چینێ قوناغا سیێ یا ڤاكسینێ دژه‌ كورونایێ تاقیكر

25/08/2020 12:30

ئه‌ڤرۆ نیوز:

به‌رپرسه‌كێ چینێ راگه‌هاند د چارچوڤه‌یێ پرۆگرامێ ره‌وشێن ژ نشكه‌كێ ڤه‌، كارمه‌ند و ده‌ستێ كارێ یێ سه‌ره‌كی ب ئه‌وی ڤاكسینێ ئه‌وان به‌رهه‌م ئینایی تاقیكرن كو پێشڤه‌بریه‌ ب باشترین شیوه‌.

ژانگ ژونگ وی سه‌رۆكێ ناڤه‌ندا زانستی و ته‌كنولوژی سه‌ر ب لژنا ساخله‌میا نیشتمانی ڤه‌یه‌ راگه‌هاند حوكمه‌تا وه‌لاتێ وی ل هه‌یڤا 7 یا ئیسال رێك دا ڤاكسینێ سارس كوڤ كۆ ل وه‌لاتێ وی هاتیه‌ پێشڤه‌برن و دهێته‌ بكار ئینان ژی ئه‌و ڤاكسینه‌ بۆ ئه‌وان كارمه‌ندێن دبیاڤێ ساخله‌میێ دا كار دكه‌ن، چونكو مه‌ترسیه‌كا زۆرا توشبوونێ ب ڤایرۆسێ كورونایێ ل سه‌ر هه‌یه‌، ره‌زامه‌ندی هاتیه‌ دان ل سه‌ر بكار ئینانا ئه‌وی ڤاكسینی دناڤ سوپایێ وه‌لاتی و كارمه‌ندێن كۆمپانیان كۆ نه‌چارن ب ئه‌گه‌رێ كارێن وان سه‌ره‌دانا وه‌لاتێن ده‌رڤه‌ دكه‌ن.

سه‌رۆكێ ناڤه‌ندا زانست و ته‌كنولوژی یا چینێ ئه‌و چه‌نده‌ ژی راگه‌هاند ئه‌گه‌ر هه‌یه‌ پرۆگرامێ ره‌وشا ژنشكه‌كێ ڤه‌ یا وه‌لاتێ وی ل پائیز و زڤستانا ئیسال به‌رفره‌هتر لی بكه‌ت، د چارچوڤه‌یێ بزاڤێن به‌رده‌وامێن رێگریكرن ژ دوباره‌ به‌لاڤ بوونا ڤایرۆسێ كورونایێ.

وه‌زیرێ ساخله‌میێ: حوكمه‌ت بۆ وه‌رزێ پائیزێ خو به‌رهه‌ڤ دكه‌ت

25/08/2020 12:13

ئه‌ڤرۆ نیوز:

ڤایرۆسێ كورونایێ ل هه‌رێما كوردستانێ یا زێده‌ به‌لاڤ دبیت حوكمه‌ت ژی بۆ وه‌رزێ پائیزێ خو به‌رهه‌ڤ دكه‌ت.

د.سامان به‌رزنجی وه‌زیرێ ساخله‌میا حوكمه‌تا هه‌رێما كوردستانێ راگه‌هاند ڤایرۆسێ كورونایێ ل قوناغا به‌ربه‌لابوونێ دایه‌ وه‌زاره‌ت و حوكمه‌ت ژی خو بۆ به‌رهنگاربوونا ڤایرۆسێ كورونایێ ل وه‌رزێ پائیزێ خو به‌رهه‌ڤ دكه‌ت.

وه‌زیرێ ساخله‌میا حوكمه‌تا هه‌رێما كوردستانێ ئه‌و چه‌نده‌ ژی راگه‌هاند تانوكه‌ ئه‌مریكا بهایێ 800 هزار دۆلاران بۆ كه‌رتێ ساخله‌میا هه‌رێما كوردستانێ ته‌رخانكرینه‌ و مه‌ داخاز ژ نه‌ته‌وه‌یێن ئیكگرتی ژی كریه‌ هه‌ڤكاریا ئاواران بكه‌ن.

وه‌زاره‌تا ساخله‌میێ به‌رهه‌ڤكاریێن به‌رهنگاربوونا ڤایرۆسێن وه‌رزی دكه‌ت

25/08/2020 11:43

ئه‌ڤرۆ نیوز:

په‌یڤدارێ وه‌زاره‌تا ساخله‌میا حوكمه‌تا هه‌رێما كوردستانێ راگه‌هاند دبیت ڤایرۆسێن وه‌رزی یێن سه‌رمایێ كارتێكرنێن خراپ هه‌بن كۆ هه‌ڤده‌مه‌ ل گه‌ل هه‌بوونا ڤایرۆسێ كورونایێ، توشی وه‌لاتیان ب بن، له‌ورا به‌رهه‌ڤكاریێن پێدڤی هاتینه‌ كرن بۆ ئه‌ڤێ چه‌ندێ.

