ئه‌ڤرۆ نیوز:
لیژنا حوكمه‌تا هه‌رێما كوردستانێ بۆ دانوستاندنێ ل سه‌ر بودجا سێ سالێن حوكمه‌تا عیراقێ ل به‌غدایه و دێ ئه‌ڤرۆ ده‌ست ب دانوستاندان كه‌ن.
زاگرۆس فه‌تاح بریكارێ وه‌زاره‌تا پلاندانانا حوكمه‌تا هه‌رێما كوردستانێ كۆ سه‌رۆكاتیا لژنا هه‌رێمێ بۆ بودجێ راگه‌هاند مه‌به‌ستا سه‌ره‌دانا مه بۆ دانانا بنه‌مایێ ستراتیژیێ بودجا عیراقێ یه د ناڤا وان دا ژی بودجه و شایسته‌یێن دارایی یێن هه‌رێمێ، بكارخستنا پرۆژه‌یێ چاكسازییا كارگێری و دارایی ل عیراقێ، گرنگیا ئه‌ڤێ لژنا هه‌ڤ پشك ئه‌وه كۆ خه‌ملاندن بۆ بودجا سێ سالێن بهێت یێن عیراقێ ئێته‌كرن و بنه‌مایێ خواست و پێدڤیێن سێكته‌ران دهێنه ده‌ست نیشانكرن و ماف و شایسته‌یێن دارایی یێن هه‌رێمێ تێدا بهێنه چه‌سپاندن.
بریكارێ وه‌زاره‌تا پلاندانانا حوكمه‌تا هه‌رێمێ ئه‌و چه‌نده ژی راگه‌هاند: پشكداریكرنا هه‌رێما كوردستانێ دڤێ لژنه‌یێ دا پشتی ئه‌وێ چه‌ندێ هات، كۆ وه‌زاره‌تا دارایی و ئابووری یا عیراقێ ل سه‌ر بنه‌مایێ یاسایا دارایی یا عیراقێ دڤێت بودجه‌یا سێ سالین بهێت به‌رهه‌ڤ بكه‌ت و داخاز ژ هه‌رێما كوردستانێ كریه بۆ پشكداریكرن ل دانانا بنه‌مایێ ستراتیژیێ بودجا عیراقێ و كوردستانێ.
ئه‌ڤرۆ نیوز:
رێڤه‌به‌رێ گشتی یێ دیوانا وه‌زاره‌تا ساخله‌میێ راگه‌هاند ڤایرۆسێ كورونایێ ب شێوه‌یه‌كێ به‌رچاڤ به‌ربه‌لاڤ بوویه، ژماره‌یا توشبوویێن ڤایرۆسی زۆر زێده‌تره ژ وێ ئه‌ڤا دهێته ده‌ست نیشانكرن، به‌لێ ژ ده‌ڤه‌ره‌كێ بۆ ده‌ڤه‌ره‌كا دی جوداهی هه‌یه.
خالس قادر رێڤه‌به‌رێ گشتی یێ دیوانا وه‌زاره‌تا ساخله‌میا حوكمه‌تا هه‌رێما كوردستانێ راگه‌هاند: نوكه هه‌رێما كوردستانێ ل قوناغا به‌لاڤبوونا به‌رفره‌هبوونا ڤایرۆسی یه و ب ئاوایه‌كی زۆر به‌ربه‌لاڤ بوویه، به‌لێ ژ جهه‌كی بۆ جهه‌كێ دی جودایه، نوكه ره‌وش ل هه‌ولێرێ باشه و ل چاڤ سێ هه‌فتیێن بوری ل دهۆكێ به‌ره‌ڤ زێده‌بوونێ كریه، ل سلێمانیێ پشتی بۆ ده‌مه‌كی باش بوو نوكه ده‌ستپێكا زێده‌بوونێ یه، ژماره‌یا مریێن ڤایرۆسێ كورونایێ هه‌تا نوكه نێزیكی ستانداردێن جیهانی یه كۆ كێمتره ژ 3% ئه‌ڤێن ل نه‌خوشخانه‌یان هاتینه توماركرن، چونكو ژماره‌كا زۆر زێده‌تر ژ وێ چه‌ندێ هاتینه جه‌ست نیشانكرن و ل مال چاره‌سه‌ریێ وه‌ردگرن چونكو زۆر به‌ر به‌لاڤ بوویه.
