ئەڤرۆ نیوز:
وەزارەتا ساخلەمیا حکومەتا هەرێما کوردستانێ دیار کر، ئەڤرۆ 30 ئادارێ، د بەردەوامیا پشکنین و لێگەریانێ لدووڤ گومانلێکریان، ھەشت تووشبوویێن ڤایرۆسێ کۆڕۆنا ل ھەولێرێ هاتنە تۆمار کرن.
گۆت ژی، پێنج ژ تووشبوویان کو زەلام و ژن و سێ زارۆکن هەموو کەسوکارێن و بەرکەفتیێن تووشبوویێ دوهی یێ ناحیا خەلیفانن.
سێ ژ تووشبوویان زەلامن و ئاکنجیێن دهۆکێ نە و هەتا نوکە ل هەولێرێ د کەرەنتینێ دانە و ژ وەلاتی فرەنسا ڤەگەریاینە.
ئەڤرۆ نیوز:
وەزرارەتا ساخلەمیا هەرێما کوردستانێ تووشبوونا 14 کەسێن دیتر ب ڤایرۆسێ کۆرۆنا یێ ل سلێمانیێ راگەهاندن.
دەقێ راگەهاندنێ:
د بەردەوامیا پشکنینان و گەریان لدووڤ گومانلێکریان، چاردە تووشبوویی ب ڤایرۆسێ کۆڕۆنا یێ ل سلێمانیێ هاتنە دەست نیشانکرن، کو هەشت ژن و شەش زەلامن ب ڤی رەنگی:
پێنج ژ تووشبوویان دناڤا سلێمانیێ و پێنجوین و ساگێز و سیتەک، کو وان پێشتر گەشت کریە.
حەفت ژ تووشبوویان ل دەربەندیخان بەرکەفتیێن تووشبوویێن پێشیترن.
دو تووشبوویێن نوو ل سلێمانیێ پێشینەیا گەشتیێ نینە.
وەزارەتا ساخلەمیێ
29 ئادارا 2020
ئەڤرۆ نیوز:
وەزارەتا ناڤخۆ یا هەرێما کوردستانێ راگەهاند، هوشداریێ د دەینە وان وەلاتیان ئەوێن کو داخوازا بنپێکرنا قانوونێ و ڕێنمایان دکەن و هەر بنپێکرنەک و خرڤەبوونەک، دێ روو ب روو سزایێن قانوونی بن.
ئەڤرۆ ئێکشەمبێ 29 ئادارا 2020 وەزارەتا ناڤخۆ یا حکومەتا هەرێمێ د راگەهاندنەکێ دا بەلاڤکریە، ب مخابنیڤە د ڤان چەند رۆژان دا، خەلکەکێ نە بەرپرس، ب ئاشکرا داخوازا بنپێکرنا قانوونێ و پێگیرنەبووینە ب رێکار و ڕێنمایێن ساخلەمیێ و بزاڤا خوەنیشاندانان دکەن، دخوازن ب مەرەمێن خوە یێن تایبەتی بەرژەوەندیێن گشتی روو ب روو مەترسیان بکەن.
دەقێ وێ راگەهاندنێ:
ئەڤرۆ نیوز:
ئه‌ڤرو ئێڤارى 29-3-2020 فه‌رهاد ئه‌مین ئه‌تروشى پارێزگه‌رێ دهۆكێ و ب ئاماده‌بوونا د.نزار عسمەت رێڤه‌به‌رێ گشتى یێ ساخله‌میا پارێزگه‌ها دهۆکێ و زكرى به‌شیر خودانێ كومپانیا كاڤین گروپ نه‌خوشخانا كاڤین یا گومانێلكریێن ڤایروسێ كورونا ڤه‌كر.
پارێزگا‌رێ دهوكێ گه‌ریانه‌ك لناڤ ژوور وكارگێریا نه‌خوشخانێ كر و ژنێزیك سه‌حكره به‌رهه‌ڤیا نه‌خوشخانێ بۆ پێشوازیكرنا گومانلێكریێن ڤایروسێ كۆرۆنا.
پارێزگا‌رێ دهوكێ ده‌ست خوشى وسوپاسیا وه‌به‌رهێنه‌ر و خێرخواز زكرى به‌شیر كر ل دور ڤێ ده‌ست پێشخه‌ریێ كو ئه‌ڤ نه‌خوشخانه خستیه دخزمه‌تا ساخله‌میێ دا.
