ئه‌ڤرۆ نیوز:
لگۆری دوماهی ئامار ل هه‌موو جیهانێ ل سه‌ر ڤایرۆسێ كورونایێ، توشبوویێن كورونایێ ژ 9 ملیۆن كه‌سان ده‌رباز بوو.
ئامارێن سه‌ر ڤایرۆسێ كورونایی ئاماژه‌یێ ب ئه‌وێ چه‌ندێ دده‌ن، كۆ ل هه‌موو جیهانێ توشبوویێن كورونایێ گه‌هشته 9 ملیۆن و 52 هزار و 9سه‌د و 58 كه‌سان، ژ ئه‌ڤێ ژماره‌یێ ژی 4 ملیۆن و 842 هزار و 306 كه‌س ساخ بووینه، ل گه‌ل ئه‌ڤێ چه‌ندێ ژی 370 هزار و 844 توشبویان ژی گیانێ خوه ژ ده‌ست دایه.
ئەڤرۆ نیوز،عەلی حاجی :
رێڤەبەرێ ناحیا باتیفا د داخویانیەکێ دا بۆ ئەڤرۆ نیوز دیار کر گوندێ کەشانێ یێ سەر ب ناحیا باتیفا ڤە بەریا دەمەکی بۆ ئێکەم جار هاتە چوول کرن و چ کەس د وی گوندی دا نەمایە.
زێدەتر دلشێر عەبدولسەتار گۆت: ل شەڤا دەرباز بوویی یا رۆژا ئێک شەمبی نێزیکی ٩ خێزانان گوندێ کەشانێ بجهـ هێلان ژ ئەگەرێ شەرێ بەردەوامێ دناڤبەرا پەکەکێ و سوپایێ تورکیا دا و بەردەوامیا توپبارانا وی گوندی ژلایێ سوپایێ تورکیا ڤە، ئەڤرۆ رۆژا دوو شەمبێ ژ نەچاری شەش خێزانان دناڤ وی گوندی ژی دا ماین ب ئێکجاری گوندێ کەشانێ بجهـ هێلان و نوکە دا چ کەسەک د وی گوندی دا نەمایە و ب ئێکجاری هاتە چوول کرن و بجهـ هێلان و گوندی ژی د دەمەکێ دایە کو بەردەوام دەوروبەر و هەتا ناڤ گوندی ب خوە ژی دا د هاتە توپباران کرن و د ماوەیێ دەست ب کاربونا من دا وەکو رێڤەبەرێ ناحیێ بۆ ئێکەم جارە ئەڤ گوندە ب ئێکجاری دهێتە چوول کرن.
ناڤبری گوت ژی : ب چوول کرنا گۆندی ژی دێ زیانێن ماددی بەر ب جۆتیارێن وی گۆندی کەڤیت ژبەرکو کارێ جۆتیاریێ ل وی گۆندی ب رێژەیەکا زێدە دهاتە کرن.
ب گورەی پێزانینێن ب دەست ئەڤرۆ نیوز کەڤتین ل سنورێ ناحیێن باتیفا و دەرکارێ نێزیکی ١٠٠ گۆندان هەتا نوکە ژ ئەگەرێ هەبوونا هێزێن پەکەکێ و سوپایێ تورکیا هاتینە چول کرن و دهێتە چاڤەرێکرن هندەک گوندێن دیتر ژی بهێنە چوول کرن.
ئه‌ڤرۆ نیوز، نه‌وزاد هلۆرى:
پشتى لێگه‌ریانێن به‌رده‌وام بو حاله‌تێن كۆرۆنایێ، ئه‌ڤرۆ ل گوندێ مێرۆز یا سه‌ر ب ده‌ڤه‌را بارزان حاله‌ته‌كێ نوو یێ كۆرۆنایێ هاته ده‌ستنیشانكرن، بڤێ یه‌كێ هژمارا حاله‌تێن كۆرۆنایێ ل ده‌ڤه‌را بارزان گه‌هشته سێ كه‌سان.