خالس قادر رێڤه‌به‌رێ گشتی یێ دیوانا وه‌زاره‌تا ساخله‌میا حوكمه‌تا هه‌رێما كوردستانێ ئه‌و چه‌نده ژی راگه‌هاند: تانوكه هه‌ڤكاریێن كۆ ژلایێ رێكخراوا ساخله‌میا جیهانی و وه‌زاره‌تا ساخله‌میا عیراقێ دگه‌هنه ده‌ستێ وه‌زاره‌تا ساخله‌میا هه‌رێمێ وه‌كو پێدڤی نینن، چونكو فشار زۆرن ب تایبه‌تی ل ئه‌ڤان دو هه‌یڤان ژماره زۆر تر بوویه، به‌ری هنگی هه‌ڤكاری بۆ دهاتن، نوكه‌ژی هه‌ماهه‌نگی ل گه‌ل وه‌زاره‌تا ساخله‌میا عیراقێ و رێكخراوا ساخله‌میا جیهانی ئه‌و هه‌ڤكاریێن دهێنه پێشكێشكرن ل ئاسێ پێدڤی دا نینن.
ئه‌ڤرۆ نیوز:
لگۆری دوماهی ئامارێن توشبوویێن ڤایرۆسێ كورونایێ ل جیهانێ گه‌هشته 25 ملیۆن و 390 هزار و 791 كه‌سان.
لگۆری ئامارێن دهێنه به‌لاڤكرن ل سه‌ر ئاستێ جیهانێ، ئه‌ڤرۆ ژماره‌یا توشبوویێن كورونایێ گه‌هشتیه 25 ملیۆن و 390 هزار و 791 كه‌سان و ژ ئه‌ڤێ ژماره‌یێ ژی هه‌شت سه‌د و 50 هزار و 630 كه‌سان گیانێ خوه ژ ده‌ست دایه.
ل سه‌ر ئاستێ جیهانێ ئه‌مریكا زۆرترین رێژه‌یا توشبوویێن ڤایرۆسێ كورونایێ تێدا هاتیه توماركرن و گه‌هشتیه شه‌ش ملیۆن و 173 هزار و 328 كه‌سان و 187 هزار و 225 كه‌سان ژی گیانێ خوه ژ ده‌ست دایه.
ڤایرۆسێ كورونایێ نه‌خوشیه‌كا كوژه‌كه و ل هه‌یڤا 12 یا سالا بوری ل باژێرێ ئوهان یا چینێ سه‌رهلدایه و نوكه ل زێده‌تری 210 وه‌لاتان به‌لاڤ بوویه.
ئه‌ڤرۆ نیوز:
رێڤه‌به‌راتیا پولیسێن پارێزگه‌ها دهۆكێ د راگه‌هاندنه‌كێ دا به‌لاڤكریه كۆ تێدا هاتیه رێڤه‌به‌رێ به‌رێ یێ پولیسێن دهۆكێ ب ئه‌گه‌رێ كورونایێ گیانێ خوه ژ ده‌ست دایه.
ئه‌ڤرۆ 31/8/2020 لیوا وه‌عدولا محه‌مه‌د رێڤه‌به‌رێ یێ پولیسێن پارێزگه‌ها دهۆكێ ب ئه‌گه‌رێ كورونایێ گیانێ خوه ژ ده‌ستدا، به‌ریا چه‌نده‌كی كورێ وی یێ گه‌نج هه‌ر ب ڤایرۆسێ كورونایێ گیانێ خوه ژ ده‌ست دابوو.
ئەڤرۆ نیوز:
مستەفا کازمی، سەرۆک وەزیرێن عێراقێ راگەهاند: وان لژنەکا تایبەت بۆ ڤەکۆلینێ ژ دۆسیا گەندەلیێن مەزن و تاوانێن نەئاسایی پێکئینایە.
