بەری حەفت سالان كابینەیا نەهێ یا حوكمەتا هەرێما كوردستانێ ب سەرۆكاتییا مەسرور بارزانی پشتی كو پێكهاتەیا حوكمەتێ و كارنامەیا وێ ژ ئالیێ پەرلەمانێ كوردستانێ ڤە هاتییە پەسەندكرن دەست ب كار بوو، د وی دەمی دا سەرۆكێ حوكمەتێ راگەهاند كو ئەو و حوكمەتا خۆ دێ پێگیر و بەرپرسیار بن بەرامبەر گەلێ كوردستانێ ب ڤێ چەندێ كو ب هەموو شیانان ڤە و ب بەرپرسانە كار بكەن ژ پێخەمەت بجهئینانا هەموو خالێن كارنامەیا حوكمەتێ.
عارف روشدی، شیرەتكارێ مەكتەبا سیاسیا پارتی دیموكراتی كوردستان ل دۆر رۆلێ كابینەیا نەهێ بۆ رۆژنامەیا (ئەڤرۆ) گۆت» د راستی دا سەرەڕای ئالۆزی و رێگرییان سەرۆكێ حوكمەتا هەرێمێ پشتی بەلاڤكرنا ئەركێن هەر وەزارەتەكێ وەك چەوا د كارنامەیێ دا هاتییە ب راستگۆیی سەركردایەتی و سەرپەرشتییا پرۆسەیا حوكمڕانییەكا پاقژ كر و دكەت وبەری هەر پێنگاڤەكا دی ب یاسا و رێنما و پلانان وەك چەوا د چارچۆڤەیا كارنامەیێ دا دووپات ل سەر هاتبوو كرن رێگری ل گەندەلیێ ب هەموو شێوەیێن وێ ڤە گرت د دەمەكێ دا كو باش دزانی و چەندین جاران ژی ئاماژە پێ دكر كو د ئەنجامێ ڤی ئەركی دا یێ پشتڕاستە دێ رووبڕووی ئاستەنگان بیت ژ ئالیێ وان كەس و ئالیێن بەرژەوەندیێن وان تێك دچن».
پتر گۆت»ژ بەر ڤێ چەندێ ئالیێن زیانڤەكەفتی ب هەموو شێوەیان دەست كر ب داڕشتنا پلان و پیلانان كر ب مەرەما دروستكرنا ئاستەنگان و راگرتنا كاركرنا نیشتیمانپەروەرانە یا سەرۆكێ حوكمەتا هەرێمێ و كابینەیا وی و ئەڤ پلان و پیلانە ل سەر ئاستێ هەرێما كوردستانێ و حوكمەتا فیدرالا ئیراقێ هاتنە داڕشتن. ل سەر ئاستێ هەرێما كوردستانێ رێگری ل جهئینانا یاسا و فەرمان و پرۆژەیێن خزمەتگوزاری یێن حوكمەتێ وەك پێدڤی ل هندەك دەڤەران كرن و ل سەر ئاستێ حوكمەتا فیدرال ژی هاریكار نەبوون د چارەسەركرنا كێشە و ئاریشەیێن دروستكری دژی بەرژەوەندیێن گەلێ مە دا بەلكو سەرەڕای نەدادپەروەری و زۆردارییا دامودەزگەهێن بەغدایێ بەردەوام لایەنگری دكرن یان ژی بێدەنگی هەلدەبژارت، بەلێ حوكمەتا هەرێما كوردستانێ ژ بەر كو بەرهەمێ خەباتا نیشتیمانپەروەرانە یا گەلێ مە یە ب سەرۆكاتییا مەسرور بارزانی و پشتەڤانییا پترییا هەرە مەزنا تەخ و چینێن خەلكێ كوردستانێ و نێچیرڤان بارزانی، سەرۆكێ هەرێما كوردستانێ و پارتی دیموكراتی كوردستان پەرە ب ئەركێن خۆ دا و شییا ل سەر پترییا ئالۆزیان زال بیت و خۆڕاگرانە بەردەوامیێ بدەتە كاروانێ ئاڤەدانیێ و پاراستنا خواست و مافێن رەوا یێن گەلێ مە».

