ئەڤرۆ نیوز:
وەزارەتا ناڤخوە یا حوکمەتا هەرێما کوردستانێ راگەهاند کو ژ بۆ پاراستنا وەلاتیان و رێگریکرن ژ بەلاڤبوونا ڤایرۆسێ کۆرۆنایێ بریار هاتیە دان قەدەغەیا هاتنوچوونێ ل هەرێما کوردستانێ هەتا ئێکێ نیسانێ بهێتە درێژکرن.
د داخۆیانیا وەزارەتا ناڤخوە دا ئەو یەک ژی هاتیە دیارکرن کو ل دەمژمێر ١٢ شەڤێ هەتا شەشێ سپێدێ ژی ب چو رەنگەکێ رێ ناهێتە دان کەس هاتنوچوونێ بکەت.
ئەڤرۆ نیوز:
وەزارەتا نافخۆ یا هەرێما کوردستانێ قەدەغەیا هاتنوچوونێ هەتا 1 نیسانێ ل هەموو هەرێما کوردستانێ درێژ کر و گۆتیە، هەر کەسەکێ پابەند نەبێت دێ هێتە سزادان.
هەروەسا وەزارەتا نافخۆ یا هەرێما کوردستانێ گۆتیە، هیچ هاتنوچوونەک دناڤبەرا دەمژمێر 12:00 شەڤێ هەتا 06:00 سپێدێ یا رێپێدایی نینە، ژ بلی ترۆمبێلێن هێزێن ئەمنی، ئەوێن ئەرکێ خوە دا و ترۆمبێلێن ئەمبولانس و ئەوێن رێپێدایی.
ئەڤرۆ نیۆز، قائید میرۆ:
کۆردو شابان، پەیڤدارێ وەزارەتا باژێڕڤانیێ بۆ ئەڤرۆ نیۆز دیارکر” سەرەڕای کو نوکە بھێنڤەدانا فەرمیە لھەرێما کوردستانێ، بەلێ تیمێن باژێڕڤانیان لسەرانسەری ھەرێما کوردستانێ مژۆلی پاقژکرنا باژێڕ و بجە ئینانا رێنمایێن خۆپارێزیێ نە، بتایبەتی گەھاندنا ئاڤا پاقژ و ساخلەم بۆ ھەموو ئاکنجیێن ھەرێما کوردستانێ.
پەیڤدارێ وەزارەتا باژێڕڤانی ئاشکراکر” وەزارەتا باژێڕڤانیێ یا ھاریکارە دگەل وەزارەتێن پەیوەندیدار بۆ بەرھنگاربوونا ڤایرۆسا کۆرۆنا.
کۆردو شابان گۆتژی” وەزارەتا باژێڕڤانیان ئەرد بۆ ئاڤاکرنا پێنج نەخۆشخانەیێن تایبەت ب ڤایرۆسا کۆرۆنایێ بەرھەڤکریە یاکو بڕیارە ژلایێ حوکمەتا ھەرێما کوردستانێ و کەسێن خێر خواز بھێنە ئاڤاکرن.
ئەڤرۆ نیوز:
دەزگەهێ خێرخوازی یی بارزانی هێلا گەرم بۆ خەلکێ کێم دەرامەت و هەژارێن دهۆکێ راگەهاند کو تێدا هاتیە دیار کرن دو هێلێن تەلەفونێ سپێدێ دەمژمێر ٩ هەتا ٦ ئێڤاری بێ بەرامبەر د خزمەتا وەلاتیان دانە، ئانکۆ پەیوەنی کرن دێ بێ بەرامبەر بیت.
