ئه‌ڤرۆ نيوز:

رێڤەبەرێ گشتیێ ئاڤاکرنا ھەولێرێ ئاماژە ب قۆناغێن تەمامکرنا رێیا سەرەکیا ‏ھەولێر بۆ دھۆکێ دکەت و ئاشکراکر، ل رۆژێن داھاتێ دێ دەست بجھئینانا رێیا ‏ھەولێر دھۆک ل سەنتەرێ باژێڕێ ھەولێرێ ھەتا رۆڤیا ھێتەکرن و دیارکر، ل حەفتیا ‏داھاتێ دێ گرێبەستا پڕۆژەی دناڤبەرا کۆمپانیا ھێمن گروپ و سەرۆکاتیا جڤاتا ‏وەزیران ھێتە ئیمزاکرن.‏

ھونەر گلی، رێڤەبەرێ ئاڤاکرن و ئاکنجیکرنا ھەولێرێ بۆ رۆژناما ئەڤرۆ گۆت “رێیا ‏ھەولێر بۆ دھۆک سێ قۆناغا پێکھاتیە و قۆناغا ئێکێ دھۆک ھەتا رۆڤیایە بەری نوکە ‏حوکمەتێ دایە کۆمپانیەکێ، بەلێ دیارە نەھاتیە تەمام کرن، نوکە سەرۆکایەتیا ‏جڤاتا وەزیران جارەکا دی پڕۆە دایە کۆمپانیەکا نافخۆیی و ل رۆژێن بۆری سەرۆکێ ‏حوکمەتێ بەری بنیاتی بۆ دانا و دێ ھێتە دەستپێکرن و تەمام کرن، قۆناغا دوێی ‏رۆڤیا بۆ ھەولێرە، ئەڤە نوکە د قۆناغا تەندەری دایە و ل ڕۆژێن داھاتی گرۆپێ ‏کۆمپانیێن ھێمن دێ دەست ب پڕۆژێ چێکرنا رێیا سەرەکیا دھۆک ھەولێر کەت ل ‏سەنتەرێ باژێڕێ ھەولێرێ، کو رێیا دھۆک ل سەنتەرێ باژێڕێ ھەولێرێ جادا 150 ‏دەستپێ دکەت ھەتا دگەھیتە سەر روبارێ زێیێ مەزن.‏

ھونەر گلی ئاماژەکر “ل چەند رۆژێن داھاتی دێ گرێبەستا بجھئینانا پڕۆژێ رێیا ‏ھەولێر دھۆک ل سنورێ پارێزگەھا ھەولێرێ ھێتە ئیمزاکرن دناڤبەرا سەرۆکایەتیا ‏جڤاتا وەزیران و کۆمپانیا کار تێدا دکەت، کو بڕیارە ھەموو رێ ھەر ل ھەولێرێ ھەتا ‏پرا گۆپالەی بھێتە تەمام کرن و درێژاھیا رێیێ 38 کلیۆمەترن، ئەڤە ژی ژبلی ‏درێژاھیا پرێ، بێگومان ھەردو رێ ل سنورێ پارێزگەھا ھەولێرێ و پارێزگەھا دھۆکێ ‏بھێنە تەمام کرن دێ پڕۆژە بەرەف دووماھیێ چیت و مفایەکێ زۆر ھەبیت بۆ ‏وەلاتیێن ھەردو پارێزگەھێن ھەرێما کوردستانێ، چونکو ل ھەولێرێ ھەتا دگەھیتە ‏ئیبراھیم خەلیل رێ ھەموو دێ بیتە دو ساید و ب ستاندەردێن پێشکەفتی دێ ھێتە ‏چێکرن، ئەڤە ژی دێ بیتە ئێک ژ رێیێن پێشکەفتی و سەرەکیێن ھەرێما کوردستانێ.‏

ئه‌ڤرۆ نيوز:

سێ کچ کو خەلکێ فرەنسانە و قوتابیێن کولیژا پزیشکی نە ل قوناغا 6ێ و ‏دووماھیێ ل پاریس ژ زانکویا ‏‎ (Paris5 Decartes)‎ل فرەنسا، ئەڤە بو ماوێ ‏ھەیڤەکێ یە . ب سەرپەرشتیا رێکخراوا (ستێب ئین) وەک خۆبەخش ھاتینە ‏ھەرێما کوردستانێ دا کو خزمەتا ئاوارا بکەن، روژانە ل دەمژمێر 8 سپێدێ ھەتا ‏‏3:30 ئێڤاری ل کلینیکا نوژداری یا کەمپا داودیێ و شاریا کار دکەن و ھندەک ‏روژا چوینە دەف ئاوارێن گوندا ژی.