جێگرێ سەرۆكێ جڤاتا نوونەرێن ئیراقێ راگەهاند كو ل حەفتییا بۆری نڤیسارەكا فەرمی ئاراستەی جڤاتا وەزیرێن ئیراقێ كریە ب مەرەما ب هەمیشەییكرنا فەرمانبەرێن گرێبەست ل هەرێما كوردستانێ.
فەرهاد ئەترووشی، جێگرێ سەرۆكێ جڤاتا نوونەرێن ئیراقێ گۆت» نێزیكی 70 هزار فەرمانبەرێن گرێبەست ل هەرێما كوردستانێ هەنە كو د كەرتێن جودا وەك ساخلەمی و پەروەردێ و سێكتەرێن دی دا خزمەت دكەن و مە د نڤیسارەكێدا داخواز كریە ئەو فەرمانبەرە بهێنە سەر میلاكێ هەمیشەیی ژبەر كو ئەڤە مافەكێ یاسایی یێ خۆ وانە و ل گەل بڕیارێن دادگەها فیدرال ژی دگونجیت».
ل دۆر ناڤەڕۆكا نڤیسارێ، جێگرێ سەرۆكێ جڤاتا نوونەرێن ئیراقێ ئاماژە ب وێ كر كو نڤیسار رەوانەی جڤاتا وەزیران كریە داكو گەنگەشە ل سەر بهێتە كرن ژ بلی پرسا فەرمانبەرێن گرێبەست، فەرهاد ئەترووشی باسی دۆسێیەكا دی یا گرێدای ب مامۆستایێن زانكۆ و فەرمانبەرێن خانەنشینكری كر و گۆت» هەژمارەكا مەزن ژ مامۆستایێن زانكۆیێ و فەرمانبەران پشتی خانەنشینبوونا وان پاداشتێ دووماهییا خزمەتێ وەرنەگرتییە و بۆ ڤێ مەرەمێ ژی مە نڤیسارەكا دی بەرهەڤ كریە و دێ رەوانە كەین داكو ئەو مافێ دارایی یێ وان بهێتە خەرجكرن».
فەرهاد ئەترووشی رۆهنكر ژی وەك جێگرێ سەرۆكێ جڤاتا نوونەران دێ بەردەوام بیت ل سەر دووڤچوونا ڤان كێشەیان تاكو دگەهنە ئەنجامەكێ دووماهیێ و مافێ فەرمانبەر و خانەنشینێن هەرێما كوردستانێ ل بەغدا دهێتە بنەجهكرن.

بەرپرسێ پەیوەندیێن گشتی یێن پارتی دیموكراتی كوردستان رەخنەیێن توند ل وان پەرلەمانتاران دگریت یێن بایكۆتا روونشتنێن پەرلەمانی كرین و داخازێ ژێ دكەت ب زڤڕنە پەرلەمانی داكو رێكارێن پێكئینانا حوكمەتێ دەست پێ بكەن .
كەمال كەركووكی، بەرپرسێ پەیوەندیێن گشتی یێن پارتی دیموكراتی كوردستان د كۆنگرەیەكێ رۆژنامەڤانی دا راگەهاند» پشكەك ژ پەرلەمانتاران سووندا یاسایی خوارینە لێ نوكە دەوامێ ناكەن و ئەڤە بەرۆڤاژی سووندا وانە و د بەرامبەر خودێ و گەلێ كوردستانێ دا ب تاوانبار دهێنە هەژمارتن».
بەرپرسێ پەیوەندیێن گشتی یێن پارتی داخازێ ژ وان پەرلەمانتاران دكەت كو ئەو قەیدێن حزبێن وان ب سەر وان دا سەپاندین بشكێنن و ب زڤڕنە هۆلا پەرلەمانی بێ كو مەرج ل سەر وان بهێنە سەپاندن و ب گۆرەی خواست و باوەرییا خۆ كار بكەن.
سەبارەت ب پرۆسەیا سیاسی و پێكئینانا كابینەیا نوو یا حوكمەتا هەرێما كوردستانێ، كەركووكی دوپاتی ل وێ چەندێ كر كو نابیت پێنگاڤ بەرۆڤاژی ببن و عەرەبانە ل پێش هەسپان بهێنە دانان.
