ئەڤرۆ نیوز:
وەزارەتا ساخلەمیا هەرێما کوردستانێ ئامارێن 24 دەمژمێرێن بوری یێن تایبەت ب ڤایرۆسێ کۆرۆنایێ بەلاڤکرن و دیار کریە: کو 252 تووشبوویێن نوو یێن ڤایرۆسێ کۆرۆنایێ ل هەرێما کوردستانی هاتینە دەستنیشان کرن و 13 تووشبوویان وەغەر کریە و دیسان 122 کەسێن دی ژ وێ نەخۆشیێ چێبووینە.
هەروەسا گۆتیە: ئەو کەسێن تووشبووین 98 ژ وان ل هەولێرێ نە، 62 ل سلێمانیێ، 39 ل ئیدارا راپەڕین، 29 ل ئیدارا گەرمیان، 14 ل دهۆکێ و 10 ل هەلەبجە.
ئه‌ڤرۆ نیوز، مه‌حمود نهێلى:
رازیبوون هاتیه كرن ل سه‌ر سه‌خبێكرنا به‌شه‌ك ژ رێیا سێ گوندێن سه‌ر ب قه‌زا ئامێدیێ ڤه كو رێیا جهێن گه‌شتیارى ژى ب خوه ڤه دگریت.
ئه‌ندازیار ئه‌ڤراز ئامێدیێ، سه‌رۆكێ باژێرڤانیا ئامێدیێ بۆ ئه‌ڤرۆ نیوز دیاركر: كو هه‌ر چه‌ند مه دڤیا ئه‌ڤ رێیه ل سه‌ر پارێ تایبه‌تێ سندوقا نێڤده‌وله‌تى هاتبا چێكرن لێ نه‌ئێك ژ وان پرۆژه‌یان بوویه و گۆت: ( ئه‌ڤ جاده‌یه رێیا سه‌ره‌كى یا سێ گوندێن ده‌ڤه‌را به‌رێ گارێ یێن ده‌وروبه‌رێن سه‌نته‌رێ قه‌زایێ یه، زێده‌بارێ رێیا سه‌ره‌كى یا جهێ گه‌لیێ سێ پركایه كو ئێكه ژ جهێن گوزارى ل ده‌ڤه‌را ئامێدیێ).
ئه‌ندازیار ئه‌ڤراز ئامێدى دیار ژى كر، كو ل سه‌ر بودجێ تایبه‌تێ پارێزگه‌ها دهوكێ كوژمێ 60 ملیون دیناران بۆ سه‌خبێركرنا به‌شه‌كى ڤێ جاده‌یێ هاتینه ته‌رخانكرن كو د بیته به‌شه‌ك ژ رێیا تاخێ مرێبكا ژى ل سه‌نته‌رێ قه‌زایێ.
ناڤهاتی گۆت ژی: (بۆ چێكرنا ڤێ جادێ مه پێدڤى ب كوژمه‌كى پتر یێ پاره‌ى هه‌یه كو درێژاهیا وێ دبیته پتر ژ حه‌فت كیلومه‌تران ) و ئاشكرا كر ، كو وان چه‌ندین جاران ڤه‌دیتن بۆ ئه‌نجامداینه و ب نڤیسار بلند كرینه لێ تا نوكه رازیبوون ل سه‌ر چێكرنا وێ جاده‌یێ ب ره‌نگه‌كێ باش كو هه‌موو جادێ بخوه بگریت نه‌هاتیه كرن.
ئەڤرۆ نیوز:
رێڤەبەریا گشتی یا ساخلەمیا پارێزگەها دهۆکێ راگەهاند: ئەڤرۆ سێشەمبی، 21/7/2020، یازدە نەخۆشێن دی یێن ڤایرۆسێ کۆرۆنایێ ل دهۆکێ کو د نەخۆشخانێ دا بوون، پشتی هەموو پشکنین بۆ هاتینە کرن، دیاربوو کو ب تەمامی چارەسەربووینە و ب سلامەتی ژ نەخۆشخانێ هاتنە دەرخستن.
هەروەسا گۆتیە: ب ڤێ چەندێ هژمارا گشتی یا نەخۆشێن چارەسەربووین گەهشتنە 285 کەسان ل دهۆکێ و نوکە 58 نەخۆش ماینە د نەخۆشخانێ دا.
ئەڤرۆ نیوز:
د. عەلی تەتەر پارێزگارێ دهۆکێ دیار کر کو وان وەکو پارێزگەها دهۆکێ دڤێت ئاسانکاری بۆ هاتنوچوونا د ناڤبەرا پارێزگەهان دا هەبیت لێ راکرنا ب تەمامی یا قەدەغەیا هاتنوچوونێ نها د جهێ خوە دا نینە و وان نەڤێت نها هاتنوچوون د ناڤبەرا پارێزگەها دهۆکێ و پارێزگەهێن دی دا ئاسایی ببیت.
