ئەڤرۆ نیوز، مەحمود نھێلی:
بەرپرسێ نڤیسینگەھا گەشتوگۆزارێ ل سیلاڤێ بۆ ئەڤرۆ نیوز دیار کر کو وان پلان ھەیە بۆ سالا ٢٠١٩ پێشڤەچوونێن باش د کەرتێ گەشتوگۆزاری دا بکەن ل دەڤەرێ و گۆت: “ئەڤ پێشڤەچوون و گەشەپێدانا د بوارێ گەشتیاری دا دێ ل دەڤەرێ دروست دبیت نەک بتنێ ل دێ ل ئامێدیێ یان سیلاڤێ بیت ئەڤە دێ جھێن گەشتیاری یێن ھەر شەش ناحیێن سەر ب قەزایێ ڤە ب خوە ڤە گریت و دێ گرنگی ب گەشتوگۆزارا ھاڤین و زڤستانێ ژی ھێتە دان”.
ناڤھاتی ئاماژە دا وێ چەندێ کو بۆ ئەڤ سالە ھەتا نوکە چو بەرھەڤی بۆ گەشتوگۆزارا زڤستانێ نەھاتینە کرن ژ بەر کو نوکە چ ل بەر دەستێ وان نینە و گۆت: “ئەم چاڤەرێ نە دەست ب تلەفریکا گەلیێ سەرسنکێ بھێتە کرن ھەروەسا مەلەڤانگەھەکە و یاریێن ئولومپی ژی د ڤی پرۆژەی دا ھەنە، لێ ژ بەر کو ئەو ژی ئێکە ژ پرۆژێن وەبەرئینانێ ژ بەر روتینیاتێن ب رێڤەچوونا کاری ھەتا نوکە دەست ب وی پرۆژەی نەھاتینەکرن”.

ئەڤرۆ نیوز، لەزگین جوقی
ژێدەرکی ژ ئاسایشا زاخۆ بۆ ئەڤرۆ نیوز دیار کر کو ئەڤرۆ رۆژا ٢٢/١١/٢٠١٨ ئاسایشا قەزا زاخۆ ئامارا دەستەسەرکرنا ١٢٠ کەسان ژ بەر ب کارئینانا مادێن ھۆشبەر راگەھاند و داخواز ژ ھەموو دایک و بابان کر ئاگەە ژ زارۆکێن خوە ھەبن و گەنج خوە دوور بکەن ژ ڤان مادێن مەترسیدار.
ھەمان ژێدەر دیار کر کو بازرگان و بکارئینەر و بەلاڤکەر د ناڤ ڤان کەسێن دەستەسەرکری دا ھەنە ھندەک ژی خەلکێ دەرڤەی سنوورێ ھەرێما کوردستانێ نە و ھندەک ژی خەلکێ زاخۆ نە ژ وان ژی کچ و ژن ژی د ناڤ دەستەسەرکریان دانە.

دھۆک، لەزگین جوقی:
سەرۆکێ جڤاتا قەزا شنگالێ بۆ ئەڤرۆ نیوز دیار کر کو وان داخوازکریە ھێزەکا بھێز یا ھەڤپشک بۆ پاراستنا ئێمناھیا شنگالێ بھێتە پێکئینان دناڤبەرا حوکمەتا ھەرێما کوردستانێ و حوکمەتا عیراقی دا.
وەیس نایف، سەرۆکێ جڤاتا قەزا شنگالێ دیار کر کو ھەتا ئیدارەکا ھەڤپشک بۆ شنگالێ نەھێتە دروستکرن یا پێکھاتی ژ ھێزین پێشمەرگێن کوردستانێ و سۆپایێ عیراقی رەوش ل شنگالێ خوەش نابیت و گۆت: “نوکە ئەم یی کاردکەین ھێزەکا ھەڤپشک بۆ شنگالێ بھێتە پێکئینان و پێشمەرگێن کوردستانێ دگەل سۆپایی عیراقی و ئاسایش ڤەگەڕنە شنگالێ، چونکی ھەکە وەسا نەبیت ژ بەر گرۆپێن چەکدار شنگالێ خەوش نابیت و دێ پتر ئالوز بیت”.
ناڤھاتی ئاماژە دا وێ چەندێ کو نابیت شنگال بمینت قوربانیا لایەنیێن نەقانوونی و ئاوارە ھەر بمیننە د بن خیڤەتان ڤە و پێدڤیە پێشمەرگە و سۆپایی عیراقێ ل شنگالێ ھەبن داکو خەلک بشێت ڤەگەڕن و گۆت: “پتر ژ ٣٠٠ ھزار کەسان د ناڤ کەمپان دا ل ھەرێما کوردستانێ دژین و رێژەکا مەزن یا خەلکێ یێن چووینە دەرڤەی وەلاتی، نابیت ئەڤ ھەموو خەلکێ شنگال ببیتە قوربانێن ململانا سیاسی ل شنگالێ و ریگریێ ل زڤرینا ئیدارا شەرعیی یا شنگال بکەن”.