رۆهنكر ژی كو ئەركێ ئێكێ كاراكارنا پەرلەمانێ كوردستانێ یە و پاشی ب گۆری نەریتێ دیموكراسیێ جیهانی ئەو ئالیێ زۆرینەیا دەنگان ب دەستڤەئینای جارا ئێكێ دهێتە راسپاردن بۆ پێكئینانا حوكمەتێ و هەكە ب گۆرەی یاسایا سەرۆكاتییا هەرێما كوردستانێ ئەو ئالییە د دەمێ ئێك مەهێ دا نەشییا كابینەیێ پێك بینیت دێ ئالییەكێ دی هێتە راسپاردن.
ئەڤە د دەمەكێ دایە كو نێزیكی دو سالانە هەلبژارتنێن پەرلەمانێ كوردستانێ هاتینە كرن لێ تا نهۆ ئالیێن سیاسی ب تایبەت پارتی و ئێكەتی ل سەر پێكئینانا حوكمەتا نوو رێك نەكەفتینە و پارتی وەك سەركەفتییا ئێكێ دووپاتیێ ل سەر مافێ خۆ یێ دەستووری دكەت بۆ پێكئینانا كابینەیێ.

قونسلێ گشتی یێ توركیا ل هەرێما كوردستانێ دووپاتی ل بهێزییا پەیوەندیێن د ناڤبەرا هەولێرێ و ئەنقەرەیێ دا دكەت و رادگەهینیت، كۆمپانیاێن توركی رۆلەكێ سەرەكی د ئاڤەدانكرن و پێشكەفتنا هەرێما كوردستانێ دا هەبوویە.
ئێرمان تۆپچو، قونسلێ گشتی یێ توركیا ل هەرێما كوردستانێ، د داخۆیانییەكا رۆژنامەڤانیدا گۆت» پەیوەندیێن د ناڤبەرا توركیا و هەرێما كوردستانێ دا گشتگیرن و هەموو بوارێن ئابۆری، ئێمناهی، سیاسی و كولتووری ڤەدگرن، لێ گرنگترین رەهەندێ ڤان پەیوەندییان، ئەو پەیوەندییا مرۆڤی یە یا د ناڤبەرا هەردو ئالییان دا كو وەكریە بناغەیێ وێ گەلەك بهێز بیت».
تۆپچوی ئاماژە ب وێ دا كو توركیا ژ ئالیێ ئابۆری ڤە هەڤپشكەكا سەرەكی یێ هەرێما كوردستانێ یە و گۆت «كۆمپانیێن توركی د رێزا ئێكێ دا نە د ناڤ وەبەرهێنەرێن بیانی ل هەرێما كوردستانێ، هەروەسا زۆرترین هەژمارا كۆمپانیاێن بیانی ل هەرێمێ ژی، یێن توركی نە».
قونسلێ گشتی یێ توركیا باس ل دیرۆكا كاركرنا كۆمپانیێن وەلاتێ خۆ كر و گۆت «ئەڤ كۆمپانییە پشكەكا دانەبڕی یا وێ پێشكەفتن و سەركەفتنانە یا كو هەرێما كوردستانێ د دەمێ30 سالێن بۆری دا ب دەست ڤە ئیناین».
ئێرمان تۆپچوی دووپات كر كو وەلاتێ وی دخوازیت پەیوەندییان د هەموو بواران دا ل گەل هەرێما كوردستانێ پتر پێش بێخیت و ئاستێ هەڤكاریێن ئابۆری و بازرگانی بەرفرەهتر بكەت.

نێچیرڤان بارزانی سەرۆكێ هەرێما كوردستانێ پێشوازی ل نیكۆلۆ فۆنتانا، بالیۆزێ ئیتالیایێ ل ئیراقێ و شاندەكێ دگەلدا كر د وێ كۆمبوونێ دا سەرۆكێ هەرێما كوردستانێ سوپاس و پێزانینێن خۆ ئاراستەی سەرۆككۆمار و حوكمەت و گەلێ ئیتالیا كر بۆ پێبەخشینا مێدالیا رێزلێنانا سڤیل و ئەڤ پێنگاڤە وەك نیشانا دۆستینییا راستگۆیانە و پێشئێخستنا پەیوەندیێن هەردوو ئالییان هەلسەنگاند.