ژ دەمژمێر 9:00 سپێدی تا دەمژمێر
6:00 ئێڤارێ دێ خزمەت دا بیــت
07508196671
07508313237
ئەڤرۆ نیوز:
ژئەنجامێ ئاڤ رابون ولەهیێن ل روژێن دەربازبوی ل سنورێ پارێزگەها دهوکێ پەیدابوین زیانێن مەزن گەهشتبونە خەلکێ پارێزگەهێ و ژبەر وان زەرەر و زیانا رێزدار نێچیرڤان بارزانی سەروکێ هەرێما کوردستانێ پەیوەندییەکا تێلەفونی دگەل بەرێز فەرهاد ئەمین ئەتروشی ئەنجامدابو وهەڤخەمی وسەرەخوشیێن خو گەهاندبونە زیانڤێکەفتیان ومالباتێن قوربانیان وکوژمێ ئێک ملیار دینارا بو زیانڤێکەفتیا تەرخانکربو و هەرئەڤرو ٢٢ـ٣ـ٢٠٢٠ بەرێز فەوزی حەریری سەروکێ دیوانا سەروکاتیا هەرێما کوردستانێ سەرەدانا پارێزگەها دهوکێ کر وژلایێ بەرێز فەرهاد ئەمین ئەتروشی پێشوازی لێ هاتە کرن و ئەو کوژمێ پارەی کو ئێک ملیار دینار بوون رادەستی پارێزگەرێ دهوکێ کرن ژ بو قەرەبوکرنا زیانڤێکەفتیێن لەهیا …هەژی گوتنێ یە بەری نوکە ژی سەروکێ حکومەتا کوردستانێ بەرێز مەسرور بارزانی ٢ملیار دینار ب رێکا وەزیرێ نافخو گەهاندبونە پارێزگەها دهوکێ ژبو قەرەبوکرنا زیانڤێکەفتیێن لەهیا ل هەموو پارێزگەهێ.
ژلایێ خوڤە پارێزگەرێ دهوکێ بناڤێ خو و خەلکێ پارێزگەهێ سوپاسیا هەردوو بەرێزان سەروکێ هەرێما کوردستانێ وسەروکێ حکومەتا هەرێما کوردستانێ کر ل دور ڤێ دەستپێشخەریا وان بو قەرەبوکرنا زیانڤێکەفتیێن لەهیا ل پارێزگەها دهوکێ.
ئه‌ڤرۆ نیوز:
سه‌رۆكێ حكومه‌تا هه‌رێما كوردستانێ په‌یامه‌ك به‌لاڤكر و تێدا هاتیه كۆ داخازا پێگیربوونێ ب رێنمایان ژلایێ وه‌لاتیێن كوردستانێ ڤه دكه‌ت.
د په‌یامه‌كێ دا سه‌رۆكێ حكومه‌تا هه‌رێما كوردستانێ مه‌سرور بارزانی راگه‌هاندیه جهێ داخێ یه ژماره‌یا توشبوویان ل هه‌رێما كوردسانێ ب تایبه‌تی ل پارێزگه‌ها سلێمانیێ د زێده‌بوونێ دایه، ئه‌گه‌ر ژی ئه‌و رێكارێن هاتینه دانان ژ لایێ وه‌لاتیانڤه پێگیری پێ ناهێته‌كرن.
ئه‌ڤه ژی ده‌قێ په‌یاما سه‌رۆكێ حكومه‌تا هه‌رێما كورستانێ یه:-
. هیڤیدارم وه‌لاتیێن خوشتڤی پێگیری رێنمایان بن.
.جهێ داخێ یه ژماره‌یا توشبوویان ل هه‌رێما كوردستانێ ب تایبه‌تی ل پارێزگه‌ها سلێمانیێ د بلند بوونێ دایه، ئه‌گه‌ر ژی ئه‌وه كۆ وه‌ك پێدڤی هه‌ڤكاریا سازیێن په‌یوه‌ندیدار ناهێته‌ركرن و رێكارێن خۆ پاراستنێ ژلایێ هنده‌ك وه‌لاتیان ڤه ناهێنه بجهكرن.
داخازێ ژ هه‌موو وه‌لاتی و ئاكنجیێن هه‌رێما كوردستانێ دكه‌م پێگیر بن ب رینمایێن هه‌ردو وه‌زاره‌تێن ساخله‌می و ناڤخۆ ژبوی رێك ل به‌لاڤبوونا زێده‌ترا ڤایرۆسێ كورونایێ بهێته‌گرتن.
