ئەڤرۆ نیوز:
لژنا چاندنێ ل پەرلەمانێ عیراقێ هۆشداری دا ژ كارتێكرنا بەنداڤا ئەلیسۆ یا تورکی ل سەر پلان و پرۆژێن چاندنێ ل عیراقێ.
سەلام شەمەری سەرۆكێ لژنا چاندنێ ل پەرلەمانێ عیراقێ دیار کریە: کو هەموو پلان و پرۆژێن ستراتیژی یێن حوکمەتا عیراقێ و وەزارەتێن پەیوەندیدار د وارێ چاندن و ئاڤدانێ دا، پشت گرێدانێ ب ئاڤا هەردو رووبارێن دیجلە و فوراتی دكەن.
ناڤهاتی ئاشکرا کر ژی: نەبوونا رێككەفتنەكێ دناڤبەرا بەغدا و ئەنقەرە دا ل سەر بەهرا عیراقێ ژ ئاڤا رووبارێ دیجلەی، دێ كارتێكرنەكا خراب كەتە سەر سێكتەرێ چاندنێ و پلانێن گەشەپێدانا وی كەرتی ل عیراقێ، لەوما وی داخواز ژ حوکمەتا عیراقێ كریە، کو بزووترین دەم ل گەل توركیا بگەهیتە رێككەفتنەكێ بۆ مسوگەركرنا بەهرا عیراقێ ژ ئاڤا هەردو رووباران، دیسان رێک نەهێتەدان، کو تورکیا ئاڤێ وەكو كارتەكا فشارێ بۆ هندەك مەرەمێن سیاسی ل دژی عیراقێ بكار بینیت.
ئەڤرۆ نیوز:
حوکمەتا هەرێما کوردستانێ راگەهاند: ب هەلکەفتا هاتنا جەژنا رەمەزانێ، هەر ژ رۆژا ئێکشەمبی ٢٤ ڤێ هەیڤێ هەتا رۆژا پێنجشەمبی ٢٨ ڤێ هەیڤێ بهێنڤەدانا فەرمی یە.
جوتیار عادل پەیڤدارێ حوکمەتا هەرێما کوردستانێ دیار کر: ب هەلکەفتا هاتنا جەژنا رەمەزانا پیرۆز، حوکمەتا هەرێما کوردستانێ، هەر ژ رۆژا ئێکشەمبی ٢٤-٥-٢٠٢٠ هەتا رۆژا پێنجشەمبی ٢٨-٥-٢٠٢٠ کرە بهێنڤەدانا فەرمی.
گۆت ژی: ئەم داخوازێ ژ وەلاتیان دکەین، د رۆژێن جەژنێ دا، ژ پێخەمەت ساخلەمیا هەموو وەلاتیان، پێگیریێ ب رێنمایێن بەرهنگاربوونا ڤایرۆسێ کۆرۆنا یێ بکەن.
ئەڤرۆ نیوز:
وەزیرێ ناڤخوە یێ حوکمەتا هەرێما کوردستانێ راگەهاند کو هێشتا مەترسیا کۆرۆنایێ ل هەرێما کوردستانێ هەیە و پەیدابوونا چەندین حالەتان د ڤان چەند رۆژێن بۆری دا ل هەولێرێ و سلێمانیێ نیشا ددەت کو مەترسیا کۆرۆنایێ ل هەرێما کوردستانێ یا هەی.
رێبەر ئەحمەد ئەو یەک ژی دیار کر کو قەدەغەیا هاتنوچوونێ یا بۆ سێ رۆژێن جەژنێ ژ بەر هندێ یە دا وەلاتی بهێنە پاراستن و گۆت: (هێزێن ئێمناهیێ، پۆلیس و پێشمەرگە دێ د سێ رۆژێن جەژنێ دا ب توندی چاڤدێریا هاتنوچوونێ کەن و ژ بەر هندێ ژی دڤێت وەلاتی ب تەمامی پێگیریێ ب قەدەغەیا هاتنوچوونێ بکەن و ل مالێن خوە دابن، چونکو بریارێن هاتینە دان هەموو ژ بۆ پاراستنا وەلاتیانە ژ ڤایرۆسێ کۆرۆنایێ).