هەروەسا دیارکریە: دەستهەلاتا پێدڤی ب لژنێ هاتیەدان بۆ ڤەگەراندنا سەنگا دەولەتێ و ڤەگەراندنا مافێن وەلاتیان ژ گەندەلکاران، ل قۆناغا ئێکێ یا ڤەکۆلینان دەربارەی گەریانێ لدووڤ راستی یێن بنپێکاریێن دژی خۆنیشاندەران ب دووماهی هاتیە.
هەروەسا گوتیە، کارێن تۆمارکرنا کوشتی و بریندارێن خۆنیشاندانان دەستپێکرینە، هەتە ئامارەکا دروست بدەست وان بکەڤیت، دێ مافێن وان بۆ دابین کەن.
ئەڤرۆ نیوز:
ل دەمێ بریاردانێ بۆ پێکئینانا هەڤژینیێ، پێدڤیە ژن ب باشی هزرا خوە بکەن، ل سەر شکەستنا پەیوەندیێن کەڤن یان ژی ژبەر تەمەنی، یا هەر ئەگەرەکا دی بریارێن ب لەز نەدەن، هەتا پشت راست دبن کەسێ بەرامبەری وێ گونجایە و ب کێر دهێت.
مالپەرێ ئیندیا د بابەتەکێ دا، ئاماژە ب کۆمەکا ژ وان زەلامان کریە، کو پێدڤیە ژن بۆ پێکئینانا هەڤژینیێ ئاگەهداری ڤان جۆرە زەلامان بن، کو بۆ هەڤژینیێ بکێر ناهێن و د گونجای نینن، ئەو ژی ئەڤەنە:
.زەلامێ دلپیس، ئەوێ نەبەرپرسیار و پشتگرێدانێ ل سەر خوە نەکەت.
.زلامێ تۆرە و دەمارگیر و بها و رێزا ژنێ نەزانیت.
.زەلامێن درەوین و خیانەتکار.
. ئەو زەلامێن بەردەوام گومان لێ بهێتە کرن.
.بەردەوام بزاڤا تۆرەکرنا تە بدەت، دیسان زەلام ئازادیان نەهێلیت و بەردەوام ل هەموو تشتان ڤەکۆلیت.
ئەڤرۆ نیوز ، زنار تۆڤى:
سەرۆكێ فراكسیۆنا پارتى دیمۆكراتى كوردستان ل جڤاتا پارێزگەها دهۆكێ، بۆ مالپەرێ ئەڤرۆ نیوز دیار كر: ئەڤرۆ د كۆمبوونەكا ئاسایى دا جڤاتا پارێزگەها دهۆكێ، ب نڤیسارەكا فەرمى بەربژارێ پۆستێ جێگرێ ئێكێ یێ پارێزگارێ دهۆكێ گەهشتە جڤاتا پارێزگەها دهۆكێ، لدووڤ قانوونا جڤاتێن پارێزگەهان و پەیرەوێ نافخۆ، هەر سێ بەربژێرێن جێگرێ پارێزگارێ دهۆكێ هاتنە پەسەند كرن و ئێك ژ وان دێ ژ ئالیێ جڤاتا وەزیرێن هەرێما كوردستانێ ڤە هێتە دانان، وەكو جێگرێ ئێكێ یێ پارێزگارێ دهۆكێ، بۆ كاروبارێن كارگێرى و قانوونى، كو ئەو ژى دێ كەسەكێ مەسیحى بیت، دیسان بەرنامێن كارى یێن جڤاتا پارێزگەها دهۆكێ ل رۆژا سَشەمبى و ل دەمژمێر 11 سپێدێ هێنە گێران و شەش رێڤەبەرێن گشتى ل پارێزگەها دهۆكێ دێ هێنە گوهۆرین، كو ناڤێن ب فەرمى گەهشتینە جڤاتا پارێزگەها دهۆكێ، هەر دەمێ كومبوون هاتە ئەنجامدان، دێ ناڤێن وان هێنە پەسەندكرنێ و ناڤێن وان دێ هێنە بلند كرن بۆ جڤاتا وەزارێن هەرێما كوردستانێ بۆ وێ چەندێ كو كارێ قانوونى بهێتە ئەنجامدان.