هه‌روه‌سا سوپاسیا هه‌موو سه‌رمایه‌دار وخێر خوازا تایبه‌تى ده‌زگه‌هێ وه‌به‌رهێنانێ یێ پارتى كر كو وه‌كو خو به‌خش هه‌ڤكارى ل گه‌ل ژوورا ئوپه‌راسیونا كرییه بۆ هاریكاریكرنا نه‌خوشێن ڤایروسێ كۆرۆنا و سوپاسیا وان خێر خواز و سازیان ژى كر یێن هاریكاریا ده‌ست كورتێن پارێزگه‌هێ كرین و سوپاسیا خه‌لكێ پارێزگه‌هێ كر كو هه‌تا نوكه زور دهاریكار بووینه ل گه‌ل ژوورا عه‌مه‌لیاتا بۆ بجهئینانا رێنما و بریارێن حكومه‌تا كوردستانێ و ژوورا ئوپه‌راسیونا، داخواز ژ خه‌لكێ پارێزگه‌هێ كر كو پتر د هشیار و هاریكار بن ل گه‌ل لایه‌نێن په‌یوه‌ندیدار ژبۆ بجهئینانا هه‌موو رێنما و بریارێن حوکمه‌تا كوردستانێ و ژوورا عه‌مه‌لیاتا بۆ وێ یه‌كێ ئه‌ڤ نه‌خوشیه ژ هه‌موو خه‌لكێ پارێزگه‌هێ بهێته دووركرن.
هه‌روه‌سا سوپاسیا تیمێن ساخله‌میێ و؛ده‌زگه‌هێن ئێمناهیێ كر كو پلانا ژوورا ئوپه‌راسیونا یا به‌رهنگاربوونا ڤایروسێ كۆرۆنا ب ره‌نگه‌كێ رێك و پێك بجهـ دئینن.
پارێزگا‌رێ دهۆكێ گوت ژی: ئه‌م داخوازا لێبورینێ ژ هه‌موو خه‌لكێ پارێزگه‌هێ دكه‌ین كو ژ سه‌ر كار و كاسبكاریا رۆژانه هاتینه دووركرن و زه‌ره‌رمه‌ند بووینه، لێ ئه‌ڤ بریاره هه‌موو ژبۆ به‌رژه‌وه‌ندیا گشتى بووینه كو خه‌لكێ مه ژ ڤایروسێ كۆرۆنا بهێنه پاراستن و،ئه‌م یێ كار دكه‌ین كو وه‌جبه‌كا ئاهێن خوارنێ یا بله‌ز ل سه‌ر هه‌موو خه‌لكێ پارێزگه‌هێ به‌لاڤكه‌ین، هه‌روه‌سا ده‌زگه‌هێ خێر خوازێ بارزانى ژى (50) هزار به‌هرە ئاماده كرینه ل سه‌ر خه‌لكێ هه‌موو پارێزگه‌هێ ب هه‌موو قه‌زا ڤه به‌لاڤكه‌ت.
گۆت ژی: مه هزر ل هه‌موو تشته‌كێ كریه كو د به‌رژه‌وه‌ندا خه‌لكێ مه دابن و رۆژانه كومبوونێن به‌رده‌وام دهێنه سازكرن و هه‌موو بابه‌تێن گرێداى ب ره‌وشا وه‌لاتیان ڤه دهێنه به‌حسكرن و دڤێت ئه‌م خوە ب پارێزین دا ئه‌ڤ په‌تایه بهێته دووركرن.
ژلایێ خوڤه رێڤه‌به‌رێ گشتى یێ ساخله‌میا دهۆکێ د. نزار عسمەتی گۆت: ڤەکرنا ڤێ نه‌خۆشخانێ دێ بیته هاریكار بۆ حه‌واندنا گومانلێكریێن نه‌خۆشیا ڤایروسێ كۆرۆنا و هه‌ر گومانلێكریه‌ك ژ 24- 48 ده‌م ژمێرا دێ ل ڤێ نه‌خوشخانێ مینیت هه‌تا ئه‌نجامێن پشكنینێ بۆ ده‌ردكه‌ڤن، هه‌روه‌سا بارێ نه‌خوشخانێن دى دێ هێته سڤكرن و سوپاسیا خێرخواز زكرى به‌شیری كر بۆ ئاڤاكرنا ڤێ نه‌خوشخانێ وته‌رخانكرنا جهێن دى بۆ كه‌ره‌نتیكرنا وه‌لاتیان.