هەردوو ئالییان دوپاتی ل سەر پێشئێخستنا پتر یا پەیوەندیێن ئیراقێ و هەرێما كوردستانێ ل گەل وەلاتێ ئیتالیایێ كر و بیروڕا ل دۆر چەوانییا بەرفرەهكرنا هەڤكاریێن هەڤپشك د بوارێن جودا جودا دا لێكگۆهارتن. تەوەرەكێ دی یێ كۆمبوونێ كو تایبەت بوو ب رەوشا ناڤخۆ یا هەرێمێ و ئەنجامێن سەرەدانا حەفتییا بۆری یا نێچیرڤان بارزانی بۆ ئیرانێ و دیدارێن وی ل تەهرانێ هەروەسا دووماهی پێشهاتێن دەڤەرێ و چەند پرسێن جهێ گرنگییا هەڤپشك هاتنە گەنگەشەكرن.

نێچیرڤان بارزانی سەرۆكێ هەرێما كوردستانێ ب هەلكەفتا ب دووماهیهاتنا ئەركێ وی پێشوازی ل (پاتریك دۆرێل) بالیۆزێ فەرەنسا ل ئیراقێ كر د دیدارەكێ دا سەرۆكێ هەرێما كوردستانێ سوپاسییا بالیۆزێ فەرەنسا كر بۆ بزاڤ و كارێن وی د پێناڤی پێشئێخستنا پەیوەندیێن فەرەنسا ل گەل ئیراقێ و هەرێما كوردستانێ و هیڤییا سەركەفتنێ د ئەركێ وی یێ داهاتی دا بۆ خواست.
ژ ئالیێ خۆ ڤە بالیۆزێ فەرەنسا سوپاسییا نێچیرڤان بارزانی و ئالیێن پەیوەندیدارێن هەرێما كوردستانێ كر كو هەردەم هاریكار بوون بۆ سەرئێخستنا ئەركێ وی هەروەسا دووپاتی ل سەر خواستا وەلاتێ خۆ بۆ پێشئێخستنا پتر یا پەیوەندییان و بەرفرەهكرنا هەڤكاریێن هەڤپشك ل تەمامییا بواران دا كر. د وێ دیدارێ دا (یان برێم) قونسلێ گشتیێ فەرەنسا ل هەرێما كوردستانێ بەرهەڤ بوو.

دەستەیا كارگێڕییا مەكتەبا سیاسی یا پارتی دیموكراتی كوردستان پیرۆزباهی ل نێچیرڤان بارزانی سەرۆكێ هەرێما كوردستانێ كر ب هەلكەفتا پێبەخشینا بلندترین مێدالیا رێزلێنانێ یا سڤیل یا كۆمارا ئیتالیایێ و راگەهاند كو ئەڤ خەلاتێ نێڤدەولەتی دەربڕینێ ژ پێگەهێ بهێزێ سەرۆكێ هەرێمێ دكەت.
د پەیامەكا پیرۆزباهیێ دا دەستەیا كارگێڕییا مەكتەبا سیاسی یا پارتی دیار كریە ب هەلكەفتا بەخشینا بلندترین مێدالیا رێزلێنانا سڤیل یا كۆمارا ئیتالیایێ بۆ نێچیرڤان بارزانی، سەرۆكێ هەرێما كوردستانێ گەرمترین پیرۆزباهی ئاراستەی بەڕێزێ و گەلێ مە دكەین.
د پەیامێ دا هاتییە بەخشینا ڤی خەلاتی بهایەكێ بلند و نێڤدەولەتییە و ئاماژەیە بۆ پێگەهـ و كارتێكرنا سەرۆكێ هەرێما كوردستانێ ل سەر ئاستێ ناڤخۆ و نێڤدەولەتی هەروەسا نیشانا بزاڤ و پێنگاڤێن وی نە بۆ بهێزكرنا دیپلۆماسییا هەرێما كوردستانێ و بهێزكرنا پەیوەندییان و پێكڤەژیانێ و پاراستنا بهایێن هەڤپشك.
دەستەیا كارگێڕییا مەكتەبا سیاسی یا پارتی جارەكا دی خۆشحالییا خۆ ب ڤێ هەلكەفتێ دیار كریە و هیڤییا سەركەفتنا بەردەوام بۆ ئەزموونا هەرێما كوردستانێ خواست.