بوچی تە کوردستان ھەلبژارد؟ سەڤدایێ گۆت: (من شیان ھەبون و ھەلبژاردن یا ‏من بۆ کو بچمە ھەر جھەکێ، لێ ژبەرکو ئەسلێ من کوردە، لەوما من کوردستان ‏ھەلبژارد و من دڤیا ھاریکاریا نەتەوا خوە بکەم، ھەرچەندە کوردا باکورم و ل ‏فرەنسا بۆیمە و ژیایمە، بەس من ئەو نێزیکی یا ھەی ل گەل کوردێن ھەر چار ‏پارچێن دیتر). ‏

سەڤدایێ ئەو چەندە ژی گۆت: (من دڤیا بھێم کوردستانێ ببینم، ژبەرکو من ‏دزانی ئێزدی پشتی سالا 2014 و ھاتنا داعشا گەلەک یێن ھاتینە ئێشاندن و من ‏زانی کو کەمپێن وان ھەنە، لەوما من دڤیا ھاریکاریەکا مرۆڤایەتی پێشکێشی وان ‏بکەم، ھەروەسا ژبەرکو ئەم قوتابیێن قوناغا 6ێ و دووماھیێ یا کولیژا پزیشکی ‏نە و دێ تبێ خلاس کەین، ئەڤجا مە دڤیا تشتەکێ جیاواز ببینین ژ وێ ئەوا مە ‏دیتی و خواندی و پتر بکەڤینە د کاریدا ل جھەکێ جیاواز و ئاریشێن جیاوازتر ‏ببینین ژ وان یێن مە دیتین). ‏

چاوا کورددستانێ د ھەلسەنگینی؟ سەڤدایێ گۆت: (من دزانی کوردستان یا ‏پێشکەفتیە و بەحسێ کوردستانێ بو من ھاتبو کرن، بەس ئەڤا من بچاڤێن خوە ‏دیتی گەلەک زێدەتر بو ژ وێ ئەوا بو من ھاتیە گۆتن و ئەوا من پێشبینی دکر و ‏بو من گەلەک یا خۆش بۆ، چونکی وەکی دبینم د گەلەک لایەنا دا یا پێشکەفتیە و ‏ئەو تشت لێ ھەنە ئەوێن د وەلاتەکێ پیشکەفتی دا ھەبن و بتنێ ئەو تشتێ من ‏دیتی کو یێ جیاواز ل گەل پێشبینیێن من برینا کەھرەبێ بو).‏

ئاوارا چ گازندە ھەبون؟ سەڤدیێ گۆت: (ئاوارە گەلەک پێدڤی ب ھندێ نە کو ‏باخڤن و ئێک گوھداریا وان بکەت، ژبەرکو دەنگێ وان ناگەھیتە چ جھا ھەکو مە ‏دبینن دھێن دئاخڤن و حەز دکەن ئەم گوھێ خوە بدەینێ). ‏

کلیمانتین ژی ئێک ژ وان کچایە گۆت: (یا گرنگ بو من ئەوە خزمەتا مرۆڤایەتیێ ‏بکەم، لێ من ژبەرھندێ کوردستان ھەلبژارد ژبەرکو د ڤان سالێن دووماھیێ دا ‏گەلەک بەحسێ کوردستانێ د میدیایێ دا ھاتە کرن و لبەر گوھێن مە کەفت مە ‏نیاسی و مە زانی کو ئاریشەکا مەزن ل ڤێرە ھەیە، ھەروەسا ھاتنا پەنابەرا بو ‏ئەوروپا و سیاسەت و حوکمەتا مە بخۆڤە مژوول کر و مە بخو ژی ھەست پێ دکر ‏لەوما یا بو مە گرنگ بو کو بھێینە ڤێرە). ‏