ئەڤرۆ نیوز:
كوردۆ ئێحسان رێڤه‌به‌رێ وه‌به‌رهێنانا پارێزگه‌ها دهوكێ دیار کر د چارچوڤێ خو ئاماده‌كرن ژ بۆ (ماسته‌ر پلانێن وه‌به‌رهێنانێ) ل هه‌رێما كوردستانێ ب گشتى و پارێزگه‌ها دهۆكێ دا ب تایبه‌تى، مه ب هه‌ماهه‌نگیا هه‌موو قه‌زا و ناحیان ل سه‌رانسه‌رى پارێزگه‌هێ پلانه‌ك دانایه كو بزانین ل هه‌مو قه‌زا و ناحیان چ (پرۆژه) وان پێدڤى پێ هه‌یه و چه‌ندین دانوستاندن مه ئه‌نجام داینه و بۆچونێن خه‌لكێ ژى هه‌لبه‌ت هاتنه وه‌رگرتن، و ده‌رئه‌نجامێ ڤان دانوستاندنان بۆ مه دیار بوویه كو ل قه‌زایان ئه‌م بشێین هند كاران بكه‌ین كو خزمه‌تا خه‌لكێ بكه‌ن.
رێڤه‌به‌رێ وه‌به‌رهێنانا پارێزگه‌ها دهۆكێ ئه‌و چه‌نده دیار کر هه‌ر وه‌به‌رهێنه‌ره‌ك بشێت ل قه‌زا و ناحیان كار بكه‌ت دێ ئه‌م رێخۆشكه‌ر بین، و ب هه‌مو شیان ڤه د خزمه‌ت دا بین، و بۆ ئه‌ڤێ قوناغێ(239) پرۆژێن وه‌به‌رهێنانێ دێ ل سه‌ر ئاستێ پارێزگه‌هێ مینا قه‌زا و ناحیان ژى هێن ئەنجامدان. مینا پرۆژێن (چاندنی) و پرۆژێن گه‌شتیارى ل چه‌ندین ده‌ڤه‌رێن ژ ده‌رڤه‌ى باژێرى و گۆت: (ئه‌ڤ پرۆژانە، ئه‌وێن مه به‌حس كرین، ده‌ست ب كارى بكه‌ن هه‌لبه‌ت ل دووڤ وێ پێشبینیا مه دیار كرى كو (200) هزار ده‌رفه‌تێن كارى دێ بۆ خه‌لكێ مه دروست بن. ئه‌م چاڤه‌رێ دكه‌ین ل ده‌مه‌كێ نێزیك ئه‌ڤ پرۆژه‌یه ده‌ست پێ بكه‌ن، و ب ئه‌ڤێ چه‌ندێ دێ ده‌لیڤێن كاركرنێ بو خه‌لكێ ژى دروست بن).
ئه‌ڤرۆ نیوز:
ریڤه‌به‌رێ تایێ هه‌ولێرێ یا به‌نكا ناڤه‌ندا عیراقێ راگه‌هاند سیسته‌مێ به‌نكی یێ نوكه ڤه‌كریه و چاڤه‌ریێ دكه‌ین، به‌غدا 400 ملیار دیناران وه‌كو موچه‌یێ فه‌رمانبه‌رێن هه‌رێمێ بخێنه سه‌ر سیسته‌می.
كازم نامق ریڤه‌به‌رێ تایێ هه‌ولێرێ یێ به‌نكا ناڤه‌ندا عیراقێ ئه‌و چه‌نده ژی راگه‌هاند: سیسته‌مێ به‌نكی د نوكه دا یێ ڤه‌كریه بۆ وه‌رگرتنا 400 ملیار دیناران كۆ ژلایێ سه‌رۆك وه‌زیرێن عیراقێ ڤه ره‌زامه‌ندی ل سه‌ر هاتیه دان وه‌كو موچه‌یێ هه‌یڤا نیسانێ یێ فه‌رمانبه‌رێن هه‌رێما كوردستانێ ره‌وانه بكه‌ت.
ناڤبری ئه‌و چه‌نده ژی دا زانین كۆ ل گه‌ل به‌غدا ئاخڤتینه و هاتینه ئاگه‌هداركرن كۆ سیسته‌مێ به‌نكی یێ ڤه‌كریه هه‌ر ده‌مێ پاره هات سه‌ر سیسته‌مێ حكومه‌تا هه‌رێما كوردستانێ دێ مه ئاگه‌هدار كه‌ن و دشیێن بكار بینین.
