڤسۆزی و پشتەڤانییا وەلاتێ خوە بۆ هەرێما كوردستانێ دوپاتكر.
سەرۆكایەتییا هەرێما كوردستانێ ڕاگەهاند، نێچیرڤان بارزانی، سەرۆكێ هەرێما كوردستانێ و ژۆن نوێل بارۆ، وەزیرێ دەرڤەیێ فرەنسا پەیوەندییەكا تەلەفۆنی ئەنجامدا.
د وێ پەیوەندییا تەلەفۆنیدا، وەكو د بەیاننامەیا سەرۆكایەتییا هەرێما كوردستانێ دا هاتی» وەزیرێ دەرڤەیێ فرەنسا هەڤسۆزی و پشتەڤانییا وەلاتێ خوە بۆ هەرێما كوردستانێ دوپاتكر ل بەرانبەر وان هێرشێن ل سەر هەرێما كوردستانێ دهێنە كرن».
سەرۆكایەتییا هەرێمێ دیاركر ژی»هەردو ئالییان پێشهاتێن بەردەوام یێن دەڤەرێ و ئاسۆیێن چارەسەركرنا كێشەیان گەنگەشەكر و هەڤڕابوون ل سەر بەردەوامییا هەماهەنگییا نێزیك د ناڤبەرا واندا بۆ پاراستنا ئارامیێ».
ژ ئالیێ خوەڤە، نێچیرڤان بارزانی سوپاسییا پشتەڤانییا بەردەوام یا فرەنسا بۆ هەرێما كوردستانێ كر و دوپاتی ل گرنگییا ڕۆلێ فرەنسا و جڤاكا نێڤدەولەتی د كێمكرنا ئالۆزییان و دوورئێخستنا دەڤەرێ ژ مەترسیێن شەڕی كر.

د پەیوەندییەكا تەلەفۆنیدا د ناڤبەرا نێچیرڤان بارزانی، سەرۆكێ هەرێما كوردستانێ و محەمەد شیاع سوودانی، سەرۆك وەزیرێن ئیراقێ دوماهی پێشهاتێن دەڤەرێ و دەرئەنجامێن وێ هاتنە گەنگەشەكرن.
هەردو ئالییان ڕەتكرنا وان هێرشان دوپاتكر كو ل سەر باژێڕێن ئیراقێ و هەرێما كوردستانێ دهێنە كرن و دوپاتكر كو نابیت ئاخا ئیراقێ ببیتە ژێدەرێ گەفێ یان هێرشێ ل سەر وەلاتێن دەوروبەر. هەروەسا پشتەڤانییا خوە بۆ هەموو وان پێنگاڤان نیشاندا كو دبنە جهێ ب هێزكرنا ئاشتیێ و ئارامیێ ل دەڤەرێ.
هەردو ئالییان داكۆكی ل سەر پێدڤییا ڕوو ب ڕووبوونا ئالۆزییان ب ڕێكا ئێكگرتنا هەلوەست و گوتارێن هێزێن نیشتمانی كر ب شێوەیەكی كو سەروەرییا وەلاتی و ئاسایشا نیشتمانی بهێنە پاراستن.
ژ ئالیێ خوەڤە، نێچیرڤان بارزانی دوپاتكر كو هەرێما كوردستانێ وەك هەردەم دێ فاكتەرێ ئارامیێ بیت و پشتەڤانیێ ل هەموو بزاڤێن نیشتمانی دكەت بۆ دوورئێخستنا ئیراقێ ژ دەرئەنجامێن نەرێنی یێن ململانێ ل دەڤەرێ.