ھوون چ دکەن بو ئاوارا؟ کلمانتینێ گۆت: (ئەم رۆژانە ژ دەمژمێر 8 دچینە ناڤ ‏کەمپا دا و دەست ب کارێ خوە دکەین ھەتا دەمژمێر 3:30 ئێڤاری ھەر ئێک ژ ‏مە رۆژانە ھەتا 30 نەخۆشا د مەشینینن و چارەسەر دکەین، نەک بتنێ ل کەمپا ‏داودیێ و شاریا ئەم کار دکەین بەلکو ئەم دچینە گوندا ژی نەخۆشا چارەسەر ‏دکەین). ‏

ھەوە رەوشا ئاوارا و کەمپێ چاوا دیت؟ کلیمانتینێ گۆت: (ئەوا مە دیتی ل کەمپا ‏داودیێ کو کەمپەکا بچووکە بەس کەمپەکا گەلەک باش و ب رێک و پێکە و ھەموو ‏خزمەتگوزاری لێ ھەنە و یا پاقژە و کلینیکێن نوژداری لێ ھەنە و ژ ھەموو لایەکێ ‏ڤە باش یێن ھاتینە دروستکرن، بەس پاشەروژ نینە و ئەڤ چەندە کارتێکرنەکا ‏دەروونی لێ دکەت، چونکی کەس نزانیت دێ پاشەروژا وی چلێ ھێت).‏

ھەوە بەس ژلایێ ساخلەمیڤە خزمەتا ئاواران کریە یان ژلایێ ماددیڤە ژی؟ ‏ئوغیلی گۆت: (مە ژ ھەردو لایاڤە خزمەتا ئاوارا کریە ھەم ژلایێ ساخلەمیڤە و ‏ھەم ژی ژ لایێ ماددیڤە و نێزیکی ھزار کارتونێن تشتا مە ل سەر 5 ھزار کەسا ‏پارڤە کرن کو ئەو پێداویستی تێدا بون یێن روژانە پێدڤی دبنێ، ھەر کارتونەک ‏بو 5 کەسا بوو). ‏

دەمێ ھەوە ڤیای بھێنە کوردستانێ کار بکەن خێزانێن ھەوە نەبونە رێگر؟ ئوغیلی ‏گۆت: (بو مە عاجز بون و گەلەک دو دل بون بەس نەبونە رێگر، چونکی بو وان ‏ئیران، عیراق، تورکیا، سوریا ئەو دەڤەرن یێن مەترسی تێدا ئەوان و ھند زانیاری ‏نینن کو بزانن کوردستان دەڤەرەکا جیاوازە ژ وان جھا و وەسا دبینن کو یا د ‏مەترسیێ دا لێ ئەم نەشیاینە وان وەسا تێ بگەھینین و باوەریێ بۆ چێکەین کو ‏کوردستان دەڤەرەکا ئێمنە و گەلەک کەمپ و ئاوارە تێدانە ژبەرھندێ ژی روژانە ‏ئەم پەیوەندیێ ب خێزانێن خوە دکەین دا کو بزانن ئەم ب سلامەتین). ‏

پشتی ھوون ھاتینە دناڤ ئاوارا دا ھەوە ھەلسەنگاندنەک کریە و د چ بواردا کێشە ‏ھەنە؟ ئوغیلی گۆت: (مە د بوارێ ساخلەمیێ دا ھەلسەنگاندن کریە و نەخوشیێن ‏وان د ژێکجودانە و چەندین نەخوشی دناڤ ئاوارا دا ھەنە و ھندەک دوم درێژن ‏وەک فشارێ و نەخوشیا شەکرێ بتایبەت کەسێن ب تەمەن ئێشێن وان ئەڤەنە و ‏یێن زارۆیان ژی ئیلتھاب و نەخوشیێن پیستی گەلەک د زورن، ھەورەسا ھندەکا ژی ‏پشت ئێش و لەش ئێش ل دەف ھەیە و ئەم دبینین ئەگەرێن ڤێ چەندێ ژی پتر بۆ ‏نەخوشیێن دەروونی د زڤرن و نەخوشیێن دەروونی ژی د زێدەنە لەوما پێدڤیە ‏ژبلی کلینیکێن تبی یێن سایکولوژی بھێنە ڤەکرن).‏