سه‌رپه‌رشتێ ئاڤاكرنا نه‌خوشخانێ ئه‌ندازیار كامیران عەبدوللا گوت: ئەڤ نه‌خوشخانه ژ ( 45) ته‌ختان پێك دهێت و هه‌موو پێدڤیێن نۆشدارى وه‌كو ته‌خت و ته‌له‌فزیون و هێلا ئنترنێتێ و یه‌كه‌یێن كارگێرى دناڤدا هه‌نه پرۆژه دماوێ 7 هه‌تا نه‌هـ رۆژان دا هاتیه دورستكرن.
ئه‌ڤرۆ نیوز ، زنار تۆڤى:
د. جه‌گه‌ر رێكانى، ماسته‌ر ب ئێشێن وه‌بایێ ل نبراسكا/ ئه‌مریكا، دكتۆرا ب ئیشێن هناڤا، كولۆرادۆ/ ئه‌مریكا، دكتۆرا ب په‌نجه‌شێرێن خوینێ ل جۆنز هوپكنز/ ئه‌مریكا وه‌رگرتینه، د دیداره‌كێ دا بۆ ئه‌ڤرۆ نیوز دیار كر: د نوكه دا چ ڤاكسین ل به‌ر ده‌ست نینن بۆ ڤایرۆسێ كۆرۆنا و چ چاره‌سه‌ریێن تایبه‌ت ژى نینن ژ بۆ ڤى ڤایرۆسى، له‌وما چه‌كێ مه یێ سه‌ره‌كى ژبۆ به‌رگریێ ل دژى ڤى ڤایرۆسى خوه پاراستنه، خوه پاراستن ژى سێ ته‌وه‌ران ب خوه‌ڤه دگریت.
هێشتا گۆت: ته‌وه‌رێ ئێكێ ژى ته‌وه‌رێ كه‌سایه‌تیه،ئه‌و ژى شووشتنا ده‌ستان ب ئاڤا گه‌رم و سابوونێ، كو نه كێمتر بیت ژ 20 چركه‌یان، پێدڤیه چه‌ندین جاران د رۆژێ دا ئه‌ڤ كریاره بهێته ئه‌نجامدان، هه‌روه‌سا پێدڤیه مرۆڤ ده‌ستێ خوه نه‌كه‌ته ده‌ڤ و دفن و چاڤێن خوه، چونكى ئه‌ڤ جهه د هه‌ستیارن ژبۆ ڤه‌گۆهاستنا ڤى ڤایرۆسى.
ته‌وه‌رێ دویێ ته‌وه‌رێ ناڤمالێ یه، دڤێت كه‌ره‌ستێن ناڤمالێ بهێنه تافیل كرن، ب مادێ دیتۆلى و دڤێت رێژا كحولى تێدا( 60_70%) بیت، هه‌كه ئه‌ڤ ماده یێ به‌رده‌ست نه‌بیت، مرۆڤ دشێت فاسێ ب كار بینیت بۆ شووشتنا كه‌لوپه‌لان و ب ره‌نگه‌كێ تایبه‌ت، ئه‌و ژى تێكه‌لكرنا پێنج كه‌فچكێن فاسێ ل گه‌ل سێ لتر و نیڤێن ئاڤێ، پاشى بۆ تافیلكرنێ ب كار بینین.
ئه‌و چه‌ند ژى دیار كر: ده‌رباره‌ى خوارنێ ژى پرانیا خوارنێن رۆژهه‌لاتا ناڤین، ڤایرۆسێ كۆرۆنا یێ ناڤه‌گوهێزن، چونكى ئه‌و خوارنێن دهێنه كه‌لاندن چ مه‌ترسى ل سه‌ر وان خوارنان نینه، ئه‌ڤێن نه‌هێنه كه‌لاندن، وه‌كو فێقى و كه‌سكاتى، پێدڤیه باش ب ئاڤا گه‌رم و كه‌فا سابوونێ بهێنه شووشتن و باش بهێنه هشك كرن به‌رى خوارنێ، دیسان دڤێت جلك ژى ب ئاڤا گه‌رم و ل گه‌ل فاسێ ژى بهێنه شووشتن و باش بهێنه هشك كرن به‌رى ل به‌رخوه بكه‌ن.