ل ڤان رۆژان سالڤەگەڕا دامەزراندنا كابینەیا نەهێ یا حوكمەتا هەرێما كوردستانێ بوو ب سەرۆكاتییا مەسرور بارزانی كو د دەمێ حەفت سالێن بۆری دا ژێرخانەیا ئابۆری و دیجیتالی و خزمەتگوزاریێن هەرێمێ گوهۆڕینێن بنەڕەتی ب سەردا هاتییە و زێدەتری 22 ملیار و 700 ملیۆن دۆلار ل پرۆژەیێن جودا جودا دا وەبەرهێنان هاتییە كرن و كارنامەیا ڤێ كابینەیێ ل سەر بنەمایێ چاكسازیێ و هەمەجۆركرنا داهاتی هاتییە داڕێژتن و د ڤێ قووناغێ دا سەرەرای قەیرانێن كۆرۆنا و نزمبوونا بهایێ پەترۆلێ، حوكمەتا هەرێمێ شیایە ل هەموو سێكتەران پێشكەفتنێ ب دەست ڤە بینیت.
ئاسایشا ئاڤێ و پرۆژەیێن ستراتیژی
ژ بۆ رووبڕووبوونا هشكەسالیێ حوكمەتا هەرێمێ 9 بەنداڤێن نوو ب تێچوونا حەفت ملیار و 265 ملیۆن دیناران دروست كرینە كو شیانێن عمباركرنا 8.252 ملیۆن مەترێن سێجاركی یێن ئاڤێ هەنە و دیسان 30 بەنداڤێن ئاخێ تەمام كرینە و 57 بەنداڤێن دێ یێن ئاخێ د قووناغا بجهئینانێ دانە و ل كەرتێ ئاڤا پاقژ ژی رۆژانە دوو ملیۆن و 564 هزار مەترێن سێجاركی یێن ئاڤێ ئێك ملیۆن و 181 هزار هەڤپشكان دهێتە دابینكرن.
ئاسایشا خوارنێ و كەرتێ چاندنێ
وەبەرهێنانا چاندنێ ژ 8،1% بۆ 12% بلند بوویە و چار سایلۆیێن مەزن ب شیانێن 160 هزار تەنان و ب گوژمێ 90 ملیار دیناران تەمام كرینە و نۆكە 13 هزار و 943 كۆمپانییا و هزار و 341 كارگەه ل ڤی كەرتێ كار دكەن و بەرهەمێن ناڤخۆ وەك هنار و سێڤ و هنگڤین دهێنە هنارتن بۆ بازارێن جیهانی.
شۆڕشا رێك وپران و ئەندازەیا هاتنووچۆنێ
ل كەرتێ رێك وپرێن دەرڤەی باژێڕان هزار و 271 پرۆژە ب تێچوونا 5،322 تریلیۆن دیناران و ب درێژاهییا پێنج هزار و 940 كیلۆمەتران پلانا وان هاتییە دانان كو 810 پرۆژە تەمام بووینە و ل ناڤ باژێڕان ژی دو هزار و 248 پرۆژەیێن جادە و پران ب تێچوونا 2.05 تریلیۆن دیناران هاتینە بجهئینان، ئەندازەیا هاتنوچوونێ ژی ب بنەجهكرنا 60 پران و 68 كیلۆمەترێن پەرژانێن ئاسنی و 21 هزار و 600 هێمایێن هاتنوچوونێ هاتییە پێشڤەبرن.
چاكسازی و دیجیتالكرنا حوكمەتێ
كابینەیا نەهێ یا حوكمەتا هەرێما كوردستانێ زێدەتری 29 سیستەمێن دیجیتالی بجهئیناینە ژ وان سیستەمێ KRDPass»، «E-VISA و پۆرتالا حوكمەتا هەرێمێ (GOV.KRD). د بوارێ چاكسازییا دارایی ژی دا پرۆژەیێ (هەژمارا من) سەركەفتنا مەزن ب دەستڤەئینایە و 950 هزار فەرمانبەر هاتینە تۆماركرن و 638 ئامیرێن ATM هاتینە دانان و چار هزار و 189 مووچەیێن نەیاسایی هاتینە بڕین و 29 هزار و 338 دۆسیێن خانەنشینیا نەیاسایی هاتینە رێكخستن.