كازم نامق ریڤه‌به‌رێ تایێ هه‌ولێرێ یێ به‌نكا ناڤه‌ندا عیراقێ گۆت ژی ل راگه‌هاندنێ مه گوهـ لێ بوویه بزاڤ دهینه‌كرن بۆ هنارتنا موچه‌یێ فه‌رمانبه‌ران بۆ هه‌رێمێ.
دهۆك، له‌زگین جوقی:
جێگرێ پارێزگارێ نه‌ینه‌وا دیاركر به‌رنامه‌ك هاتیه دانان ب هه‌ڤكاری دگه‌ل رێكخراوان ل مووسل بۆ زڤرینا ئاواران ژ ناڤ كه‌مپێن مووسلێ دا بتنێ رێك خێزان داعش ناهێته دان ژ ناڤ كه‌مپان ده‌ربكه‌ڤن دێ هه‌موو د ناڤ كه‌مپه‌كێ دا هێنه ئاكنجیكرن.
عه‌لی عومه‌ر كه‌بعو، جێگرێ پارێزگارێ نه‌ینه‌وا بۆ كارۆبارێن ئاواره و رێكخراوان دیاركركو به‌رنامێ زڤرینا ئاواران ده‌ستپێكریه به‌ری چه‌نده‌كێ 106 خێزان ژ كه‌مپا سلامیه بۆ سه‌ر مال ومولگێن وان هاتنه ڤه‌گوهاستن نوكه ژی ئه‌م یێ ل سه‌ر كه‌مپه‌كا دێ كاردكه‌ین بۆ هندێ هژماره‌كا خێزانا ژ ناڤ كه‌مپێ بۆ سه‌ر جهـ وارێن وان بهێنه ڤه‌گه‌راندن هه‌موو بۆ ده‌ڤه‌را به‌عاج و عه‌یازیه وده‌ڤه‌رێن سه‌رڤه دهێنه ڤه‌گه‌راندن نوكه ل پارێزگه‌ها مووسل چار كه‌مپ هه‌نه ئه‌م یێ كاردكه‌ن هه‌موو بهێنه گرتن هه‌تا دووماهیا ئه‌ڤ سالا ل قوناغا دوویێ بتنی دێ خێزانیێن داعش مینن.
ئاشكه‌را كركو هه‌موو خێزانێن داعش دێ بۆ ناڤ كه‌مپه‌كێ هێنه ڤه‌گوهاستن چونكو رێك ب وان ناهێته دان ڤه‌گه‌رن ژبه‌ر كو خێزانێن تیرۆرستێن داعشێ نه ره‌نگه پتر ژ دوو هزار خێزانێن تیرۆرستێن داعش بمینن ئه‌ڤه هه‌موو دێ دناڤ كه‌مپه‌كێ دا هێنه كۆمكرن پشتی هه‌موو خێزانیێن دێ ژ ناڤ هه‌ر چار كه‌مپان بۆ سه‌ر جه وارێن وان دهێنه ڤه‌گوهاستن”.
ئەڤرۆ نیوز:
وەزارەتا ساخلەمیا هەرێمێ راگەهاند: هەشت تووشبوویێن دی یێن کۆرۆنا یێ ل هەولێرێ هاتنە تۆمار کرن، هەموو ژ خێزانەکا تووشبوویەکێ هەولێرێ نە و ل کۆمەلگەها شاوەیسن.
هەروەسا گۆتیە: د بەردەوامیا پشکنین و لێگەریانێ لدووڤ گومانلێکریان، ھەشت تووشبوویێن دی یێن ڤایرۆسێ کۆرۆنا یێ ل ھەولێرێ هاتنە دەست نیشانکرن، کو ئەو ژی ژنەک د ژیێ 45 سالیێ دا و دو کچ د ژیێن 22 و 11 سالیێ و چار کور د ژیێن 25 و 22 و 14 و 6 سالیێ دا، کو هەموو ژ خێزانەکا تووشبوویەکێ ئەڤرۆ یە ل هەولێرێ و ل کۆمەلگەها شاوەیسن، دیسان زەلامەکێ د ژیێ ٤٢ سالیێ دایە و برایێ تووشبوویێ ئەڤرۆ یێ باژێرێ هەولێرێ یە، کو خۆجهێ ھەولێر ستی یە، ھەموو ژی بەرکەفتیێن تووشبوویێن دوهی و ئەڤرۆ نە.