زێده‌باری ئاگه‌هداركرن و بكار ئینانا هه‌موو رێكارێن پێدڤی ژلایێ سازیێن حكومه‌تێ، جهێ داخێ یه هه‌تا نوكه هنده‌ك سه‌رپێچیكرن ژلایێ هنده‌ك كه‌سان ڤه به‌رده‌وامه و ئه‌و ره‌فتارێن وان نه بتنێ ژیانا وان به‌لكو ژیانا كه‌س و كارێن خۆ و ته‌ڤایا خه‌لكێ كوردستانێ دئێخنه دمه‌ترسیێ دا.
جهێ داخێ یه ژماره‌یا توشبوویان ل هه‌رێما كوردستانێ ب تایبه‌تی ل پارێزگه‌ها سلێمانیێ ل بلند بوونێدایه، ئه‌گه‌ر ژی ئه‌و كۆ وه‌ك پێدڤی هه‌ڤكاریا سازیێن په‌یوه‌ندیدار نه‌هاته‌كرن و رێنمایی ژلایێ هنده‌ك وه‌لاتیان ڤه ناهێنه بجهكرن، سه‌رپێچیكرن ل خالێن توخیبی هه‌تا نوكه به‌رده‌وامه.
چ به‌رژوه‌ندیێن تایبه‌ت ئه‌وێ چه‌ندێ نائینن ژیانا خۆ خه‌لكی بێخیه دمه‌ترسیێ دا، دڤێرێ دا ب پێدڤی دزانم سازیێن په‌یوه‌ندیدار یێن حكومه‌تێ رێكێن توند هه‌مبه‌ر سه‌رپێچیكاران بكار بینن و ئه‌وێن یاریێ ب ژیانا خه‌لكی دكه‌ن دێ ریب ری پێرابوونێ یاسایی بن.
هیڤی دارم ژ وه‌لاتیێن خوشتڤی مه‌ترسیا ئه‌ڤی ڤایرۆسی بزانن زێده‌تر ب جدی وه‌ربگرن، ئه‌ڤا ل سه‌ر حكومه‌تێ ئه‌نجام دا دێ به‌رده‌وام ژی دبین، به‌لێ پێدڤیه ئه‌م هه‌می هه‌ڤكاریا ئیك بكه‌ین رۆلێ حكومه‌ت و وه‌لاتیان دڤێ ره‌وشێ دا ته‌مامكه‌رێن ئێكن.
شیانێن سیسته‌مێ ساخله‌میا هه‌رێمێ توخیبداره و ل ده‌مێ به‌لاڤبوونا زێده‌ترا ڤایرۆسێ كورنایی ئاریشه دێ زێده‌تربن و ئه‌وی ده‌می گازنده‌كرن ب هه‌وارا چ كه‌سان ڤه ناچیت، هه‌ر ب رژد نه‌وه‌رگرتن، كێمته‌رخه‌میه‌ك دشێت ب بیته ئه‌نجامێ كاره‌ساته‌كێ، ل سه‌ر هه‌موو كه‌س و لایه‌كی پێدڤیه ده‌ستا ژ به‌رژه‌وه‌ندیێن تایبه‌ت به‌رده‌ن و خه‌ما گشتی یا خه‌لكێ كوردستانێ بهێته خوارن، چونكو كه‌س ژ كارتێكرن و شینوارێن ئه‌ڤی ڤایرۆسی دیر نابیت.
هیڤیێ ژ هه‌موو وه‌لاتیێن كوردستانێ دكه‌م ب هه‌سته‌كێ به‌رپرسیارانه رێنمایان لبه‌رچاڤ بكه‌ن و ژیانا خو و كه‌س و كار و هه‌ڤ نیشتمانیێن خۆ بپارێزن، هیڤییێ ژ هه‌وه دكه‌م ل ئه‌ڤی ده‌مێ دیاریكری ل مالێن خودا ب مینن و كێمترین په‌یوه‌ندی و هاتنوچون هه‌بیت.