دكتور هه‌وار عه‌بدوللا، رێڤه‌به‌رێ نه‌خۆشخانا گشتى یا بلێ بۆ ئه‌ڤرۆ نیوز گۆت: (دبه‌رده‌وامیا گه‌ریان و دوڤچوون ل سه‌ر حاله‌تێن كۆرۆنایێ، ئه‌ڤرۆ حاله‌ته‌كێ نوو یێ كۆرۆنایێ ل گوندێ مێرۆز یا سه‌ر ب ده‌ڤه‌را بارزان هاته توماركرن كو ئه‌و ژى پێشمه‌رگه‌یه‌كه و خه‌لكێ پیرمامه و ل میرۆز ده‌وامێ دكه‌ت).
زێده‌تر گۆت: (داكو گیانێ وه‌لاتیان پاراستى بیت و زێده‌تر خه‌لكێ ده‌ڤه‌رێ توشى ڤایرۆسا كۆرۆنایێ نه‌بیت، گوندێ مێرۆز ب تمامى هاته كه‌ره‌نتینكرن بۆ ده‌ما 14 رۆژان، پاشان تیمێن مه دێ ژ نێزیك سه‌ره‌دانێ بۆ كه‌ن داكو ئه‌و كه‌سانێن به‌ركه‌فتى بهێنه پشكنین كرن و پاراستى بن ژ كۆرۆنایێ). ب گوره‌ى ئاخفتنێن ناڤبرى، ئه‌ڤه دبیته حاله‌تێ سێیێ یێ كۆرۆنایێ كو ل ده‌ڤه‌را بارزان دهێته توماركرن.
پێشتر ژى چوار گوندێن ده‌ڤه‌را بارزان ژ به‌ر توماركرنا دوو حاله‌تێن كۆرۆنایێ هاتبونه كه‌ره‌نتین كرن كو ئه‌و ژى هه‌ر ئێك ژ گوندێن هه‌سنان، رێشه، هوستان و كوركێ بوون.
ئه‌ڤرۆ نیوز:
ب ئارمانجا ژناڤبرنا چه‌كدارێن داعشێ ل ده‌ڤه‌رێن سه‌لاحه‌دین تا دیالا و سامه‌را و كه‌ركوك، ئوپراسیونا هه‌ڤپشكا عیراقێ و قوناغا سیێ كۆ ب ئوپراسیونا قاره‌مانێن عیراقێ ده‌ستپێكر.
عه‌مید یه‌حیا رسول په‌یڤدارێ گشتی یێ هێزێن چه‌كدارێن عیراقێ راگه‌هاند ب فه‌رمانا مسته‌فا كازمی فه‌رمانده‌یی گشتی یێ هێزێن چه‌كدارێن عیراقی ب سه‌رپه‌رشتیا فه‌رمانده‌یێ ئوپراسیونێن هه‌ڤپشك سپێده‌هیا ئه‌ڤرۆ 22/6/2020 بۆ پاقژكرنا ده‌ڤه‌رین پارێزگه‌ها سه‌لاحه‌دین و توخیبێ وێ ل گه‌ل فه‌رمانده‌یێن ئوپراسیونا دیالا و سامه‌را و كه‌ركوكی ل سێ ئالیان ڤه قوناغا سێ یا ئوپراسیونا قاره‌مانێن عیراقێ ده‌ستپیكر.
په‌یڤدارێ گشتی یێ هیزێن چه‌كدارێن عیراقێ ئه‌و چه‌نده ژی راگه‌هاند ئه‌و سێ قولێن هاتیه ده‌ست نیشانكرن بۆ هێرشبرنێ كۆ قولێ ئێكێ ژلایێ هێزێن وه‌زاره‌تا به‌ره‌ڤانیێ یه و قولێ دوێ ژلایێ هێزێن سه‌ر ب وه‌زاره‌تا ناڤخو و قولێ سیێ ژلایێ هێزێن سه‌ر ب حشدا شه‌عبی ڤه هه‌ر سی قول پێكڤه بۆ ژناڤبرنا داعشێ ده‌ست ب ئوپراسیونێ كرینه.
ناڤبری ئه‌و چه‌نده ژی دیاركر ئارمانج ژ ئه‌ڤێ ئوپراسیونێ ژناڤبرنا پاشمایێن چه‌كدارێن داعشێ و ژناڤبرنا ڤه‌شارگه‌ه و رامالینا پاشمایێن شه‌ری و چه‌سپاندنا ئه‌من و ئاسایشێ یه ل ده‌ڤه‌رێ.