سەرۆكێ هەرێما كوردستانێ و وەزیرێ دەرڤەیێ ئیرانێ دوماهی پێشهاتێن دەڤەرێ گەنگەشەكر و دوپاتی ل گرنگییا پاراستنا ئارامیێ كر.
سەرۆكاتییا هەرێما كوردستانێ بەلاڤكر» د پەیوەندییەكا تەلەفۆنیدا د ناڤبەرا نێچیرڤان بارزانی، سەرۆكێ هەرێما كوردستانێ و عەباس ئیراقچی، وەزیرێ دەرڤەیێ كۆمارا ئیسلامییا ئیرانێ دا، سەرەرای باسكرنا هەڤبەندیێن كۆمارا ئیسلامییا ئیرانێ ل گەل هەرێما كوردستانێ، دوماهی پێشهاتێن دەڤەرێ و دەرئەنجامێن وێ هاتنە گەنگەشەكرن، هەردو ئالییان دوپاتی ل گرنگییا پاراستنا ئارامیێ كر».
سەرۆكاتییا هەرێمێ دیاركر ژی» هەردو ئالییان داكۆكی ل پاراستنا ئاسایشا سینۆران كر، ب شێوەیەكی كو ڕێگری ل هەر بزاڤەكێ بهێتە كرن بۆ تێكدانا ئارامییا دەڤەرێ و زێدەتر ئالۆزكرنا ڕەوشێ».
نێچیرڤان بارزانی دوپاتكر كو هەرێما كوردستانێ نابیتە پشكەك ژ ململانێیان ووەك هەردەم دێ فاكتەرێ ئارامیێ بیت، هەروەسا پشتەڤانی ل بزاڤێن دیپلۆماسی دكەت بۆ ئارامكرنا گرژییان و دوورئێخستنا مەترسیێن شەڕی ژ گەلێن دەڤەرێ.
نێچیرڤان بارزانی دوپاتی ژی ل خواستا هەرێما كوردستانێ كر بۆ پاراستن و پێشڤەبرنا هەڤبەندیێن دۆستانە ل گەل كۆمارا ئیسلامییا ئیرانێ.
تەوەرەكێ دی یێ پەیوەندییا تەلەفۆنی تایبەت بوو ب پرسێن ئەمنی، هەردو ئالییان باس ل ب هێزكرنا هاریكارییان كر د چارچۆڤەیێ ڕێككەفتنا ئەمنی د ناڤبەرا ئیراقێ و ئیرانێدا، ب تایبەت ل دۆر پاراستنا سینۆران و ڕێگریكرنێ ل هەر ئالییەكێ سیێ بۆ بكارئینانا ئاخا وێ ب مەبەستا تێكدانا ئاسایشا دەڤەرێ.

نێچیرڤان بارزانی، سەرۆكێ هەرێما كوردستانێ و شێخ محەمەد بن زاید ئال نەهیان، سەرۆكێ دەولەتا ئیماراتێ پەیوەندییەكا تەلەفۆنی ئەنجامدا.
د وێ پەیوەندییا تەلەفۆنیدا، دوماهی ئالۆزیێن دەڤەرێ و ئەنجامێن مەترسیدارێن شەڕی هاتنە گەنگەشەكرن و هەردو ئالییان دلگرانییا خوە بەرامبەر شەڕی دیاركر و دوپاتی ل گرنگییا ب لەزكرنا بزاڤێن دیپلۆماسی كر بۆ ئارامكرنا ڕەوشی و پاراستنا ئارامیێ ل دەڤەرێ.
د تەوەرەكێ دی دا، هەڤبەندیێن ئیماراتێ ل گەل ئیراقێ و هەرێما كوردستانێ و پێشڤەبرنا هاریكارییا هەڤپشك د وارێن جودا جودا دا هاتنە باسكرن، هەردو ئالییان داكۆكی ل زێدەتر ب هێزكرنا هەڤبەندیێن دیرۆكی و دۆستانە د ناڤبەرا واندا كر.

مەسرور بارزانی، سەرۆكێ حوكمەتا هەرێما كوردستانێ و هاكان فیدان، وەزیرێ دەرڤەیێ توركیا پەیوەندییەكا تەلەفۆنی ئەنجامدا.
حوكمەتا هەرێما كوردستانێ د بەیاننامەیەكێدا ڕاگەهاند» د وێ پەیوەندیێدا دانوستاندن ل دۆر ڕەوشا گشتییا ئیراقێ و هەرێما كوردستانێ و دوماهی پێشهاتێن شەڕ و ئالۆزیێن دەڤەرێ هاتە كرن».
حوكمەتا هەرێما كوردستانێ د بەیاننامەیا خوەدا دیاركر ژی» هەردو ئالی هەڤڕابوون ل سەر گرنگییا پاراستنا ئاشتی و ئارامییا دەڤەرێ».

مەسرور بارزانی، سەرۆكێ حوكمەتا هەرێما كوردستانێ و حەمەد بن بن عیسا ئال خەلیفە، شاهێ بەحرێنێ د پەیوەندییەكا تەلەفۆنیدا ڕەوشا گشتییا دەڤەرێ و ب تایبەت بەحرێنێ وئیراقێ و هەرێما كوردستانێ و دوماهی پێشهاتێن شەڕ و ئالۆزییان گەنگەشكر.
حوكمەتا هەرێما كوردستانێ سەبارەت وێ پەیوەندییا تەلەفۆنی د بەیاننامەیەكێدا ڕاگەهاند» هەردو ئالییان دلگرانییا خوە ژ هێرش و شەڕ و ئالۆزییان ل دەڤەرێ دیاركر».
حوكمەتا هەرێمێ د بەیاننامەیا خوە دا دیاركر ژی» سەرۆكێ حوكمەتا هەرێمێ و شاهێ بەحرێنێ دوپاتی ل پێدڤییا پێشڤەبرنا هاریكاریێ و هەماهەنگیێ د ناڤبەرا هەردو ئالییاندا كر ژ پێخەمەت پاراستنا ئاشتی و ئارامییا دەڤەرێ».