د.محه‌مه‌د قادر په‌یڤدارێ وه‌زاره‌تا ساخله‌میا حوكمه‌تا هه‌رێما كوردستانێ راگه‌هاند وه‌ك وه‌زاره‌تا ساخله‌میێ، به‌رهه‌ڤكاریێن ته‌مام كرینه‌ ژبۆ به‌رهنگاربوون و چاره‌كرنا ڤایرۆسێن وه‌رزێ پائیز و سه‌رمایێ، چونكو دبیت ئه‌و ڤایرۆسێن وه‌رزی كارتێكرنێن خراپ هه‌بن كو هه‌ڤده‌مه‌ ل گه‌ل هه‌بوونا كورونایێ تووشی وه‌لاتیان بیت.

ناڤبری ئه‌و چه‌نده‌ ژی راگه‌هاند بۆ ئه‌ڤێ چه‌ندێ وه‌زاره‌تا ساخله‌میێ به‌رهه‌ڤكاری و پلان وه‌ك پێشكێشكرنا رێنمایێن خوپارێزیێ ژ ڤایرۆسی و پیێشكێشكرنا چاره‌سه‌ریێ و دابینكرنا پێدڤیێن چاره‌كرنێ و دابینكرنا ڤاكسینێ ڤایرۆسان و دابینكرنا جه و كارمه‌ندێ پێدڤی بۆ نه‌خوشخانه‌یان هاتیه‌ دارشتن.

په‌یڤدارێ وه‌زاره‌تا ساخله‌میێ ئه‌و چه‌نده‌ ژی دازانین سالانه‌ كارتێكرنێن ڤایرۆسێن وه‌رزی ل ده‌مه‌كی بۆ ده‌مه‌كێ دی جودایه‌، له‌ورا دڤێت زانیاری و تێگه‌هشتن بۆ ئه‌وێ چه‌ندێ بهێنه‌كرن داكو هه‌ركه‌سه‌ك خو ب پارێزیت.

كازمی سه‌رۆكاتیا شاندێ عیراقێ د كۆمبوونا بلندا سێ قولی دا كه‌ت

25/08/2020 11:32

ئه‌ڤرۆ نیوز:

سه‌رۆك وه‌زیرێ عیراقێ سه‌رۆكاتیا شاندێ وه‌لاتێ خو ل كۆمبوونا بلندا عیراق و ئوردن و مسرێ دا كه‌ت.

ئه‌ڤرۆ 25/8/2020/ نڤیسینگه‌ها سه‌رۆك وه‌زیرێ عیراقێ د به‌یاننامه‌یه‌كێ دا راگه‌هاند مسته‌فا كازمی سه‌رۆك وه‌زیرێ عیراقێ ب سه‌رۆكاتیا شانده‌كێ بلند به‌ره‌ڤ عه‌مانا پایته‌ختێ ئوردنێ رێكه‌ڤت.

سه‌رۆك وه‌زیرێ عیراقێ ب نوونه‌راتیا عیراقێ پشكداریێ ل كۆمبوونا بلندا وه‌لاتێن عیراقێ و ئوردن و مسرێ دا كه‌ت و ل گه‌ل شاهـ عه‌بدولا یێ دوێ شاهێ ئوردنێ و عه‌بدلفه‌تاح سیسی سه‌رۆك كۆمارێ مسرێ كۆم دبیت.

د ئه‌وی كۆمبوونا بلندا هه‌ر سێ وه‌لاتان دا دێ رۆناهێ ئیخنه‌ سه‌ر پرسا هه‌ڤكاری و هه‌ماهه‌نگی یا ئابوورێ دناڤبه‌را هه‌ر سی وه‌لاتان ژبلی پرس و ئاریشه‌یێن رۆژهه‌لاتا ناڤین.

په‌یڤدارێ ده‌سته‌یێ: ڤه‌لڤینه‌ك یا دكه‌ڤیته‌ كه‌رتێ گه‌شتوگوزارێ دا

25/08/2020 11:18

ئه‌ڤرۆ نیوز:

پشتی ده‌مه‌كێ زۆر ژ سست بوونێ، جاره‌كا دی لڤینێن گه‌شتیاری ل هه‌رێما كوردستانێ دروست دبن.

