ئەڤرۆ نیوز ، زنار تۆڤی:

وەسا بریارە سوبەهی سێشەمبی کوربەندێ داڤۆس ل سویسرا برێڤە بچیت، ئەڤ سالە ل 21 هەتا 24 كانوونا دویێ كۆربەندێ ئابووری یێ جیهانی داڤۆس ل وەلاتێ سویسرا ب پشکداریا سەرۆكێن دەهان وەلاتان دێ برێڤە چیت و دێ دەست ب كارێن خوە کەت، ئەڤ سالە دۆنالد تره‌مپ سەرۆکێ ئەمریکا سه‌رۆکێ هه‌رێما کوردستانێ نێچیرڤان بارزانی و سکرتێرێ گشتی یێ نەتەوێن ئێکگرتی و سەرۆک کۆمارێ عیراقێ دێ پشکداریێ تێدا کەن، ئه‌ڤ ساله‌ 119 ملیاردێر كو خودانێن 500 ملیارانه‌ ل گه‌ل 2000 ئه‌ندامێن دى ژ هه‌موو جیهانێ دێ پشکداریێ د كۆربه‌ندێ داڤۆس دا کەن.

كۆربەندێ ئابووری یێ جیهانی ل داڤۆس ل سویسرا، رێكخراوەکا نەحكومیە، ل سالا 1971 ژ ئالیێ زانایێ وارێ ئابووری كلاوس شواب هاتیە دامەزراندن، زێدەتر ژ هزار كۆمپانیێن نێڤدەولەتی و فرەرەگەزی ئەندامن د وی كۆربەندیدا، دناڤ واندا كۆمپانیا نەستەلە و نیكی و مایكرۆسۆفت و ب دەهان كۆمپانیێن زەبەلاح یێن دیتر هەنە، مەزنە بەرپرسێن كۆمپانیایێن جیهانێ و سەركردێن سیاسی، سالانە ل ڤی باژێری كۆم ڤە دبن و گوتۆبێژان ل سەر كێشێن مەزن یێن ئابووری و سیاسەتێ ل جیهانێ دكەن.

هەروەسا گرێبەست و پرۆژێن ئابووری یێن هەڤبەش یێن مەزن ژی دناڤبەرا وەلاتاندا دهێنە ئیمزاکرن، ئارمانجا ڤی كۆربەندی ئابوورێ ئازاد و رەخساندنا ژینگەهەکێ یە ل بارێ وەبەرهێنانێدا ل سەرانسەری جیهانێ بۆ كۆمپانیان.

هەر چەندە رێكخراوەکا نە حکومیە، بەلێ مەرجێ ئەندامبوونا كۆمپانیان د وی كۆربەندیدا ئەوە كو داهاتێ وێ كۆمپانیێ كێمتر نەبیت ژ ملیارەکا دۆلاران د سالەکێدا، هەروەسا سالانە هەر كۆمپانیەکا ئەندام پێدڤیە 12 هزار و 500 دۆلاران وەك ئابوونە بدەتە وێ رێكخراوێ، ژبۆ پشکداریا سالانە بۆ هەر كۆمپانیەکێ ژی شەش هزار و 250 دۆلارێن ئەمریكیە، هەکە هەر كۆمپانیەکێ بڤێت د بەرنامە و ئەجیندا و گوتۆبێژ و پانێلێن كۆربەندێ داڤۆس دا بهێنە بەحسکرن، پێدڤیە 250 هزار دۆلاران بدەتە وی كۆربەندی، هەکە هەڤبەشەکێ بەردەوام یێ سالانە ژی بیت، ب تنێ دێ 78 هزار دۆلاران ژێ وەرگریت.

هەروەسا سالانە ب سەدان كەس ژ سەرۆكێن وەلاتان و سەرۆك وەزیر و وەزیرێن وەلاتێن جیهانی و سەرۆك و خودانێن كۆمپانیان و ئابووریناس و رۆژنامەوڤان و سیاسەتمەدار و پارێزەر و كەسانێن ئەكادیمی پشکداریێ د وی كۆربەندیدا دكەن، ل ڤان سالێن دوماهیێ بۆچوونەك دروست بوویە، کو كێشێن ئابووری و سیاسی یێن جیهانێ هند گەلەکن، کو ب تنێ ب ئەنجامدانا ئیک كۆربەند د سالەكێدا نەشێن چ چارەسەریا بۆ هەموو كێشان ب بینن، لەوما كۆربەندێ داڤۆس جۆدا دێ ژ كۆربەندی فەرمی، کو ل داڤۆس دێ هێتە ئەنجامدان، سالانە چەندین كۆربەندێن دیتر یێن نێڤدەولەتی ل وەلاتێن جۆدا دهێنە ئەنجامدان.

باژێرێ داڤۆس:

باژێرەکێ بچووكە و دکەڤیتە سەر رووبارێ لاندویسر ل دەڤەرا براتیقۆ یا سەر ب كانتۆنا گرۆباندن ل رۆژهەلاتێ وەلاتێ سویسرا، هەروەسا سەرۆكێن زۆربەیا وەلاتانێن جیهانێ سەرەدانا وی باژێری دكەن و لێ دمینن، هەڤدەم باژێرەکێ ب ناڤودەنگە بۆ وەرزشا زڤستانێ، ب تایبەتی خوە حلیساندنا سەر بەفرێ، هەروەسا پتریا خەلکێ وێ ب رەگەز ئەلمانینە و ب زمانێ ئەلمانی د ئاخڤن، ل سەدێ هەژدێ دا داڤۆس بوویە روویەكێ دیار یێ دەولەمەند و ڤەکۆلەران، سەرجەم چینێن ئەرستۆكراتی ل وی باژێری كۆمبووینە، هەروەسا بوویە باشترین دەڤەرا ژیانێ ل سویسرا، رووبەرێ ڤی باژێری 254 هزار و 48 كیلۆمەترن و بلنداهیا وی ژ ئاستێ روویێ دەریایێ ڤە دگەهیته هزار و 560 مەتران.