ناڤهاتی راگەهاند ئەو ل گەل هندێ نە ئاسانکاری بۆ هاتنوچوونێ د ناڤبەرا پارێزگەهان دا بهێتە کرن.
ئەو یەک د دەمەکێ دایە کو ئەڤرۆ هەڤال ئەبوبەکر پارێزگارێ سلێمانیێ راگەهاند کو وان پێشنیازا هندێ دایە لیژنا بلند یا بەرهنگاریا کۆرۆنایێ ل هەرێما کوردستانێ کو قەدەغەیا هاتنوچوونێ د ناڤبەرا پارێزگەهان دا بهێتە راکرن.
ئەڤرۆ نیوز:
هەڤال ئەبوبەکر پارێزگارێ سلێمانیێ راگەهاند کو وان بۆ کۆمبوونا بلند یا بەرهنگاریا کۆرۆنایێ ل هەرێما کوردستانێ پێشنیاز کریە کو قەدەغەیا هاتنوچوونێ د ناڤبەرا پارێزگەهێن هەرێما کوردستانێ دا نەمینیت.
ناڤهاتی ئەو یەک ژی دیار کو بێگومان دڤێت رێنمایێن خوە پاراستنێ بهێنە بجهکرن و ب مەرج قەدەغەیا هاتنوچوونێ یا د ناڤبەرا پارێزگەهان دا بهێتە راکرن.
ئەڤرۆ نیوز، زنار تۆڤی:
ئەڤرۆ سێشەمبی 21.7.2020 کامی کەمال پەیڤدارێ كومه‌لگه‌ها ده‌روازێ نێڤده‌وله‌تى یێ ئیبراهیم خه‌لیل، بۆ ئەڤرۆ نیوز دیار کر: ل چه‌ند مالپەرێن تۆرێن جڤاكی دا نووچه‌یەك به‌لاڤ بوویه و تێدا دیار کریە، كو سۆپایێ عیراقێ ده‌ست ب سه‌ر كۆمه‌لگه‌ها ده‌روازێ نێڤده‌وله‌تى یێ ئیبراهیم خه‌لیل دا گرتیه و كۆنترول كریه، لێ ئه‌م ڤێ نووچه‌ی ره‌د دكه‌ین و بێ بنه‌ما ل قه‌له‌م دده‌ین، چ هێزێن سۆپایێ عیراقێ ژی نەهاتینە دەروازێ ئیبراهیم خەلیل.
ئەڤرۆ نیوز، عەلی حاجی :
دۆر ل چاڤێ راگەهاندنێ سەرۆکێ حکومەتا هەرێما کوردستانێ سەرەدانا باژێرێ زاخۆ کر و ژلایێ بوتان محسن قایمقامێ زاخۆ ڤە هاتە پێشوازی کرن و ل دووڤ دا ژی کومبوونەک دگەل ئیدارا باژێرێ زاخۆ ساز کر.
دکتور عەلی تەتەر پارێزگارێ دهوکێ بۆ دەزگایێن راگەهاندنێ گۆت: (د سەرەدانا خوە دا بۆ باژێرێ زاخۆدا ،مەسرور بارزانی سەرۆکێ حکومەتا کوردستانێ ب کوژمێ ٥٠ ملیار دیناران بریارا دروست کرنا پروژەیان ل زاخۆ دەرکر کو ئەو پروژەیە دێ ل هەمی ناحی و گوندان خوە ڤەگریت و هەر دیسان ژ وان هندەک پرۆژەیان ژی کو بەردەوام خەلکێ زاخۆ بەحس لێ دکەت ئەو ژی تەمام کرنا جاددەیا دناڤبەرا ئیبراهیم خەلیل بۆ زاخۆ و هەر دیسان تەمام کرنا جاددەیێ ژ ئیبراهیم خەلیل بۆ کومەلگەها دێرەبونێ و پروژەیەکە پێدڤیە بهێتە ڤەکرن بەلێ ژ بەر نە تەمام بوونا پشکەکا جاددەیێ هەتا نوکە نەهاتیە ڤەکرن بەلێ دێ د دەمەکێ نێزیک دا هێتە ڤەکرن کو دبیت هەتا ١٠٠ ملیار دینار تێچوویێ وی پروژەی بیت و ژ پروژەیێن ستراتیژی یە و دێ پاشەروژێ دا مفایەکێ باش ژێ هێتە دیتن و هەر دیسان ژ وان پروژەیان ژی بریار ل سەر دروست کرنا پروژەیێ ئاڤا باتیفا هاتیە دان کو دێ هەمی گوند و کومەلگەهـ و سەنتەرێ ناحیێ ب خوە ڤە گریت ئەو ژی ئێک ژ پروژەیێن ستراتیژی یە و دێ بۆ ماوەیەیکێ درێژ ژی مفا ژێ هێتە دیتن و ئاریشەیا ئاڤێ ل وێ ناحیێ چارەسەر کەت و هەر دیسان).