ئەڤرۆ نیوز، عەلی حاجی:
ئەندامەکێ پەرلەمانێ کوردستانێ بۆ ئەڤرۆ نیوز دیار کر: پێشتر ب رێیا پێنچ پەرلەمانتاران یاداشتنامەک بۆ سەرۆکاتیا پەرلەمانێ کوردستانێ رەوانەکر و لدووڤ دا ژی بۆ حکومەتا هەرێما کوردستانێ بۆ ئاشکراکرنا کەیسێ وەلاتیێ رۆژهەلاتێ کوردستانێ مستەفا سەلیمی.
زێدەتر حکمەت محو گەودا گۆت : پشتی کو مستەفا سەلیمی ژ زیندانەکا وەلاتێ ئیرانی خوە رزگار کری و قەستا باشورێ کوردستانێ کری کو د وێ یاداشتنامێ ژی دا ب روونی هاتیە بەحس کرن و قەستا دەڤەرەکا باشورێ کوردستانێ کری، بەلێ جهێ داخێ بوو، ژلایێ ئاسایشا وێ دەڤەرێ ڤە ب بهانەیا ڤایروسێ کورونایێ و کەرەنتینە کرنێ هاتە سەر دابرن و ژلایێ ئاسایشا وی باژێری ڤە ب وەلاتێ ئیرانێ هاتە دان و هاتە سێدارەدان، هەموو ئەندامێن لژنا نافخۆ و ئاسایش و ئەنجومەنێ خوەجیەکان ل پەرلەمانێ کوردستانێ داخازا دیار کرنا وی کەیسێ کری یە بۆ رایا گشتی و پەرلەمانێ کوردستانێ و نابیت ئەنجام دەرێن وێ کەیسێ ب ساناهی دەرباز ببن ژبەر کو موستەفا سەلیمی خزمەتەکا باش د بیاڤێ کوردینیێ دا دەرباز کر یە.
ناڤهاتی ئاشکرا کر ژی: ب رێیا وێ یاداشتێ ژی مە داخواز کری یە حکومەتا هەرێما کوردستانێ دەرەنجامێ وێ لژنا ژلایێ وان ڤە هاتیە پێک ئینان بۆ پەرلەمانێ کوردستانێ و رایا گشتی دیار بکەت کو کارێ وێ لژنێ گەهشتە کیڤە و هەر دیسان وەکو پەرلەمانتار ژی وەکو کارەکێ مروڤایەتی و نیشتیمان پەروەری دێ ل سەر دووڤچوونا وێ کەیسێ بەردەوام بین تا کو راستیا وی بابەتی بۆ خەلکێ کوردستانێ دهێتە دیار کرن.
ئەڤرۆ نیوز:
بەشیر حەداد جێگرێ سەرۆکێ پەرلەمانێ عیراقێ دیار کر: ئەو سۆزێن مستەفا کازمی داینە هەرێمێ ئاشکرا کرن و گۆت: کازمی سۆزدایە هەموو ئاریشێن ناڤبەرا هەرێمێ و بەغدا چارەسەر بکەت، د ناڤ وان ژی دا پارێ مووچەخۆرێن هەرێما کوردستانێ.
بەشیر حەداد جێگرێ سەرۆکێ پەرلەمانێ عێراقێ د روونکرنەکا رۆژنامەڤانی دا گۆت: ل ڤان نێزیکان دێ شاندەکێ هەرێمێ ڤەگەریتەڤە بەغدا ب مەرەما تمامکرنا گۆتۆبێژان و بەحسکرنا وان دەرئەنجامێن، ئەو لیژنە گەهشتینێ.
هەروەسا گۆتیە: کازمی سۆزدایە هەموو ئاریشێن دناڤبەرا هەرێمێ و بەغدا چارەسەر بکەت، د ناڤ وان دا مووچێ فەرمانبەرێن هەرێمێ، ئەم ب هیڤینە کو بەری جەژنا ڕەمەزانێ کازمی دێ پارێ مووچەخۆرێن هەرێمێ ڤرێکەت.
نيشاندان