ل دوماهیی سوپاسی و خۆراگریا پرانیا خه‌لكێ كوردستانێ دكه‌م، سوپاس و پێزانینێن خۆ ئاراسته‌ی تیمێن ساخله‌میێ و ئه‌وان نوژدار و په‌رستارا دكه‌م ل هێلا پێشیا به‌رهنگاربوونا ڤایرۆسی دانه، سوپاس بۆ هێزێن ناڤخۆ و كارمه‌ندێن باژێرڤانیێ و كاره‌بێ و سازیێن خزمه‌تگۆزاری دكه‌م كۆ شه‌ڤ و رۆژ د پاراستنا خه‌لك و بجهكرنا رێنمایان دا به‌رده‌وام بوون.
خودایێ مه‌زن هه‌می لایه‌كی ب پارێزیت و كوردستانێ ژ هه‌موو نه‌خوشییان دیر بێخیت.
مه‌سرور بارزانی
سه‌رۆكێ حكومه‌تا هه‌رێما كوردستانێ.
22/3/2020
ئه‌ڤرۆ نیوز:
رێكخراوا ساخله‌میا جیهانی هوشداریێ دده‌ته گه‌نجان كۆ مه‌ترسیا ڤایرۆسێ كورنایێ ب رژدی وه‌ربگرن و پێگیری رێنمایێن نوژداری بن.
رێكخراوا ساخله‌میا جیهانی راگه‌هاند كۆ ڤایرۆسێ كورونایێ مه‌ترسی بتنێ نینه بۆ سه‌ر كه‌سێن دانعه‌مر، به‌لكو مه‌ترسیه‌كا مه‌زنه بۆ سه‌ر گه‌نجان و تانوكه گه‌نجان مه‌ترسیێن ڤایرۆسێ كورنایێ ب رژدی وه‌رنه‌گرتینه.
ریكخراوا ناڤبری ئه‌و چه‌نده ژی دیاركر ل هنده‌ك وه‌لاتێن توشبویی ب ڤایرۆسێ كورونایێ گه‌نج توشبووینه و ئه‌ڤه ژی ئه‌گه‌ره‌كه بۆ گوهدارینه‌كرنا گه‌نجان ب رێنمایێن نوژداری.
ڤه‌كۆلینێن نوژداری ده‌ر دئێخن كۆ ڤایرۆسێ كورونایێ مه‌ترسی بۆ سه‌ر هه‌موو ته‌خ و چینێن جڤاكێ و كه‌س ژ مه‌ترسیێن كورنایی ڤه‌ده‌ر نینه.
ئەڤرۆ نیوز:
وەزارەتا ساخلەمیا هەرێما کوردستانێ راگەهاند، حەفت کەسێن دیتر ل هەولێر و سلێمانیێ تۆشی کۆرۆنا یێ بوون، کو شەش ژ وان ل سلێمانیێ و کەسەک ژی ل هەولێرێ یە، تۆشبوویەک ل دەربەندیخانە کو ئێکەم جارە ل وێ قەزایێ تووشبوویەک د هێتە تۆمار کرن.
هەروەسا گۆتیە، تۆشبوویێ هەولێرێ رەگەزی نێرە و د ژیێ 29 سالیێ دایە، شەش تۆشبوو یێن سلێمانیێ ئێک د ژیێ 37 سالیێ دایە و خەلکێ سەنگەسەرە ل دەڤەرا راپەرین، تۆشبوویەکێ دیتر د ژیێ 45 سالیێ دایە و خۆجهێ دەربەندیخانە، تۆشبوویێن دیتر خەلکێ سلێمانیێ نە و ژنەکا دژیێ 38 سالیێ دایە، ئەوێن دیتر ژ رەگەزی نێرن و د ژیێن 28، 62 و 48 سالیێ دانە.
سەرجەمێ گشتی یێن تووشبوویێن کۆرۆنا ل کوردستانێ 54 کەسن.