ژێرخانەیا كارەبێ و پرۆژەیێ رۆناهی
ئاستێ بەرهەمئینانا كارەبێ ژ دو هزار و 360 مێگاواتان بۆ چار هزار و 334 مێگاواتان بلند بوویە و پرۆژەیێ رۆناهی بۆ كارەبا 24 ساتی 90% قووناغێن خۆ بڕییە و شەش هزار موەلیدەیێن ئەهلی هاتینە ڤەمراندن و 83% كارەبا هەرێمێ ب رێیا غازا سروشتی دهێتە بەرهەمئینان.
وەبەرهێنان ب گوژمێ 7،22ملیار دۆلاران
كابینەیا نەهێ مۆلەت داینە 778 پرۆژەیێن وەبەرهێنانێ كو كەرتێ گەشتیاری ب 102 پرۆژان و ب بهایێ 7،6 ملیار دۆلاران ل پلا ئێكێ یە و ل دووڤ وێ ئاكنجیبوون ب 6،8 ملیار دۆلار و پیشەسازی ب 4،6 ملیار دۆلار دهێن.
خزمەتگوزاریێن پەروەردەیێ و ساخلەمیێ
273 قوتابخانەیێن نوو دروست كرینە و سێ هزار قوتابخانە نۆژەن كرینە و ل كەرتێ ساخلەمیێ 79 نەخۆشخانەیێن نوو و 31 بنكەهێن پسپۆڕی هاتینە دامەزراندن و 42 هزار و 37 مامۆستایێن گرێبەست ب هەمیشەیی كرینە و ب رێیا پرۆژەیێن وەبەرهێنانێ زێدەتری 150 هزار دەلیڤەیێن كاری بۆ وەلاتییان پەیداكرینە.
پاراستنا ژینگەهێ و پێگەهێ نێڤدەولەتی
رێژەیا كەسكاتیێ ژ 15% بۆ 20% بلند بوویە و پرۆژەیێ كەمەرا كەسك یا هەولێرێ ب درێژاهییا 150 كیلۆمەتران دەستپێكریە و ل سەر ئاستێ نێڤدەولەتی ژی هەرێما كوردستانێ خودانا 14 نوونەرایەتییانە ل وەلاتان و 36 قونسلگەری و نڤیسینگەهێن وەلاتان ل هەولێرێ كار دكەن و هەرێمێ وەك بنگەهێ پێكڤەژیانێ مێهڤاندارییا 853 هزار ئاوارە و پەنابەران كریە كو سالانە 860 ملیۆن دۆلار تێچوویێ وێ ل سەر حوكمەتا هەرێمێ بوویە. ئەڤ ئامارە د سەلمینن كو كابینەیا نەهێ پێنگاڤێن گەلەك مەزن بەرەڤ بنەجهكرنێ و پێشئێخستنا هەموو بواران هاڤێتینە.

پەیڤدارێ حوكمەتا هەرێما كوردستانێ راگەهاند: كابینەیا نەهێ ب سەرۆكاتییا مەسرور بارزانی مۆدێلەكێ نوو یێ كاركرنێ پێشكێش كر كو تێدا ل جهێ پشتگرێدانێ ب درووشمان ب پرۆژەیێن ستراتیژی و درێژخایەن بەرسڤا ئاستەنگان دا و شیایە بنەمایەكێ بهێز بۆ پاشەڕۆژا ئابۆری و كارگێڕۆیا هەرێما كوردستانێ دابڕێژیت.
پێشەوا هەورامانی، پەیڤدارێ حوكمەتا هەرێما كوردستانێ د بەیاننامەیەكێ دا ئاماژە ب وێ چەندێ كر كو كابینەیا نەهێ ب سەرۆكاتییا مەسرور بارزانی ب كریار نیشادا كو ئیرادەیا ئاڤاكرن و چاكسازیێ ل سەرێ هەموو بەربەستانە و دیار كر كو حوكمەتێ ل جهێ پشتگرێدانێ ب درووشمان ب پرۆژەیێن ستراتیژی بەرسڤا ئاستەنگان دا.