نادر روستی په‌یڤدارێ ده‌سته‌یا گه‌شتوگوزارا هه‌رێمێ راگه‌هاند هێشتا ئامار ل به‌رده‌ست نین د ئه‌ڤان رۆژان دا چه‌ند گه‌شتیار هاتینه‌ ناڤ هه‌رێما كوردستانێ، به‌لێ لڤینه‌كا گه‌شتیاری ده‌ستپێكریه‌ و به‌رده‌وام ژی چاڤه‌ریێ زێده‌بوونێ دكه‌ین.

په‌یڤدارێ ده‌سته‌یا گه‌شتوگوزارێ ئه‌و چه‌نده‌ ژی راگه‌هاند: چاڤه‌ریێ نه‌ بریار ب بیته‌ ئه‌گه‌رێ دوباره‌ ڤه‌ژاندنا كه‌رێ گه‌شتیاری، هه‌ر چه‌نده‌ وه‌رزێ هاڤینێ زۆر نه‌مایه‌، به‌لێ سروشتێ هه‌رێمێ هوسایه‌ گه‌شتیارێ هه‌ر چار وه‌رزان هه‌یه‌.

ل هه‌رێما كوردستانێ كه‌رتێ گه‌شتوگوزاری ل سالێن بوری به‌ره‌ڤ ڤه‌ژاندنه‌كا گه‌شه‌كرنێ دچوو، سالا بوری رێكورده‌كێ نوو ژ رویێ هاتنا گه‌شتیاران توماركر، ب هه‌رسێ پاریزگه‌هانڤه‌، لگۆری ئامارا فه‌رمی یا ده‌سته‌یا گه‌شتوگوزارا هه‌رێما كوردستانێ سێ ملیۆن و 700 هزار گه‌شتیار هایتنه‌ ناڤ هه‌رێما كوردستانێ.

پێلا دوێ یا كورونایێ هاته‌ دیاركرن

25/08/2020 10:28

101

ئه‌ڤرۆ نیوز:

وه‌زاره‌تا ساخله‌میا عیراقێ ده‌مێ هاتنا پێلا دوێ یا ڤایرۆسێ كورونایێ دیاركر.

ئه‌ڤرۆ 25/8/2020، عه‌باس حسینی ئه‌ندامێ شانه‌یا به‌رهنگاربوونا كورونایێ ل ده‌ڤه‌را ره‌سافه‌ یا به‌غدا راگه‌هاند: زێده‌بوونا ژماره‌یا توشبوویێن كورونایێ ل عیراقێ بۆ دو ئه‌گه‌ران دزڤریت، كۆ پیك هاتینه‌ ژ :-

پێگیرنه‌بوونا وه‌لاتیان ب رێنمایێن ساخله‌میێ.
زێده‌بوونا ژماره‌یا پشكنینان، كۆ نوكه‌ رۆژانه‌ 25 هزار پشكنین بۆ وه‌لاتیان دهێته‌كرن.

عه‌باسی ئه‌و چه‌نده‌ ژی دیاركر عیراق تانوكه‌ د قوناغا ئێكێ یا كورونایێ دایه‌ و پێلا دوێ یا ئه‌ڤی ڤایرۆسی ل هه‌یڤا 10 یا ئیسال دێ سه‌رهلده‌ت.

تانوكه‌ 207 هزار و 985 كه‌س ل عیراقێ توشی ڤایرۆسێ كروناێ بوون و ژ ئه‌ڤێ ژماره‌یێ ژی شه‌ش هزار و 519 كه‌سان گیانێ خوه‌ ژ ده‌ست دانه‌.

د روودانەکا ترافیکێ دا کەسەک بریندار بوو

25/08/2020 10:13

ئەڤرۆ نیوز، زنار تۆڤی:

موقەدەمێ مافپەروەر ئازاد تاها بەرپرسێ راگەهاندنا رێڤەبەریا گشتی یا هاتنوچوونا پارێزگەها دهۆکێ، بۆ ئەڤرۆ نیوز دیار کر: د روودانەکا ترافیکێ دا کەسەک بریندار بوو.

ناڤهاتی زێدەتر گۆت: ل شەڤا بوری ل ناڤا سەنتەرێ قەزا زاخۆ و ل جادا بێدارێ ترۆمبێلەکا تایبەت جێب رەنج رۆڤر یا رەنگ شین، ژ ئەگەرێ بلەز هاژوتنێ، ترۆمبێل ل ژێر کونترۆلا شۆفێری دەرکەفتیە و خوە ل سێ ستوونێن کارەبێ ل گەل نیشانەکا هاتنوچوونێ و چەندین داران دایە، د ئەنجامدا کەسەک بریندار بوویە و زیانێن مادی یێن مەزن ب ترۆمبێلێ کەفتینە و ستوونێن کارەبێ ژی هاتینە هەلوەشاندن.

