ئەڤرۆ نیوز:
وەزارەتا ساخلەمیا هەرێما کوردستانێ راگەهاند، د بەردەوامیا پشکنینێ و گەڕیانێ لدووڤ گومانلێکریان، سێ تووشبوویێن ڤایرۆسێ کۆڕۆنا هاتنە دەست نیشانکرن، کو دو گەنجن د ژیێ (19) و (21) سالیێ دانە، خەلکێ دهۆکێ و ئامێدیێ نە و ژنەکا تەمەن (70) سالی ژی ل قەزا دەربەندیخانێ یە، هەموو بەرکەفتیێن تووشبوویێن بەری نوکەنە.
وەزارەتا ساخلەمیێ
28 ئادارا 2020
ئەڤرۆ نیوز، عەلی حاجی :
بەرپرسێ راگەهاندنا رێڤەبەریا ساخلەمیا زاخۆ د داخویانیەلێ دا بۆ ئەڤرۆ نیوز دیار کر ژ ئەگەرێ شەرەکێ دناڤبەرا هندەک گەنجان دا ل گوندێ سوریا یا سەر ب قەزا سێمێلێ ڤە کەسەکێ گیانێ خوە ژ دەستدا.
زێدەتر ئەمیر عەلی گوت : ل ئێڤاریا ئەڤرۆ روژا شەمبێی ل گوندێ سوریا یا سەر ب قەزا سێمێلێ ڤە ژ ئەگەرەکێ نەدیار شەرەک ب کێران دناڤبەرا هەژمارەکا گەنجان دا دروست دبیت و ژ ئەگەرێ دژواریا وی شەری چەند کێرەک ب گەنجەکێ دکەڤن و گیانێ خوە ژ دەست دەت و هەر دیسان دو کەسێن دیتر ژی بریندار بوینە و رەوشا ئێک ژ وان کەسان یا باش نینە و ل بەریا دەمەکێ کێم ئەو گەنجێن بریندار بوین بۆ باژێرێ دهوکێ هاتنە رەوانە کرن و هەتا نوکە ژی ئەگەرێن وی شەری نەهاتیە زانین.
ئەڤرۆ نیوز:
حوکمەتا هەرێما کوردستانێ ماوێ بهێنڤەدانا فەرمانگەهان ل هەرێما کوردستانێ هەتا 16 نیسانێ درێژ کر.
ده‌قێ راگه‌هاندنا پەیڤدارێ حكومه‌تا هه‌رێما كوردستانێ:
د چارچۆڤێ بەردەوامبوونا ڕێکارێن خۆپارێزیێ ل دژی ڤایرۆسێ کۆرۆنا ل ھەرێما کوردستانێ، بڕیار هاتە دان ب درێژکرنا ڕۆژانێن بهێنڤەدانێ ل سەرجەم وەزارەت و دەستە و فەرمانگەهـ و سازیێن ھەرێمێ و زانکۆ و پەیمانگەهـ و قوتابخانە و ناڤەندێن خواندنا حکومی و ئەھلی ( ژ بلی ھێزێن ئاسایشێ و ئاسایشا نافخۆ و سازیێن ساخلەمیێ)، ل ڕۆژا ئێکشەمبی رێکەفتی 29/3/2020 هەتاکۆ رۆژا پێنجشەمبی رێکەفتی 16/4/2020.
وەزارەتا ساخلەمیێ و وەزارەتێن خزمەتگوزاریێن گشتی دێ بەردەوام بن ل سەر پێشکێشکرنا خزمەتگوزاریێن گشتی و هەوارهاتنێ.
ئەڤرۆ نیۆز، قائید میرۆ:
گورەی ئاخفتنێن بەرپرس و بسپۆرێن ساخلەمیێ قەدەغەیا ھاتنوچوونێ کاریگەری لسەر کێمبوونا زیانێن ڤایرۆسا کۆرۆنایێ ھەبووینە و بەرپرسەکێ وەزارەتا ساخلەمیێ ژی دبێژیت، قەدەغەیا ھاتنوچوونێ رێگربوویە ل پەیدابوونا کارەساتان.
دکتۆر خالس قادر، رێڤەبەرێ گشتیێ دیوانا وەزارەتا ساخلەمی بۆ ئەڤرۆ نیۆز دیارکر” بڕیارا قەدەغەیا ھاتنوچوونێ کاریگەریەکا زۆر لسەر رێگریکرن ل بەلافبوونا ڤایرۆسا کۆرۆنایێ ھەبوویە و شیایە ببیتە رێگر ل ھەمبەر زیانێن کۆرۆنایێ، ئەز باوەرم ھەگەر تەدبیرێن حوکمەتا ھەرێما کوردستانێ نەبانە ئەڤە پێشبینیا روویدانا کارەساتان ھەبوو ل ھەرێما کوردستانێ و ھژمارەکا بەرچاڤا وەلاتیان دا تووشی ڤایرۆسا کۆرۆنایێ بن.