ئەڤرۆ نیوز ، زنار تۆڤی:
کارۆخ خۆشناو
کارۆخ خۆشناو سەرۆکێ پەیمانگەها ڤەکولینێن کوردی ئەمریکی، بۆ ئەڤرۆ نیوز دیار کر: یا ئاشکرایە کو ڤایرۆسێ کۆرۆنا کاریگەریەکا تەمام کریە سەر هەموو سێکتەرێن ژیانێ، دناڤا وان دا سێکتەرێ سیاسی و ئابووری و جڤاکی و ساخلەمیێ و پەروەردێ و ڤەگوهاستنێ و تەکنەلۆژی، ب رەنگەکێ کو پرانیا بابەتێن دیتر هاتینە پشتگوهـ خستن و فۆکوس ئێخستیە سەر چاوانیا خۆپارێزیێ و رووبرووبوونا ڤایرۆسێ کۆرۆنا، ئەڤ کاریگەریە ب رەنگەکێ یە، کو دشێت سەردەمی دابەش بکەت، ب سەر دەمێ پێش کۆرۆنا یێ و سەردەمێ پشتی کۆرۆنا یێ، هەروەسا ئەگەرەکێ ب هێز هەیە، کە ڤایرۆسێ کۆرۆنا ب پەتایا سەدێ (۲۱) بهێتە نیاسین.
ناڤهاتی گۆت ژی: د نوکە دا خەلکێ ئەمریکا مژوولی خوە ئامادەکرنێ نە بۆ هەلبژارتنێن سەرۆکاتیێ، کو بریارە ل رۆژا سێشەمبی (۲۰۲۰/۱۱/۳) بهێنە ئەنجامدان، لێ نوکە ڤایرۆسێ کۆرۆنا گەهشتیە هەموو ویلایەتان و رێرەوێ گرنگی پێدانا خەلکێ و حکومەتا ئەمریکا گوهۆریە، ژ گرنگیدان ب هەلبژارتنان بۆ گرنگیدانێ ب ڤایرۆسێ کۆرۆنا، ب رەنگەکێ کو هەلبژارتنێن بەراهیێ یێن دیموکراتان ل ویلایەتا ئۆهایۆ هاتنە پاشخستن، ژبەر کۆرۆنا یێ.
هێشتا دبێژیت: ل دو هەیڤێن بوری پرۆسا هەلبژارتنێن نافخۆیی یێن دیموکراتان ب باشی برێڤەچووینە، نوکە دو رکابەر د ململانێ دا ماینە، ئەو ژی (جۆ بایدن یێ تەمەن ۷۷ سالی و بێرنی ساندەرز یێ تەمەن ۷٨ سالی)، لێ دیسان ژی چانسێ (جۆ بایدنی) ب هێزترە، پشتی سەرکەفتنا وی ل هەرسێ ویلایەتێن (فلۆریدا و ئەلینۆی و ئەریزۆنا)، لەوما دهێته چاڤەرێ کرن (جۆ بایدن) ببیتە بەربژارێ سەرەکی یێ دیموکراتان و ڕوو ب روو (ترەمپی) ببیت، ئەڤە د دەمەکێ دایە کو سەرۆکێ پارتا کۆماری (رۆنا ماکدانیل) راگەهاندیە کو پارتیا وی ب فەرمی(دۆنالد تڕەمپ) بۆ گەرا دویێ یا سەرۆکاتیا ئەمریکا بەربژار کریە.
کارۆخی ئەو ژی گۆت: نوکه (دۆنالد تڕەمپ) ل ژێر ئەزموونەکا گران یا ڤایرۆسێ کۆرۆنا یێ دایە، ئەگەر ترەمپ شیا ب سەر کۆرۆنا یێ دا سەربکەڤیت، دێ شێت د هەلبژارتنێن سەرۆکاتیێ ل هەیڤا نۆڤەمبەرێ دا سەرکەڤیت، ئانکو سەرکەفتنا ترەمپی ل سەر کۆرۆنا دا یەکسانە ب سەرکەفتنا ترەمپی ل سەر جۆ بایدنی، چونکی هندەک ژێدەر ئاماژێ ب هندێ دکەن، هەکە رێک ل ڤی ڤایرۆس نەهێتە گرتن، دێ مەترسی ل سەر (۱٦۰ هەتا ۲۱٤) ملیۆن وەلاتیێن ئەمریکی دروست بیت و دێ توشی کۆرۆنا یێ بن، لەوما سەرکەفتنا ترەمپی ل سەر کۆرۆنا یێ دا، ب واتایا دەستەبەرکرنا گەرا دویێ یا کورسیێ سەرۆکاتیا ئەمریکا یە.