هشیار فەریق گولى، سەرۆكێ فراكسیۆنا پارتى ل جڤاتا پارێزگەها دهۆكێ زێدەتر گۆت: شەش رێڤەبەرێن گشتى ل دهۆكێ دێ هێنە گوهۆرین ئەو ژى ئەڤەنە: رێڤەبەرێ گشتى یێ ساخلەمیێ و رێڤەبەرێ گشتى یێ ئەوقافێ و رێڤەبەرێ گشتى یێ رەوشەنبیرى و رێڤەبەرێ گشتى یێ كارەبێ و رێڤەبەرێ گشتى یێ گەشتوگۆزارێ و رێڤەبەرێ گشتى یێ چاندنێ، هەروەسا پشتى ڤێ قۆناغێ دێ قائیمقام و رێڤەبەریێن ناحیان ژى هێنە گوهۆرین، هەر چەندە هەتا نوكە چو نڤیسارێن فەرمى ل سەر ڤى بابەتى نەگەهشتینە بەر دەستێ مە، لێ د پلانا حوكمەتێ دا هەیە ل داهاتى ئەو ژى بهێنە گوهۆرین.
ئەڤرۆ نیوز:
ب بریارا سەرۆکێ دەزگەهێ ئاسایشا هەرێما کوردستانێ هێزێن ئاسایشا گەرمیان دەستگیرکرنا چار تیرۆریستێن داعشێ ل سلێمانیێ و گەرمیان و رانیە راگەهاند.
ل رۆژا ئێکشەمبی 30-08-2020، رێڤەبەریا ئاسایشا گەرمیان راگەهاند: ب رەنگەکێ بەردەوام و چاڤدێریکرنا بزاڤێن تیرۆرستێن داعشێ، ھێزێن ئاسایشا گەرمیان، زانیاری وەرگرتن ل سەر تاقمەکێ تیرۆرستێن داعشێ، کو ھاتبوونە چەند دەڤەرێن گەرمیان و ھەرێما کوردستانێ و خوە ڤەشارتبوون، پشتی ڤەکۆلینان و ب دەستخستنا زانیاریان، ئەو تیرۆرستن خستنە ژێر چاڤدێریێ و بەلگێن تەمام کۆمکرن و پشتی رەزامەندیا دادوەری و ب بریارا سەرۆکێ دەزگەهێ ئاسایشا ھەرێما کوردستانێ، ھەلمەتا دەستگیرکرنا دەستیپێکر و هاتنە گرتن.
ئەڤرۆ نیوز:
ئه‌ڤرۆ ئێكشه‌مبی 30/8/2020 نێچيرڤان بارزانى، سه‌رۆكێ هه‌رێما كوردستانێ فه‌رمانا هه‌رێمێ بۆ دامه‌زراندنا جه‌بار مسته‌فا ره‌سۆل ئیمزا كر، وه‌كو سه‌رۆكێ ده‌زگەهێ گشتی یێ كاروبارێن مينان ل هه‌رێما كوردستانێ ده‌ستبكار بیت.
سه‌رۆك نێچيرڤان بارزانى سەرەرای پيرۆزباهیێ، كارێ وی ب گرنگ و نيشتمانى ل قه‌له‌م دا و هيڤی خواست سازیێن حوکمه‌تێ و هه‌موو لايه‌نێن په‌يوه‌ندار و رێكخراو و ئاژانسێن بيانی د ڤی واری دا هاریكاريا ڤی ده‌زگەهی بكه‌ن، هه‌موو پشتگيرى و هاریكاريێن خوە و سه‌رۆكاتیا هه‌رێما كوردستانێ ژی بۆ وی دوپات كر.
نيشاندان