دکتۆر خالس قادر ئاشکراکر” ئەم دگەل درێژکرنا بڕیارا قەدەغەیا ھاتنوچووینێ نە ل ھەرێما کوردستانێ، چونکو ھەتا رادەیەکێ زۆر دێ مەترسیێن بەلاڤبوونا کۆرۆنایێ کێم بکەت و پێدڤیە ژی وەلاتی پێگیریێ ب بڕیارێن حوکمەتێ بکەن، چونکو مەرجێ سەرکەفتنا ھەرێما کوردستانێ بسەر کۆرۆنایێ پێگیریا وەلاتیانە بۆ خۆ پارێزیێ.
ئەڤرۆ نیوز:
موسەننا ئەمین پەرلەمانتارێ کورد ل بەغدا راگەهاند کو دهێتە چاڤەرێکرن ڤێ حەفتیێ عەدنان زورفی راسپاردیێ شیعان بۆ پێکئینانا کابینا نوو یا حوکمەتێ سەرەدانا هەرێما کوردستانێ بکەت.
ناڤهاتی دیار ژی کر زورفێ دێ ل گەل بەرپرسێن هەرێما کوردستانێ و سەرکردێن کورد ل دۆر چاوانیا پێکئینانا کابینا نوو یا حوکمەتێ دێ هەڤدتینان کەت.
ئەڤرۆ نیوز:
وەزارەتا دەرڤە یا ئەمریکا ئەڤرۆ راگەهاند کو بیست کەسایەتی و هندەک سازی ل عیراقێ هاریکاریا فەیلەقێ قودس یێ سەر ب سوپای پاسداران یێ ئیرانێ کرینە و ژ بەر هندێ ژی ئەمریکا دێ وان کەسان سزا دەت.
د داخۆیانیا وەزارەتا دەرڤە یا ئەمریکا دا ناڤێ چو کەسێن عیراقی نەهاتیە راگەهاندن، لێ هاتیە دیار کرن کو بەلگەیێن تەمام ل بەر دەست دا هەنە کو وان کەسان هاریکاریا سوپای پاسداران کرینە و هەروەسا وان دڤێت بەردەوام عیراق د بیاڤێ وزێ دا پێدڤی ب ئیرانێ بیت کو ئەو یەک ژی دهێتە رامانا پێشیلکرنا سەروەریا عیراقێ.
ئه‌ڤرۆ نیوز:
سه‌رۆك كۆمارێ ئیرانی راگه‌هاند: نێزیكی 100 هزار ملیار تیمه‌ن بۆ به‌رهنگاربوونا نه‌خوشیا ڤایرۆسێ كورونایێ ته‌رخانكرن.
میدیایێن فه‌رمی یێن ئیرانێ به‌لاڤكرن حه‌سه‌ن روحانی سه‌رۆك كۆمارێ ئه‌ڤرۆ ل جڤینا نیشتمانی بۆ به‌رهنگاربوونا كورونایێ راگه‌هاند: توشبوویێن ب ڤایرۆسی كورونایێ ری ل داكه‌تنێ كریه ل سه‌ر ئاسته‌كی راوه‌ستیاینه و دشیێن دڤێ ره‌وشێ دا ده‌ست پێ بكه‌ین و ساخله‌میێ بۆ وه‌لاتی ڤه‌گه‌رینن.
سه‌رۆك كۆمارێ ئیرانێ ئه‌و چه‌نده ژی دیاركر د ئه‌ڤێ ره‌وشا دژوار دا، به‌لێ 20% یا بودجا ئیسال كۆ نێزیكی 10 ملیار تیمه‌نان دبیت بۆ به‌رهنگاربوونا كورونایێ ته‌رخان بكه‌ین ئه‌ڤ چه‌نده بۆ هه‌موو جیهانێ جهێ حێبه‌تی بوونێ یه.
ئه‌ڤ چه‌نده ل ده‌مه‌كی دایه كۆ زێده‌تری 30 هزار وه‌لاتی یێن ئیرانی تووشی ڤایرۆسێ كورونایێ بووینه .