32 سال سه‌رئه‌نفالا بادینان ده‌رباز بوون

25/08/2020 10:07

ئه‌ڤرۆ نیوز:

ئه‌ڤرۆ 32 سال سه‌ر قوناغا هه‌شتێ یا كاره‌ساتا ئه‌نفالان ده‌رباز دبن كۆ ل ده‌ڤه‌را بادینان روودابوو.

رژێما ژناڤچوویا به‌عس ب هه‌شت قوناغان ئاكنجیێن باشوورێ كوردستانی ل چه‌ند ده‌ڤه‌ره‌كێن جودا جودا جینوسایدكرن كۆ تێدا زێده‌تری 182 هزار وه‌لاتی شه‌هید و ئه‌نفال و بێسه‌رۆشینكن و ب سه‌دان گوند كاڤلكرن، قوناغا هه‌شتێ یا كاره‌ساتا ئه‌نفالان ل ده‌ڤه‌را بادینان بوو.

دێ ڤه‌گه‌ریتە‌ڤه یانا‌ به‌رشه‌لۆنا

24/08/2020 23:46

ئەڤرۆ نیوز:

كوتینهۆ یاریکەرێ بەرازیل، ب شێوێ خواستنێ په‌یوه‌ندى ب یانا بایرن میونخ یا ئەلمانی كربوو، پشتى كو نه‌شیاى ل گه‌ل یانا به‌رشه‌لۆنا یا ئیسپانی هه‌بوونا خوە ب سه‌لمینیت.
لێ پشتى ب ده‌ستڤه‌ ئینانا ناسناڤێ چامپیونز لیگێ ل گه‌ل یانا باڤارى، وى یاریزانی دوپات كر، كو ئارمانجا وى ئه‌وه‌ ڤه‌گه‌ریته‌ڤه‌ یانا به‌رشه‌لۆنا، هەر چەندە هه‌تا نوكه‌ وی هزر ل وێ چه‌ندێ نه‌كریه، کانێ دێ‌ پێنگاڤا وی یا داهاتى دێ چ بیت، به‌لێ ئەو دێ دانوستاندنان ل گه‌ل راهێنه‌رێ نوو یێ یانا كه‌ته‌لونى دێ ده‌ست پێكه‌ت.

وه‌زاره‌تا چاندنێ ئینانا باجانان ژ دەرڤە دێ قه‌ده‌غه‌ که‌ت

24/08/2020 21:53

ئەڤرۆ نیوز:

وه‌زاره‌تا چاندن و ژێده‌رێن ئاڤێ راگەهاندیە: بۆ پاراستنا به‌رهه‌مێ خۆمالی، مه‌ داخوازا قه‌ده‌غه‌كرنا ئینانا به‌رهه‌مێن باجان سوركان كریه‌.

وه‌زاره‌تا چاندن و ژێده‌رێن ئاڤێ، د نڤیسارەکێ دا، کو بۆ وه‌زاه‌تا دارایی و ئابووری یا هەرێمێ هنارتیه‌ و تێدا داخوازا قه‌ده‌غه‌كرنا ئینانا به‌رهەمێ باجانان دكه‌ت و راگه‌هاندیه‌: ب پشت به‌ستن ب قانوونا پاراستن و به‌ره‌ف پێشبرنا به‌رهەمێن چاندنێ یا هژماره‌ 4 یا سالا 2008، ب پشته‌ڤانی ب نڤێسینه‌كا سه‌رۆكا‌تیا جڤاتا وه‌زیران یا هژماره‌ (6547) ل رێكه‌فتی 22، 10 یا سالا 2014 كو تایبه‌ته‌ ب پاراستنا به‌رهه‌مێ خومالی، بریار دایه‌ ب قه‌ده‌غه‌كرنا هاورده‌كرنا به‌رهەمێن باجانان ژ ده‌رڤه‌ی وەلاتی ل رێكه‌فتی 27 تەباخا سالا 2020 بۆ ده‌مه‌كێ نه‌دیار.

هه‌ر دوێ نڤێسینێ دا هاتیه‌، ب تنێ دێ رێك ب وان به‌رهەمان هێته‌دان یێن كو موله‌تا هاورده‌كرنێ وه‌رگرتین هه‌تا ده‌رچوونا ڤێ نڤیسینێ ب به‌رچاڤ وه‌رگرتن و وه‌رگرتنا باجێ لدووڤ خشتێ باجێن ئه‌ڤ ساله‌ ( نابیت چ موله‌ته‌كا نوو یا هاورده‌كرنێ بهێته‌دان پشتی ده‌رچوونا ڤێ نڤێسینێ).

نيشاندان 1...1,000 106107108 1,100 2,100 3,100...4,170 زێده‌تر

لاپه‌ر 107 ژ 4,170