ته‌وه‌رێ سییێ ته‌وه‌رێ جڤاكیه، ئه‌و ژى ئه‌وه دڤێت مرۆڤ خوه ژ جهێن قه‌ره‌بالغ دوور بكه‌ت، چونكى هه‌كه كه‌سه‌ك هه‌لگرێ ڤى ڤایرۆسى بیت و بچیته جهه‌كێ قه‌ره‌بالغ و دێ گه‌له‌ك خه‌لكێ تووشى ڤى ڤایرۆسى كه‌ت، ئه‌ڤه دێ بیته بارگرانى بۆ حوكمه‌تا هه‌رێمێ و مه نه‌ڤێت ئه‌و وه‌كو وان وه‌لاتان لێ بهێین یێن كو گه‌له‌ك تووشبوویى هه‌ین.
د. جه‌گه‌ر هێشتا دبێژیت: دڤێت ب ره‌نگه‌كێ عاقلانه ئه‌م سه‌رده‌ریێ ل گه‌ل ڤێ ره‌وشێ بكه‌ین، دڤێت ئه‌و د گه‌شبین ژى، چونكى 80% یا تووشبوویان چێدبن، ئه‌ڤه خاله‌كا گرنگه و ئه‌وێن ژ ڤى ڤایرۆسى قورتال دبن، جۆره‌كێ به‌رگریا له‌شى بۆ چێدبیت، دیسان ئه‌وێن دهێنه داخلكرن ل ژێر چاڤدێریا چر ژى، 97% یا خه‌لكێ چێدبنه ڤه، ئه‌ڤه ژى خاله‌كا ئه‌رێنى یه، دیسان دڤێت ئه‌م مفاى ژ مانا خوه د مالدا بمینین و ده‌رنه‌كه‌ڤین، دیسان په‌یوه‌ندیێن خێزانى ب هێز بێخین و خوه پتر نێزیكى ئێك بكه‌ین و ئه‌ڤه دبیته قه‌بخوازیه‌ك ژى، كو ئه‌م مرۆڤ دشێین سه‌ره‌ده‌ریێ ل گه‌ل ڤایرۆسه‌كێ بكه‌ین، كو دبیت هه‌بوونا مه ل سه‌ر روویێ ئه‌ردى تێك بده‌ت، لێ مه ئیراده یا هه‌یى و ئه‌م دشێن ل دژى ڤى ڤایرۆسى راوه‌ستین.
ناڤهاتى گۆت ژى: دڤێت ئه‌م ڤى ڤایرۆسى سڤك وه‌رنه‌گرین، چونكى هه‌ر وه‌لاتیه‌كێ مه پێ بمریت، بۆ مه ب گه‌له‌كێ یه، دیسان پتریا قوربانیان كه‌سێن دانعه‌مرن و ئه‌وێن یێن كو ئێشێن دومدرێژ هه‌ین، له‌وما پتر مه‌ترسى ل سه‌ر كه‌سێن دانعه‌مر هه‌یه، دڤێت ئه‌م هه‌موو پێگیریێ پێ بكه‌ین، چونكى هه‌كه كه‌سێن ساخله‌م پێگیریێ ب ئه‌ڤان رێنمایان بكه‌ن، ئه‌ڤه دبیته هێمایا وه‌فاداریا وان بۆ مال و جیران و كه‌سوكارێن وان، هه‌ر چه‌نده گه‌نج ژى ب رێژا 1% ب ڤى ڤایرۆسى دمرن.
ئه‌ڤرۆ نیوز:
وه‌زاره‌تا ساخله‌می و ژینگه‌ها عیراقێ د راگه‌هاندنه‌كێ دا بلاڤكر، ل ده‌مێ 24 ده‌مژمێرێن بوری دا 41 توشبوویێن نوو ب ڤایرۆسێ كورونا كوڤید 19 هاتینه توماركرن.
لگۆری ئه‌وێ راگه‌هاندنا وه‌زاره‌تا ساخله‌می و ژینگه‌ها عیراقێ به‌لاڤكر، رێژه‌یا زۆرا توشبوویێن نوو ل پارێزگه‌ها كه‌ربه‌لا هاتیه توماركرن كۆ ژماره‌یا وان 11 كه‌سن و ل هه‌ر ئێك ل به‌غدا و به‌سره و هه‌ولێرێ هه‌شت حاله‌ت هاتینه توماركرن، ل نه‌جه‌ف 5 حاله‌ت و ل سلێمانیێ ئێك حاله‌ت هاتیه توماركرن ل ده‌مێ 24 ده‌مژمێرێن بوری چ حاله‌تێن مرنێ ب ئه‌گه‌رێ ڤایرۆسێ كورونایێ ل عیراقێ نه‌هاتینه توماركرن.
