ئه‌ڤرۆ نیوز:

سه‌رۆك مه‌سعود بارزانى ئه‌ڤرۆ پێنجشه‌مبى 28/3/2019 پێشوازى ل ئۆلگ لێڤین كونسۆلێ رووسیا ل هه‌ولێرێ كر.

كونسۆلێ رووسى سلاڤێن وه‌زیر وجێگرێ وه‌زیرێ ده‌رڤه‌یێ رووسیا گه‌هاندنه‌ سه‌رۆك بارزانى وزێده‌بارى دووپاتكرنێ ل په‌یوه‌ندیێن دیرۆكى د ناڤبه‌را هه‌ردولا ورۆلێ بارزانیێ نه‌مر د ب هێزكرنا په‌یوه‌ندیا دیرۆكى د ناڤبه‌را گه‌لێ كوردستانێ وگه‌لی رووسیا، پێگه‌هێ هه‌رێما كوردستانێ بۆ وه‌لاتێ خوه‌ ب گرنگ هژمارت وهه‌روه‌سا ئاماه‌ ب خواستا رووسیا د به‌رفره‌هكرنا په‌یوه‌ندیێن د ناڤبه‌را هه‌ردولا دا ب تایبه‌ت د بوارێ وزێ وبیناسازیێ وخواندنێ وچالاكیێن كولتوورى، د پشكه‌كا دى یا ئاخڤتنێن خوه‌ دا، كونسۆلێ رووسى ل هه‌ولێرێ رۆلێ گه‌لێ كوردستانێ د روو ب رووبوونا تیرۆرێ وتوندره‌ویێ بلند نرخاند.

ژلایێ خوه‌ڤه‌ سه‌رۆك بارزانى سوپاسیا وه‌زیر وجێگرێ وه‌زیرێ ده‌رڤه‌یێ روووسیا كر وپێزانین بۆ هه‌لویستێن حوكمه‌تا رووسیا هه‌بوو ل دۆر دۆزا گه‌لێ كوردستانێ، دووپاتكر ژى كو په‌یوه‌ندیێن گه‌لی كوردستانێ و رووسیا د دیرۆكى نه‌ ول كوردستانێ خواسته‌كا مه‌زن یا هه‌ى بۆ پێشڤه‌برنا وان په‌یوه‌ندیان،

ئەڤرۆ نیوز:

پارتی و گۆران دگەل چەند لایەنێن دی ب کومکرنا ٦٨ ئیمزایێن پەرلەمانتاران پرۆژێ راستڤەکرنا قانوونا سەروکاتیا ھەرێما کوردستانێ ئەڤرۆ پێشکێشی سەروکاتیا پەرلەمانی کر.

د کونگرەکێ رۆژنامەڤانی دا ئەمێد خوشناو سەروکێ فراکسیونا پارتی دیارکر ئەڤرۆ د چارچوڤێ رێککەفتنا دناڤبەرا پارتی و گۆران و ھەڤپەیمانێن وێ دا پرۆژێ راستڤەکرنا قانوونا ھەلبژارتنا سەروکێ ھەرێمێ ب کومکرنا ٦٨ ئیمزایێن پەرلەمانتاران ھاتە پێشکێش کرن بۆ سەروکاتیا پەرلەمانی.

ل دووڤ ڤی پرۆژە قانووتێ د ڤێ خولێ دا سەروکێ ھەرێمێ دێ د ناڤ پەرلەمانێ کوردستانێ دا ھێتە ھەلبژارتن و پاش دێ د دستورێ کوردستانێ دا شێوازێ ھەلبژارتنا سەروکێ ھەرێمێ ھێتە دیارکرن.

ئه‌ڤرۆ نیوز:
وه‌زاره‌تا په‌روه‌ردێ ل هه‌رێما كوردستانێ راگه‌هاند، ئه‌زموونێن دووماهیا سالێ د ده‌مێ خوه‌ دا دێ هێنه‌ ئه‌نجامدان وهه‌موو وان ده‌نگوباسان ره‌ت دكه‌ت كو به‌حسێ پاشخستنا ئه‌زموونان دكه‌ن.
سامان سیوەیلی، په‌یڤدارێ وه‌زاره‌تا په‌روه‌ردێ راگه‌هاند” ل دووڤ سالناما خواندنێ، ئه‌زموونێن دووماهیا سالێ د ده‌مێ خوه‌ دا دێ هێنه‌ ئه‌نجامدان”.
گۆت ژى” ئه‌و ده‌نگوباسێن دهێنه‌ به‌لاڤكرن كو ژبه‌ر هه‌یڤا ره‌مه‌زانێ، ئه‌زموونێن دووماهیا سالێ هاتینه‌ پێشخستن، به‌لكو ئه‌زموون چو قۆناغه‌كا خواندنێ نه‌هاتینه‌ پێشخستن و د ده‌مێ خوه‌ یێ ده‌ستنیشانكرى دا دێهێنه‌ ئه‌نجامدان”.