پارێزگارێ دهۆکێ هەروەسا دیار کر نەبوونا ئوڤەر پاسەکێ دناڤبەرا جاددەیا زاخۆ بۆ زانکویا کو دبوو ئەگەرێ چەندین کێشەیان لەورا بریار هاتە دان ئەو کێشەیە ژی بهێتە چارەسەر کرن و زێدەباری ڤان پروژەیان بریارا جێبەجێ کرنا چەندین پروژەیان د بیاڤێن ئاڤ و کارەب و ساخلەمی و پەروەردە و قیرکرنا جادەیێن زاخۆ و هەر دیسان ژی سەرۆکێ حکومەتێ بریار ژی دایە کو پشتی ڤێ قوناغێ پروژەیێن مایی ژی بهێنە دروست کرن کو ژ پروژەیێن درێژ خایەن دهێنە هەژمارتن.
ل دۆر بەلاڤکرنا پارچە زەڤیان ل پارێزگەها دهوکێ دکتور عەلی دیار کر ئەو کەسێن رزامەندیا وەرگرتنا پارچە زەڤیەکێ وەرگرتین رێژەیا وێ گەلەک زێدەترە ژ رێژەیا زەڤیێن بەردەست و ئەڤ چەندە ژی پێدڤیە ب رێژەیەکا زور یا ئەردی هەیە و نە بتنێ نەبوونا ئەردی ئاریشەیە بەلکو برنا خزمەتگوزاریان ژی بۆ وان تاخان ئێک ژ ئاریشەیانە و وەکو پێدڤی ژی حکومەتا خوەجهی ژی نەشیایە وان پارچە زەڤیان بۆ وان کەسان دەستنیشان بکەت یێ کو ژمارا ئەردی پێ هاتیە دان و ب بەلاڤ کرنا پارچە زەڤیان ژی کێشەیا نیشتەجێ بوەنێ چارەسەر نابیت لەورا ئەم ب هێڤی نە دگەل سەرمایەداران رێککەڤتنێ بکەین کو پروژەیێن نیشتەجێ بوونێ دروست بکەن بەلێ ب بهایەکێ ئەرزان دا کو مفا ژێ بهێتە دیتن و شوقەیێن گران بها ژی بتنێ کەسانێن دەولەمەند دشێن بکرن.
ناڤبری گۆت ژی: سەرەدانێن ب ڤی رەنگی دێ بەردەوام بن و بلا خەلک چاڤەرێ بیت دێ کارێن باش هێنە ئەنجام دان بەلێ پێنگاڤ ب پێنگاڤ و د پێنگاڤا ئەڤرۆ یا سەرەدانا سەرۆکێ حکومەتێ بۆ زاخۆ رەزامەندی ل سەر هەمی پروژەیێن زاخۆ هاتە دان و ئەم خەلکێ خوە ژی ب هەژی هەمی پروژەیان دبینین.
ئه‌ڤرۆ نیوز:
لگۆری دوماهی ئامارێن توشبوویێن ڤایرۆسێ كورونایێ ل سه‌ر ئاستێ جیهانێ هه‌تا نوكه گه‌هشتیه 14 ملیۆن و 859هزار و 319 توشبوویان، ژ ئه‌ڤێ هژماره‌یێ ژی هه‌شت ملیۆن و 911 هزار و 341 كه‌س ژی ساخ بووینه، 613 هزار و 353 كه‌سان ژی گیانێ خوه ژ ده‌ست دایه.
ل سه‌ر ئاستێ وه‌لاتێن جیهانێ، ئه‌مریكا د پله‌یا ئێكێ دهێت، كۆ تێدا سێ ملیۆن و 916 هزار و 429 توشبووی تێدا هاتینه توماركرن، ژ ئه‌ڤێ ژماره‌یێ ژی ملیۆنه‌ك و 849 هزار و 989 كه‌س ساخ بووینه، 143 هزار و 834 كه‌سان ژی گیانێ خوه ژ ده‌ست دایه.
نيشاندان