ئه‌ڤرۆ نیوز:
سه‌رۆكێ جڤاتا نوونه‌رێن عیراقێ راگه‌هاند تانوكه 20 ئه‌ندامێن جڤاتا نوونه‌رێن عیراقێ توشی ڤایرۆسێ كورونایێ بوون و ساخله‌میا هنده‌ك ژ وان باش نینه.
محه‌مه‌د حه‌لبوسی سه‌رۆكێ جڤاتا نوونه‌رێن عیراقێ راگه‌هاند پێنج ئه‌ندامێن جڤاتا نوونه‌ران وان بخو گوتیه من ئه‌مێن تووشی ڤایرۆسێ كورونایێ بووین، به‌لێ لگۆری زانیاریان 20 ئه‌ندامیێن جڤاتێ و 28 كارمه‌ندێن جڤاتا نوونه‌ران توشی كورونایی بووینه، ژ به‌ر ئه‌ڤێ چه‌ندێ زۆر زه‌حمه‌ته كۆمبوون بهێته‌كرن.
وه‌زره‌تا ساخله‌میا عیراقێ رۆژا ئێك شه‌مبێ گیان ژ ده‌ستدانا 87 كه‌سان راگه‌هاند بڤێ ژی ته‌ڤایا ئه‌وین ب ڤایرۆسێ كوروناێ گیانێ خو ژ ده‌ست داین گه‌هشته هزار و 100 كه‌سان.
ئه‌ڤرۆ نیوز:
هونه‌رمه‌ند عه‌تا چاوشین ب ئه‌گه‌رێ توشبوونا وی ب ڤایرۆسێ كورونایی گیانێ خو ژ ده‌ست دا.
سپێده‌هیا ئه‌ڤرۆ عه‌تا چاوشین هونه‌رمه‌ندێ ناڤدار ب ئه‌گه‌رێ ڤایرۆسێ كورونایێ ل نه‌خوشخانه‌یێ گیانێ خو ژ ده‌ست دا.
هونه‌رمه‌ند هه‌تا چاوشین ل هه‌فتیین بوری توشی ڤایرۆسێ كورونایی بوو ب ئه‌گه‌ری خرابیا ره‌وشا ساخله‌میا وی ئامیرێ هه‌ناسه‌دانا ده‌ستكرد ژی بۆ دانابوو به‌لێ ئه‌ڤرۆ گیانێ خو ژ ده‌ست دا.
ئه‌ڤرۆ نیوز:
سه‌رۆكێ ده‌ستیه‌یا ئامارێ ل وه‌زاره‌تا پلان دانانا حكومه‌تا هه‌رێما كوردستانێ راگه‌هاند ئیسال نه‌شیێن پرۆسه‌یا سه‌رژمێریا وه‌لاتیان ئه‌نجام بده‌ین و دو هه‌وێن دبیاڤێ هه‌ژاریێ و بیكاریێ ژی دێ ئه‌نجام بده‌ین.
سیروان محه‌مه‌د سه‌رۆكێ ده‌سته‌یا ئامار ل وه‌زاره‌تا پلان دانانا حكومه‌تنا هه‌رێما كوردستانێ راگه‌هاند: بریار بوو ل هه‌یڤا تشرینا دوێ یا ئیسال پرۆسه‌یا سه‌رژمێریا وه‌لاتیێن عیراقی و هه‌رێما كوردستانێ بهێته ئه‌نجام دان، به‌لێ ب ئه‌گه‌رێ دابین نه‌كرنا بودجه و پێدڤی و ئه‌و كاودانێن سیاسی و ئه‌منی و ساخله‌میێن عیراقێ هاتنه پێش بریار هاته دان پرۆسه بهێته پاش خستن.