د راگه‌هاندنا وه‌زاره‌تا ساخله‌میا عیراقێ دا هاتیه كۆ 11 حاله‌تێن ساخ بوونێ ل سلێمانێ و دهۆك و دیوانێ هه‌بووینه.
تانوكه ل ته‌ڤایا عیراقێ توشبوویێن ب ڤایرۆسێ كورونایێ 547 حاله‌تن و دناڤا توشبوویێن بوری دا 143 كه‌س ب ته‌مامی ساخ بووینه، هه‌ڤده‌م ژماره‌یا ئه‌و توشبووێن مرین گه‌هشتیه 42 كه‌سان.
ئەڤرۆ نیوز:
وەزارەتا ساخلەمیێ یا هەرێما کوردستانێ بەری دەمەکێ راگەهاند کو ئەو نوشدارێ بەری دەمەکێ ل هەولێرێ تووشی ڤایرۆسێ کۆرۆنا یێ ببوو ب تەمامی باش بوویە و دێ ڤەگەریتە ڤە مالا خوە.
وەزارەتا ساخلەمیێ ئاماژە ب هندێ ژی دکەت کو ل هەولێرێ ژ بلی وی نوشداری دو نەخوشێن دی یێن کۆرۆنا یێ ژی باش بووینە و دێ ڤەگەرنە ڤە مالێن خوە.
ئه‌ڤرۆ نیوز:
وه‌زاره‌تا ساخله‌میا ئیسپانیا ئاماره‌كا نوو یا توشبو و مریان ب ڤایرۆسێ كوروناێ به‌لاڤكر و تێدا هاتیه ژماره‌یا ئه‌و كه‌سێن ب ئه‌گه‌ری ڤایرۆسێ كورونایێ مرین بوونه شه‌ش هزار و 528 كه‌س.
لگۆری ئه‌وێ راگه‌هاندنا وه‌زاره‌تا ساخله‌میا حكومه‌تا ئیسپانیا، توشبوویێن ل ئیسپانیا گه‌هشته 74 هزار و 235 حاله‌ت و 12 هزار و 285 توشبووی ژی ساخ بووینه، چار هزار و 165 حاله‌تێن مه‌ترسیدار ژی هه‌نه و ل بن چاڤدێریا چردانه.
وه‌زاره‌تا ساخله‌میا ئیسپانیا ئه‌و چه‌نده ژی راگه‌هاند كۆ دبیت ل پاشه‌رۆژێ ریب ری هنده‌ك گرفتان بیت به‌لێ به‌رهه‌ڤیێن باش هاتینه كرن داكۆ ب شیێن زال بین ل سه‌ر هه‌ر گرفته‌كا دروست دبیت.
ئه‌ڤرۆ نیوز:
وه‌زیرێ ساخله‌میا حكومه‌تا هه‌رێما كوردستانێ راگه‌هاند: درێژكرنا قه‌ده‌غه‌یا هاتنوچونێ ژلایێ وه‌زاره‌تێن په‌یوه‌ندیدار ڤه دهێته هه‌لسه‌نگاندن ئه‌ڤرۆدێ بریارا پێدڤی ل سه‌ر هێته‌دان.
د. سامان به‌رزنجی وه‌زیرێ ساخله‌میا حكومه‌تا هه‌رێما كوردسانێ د پرێس كۆنفرانسه‌كی دا راگه‌هاند بریارا درێژكرنا بهێنڤه‌دانێ بۆ فه‌رمانگه‌ه و سازیێن حكومه‌تا هه‌رێما كوردستانێ بریاره‌كه كۆ هه‌لسه‌نگاندن ل سه‌ر هاتیه‌كرن و ژلایێ وه‌زاره‌تێن په‌یوه‌ندیدار ڤه ب تایبه‌تی وه‌زاره‌تا په‌روه‌ردێ و خاندنا بلند و ساخله‌میێ ڤه ل كۆمبوونا دهی یا جڤاتا وه‌زیران دانوستاندن ل سه‌ر هاتیه‌كرن.
وه‌زیرێ ساخله‌میا حكومه‌تا هه‌رێما كوردسانێ ئه‌و چه‌نده ژی دیاركر بۆ درێژكرنا قه‌ده‌غه‌یا هاتنوچونێ هه‌لسه‌نگاندن ل به‌رده‌ستن و ل گه‌ل وه‌زاره‌تێن په‌یوه‌ندیدار د دانوستاندنێ داینه ئه‌ڤرۆ دێ بریارا پێدڤی ل سه‌ر هێته دان.
