ئەڤرۆ نیوز:
وەسا بریارە سۆبه‌هى ئێکشەمبی 3 گۆلانا 2020 شانده‌كێ حوکمه‌تا هه‌رێما كوردستانێ بچیته به‌غدا و دێ ل گه‌ل مسته‌فا كازمى سەرۆک وەزیرێن راسپاردى بۆ پێكئینانا حوکمه‌تا نوو یا عیراقێ و چه‌ند سه‌ركرده و لایه‌نه‌كێن دى یێن سیاسى ل سه‌ر چه‌ندین بابه‌تان كۆم بن.
سه‌ره‌دانا شاندێ هه‌رێمێ بۆ دان و ستاندنێ یه ل سه‌ر چه‌ند ئاریشێن هەلاویستى یێن دناڤبه‌را هه‌رێمێ و به‌غدا، ژ وانا مافێن هه‌رێمێ ژ بوودجه‌یا گشتى و مووچێ فه‌رمانبه‌ران.
ئەڤرۆ نیوز:
ليستا نوو يا بەربژارێن کابینا سەرۆک وەزیرێن راسپاردیێ عیراقێ مستەفا کازمى هاتیە بەلاڤکرن، کو تێدا سێ وەزارەت بۆ کوردان هاتینە دیار کرن و بەربژارێ وەزارەتا دارایی کو ژ پشکا کوردانە، هێشتا چ ناڤ بۆ نەهاتیە دیار کرن.
ئەو وەزارەتێن پشکا کوردان پێدهێن ژ وەزارەتێن دارایی، داد، ئاڤەدانکرن و ئاکنجیبوونێ، کو هەردو وەزارەتێن داد و ئاڤەدانکرن و ئاکنجیکرن بەربژار بۆ دیار کرینە، لێ بۆ وەزارەتا دارایی چ بەربژار نەهاتیە دیار کرن.
هەروەسا بەربژارێ وەزارەتا داد، ئەمجەد محەمەد محەمەد ئەمین، وەزارەتا ئاڤەدانکرن و ئاکنجیبوونێ نازەنین محەمەد وەسو، لێ بۆ وەزارەتا دارایی چ ناڤ نەهاتینە دیار کرن.
ئه‌ڤرۆنیۆز، سالار دۆسكی:
به‌رپرسێ په‌یوه‌ندیان ل وه‌زاره‌تا ئه‌وقاف و كارۆبارێن ئایینی ل حوكمه‌تا هه‌رێما كوردستانێ، ئاشكراكر كو نه‌بوونا سندوقه‌كا زه‌كاتێ ل كوردستانێ بوویه ئه‌گه‌ر كو زه‌كات ب شێوه‌كێ نه رێكوپێك بهێته به‌لاڤه‌كرن و ئه‌ڤساله ژ سالێن بووی زه‌كات كێمبوویه.
مه‌ریوان نه‌قشه‌به‌ندی به‌رپرسێ په‌یوه‌ندیان ل وه‌زاره‌تا ئه‌وقاف و كارۆبارێن ئاینی ل حوكمه‌تا هه‌رێما كوردستانێ، ئه‌ڤرۆ پشتی نیڤرۆ 2ی گولانێ تایبه‌ت بۆ ئه‌ڤرۆ نیۆز گۆت: (ره‌نگ زه‌كاتا ئه‌ڤساله بگه‌هیته (10) ملیون دۆلاران، ئه‌ڤساله ل گه‌ل سالێن بوری دێ كێمتر بیت، چنكو كاودانێن ئابووری نه وه‌ك سالێن پێشترن).
نه‌قه‌شه‌به‌ندی ئه‌و ژی گۆت: (ل دووڤ هژمارا ده‌وله‌مه‌ندێن كوردستانێ پێشبینی دهێـته‌كرن كو زه‌كاتا ئه‌ڤساله (10) ملیۆن دولار بیت، ل سالا 2010 ده‌مێ مه دوڤچوون كری و پرسیار ژ ده‌وله‌مه‌ند و رێكخراوێن خێرخوازی هاتیه‌كرن زه‌كاتا وێ سالێ دناڤبه‌را (20 بۆ 30) ملیۆن دولاران دا بوو وی ده‌می كاودانێن ئابووری گه‌له‌ك دباش بوون، نوكه كاودانێن خه‌لكێ كوردستانێ هاتینه گوهورین و نه وه‌ك سالێن پێشترن).