پەیڤدارێ حوكمەتا هەرێما كوردستانێ ڕاگەهاند، ئەو ڕاپۆرتێن باس ل پڕچەككرنا هێزێن كوردی بۆ ناڤ ئیرانێ دكەن، دوورن ژ ڕاستیێ.
پێشەوا هەورامی، پەیڤدارێ حوكمەتا هەرێما كوردستانێ د بەیاننامەیەكێدا هەموو ئەو دەنگوباسە ڕەتكرن یێن ئاماژەكرین كو هەرێما كوردستانێ پشكەك بیت ژ پلانەكێ بۆ پڕچەككرن و هنارتنا هێزێن كوردی یێن ئۆپۆزسیۆن بۆناڤ ئاخا ئیرانێ و گوت» ئەو جۆرە ڕاپۆرتە ب مەبەست دهێنە بەلاڤكرن».
پێشەوا هەورامی دوپاتكر كو حوكمەتا هەرێما كوردستانێ و پارتێن سیاسی یێن هەرێما كوردستانێ پشكەك نینن ژ هیچ هەوەكێ بۆ بەرفرەهكرنا شەڕ و ئالۆزییان ل دەڤەرێ.
سەبارەت ب هەلوەستێ هەرێما كوردستانێ ل سەر ڕەوشا دەڤەرێ، پەیڤدارێ حوكمەتا هەرێما كوردستانێ ڕۆهنكر» بەرۆڤاژی ئەم داخواز ئاشتی و ئارامییا دەڤەرێ دكەین».
د پشكەكا دی یا بەیاننامەیێدا، پەیڤدارێ حوكمەتا هەرێما كوردستانێ ئەو هێرشێن ڕۆژانە ل سەر هەرێما كوردستانێ دهێنە كرن پرۆتەستۆ كرن و ب هێرشێن ترسناك هەژمارتن.
پێشەوا هەورامانی داخواز ژ حوكمەتا ئیراقا فیدرال و جڤاكا نێڤدەولەتی كر، هێرشێن سەر هەرێما كوردستانێ دهێنە كرن ڕابگرن و كاری بۆ پاراستنا ئاخ و خەلكێ هەرێما كوردستانێ و دەڤەرێ بكەن.

ئیلهام ئەحمەد بەرپرسا پەیوەندیێن دەرڤە یا رێڤەبەریا خوەسەر یا رۆژئاڤایێ کوردستانێ دیار کر، هەتا سیستەمێ سووریێ نەبیتە فیدرالی ئالۆزیێن هەی ژی چارەسەر نابن، هێشتا رێککەفتنا هەسەدێ و شامێ ب تەمامی نەهاتیە بجهئینان و دڤێت شام رێزی ل ئیرادەیا گەلێ کورد بگریت، ل ئالیێ دی دورزی و عەلەوی و پێکهاتەیێن دی یێن ل سووریێ ژی داخوازا مافێن خوە دکەن، پێکهاتەیێن ل سووریێ نها ل دژی سیستەمەک ناڤەندی نە و دڤێت سیستەمێ سووریێ ببیتە فیدرالی، چونکی سووریێ تنێ یا عەرەبان نینە، بەلکو یا هەموو خەلکێ سووریێ یە و دڤێت هەموو پێکهاتەیێن ل سووریێ دژین د برێڤەبرنا وەلاتی دا پشکدار بن.
ناڤهاتیێ ئەو یەک ژی دیار کر، بەری نها ژی وان گەلەک جاران دیار کرینە کو دڤێت سیستەمێ سووریێ ببیتە سیستەمەک نە ناڤەندی، چونکی رەوشا چەند مەهێن بۆری سەلماندیە کو کەس نەشێت وەکو بەری نها حوکمێ ل هەموو سووریێ بکەت و گۆت: (دڤێت ئەمریکا و وەلاتێن ئێکەتیا ئۆرۆپا ژی هاریکار بن دا شام یا نەچار بیت دەست ژ زۆرداریێ بەردەت و رێزێ ل ئیرادەیا هەموو نەتەوە و پێکهاتەیێن ل سووریێ بگریت، ژ بەر ڤێ یەکێ ژی وەکو رێڤەبەریا خوەسەر ئەم دبێژین فیدرالی باشترین چارەسەریە بۆ رەوشا نها یا ئالۆز ل سووریێ و دڤێت هەموو وەلاتێن دی ژی هاریکار بن).