ئه‌ڤرۆ نيوز:

ئه‌ڤرۆ چارشه‌مبى 27/3/2019 د كۆمبوونا سلێمانيێ دا، شاندێ پارتى ديموكراتى كوردستان ب شاندێ ئێكه‌تيێ راگه‌هاند كو د رازى بن ب وان پۆستێن پارتى بۆ دياركرين.

ل دووڤ ده‌نگوباسه‌كێ كه‌نالێ كوردستان 24 شاندێ پارتى ب ئێكه‌تيێ راگه‌هانديه‌ كو پۆستێن سه‌رۆكێ په‌رله‌مانى وجێگرێ سه‌رۆكێ حوكمه‌تێ ووزاره‌تا پێشمه‌رگه‌ وچه‌ند بريكارێن وه‌زاره‌تان بۆ ئێكه‌تيێ هاتينه‌ ده‌ستنيشانكرن، به‌لێ د كۆمبوونێ دا شاندێ ئێكه‌تيێ داخوازا چه‌ندين پۆستێن دى كريه‌، شاندێ پارتى ژى گۆتيه‌ وان كو تنێ ئه‌و پۆست يێن ماين ونه‌شێن چو پۆستێن دى بده‌نێ، چونكى به‌هرا لايه‌نێن دى يه‌.

چاڤه‌رێ دهێته‌ كرن ئێكه‌تى ئه‌ڤ شه‌ڤه‌ د به‌ياننامه‌كێ هه‌لويستێ خوه‌ يێ فه‌رمى سه‌باره‌ت داخوازيێن خوه‌ وپێشنيازێن پارتى به‌رچاڤ كه‌ت.

ئەڤرۆ نیوز:

ئەڤرۆکە ل هەولێرێ زانکۆیا سەلاحەدین دکتورا فەخری پێشکێشی زانایێ کورد کۆچەر بیرکار کر کو بەری نها خەلاتا فیلدز کو وەکو خەلاتا نوبل یا بیرکاریێ دهێتە نیاسین بدەستڤە ئینابوو.

د رێوسمەکێ دا ب ئامادەبوونا نێچیرڤان بارزانی سەرۆک وەزیرێن هەرێما کوردستانێ سەرۆکێ زانکۆیا سەلاحەدین د. ئەحمەد دزەیی خەلاتێ دکتورا فەخری پێشکێشێ پرۆفیسورێ کورد کۆچەر بیرکار کر و راگەهاند کو ئەم هێڤیدارین کۆچەر بیرکار ببیتە بنەمایەکێ گرنگ بۆ قۆتابی و مامۆستایێن مە ل زانکۆیێن هەرێما کوردستانێ.

د پشکەکا دی یا رێورەسمێ دا سەرۆکێ حوکمەتا هەرێما کوردستانێ نێچیرڤان بارزانی ژی راگەهاند کو ئەز شانازیێ ب کۆچەر بیرکار دکەم کو شیایە خوە بگەهینتە بلندترین ئاستی زانستێ د بیاڤێ بیرکاریێ دا و گەلێ کوردستانێ شانازیێ ب کەسێن وەکو پرۆفیسور کۆچەر بیرکار دکەت.

نێچیرڤان بارزانی ئەو یەک ژی دیار کر کو دەم یێ هاتی ئەم هەموو بەرێ خوە بدەینە زانستی و دڤێت هەموو شیانێن خوە بۆ هندێ تەرخان کەین، چونکو تنێ رێیا پێشکەفتنا وەلاتێ مە یە. دڤێت هەموو گەنجێن مە گرنگیێ ب خوە بدەن و زانستی بۆ خوە ئەساس وەربگرن کۆچەر بیرکار نموونەکا بەرچاڤە بۆ گەنجێن مە.

زانایێ کورد پرۆفیسور کۆچەر بیرکار ژی پشتی وەرگرتنا خەلاتی راگەهاند کو ئەڤە شانازیەکا مەزنە ئەز ل کوردستانێ ڤێ خەلاتێ وەردگرم، ئەز ل گوندەکێ مەزن بووم کو ئاستێ خواندنێ تێدا باش نەبوو و ژ بەر شەرێ ئیران و عیراقێ ئاوارە بووین، سوپاسیا دایک و بابێ خوە دکەم کو ب هەموو رەنگەکێ هاریکاریا من کرن و شیام بگەهمە ڤی ئاستی.