مه‌ریوانی ئه‌و ژی دیاركر كو ژ نه‌بوونا سندوقه‌كا دانا زه‌كاتێ خه‌لكێ مه ب شێوه‌كێ نه رێكوپێك زه‌كاتێ دده‌ت و هه‌موو وه‌لاتان سندوقێن زه‌كاتێ هه‌نه و ناڤێن هه‌ژاران دهێنه نڤێسن و دیسان ب ئه‌وان پاران كارگه‌ه دهێنه دانان و خه‌لك ل به‌ر كار دكه‌ت و ده‌لیڤێن كاری دهێنه دیتن و ب شێوه‌كێ دادپه‌روه‌رانه زه‌كات دهێته به‌لاڤه‌كرن.
به‌رپرسێ په‌یوه‌ندیان ل وه‌زاره‌تا ئه‌وقاف و كارۆبارێن ئاینی ل حوكمه‌تا هه‌رێما كوردستانێ ئه‌و ژی خۆیاكر كو زه‌كات ب تنێ پاره نینه به‌لكو ده‌خل و دانه و زێره، ته‌رش و كه‌واله و دڤێت سندوقه‌ك هه‌بیت ئه‌ڤان هه‌موویان كوم بكه‌ت.
ئەڤرۆ نیوز، هۆشەنگ تاجر:
شەریف ئەحمەدی ئەندامێ رێکخراوا مافێن مرۆڤی یا رۆژهەلاتێ کوردستانێ بۆ ئەڤرۆ نیوز دیار کر کو ل مەها بۆری ئیرانێ ١٣ کورد ل سێدارە داینە و مەترسیا سێدارەدانا گەلەک گرتیێن دی ژی هەیە.
ناڤهاتی راگەهاند کو نها ل جیهانێ هەموو کەس بەحسێ کۆرۆنایێ و مەترسیێن وێ دکەن، ئانکۆ رۆژەڤا جیهانێ ب گشتی کۆرۆنا یە و رژێما ئیرانێ ژی شیایە مفای ژ هندێ وەربگریت و کوردان ل سێدارە بدەت.
ناڤهاتی راگەهاند ژی بەری نها وەکو رێکخراوا مافێن مرۆڤی یا رۆژهەلاتێ کوردستانێ وان داخواز ژ گەلەک رێکخراوێن جیهانێ کرینە کو ل هەمبەر سێدارەدانا کوردان بێدەنگ نەبن و گۆت: (لێ مخابن وەلاتێن جیهانێ ژ بەر بەرژەوەندیێن خوە یێن ئابووری یێن ل گەل ئیرانێ ل هەمبەر سێدارەدانا کوردان بێدەنگن).
ئەڤرۆ نیوز:
د. کاروان جەمال رێڤەبەرێ ساخلەمیا سۆران راگەهاند کو هژمارا تووشبوویێن ب کۆرۆنایێ ل سۆران زێدەتر دبن و ئەو یەک ژی کارێ کارمەندێن ساخلەمیێ و ئالیێن پەیوەندیدار زەحمەتتر لێ دکەت و ژ بەر هندێ ژی دڤێت وەلاتی پێگیریێ ب رێنمایان بکەن.
ناڤهاتی راگەهاند کو مخابن د ماوەیێ چەند رۆژێن بۆری دا ٢٠ حالەتێن تووشبوویێن کۆرۆنایێ ل سنورێ سۆران هاتینە تۆمار کرن و ئەو یەک ژی مەترسیەکا مەزن بۆ هەموو وەلاتیان ل سۆران و دەوروبەرێن وێ دروست دکەت و دڤێت وەلاتی ژی پێگیریێ ب رێنمایان بکەن.
ئه‌ڤرۆ نیوز:
وه‌زاره‌تا ساخله‌میا حكومه‌تا هه‌رێما كوردستانێ 39 رێنمای به‌لاڤكرن كو تێدا رێ و ئاوایێن خۆ پاراستنێ بۆ ده‌ستپیكرنا دواما فه‌رمی دیاریكرینه.
لگۆری نفیسارا وه‌زاره‌تا ساخله‌میا حكومه‌تا هه‌رێما كوردستانێ 29/4/2020ده‌ركه‌تینه، ئاماژه ب وێ چه‌ندێ دایه كۆ ب كۆمه‌كا رێنمایا ل ده‌مێ ده‌ستپیكرنا ده‌واما فه‌رمی بهێنه بكارئینان، پێدڤیه خشته‌یه‌ك بۆ رێكخستنا دوامێ هه‌بیت و قه‌ره‌بالغی دروست نه‌بیت و فه‌رمانبه‌ر دو مه‌تران ژێك دوور بن، نابیت بۆ به‌رهه‌ڤبوونێ په‌نجه‌موورا گشتی كار پێ بهێته‌كرن و هاتیه ته‌ئكیدكرن فه‌رمانبه‌ر هه‌می ماسكان بكار بینن، نابیت كۆمبوون بهێنه‌كرن خارن بهێته خارن ل ده‌مێ زۆر پێدڤی نه‌بیت پێ، رێك ب سه‌ره‌دانكرنێ نه‌هێته دان.