هەورامانی رۆهنكر كو د بن سیبەرا دیتنا سەرۆكێ حوكمەتا هەرێمێ، مەسرور بارزانی نوكە هەرێما كوردستانێ پێنگاڤێن گەلەك مەزن هاڤێتینە د بوارێ گەرەنتیكرنا ئاسایشا خوارنێ و داڕێشتنا سیاسەتەكا هوور و گونجاو بۆ ئیدارەیا ژێدەرێن ئاڤێ و گۆت» كەرتێ چاندنێ و گەشتیاری د قووناغەكا جودا و پێشكەفتی دانە و تۆڕا رێك و پران و جادەیێن نوو ژی ب جۆرەكێ گوهۆڕینێن بنەڕەتی ب سەردا هاتییە كو بەری نوكە وێنەیێ وێ نەبوویە».
پێشەوا هەورامانی رۆناهی ئێخستە سەر وان ئاستەنگ و رێگریێن دارایی و دەرەكی یێن كو د دەمێ بۆری دا هاتینە پێش و راگەهاند هەكە دژاتی و رێگری و بڕینا بودجێ و وان قەیرانێن دروستكریێن ل پێشبەری كارێن كابینەیا نەهێ نەبان نوكە ئاستێ گەشەكرنێ و پێشكێشكرنا خزمەتگوزارییان بۆ وەلاتییان ل هەرێما كوردستانێ د قووناغەكا گەلەك بلندتر و پێشكەفتی تر دا بوو.

ئەندامەكا جڤاتا نوونەرێن ئیراقێ ژ فراكسیۆنا پارتی دیموكراتی كوردستان ئاشكرا كر كو پاشكەفتنا مووچەی ب تنێ هەرێما كوردستانێ نەگرتییە ڤە بەلكو ژبەر كێمییا نەختینەیێ ل هەموو ئیراقێ گیرۆبوون د بەلاڤكرنا مووچەیێن دەزگەهێن فیدرال ژی دا هەیە و ئاماژە ب دەمێ خەرجكرنا مووچەیێن فەرمانبەرێن هەرێمێ دا.
ئیخلاس دلێمی، ئەنداما پەرلەمانێ ئیراقێ ژ فراكسیۆنا پارتی دیموكراتی كوردستان راگەهاند» حوكمەتا هەرێما كوردستانێ هەموو داتا و پێزانینێن پێدڤی بۆ فەرمانگەهێن دارایی یێن ئیراقێ هنارتینە».
دلێمی ئاماژە ب وێ دا كو نوكە داتایێن هەرێمێ گەهشتینە و ژ ئالیێ ژمێریاران و فەرمانگەها بودجەی ڤە پێداچوون بۆ هاتییە كرن و بڕیارە ل رۆژا ئێكشەمبیا 12/7/2026 هووربینییا دووماهیێ د لیستەیان دا بهێتە كرن.
ل گۆرەی گۆتنا ڤێ پەرلەمانتارێ ب ئەگەرەكێ مەزن د رۆژێن دووشەمبی یان سێشەمبییا ژ ڤێ حەفتیێ دەست ب خەرجكرن و بەلاڤكرنا مووچەیێن فەرمانبەرێن هەرێما كوردستانێ بهێتە كرن.
ژ ئالیێ دی ڤە ئیخلاس دلێمی دووپاتی ل سەر وێ كر كو گیرۆبوونا بەلاڤكرنا شایستەیێن دارایی كێشەكا گشتگیرە ل هەموو ئیراقێ و ب تنێ هەرێما كوردستانێ نەگرتییە ڤە و رۆهن كر كو حوكمەتا فیدرال ژی هەتا نوكە مووچەیێن هەموو دەزگەهێن خۆ بەلاڤ نەكرینە ب شێوەیەكی كو هەتاكو ئەندامێن جڤاتا نوونەرێن ئیراقێ ژی ل رۆژا پێنجشەمبی 9/7/2026 مووچەیێ خۆ وەرگرتییە، ناڤبری هۆكارێ ڤێ گیرۆبوونا گشتی بۆ دروستبوونا كێشەیا كێمییا نەختینەیێ ل هەموو ئیراقێ ڤەگەڕاند لێ پشتڕاستی دا كو رێكارێن دارایی یێن تایبەت ب هەرێما كوردستانێ ب شێوەیەكێ ئاسایی و ل گۆرەی پلانان ب رێڤە دچن.