ئه‌ڤرۆنيوز:
نوونه‌رێ مه‌سيحيان ل په‌رله‌مانێ كوردستانێ راگه‌هاند، مه‌سيحيان كێشه‌كا مه‌زن يا ده‌نگدانێ هه‌بوو، به‌لێ ئه‌و كێشه هاته چاره‌سه‌ركرن وئه‌وێ پرۆسا بايۆمه‌ترى ئه‌نجام نه‌دابيت، دشيت ب كارتا ده‌نگدانێ وبه‌لگه‌نامه‌كا فه‌رمى ده‌نگى بده‌ت.
مه‌سيحيان پێنج كورسيێن كۆتا بۆ جڤاتا نوونه‌رێن عيراقێ يێن هه‌ين وهه‌فت ليستێن مه‌سيحى ل عيراقێ وهه‌رێما كوردستانێ هه‌ڤركيێ ل سه‌ر بده‌ستڤه‌ئينانا وان پێنج كورسيان دكه‌ن ل به‌غدا ومووسلێ وكه‌ركووكێ وهه‌ولێرێ ودهۆكێ .
نوونه‌رێ مه‌سيحيان ل په‌رله‌مانێ كوردستانێ، سرور مه‌تى، بۆ مالپه‌رێ فه‌رميێ پارتى ديموكراتى كوردستان گۆت” هنده‌ك ژ مه‌سيحيێن زوو بايۆمه‌ترى ئه‌نجامداى، كارتێن وان يێن ده‌نگدانێ ب وێنه‌ڤه يێن زڤرين وهنده‌كان ژى پشتى سه‌رێ سالێ بايۆمه‌ترى ئه‌نجامداى، دێ كارتێن وان پشتى هه‌لبژارتنان زڤرن ئانكو ل 1/6/ 2018، له‌وما وان كێشان ده‌نگدانێ هه‌بوو، به‌لێ كۆمسيۆنێ بريار دايه ئه‌و دشێن ب كارتا كه‌ڤن ده‌نگى بده‌ن وپێدڤيه ل گه‌ل وێ كارتێ ژى به‌لگه‌نامه‌كا فه‌رمى دگه‌لدا بيت ووێنه ل سه‌ر بيت وب ڤێ چه‌ندێ ئه‌و كێشه هاته چاره‌سه‌ركرن”.
سه‌باره‌ت ده‌نگدانا ئاوارێن ده‌شتا نه‌ينه‌وا، سرور مه‌تى گۆت” مه ل گه‌ل كۆمسيۆنا ئاخڤتيه وبرياره كۆمسيۆن بنگه‌هه‌كێ ده‌نگدانێ يێ تايبه‌ت بۆ ڤه‌كه‌ت، به‌لێ پێدڤيه هه‌ر ئاواره‌ك بۆ پارێزگه‌ها خوه ده‌نگ بده‌ت، چونكى ئاوارێن ئه‌نبار وتكريت ومووسل يێن ل هه‌رێما كوردستانێ هه‌ين”.
نيشاندان