سه‌رۆكێ ده‌سته‌یا ئامار ل وه‌زاره‌تا پلان دانانا حكومه‌تنا هه‌رێما كوردستانێ ئه‌و چه‌نده ژی راگه‌هاند دوور ژ ئه‌ڤێ چه‌ندێ مه وه‌ك هه‌رێما كوردستانێ ره‌خنه ل سه‌ر شێوازێ سه‌رژمێریكرنێ هه‌بوون، تایبه‌ت ل ده‌ڤه‌رێن كوردستانی ده‌رڤه‌ی هه‌رێمێ، له‌ورا سالا بهێت كو دێ هێته‌كرن دڤێت هه‌موو ئه‌و گرفت بهێنه چاره‌كرن، پاشی پرسه‌یا سه‌رژمێریكرنێ بهێته‌كرن.
ناڤبری ئه‌و چه‌نده ژی دازانین نوكه مژیلی رێپیڤه‌كێ نه دبیاڤێ هه‌ژاری و بێكاریێ كو پشت به‌ستنێ ب موچه‌یێ فه‌رمانبه‌ران ل كه‌رتێ حكومه‌تی و تایبه‌ت بهایێ كه‌ل و په‌لان و پاشی رێژه هێته راگه‌هاندن ژبوی ل ده‌مێ پێدڤی و چاره‌كرنێ پشت به‌ستن ل سه‌ر بهێته‌كرن.
ئەڤرۆ نیوز:
یانا ریال مەدرید ب شێوەکێ فەرمی و پشتی چەند هەیڤان، هاتە پێشەنگیا خولا یانێن ئیسپانیا، پشتی سەرکەفتن ل سەر ریال سۆسیداد ئینای.
یانا ریال مەدرید ژ دەرڤەی یاریگەها خوە، سەرکەفتنەکا گرنگ ل سەر یانا ریال سۆسیداد تۆمار کر، هەر چەندە ریال دڤێ یاریێ دا تووشی هندەک زەحمەتی و ئاستەنگیان بوو، بەلێ شیا ب ئەنجامێ دو گۆلان بەرامبەر گۆلەکێ سەرکەفتنێ تۆمار بکەت و ب ڤی ئەنجامی ریال چوو پێشەنگیا لالیگا یێ و پێشەنگی ژ بەرشەلۆنا وەرگرت، نوکە ریال خودانا 65 خالانە.
ئەڤرۆ نیوز:
دەستهەلاتا فرۆکەڤانیا سڤیل یا عیراقێ راگەهاند: دەمێ راگرتنا گەشتێن ئەسمانی هەتا ١ تیرمەهیێ هاتە درێژ کرن.
دورەید یەحیا جاسم رێڤەبەرێ گشتی یێ دەستهەلاتا فرۆکەڤانیا عرراقێ ئاشکرا کر: ب پشت گرێدان ب بریار و ئەرکێن لژنا بلند یا ساخلەمی و سلامەتیا نیشتیمانی یێن تایبەت ب بەرهنگاربوونا ڤایرۆسێ کۆرۆنا یێ، دەمێ ڕاگرتنا گەشتێن ئەسمانی هەتا ١ تیرمەهێ هاتە درێژ کرن، لێ ئەڤ بڕیارە گەشتێن ئەسمانی یێن نە ئاسایی بۆ ڤەگەڕاندنا وان عێراقیێن کو ل دەرڤە ئاسێ ماین و هەڤکاریێن ساخلەمیێ و هەوارهاتنێ و کارگۆیان ڤەناگریت.
ئەڤرۆ نیوز:
حوکمەتا هەرێما کوردستانێ چەند بڕیار دەربارەی مووچە و دەرمالێن فەرمانبەران و مووچەخۆران دەرکرن و گۆتیە، وان بڕیار دایە ب خەرجکرنا 79% یا مووچە و دەرمالان، ئەو کەسێن کە مووچێ وان ژ 300 هزاران کێمتر، مووچێ وان ناهێتە کێمکرن، ئەڤ بریارە دەمکینە و ب تنێ بۆ مووچێ ڤێ هەیڤێ یە.
ئەڤرۆ جڤاتا وەزیران وەزیران ب سەرۆکاتیا مەسرۆر بارزانی سەرۆکێ حوکمەتێ کۆمبوویە، پشتی دیراسەكرنا گشت ئەگەران ئەڤ بریارە داینە:
ئێک:
أ: تەمویلكرنا رێژا 79% یا خەرجیێن مووچە و شایستێن دارایی یێن مووچەخۆرێن گشت وەزارەت و دەستە و لایەنێن نەگرێدایی ب وەزارەت و سەرجەم سەرۆکایەتی و دامەزراوێن هەرێمێ.