سەرۆكێ هەرێما كوردستانێ ل گەل وەزیرێ دەولەتێ بۆ كاروبارێن دەرڤە یێ ئەلمانی و شاندێ د گەلدا كۆمبوو. وەزیرێ ئەلمانی و شاندی دوپاتكر، وەلاتێ وان ب گرنگی ڤە دنێڕیتە ئارامییا ئیراقێ و هەرێما كوردستانێ.
ل ڕۆژا چارشەمبی 25/2/2026، نێچیرڤان بارزانی، سەرۆكێ هەرێما كوردستانێ پێشوازی جێزا ئەندریاس ڤۆنگایەر، وەزیرێ دەولەتێ بۆ كاروبارێن دەرڤە یێ ئەلمانی و شاندەكێ د گەلدا كر.
سەرۆكایەتییا هەرێما كوردستانێ بەلاڤكر» د كۆمبوونەكێدا هەردو ئالییان، پێشڤەبرنا هەڤبەندیێن ئەلمانیا ل گەل ئیراقێ و هەرێما كوردستانێ، دوماهی پێشهاتێن ڕەوشا سیاسییا ئیراقێ و هەرێما كوردستانێ و هەڤبەندیێن هەولێرێ- بەغدایێ و ڕەوشا پەكەكێ، هاتنە گەنگەشەكرن».
سەرۆكایەتییا هەرێمێ دیاركر ژی» شاندێ ئەلمانی دوپاتكر، ئەلمانیا ب گرنگی ڤە دنێڕیتە ئارامییا ئیراقێ و هەرێما كوردستانێ و خواستا وەلاتێ خوە بۆ بەردەوامییا هاریكارییا هەڤپشك د وارێن جودا جودا دا، دیاركر».
ژ ئالیێ خوەڤە نێچیرڤان بارزانی سوپاسییا هاریكاری و پشتەڤانیێن ئەلمانیایێ بۆ هەرێما كوردستانێ د هەموو واراندا كر، هەروەسا دوپاتی ل گرنگییا چارەسەركرنا ئاشتییانەیا كێشەیان و پاراستنا ئارامییا ناڤچەیێ كر.
گەڤ و مەترسیێن داعشێ، ڕەوشا سووریێ و چەند پرسێن جهێ گرنگییا هەردو ئالییان، تەوەرەكێ دی یێ كۆمبوونێ بوو كو بالیۆزێ ئەلمانیا ل ئیراقێ و قونسلێ گشتیێ ئەلمانیا ل هەرێما كوردستانێ بەرهەڤ بوون.

سەرۆكێ حوكمەتا هەرێما كوردستانێ ل گەل بریكارێ وەزارەتا دەرڤەیا ئەلمانیا كۆمبوو و هەردو ئالییان دوپاتی ل پێشڤەبرنا هاریكارییان بۆ ڕوو ب ڕووبوونا داعشێ كر.
ل ڕۆژا چارشەمبی 25/2/2026، مەسرور بارزانی، سەرۆكێ حوكمەتا هەرێما كوردستانێ پێشوازی ل جیزا ئەندریاس ڤۆنگەیر، بریكارێ وەزارەتا دەرڤەیا ئەلمانیا و شاندەكێ د گەلدا كر.
حوكمەتا هەرێما كوردستانێ د بەیاننامەیەكێدا بەلاڤكر» د كۆمبوونەكێدا كو دانیال كرێبەر، بالیۆزێ ئەلمانیا ل ئیراقێ بەرهەڤبووی، هەردو ئالی هەڤڕابوون ل سەر گرنگییا بهێزكرنا هەڤبەندیێن دوقۆلی».
سەرۆكێ حوكمەتا هەرێما كوردستانێ سوپاسییا پشتەڤانی و هاریكاریێن ئەلمانیایێ بۆ هەرێما كوردستانێ كر و دوپاتی ل پێشئێخستنا هەڤبەندییان كر.
تەورەكێ سەرەكیێ كۆمبوونێ تایبەت بوو ب پرسا تیرۆرێ، هەردو ئالییان دوپاتی ل پێدڤییا پێشڤەبرنا هاریكاری و هەماهەنگییا جڤاكا نێڤدەولەتی كر بۆ ڕوو ب ڕووبوونا گەف و مەترسیێن تیرۆرستێن داعشێ ل ئیراقێ و سووریێ.
د پشكەكا دی یا دیدارێدا، ڕەوشا گشتییا ئیراقێ و دەڤەرێ، هەروەسا بزاڤ و دانوستاندنێن تایبەت ب هەلبژارتنا سەرۆككۆماری و پێكئینانا حوكمەتا فیدرال و حوكمەتا هەرێما كوردستانێ هاتنە گەنگەشەكرن.