ل دووماهیێ ئەو ژی ئاشکرا کر: هەر چەنده پێشتر دۆنالد ترەمپی راگەهاندیە، کو ل هەیڤا تەمۆزێ یان یا تەباخێ دێ دووماهی ب کۆرۆنا یێ هێت، بەلێ هەکە مەترسیا کۆرۆنا یێ یا بەردەوام بیت، دێ کاریگەریێ کەتە سەر میکانیزما هەلبژارتنێن ئەمریکا، ب ئاوایەکێ کو خەلکێ ئەمریکا نەشێن وەک پێشتر راستەوخۆ بچنە سەر سندوقێن دەنگدانێ، بەلکو دبیت ب رێیا ئەنتەرنێتێ و ب شێوێ (on line) دەنگێ خوە بدەن، ئانکو د خراپترین بارودۆخ دا خەلکێ ئەمریکا سازشێ ناکەن ل سەر مافێن دەنگدانێ و دەستبەرداری هەلبژاتنان نابن، لەوما ب هەر شێوەکێ بیت، دێ هەلبژاتنێن سەرۆکاتیا ئەمریکا ل دەمێ خوە دا برێڤە چن، چونکە هەلبژارتن (سەنگێ مەحەکیا) دیموکراسیەتیێ یە ل ئەمریکا.
ئەڤرۆ نیوز:
هاریکارێ سەرۆک وەزیرێن هەرێما کوردستان بۆ کاروبارێ جڤاتا بلند یا وەبەرهێنانێ و راژەیا گشتی گۆت، حکومەتێ پلانەکا تۆکمە هەیە بۆ رێکخستنا داهاتان و دلنیایێ ژی ددەت، کە ئەوا هەی جێبەجێکرنا قانوونا چاکسازیێ یە و دەستکاریێ د مووچەی دا ناکەن.
هەروەسا گۆتیە، حکومەتا هەرێما کوردستانێ پلان هەیە هەموو داهاتێن دەروازێن سنووری، باج و گەشتیاری و وەبەرهێنانێ رێکبێخیت، دێ وەکەت، کو ژێدەرێ داهاتێ هەرێمێ ب تنێ نەفت نەبیت، هەروەسا قانوونا چاکسازیێ ل پەرلەمانێ کوردستانێ هاتیە پەسەنکرن، لەوما دێ حکومەت جێبەجێ کەت، رەتکریە کو پاشەکەفتێ مووچەی بهێتەڤە، بەلکو ئەوا دهێتە کرن جێبەجێکرنا قانوونا چاکسازیێ یە.
دەربارەی دەستکاریکرنا مووچەی و ڤەگەریانا سیستەمێ پاشەکەفتی، رێباز حەملان دلنیایێ ددەت و دبێژیت، هیچ بڕیارەکا دیتر نینە بۆ هندێ خەلک تووشی دو دلیێ ببیت و بێژن، دێ دەستکاریا مووچەی هێتە کرن یان دێ پاشەکەفت ڤەگەریت.
رێباز حەملانی گۆتیە ژی: نابیت خوە نیگەران بکەین و برا مووچەخۆران و خەلکێ د ئینمە ڤە، کو ل 2014 بەرگەیا قەیرانا شەرێ داعش و داکەفتنا بهایێ نەفتێ و هاتنا ئاواران گرت، دلنیابن دێ ڤێ قەیرانێ دەرباز کەین.
نيشاندان