ب: راگرتنا تەمویلكرنا وێ رێژا 21%، دێ مینیت لدەف وەزارەت و لایەنێن پەیوەندیدار ب شێوەكێ دادپەروەرانە ل سەر سەرجەم مووچەخۆران دێ هێتە جێبەجێ کرن، ل بەر چاڤگرتنا زۆری و كێمیا شایستێن دارایی یێن مووچەخۆران.
ج: خەرجكردنا تەمام 100% یێن شایستێن دارایی یێن كەسوكارێن شەهیدان و ئەنفالكریان و زیندانیێن سیاسی و كێم ئەندام و خودانن پێدڤیێن تایبەت و وان مووچەخۆرێن کو شایستێن وان یێن دارایی (300) هزار دینار و خوارتر.
د: خەرجكرنا ب تنێ یا رێژا 50% یا شایستێن دارایی یێن هاتینە راسپاردن ب خزمەتێن گشتی و خودان وەزیفێن بلند و پلێن تایبەت ژ (سەرۆكێ هەرێمێ و سەرۆكێ پەرلەمانی و سەرۆكێ جڤاتا وەزیران و جێگرێن وان و ئەندامێن پەرلەمانی و وەزیران و ئەوێن پلێن وان هەین و بریكارێن وەزارەتاج و ئەوێن پلێن وان هەین و ئەوێن مووچە بریكارێ وەزارەتان وەردگرن و خودان پلێن تایبەت و ئەندامێن جڤاتا دادوەری و دادگەها پێداچوونێ و سەرجەم دادوەر و ئەندامێن داواكاریا گشتی و گشت ئەو كەسێن لدووڤ خشتێ كار پێ هاتیە کرن ب مووچەی، مووچە و دەرمالێن هەردو پلێن بلند (أ) و (ب) وەردگرن ل سەر میلاكێ شارستانی و سەربازی و جڤاتان و دەزگەهێ ئاسایشێ و هێزێن ئاسایشا نافخۆ).
هـ: برگا سەری دێ ئەوان كەسان ژی ڤەگریت، کو ب وان پلە و وەزیفان هاتینە خانەنشین كرن، یان ژی پشتی جێبەجێكرنا ڤێ بڕیارێ، دێ شایستێن مووچێ خانەنشینیێ بن ب وان وەزیفە و پلەیان.
دو:
أ : پێدڤیە وەزارەتا دارایی و ئابووری ڕێنمایێن دارایی یێن پێدڤی بۆ ئاسانكاریا جێبەجێكرنا ڤان بڕیاران دەربكەت.
ب : میکانیزما هاتی ژ ڤێ بڕیارێ، ڕێکارەکا دەمکیە و ب تنێ بۆ مووچێ ڤێ جارێ یە، یێ کو دهێتە دابەش کرن.
ج : هەموو وەزارەت و دەستە و لایەنێن نەگرێدایی ب وەزارەت و سەرجەم سەرۆکایەتی و دامەزراوێن هەرێما كوردستانێ، دێ بڕگێن ڤێ بڕیارێ جێبەجێ كەن، ل بەر رووناهیا ڕێنماییێن وەزارەتا دارایی و ئابووری و ل بەر چاڤ گرتنا ڕێنمایێن خوە پارێزیێ یێن وەزارەتا ساخلەمیێ ل دەمێ دابەشكرنا مووچەی.
سێ:
ڕاسپاردنا لژنا بلند یا دانوستاندنا ل گەل حكومەتا فیدرالی بۆ گەهشتنا ئەنجامان، ب ئاڕاستەیا دابینكرنا شایستێن دارایی یێن هەرێما كوردستانێ.
چار:
ڕاسپاردنا وەزارەت و لایەنێن پەیوەندیدار بۆ وەرگرتنا ڕێكارێن پێدڤێ بۆ جێبەجێكرنا قانوونا چاكسازیێ یا ژمارە (2) یا سالا 2020، کو ل دەستپێکا مانگا تەموزا 2020 دێ کەڤیتە وارێ جێبەجێكرنێ.
نيشاندان