ئەڤرۆ نیۆز، قائید میرۆ:
ب ئەگەرێ بەلافبوونا ڤایرۆسا کورونا چەندین بڕیارێن گرنگ ل ھەرێما کوردستانێ ھاتینە بەلاڤکرن و بسپۆرەکێ دەروونی ژی ئاشکراکر، وەلاتیێن پێگریێ ب رێنمایان دکەن کێمتر مەترسیا کورونایێ لسەرە.
دکتۆر کەریم قەرەچەتانی، بسپۆرێ دەروونی بۆ ئەڤرۆ نیۆز دیارکر” راستە بەلاڤبوونا ڤایرۆسا کورونا مەترسی بۆسەر ژیانا مرۆڤان ل سەرانسەری جیھانێ پەیداکریە، بەلێ ژلایێ زانستێ دەروونی ڤە نابیت مرۆڤ ھند خوە بترسینیت ئەڤە نەک تنێ بۆ ڤایرۆسا کورونا بەلکۆ بۆ ھەموو نەساخیێن دیژی راستە، ژبەرکو ترسا بێ سنور بخوە دبیتە ئەگەرێ پەیداکرنا چەندین نەساخیان د لەشێ مرۆڤی دا، ئەز نابێژم بلا کەس نەترسیت، بەلێ ھندەک ترسیانا زۆرژی بخوە نەساخیە.
ئەڤی بسپۆرێ دەروونی گۆت” دەزگەھێن راگەھاندنێ و تۆڕێن کۆمەلایەتی رۆلەکێ بەرچاف ھەیە ل بەلافکرنا ترسێ دناڤا جڤاکی دا و نابیت ب چو شێوەیەکی ھەموو کەس لدۆر ڤایرۆسا کۆرۆنایێ زانیاریان بەلاف بکەن، چونکە ژ قەبارێ خوە زێدەتر دھێتە مەزنکرن، بەرۆڤاژی وەک خوە ب ھشیاری سەرەدەری دگەل کۆرۆنایێ بھێتەکرن، بۆ نموونە بابەتێ ڤایرۆسا کۆرۆنایێ ھند یێ مەترسی نینە ھندی ئەم وەک مەترسی دبینین، ل حەفتیا بۆری د ئێک دەقیقەکێ کەسەکی ل سلێمانیێ چوار ئەندامێن خێزانا خوە کوشتن، ئەڤە ھەیڤەکە ڤایرۆسا کۆرۆنا لھەرێما کوردستانێ ھەیە و تنێ دو کەس ب کۆرۆنایێ گیانێ خوە ژدەستدایە.
دکتۆر کەریم قەرەچەتانی ئەویەکژی ئاشکراکر” شیرەتا من بۆ وەلاتیان ئەڤە گڤاشتنێن زۆر نە ئێخن سەر مەژیێ خوە، زێدەتر بزاڤان بکەن رێنمایێن ساخلەمیێ بجە بینن و گوھێ خوە بدەن کەسێن بسپۆر و شارەزا، ژبەرکو دوماھیێ تنێ ئەو دێ مفادار و پاراستی بن یێن پێگریێ ب رێنمایان دکەن، کێمتر ڤایرۆسا کۆرۆنا مەترسی لسەر وان ھەیە.
ئه‌ڤرۆ نیوز:
دو فه‌رمانده‌یین بلندێن سوپایێ عیراقێ ب تومه‌تا گه‌نده‌لیێ ره‌وانه‌ی دادگه‌ها سه‌ربازی هاتنه‌كرن.
لگۆری نفیساره‌كێ كۆ ئیمزایا عوسمان غانمی سوپا سالارێ عیراقێ ل سه‌ره لیوا روكن ناسر ئه‌حمه‌د غنام داود فه‌رمانده‌یێ ئوپراسیونێن ئه‌نبار و موقه‌دم سه‌میر عابد حه‌مادی ل فه‌رمانده‌ییێ ره‌وانه‌ی دادگه‌ها سه‌ربازی هاتنه‌كرن.
ئه‌و دو فه‌رمانده‌یێن عیراقی ب تومه‌تا گه‌نده‌لیێ و دزینێ ژ پارێن سوپای ب ماده‌یا 63 ئێكێ و چارێ ل یاسایا سزادانا سه‌ربازی ل دادگه‌ها سه‌ربازی دێ هێنه دادگه‌هكرن، كۆ لگوری ئه‌وێ ماده‌یی سزایێ وان دگه‌هته 10 سال زیندانكرن و هه‌كه دزی ل ده‌مێ شه‌ری دا هاتبیته‌كرن سزایێ وان دبیته 15 سال زیندانیكرن.
نيشاندان