د. سامان به‌رزنجی وه‌زیرێ ساخله‌میا حكومه‌تا هه‌رێما كوردستانێ گۆت قه‌ده‌غه‌یا هاتنوچونێ رێگرتنه ژ به‌ربه‌لاڤبوونا ڤایرۆسێ كورونایێ و ب شیوه‌یه‌كی قه‌ده‌غه‌یا هاتنوچونێ و كه‌ره‌نتینه‌كرنا ئه‌وێن ژ ده‌رڤه هاتین رێگرتنه‌كا باش بۆ نه به‌لاڤبوونا ڤایرۆسێ كورونایێ.
ئه‌ڤرۆ نیوز:
ناڤدارترین پەژیكێن جیهان ڤەگرتی:
– دناڤبەرا سالێن 165-180ز دا كولا رەش (تاعون)یا ئەنتونی ل ئیمبراتۆریا رۆمانی دا و ژ وێرێ گەهشتە سەرانسەری جیهانی و نێزیكی 5 ملیۆن كەس كوشتن.
– د ناڤبەرا سالێن 541-542ێ دا كولا رەش یا جاستنیانی ئیمبراتۆریا بیزەنتی ڤەگرت و گەهشتە هەمی جیهانی و نێزیكی 30 ملیۆن كەس كوشتن.
– ل سالا 735ێ پەژیكا خوریكان (الجدری)ا ژاپونی ل تۆكیۆ بەلاڤ بوو و ژ وێرێ گەهشتە وەلاتێن دەوروبەر و نێزیكی ملیۆن كەس كوشتن.
– د ناڤبەرا سالێن 1347-1351ێ دا كولا رەش یا دمەلی (الطاعون الدملي) ژ نێزیكی چینێ دیار بوو و گەهشتە ئیتالیا و چوو هەمی جیهانێ، هنگی ناڤێ مرنا رەش (كو دبیت ناڤێ كولا رەش یا كوردی ژ وێ هاتبیت) ل سەر هاتە دانان و پتر ژ 200 ملیۆن كەس كوشتن.
– ل سالا 1520ێ خورێكێ جیهان ڤەگرت و 56 ملیۆن كه‌س كوشتن.
– ل سالا 1817 كۆلێرێ نێزیكی ملیۆن كەسان ل سەرانسەری جیهانێ كوشتن.
– ل سالا 1855 جورەكێ كولا رەش پەیدا بوو دگۆتنێ پەژیكا سیێ، ژ هەرێما یونان یا چینی دەركەفتن و سەرانسەری جیهانێ ڤەگرت و نێزیكی 12 ملیۆن كەس كوشتن.
– د ناڤبەرا سالێن 1889-1890ێ پەرسیڤا رۆسی بەڵاڤ بوو و ملیۆن كەس كوشتن.
– ل سالا 1918ێ پەرسیڤا ئیسپانی د سالەكێ دا 50 ملیۆن كەس كوشتن و چوارێكا مرۆڤێن جیهانێ ڤەگرتبوو.
– ل سالا 1923 كۆلێرێ نێزیكی ملیۆن كەسان ل سەرانسەری جیهانێ كوشتن.
– ل سالا 1956 پەرسیڤا ئاسیایی ل چینێ دەركەفت و ملیۆن كەس كوشتن.
– ژ سالا 1981ێ تا نوكە ئایدزێ پتر ژ 35 ملیۆن كەس كوشتینە.
– د ناڤبەرا سالێن 2009-2010ێ دا پەرسیڤا بەرازان ژ ئەمریكا و مەكسیك دەركەفت و جیهان ڤەگرت و پتر ژ 200 هزار كەسان بوونە قوربانی.
– د ناڤبەرا سالێن 2014 و 2016ێ دا ئیبۆلایێ 11 هزار كەس كوشتن و پشتی هنگی سارس و مێرسێ ژی سەدان مرۆڤ بوونە قوربانی.
– ژ دویماهیا 2019ێ تا نوكە پەژیكا كورونایێ یا بەردەوامە.
ئەڤجا ل مالا خۆ روینە و خۆ و خێزانا خۆ بپارێزە، هه‌كه نە، ب تنێ دێ ژمارە هێتە گوهۆڕین.
پێزانین ژ هژمارا فیسبوكی یا سه‌عید عوسمان هاتینه وه‌رگرتن
نيشاندان