وه‌زاره‌تا ساخله‌میا حكومه‌تا هه‌رێما كوردستانێ د ئه‌وان 39 رێنمایێن به‌لاڤكرین ته‌ئكید ل سه‌ر پاقژ و بژینیێ و تافێلكرنا فه‌رمانگه‌هێ و ترۆمبێلێن وێ ل گه‌ل ده‌ستشیتنا به‌رده‌وام و دانانا هه‌وا گوهوران، هه‌ر فه‌رمانبه‌ره‌كی كوخك و په‌رسیف لێ بوو بلا موله‌تا بهێنڤه‌دانێ بده‌نێ.
راگه‌هاندنا 39 رێنمایێن نوو یێن وه‌زاره‌تا ساخله‌میێ كۆ ئیمزایا د.سامان به‌رزنجی ل سه‌ره و ئه‌ڤ چه‌نده بۆ خو پاراستنێ یه رێگرتنه ژ ڤایرۆسی.
ئەڤرۆ نیۆز، قائید میرۆ:
بھایێ پتڕۆلێ داکەتیە و چاڤدێرژی وەسا دبینن داکەتنا بھایێ پتڕۆلێ دەمکی بیت بسپۆرەکێ کەرتێ پتڕۆلێ ژی پێشبینی دکەت، بھایێ پتڕۆلێ بگەھیتە پێنجی دۆلاران.
دکتۆر عەلی بەلو، شارەزایێ کەرتێ پتڕۆلێ بۆ ئەڤرۆ نیۆز دیارکر” داکەتنا بھایێ پتڕۆلێ ددەمێ نوکەدا تنێ ژبەر رەوشا نوکەیا جیھانێ و پێشبینی دھێتەکرن گۆھڕین بکەڤنە بھایێ پتڕۆلێ، ژبەر ئەمریکا رازینابیت ھەتا دەمەکێ درێژ بھایێ پەتڕۆلێ یێ نزمبیت.
ژلایێ خۆڤەژی دکتۆر رۆندک فارس، بسپۆرا ئابووری گۆت” داکەتنا بھایێ پتڕۆلێ بتایبەتی یا تکساس ژبەر نەبوونا کڕیارانە، ئیدی پشتی گرێبەست ھاتینە نۆکرن ھێدی ھێدی بھایێ پتڕۆلێ بلند دبیت.
دکتۆر عەلی بەلو ئاشکراکر” بھایێ ئێک بەرمیلا پتڕۆلێ ئەڤسالەدا دێ بگەھیتە نێزیکی ٥٠ دۆلاران، بەرۆڤاژی داکەتنا بھایێ پتڕۆلێ کاریگەری لسەر ئیفلاسبوونا کۆمپانیێن جیھانی ھەیە.
ئه‌ڤرۆ نیوز:
په‌یڤدارێ وه‌زاره‌تا كاره‌با هه‌رێما كوردستانێ راگه‌هاند: دڤێ هه‌یڤێ دا 22 ده‌مژمێرێن كاره‌بێ ب وه‌لاتیان دهێته دان.
ئومێد ئه‌حمه‌د په‌یڤدارێ وه‌زاره‌تا كاره‌با هه‌رێما كوردستانێ راگه‌هاند هه‌یڤا بوری شیان ب ته‌ڤایی رۆژانه 21 ده‌مژمێران كاره‌با نیشتمانی بده‌ینه وه‌لاتیان، ئه‌ڤا دی ب كاره‌با مولیده‌یێن ئه‌هلی د هاته ته‌مامكرن.
ناڤبری ئه‌و چه‌نده‌ژی دیاركر دشیێن نوكه رۆژانه 22 ده‌مژمێرێن كاره‌بێ بده‌ینه وه‌لاتیان، به‌لێ ب ئه‌گه‌رێ بلند بوونا پله‌یا گه‌رماتیێ پشتی نیڤا ئه‌ڤێ هه‌یڤێ، دبیت ژماره‌یا ده‌مژمێران بهێته كێمكرن و ده‌مژمێره‌كا دی ل كاره‌با مولیده‌یێ بهێته زێده‌كرن.
په‌یڤدارێ وه‌زاره‌تا كاره‌بێ ئه‌و چه‌نده ژی دازانین هه‌رێم سێ هزار میگاواتێن كاره‌بێ به‌رهه‌م دئینیت هه‌كه ره‌وشا دارایی رێگر نه‌با، پلانێ دا هه‌یه رێژه‌یا ئاستێ پێدڤیا ناڤخو ژ كاره‌بێ بهێته بلندكرن.
نيشاندان