ئەڤرۆ نیوز:
پارێزگارێ ئامەدێ راگەهاند کو ل ئامەدێ هژمارا تووشبوویێن کۆرۆنایێ رۆژ ب رۆژێ زێدەتر لێ دهێت و هەتا نها وان نەشیاینە رێگریێ ل بەلاڤبوونا کۆرۆنایێ ل ئامەدێ بگرن.
ل گۆر پارێزگارێ ئامەدێ نها نێزیکی ٢٥ هزار کەس ل ئامەدێ د کەرەنتینێ دانە و ئەو هژمار هەر رۆژ زێدەتر دبیت و داخواز ژ وەلاتیان ژی کر کو پتر پێگیریێ ب رێنمایێن ساخلەمیێ بکەن و خوە ب پارێزن.
ئەڤرۆ نیوز:
حەسەن رۆحانی سەرۆک کۆمارێ ئیرانێ راگەهاند کو ژ بەر سزایێن ئابووری یێن کو ئەمریکا ل سەر ئیرانێ سەپاندینە زیانەکا مەزن گەهشتیە کەرتێ پەترۆلی و کەرتێن دی یێن ئیرانێ.
سەرۆک کۆمارێ ئیرانێ ئەو یەک ژی دیار کو ئەمریکا ٥٠ ملیارد دۆلار زیان گەهاندینە ئیرانێ و ئەو یەک ژی نیشا ددەت کو ئەمریکا دوژمناتیا خەلکێ ئیرانێ دکەت و دڤێت ئیرانێ ب تەمامی ژناڤ ببەت.
ئەڤرۆ نیوز:
ژێدەرێن میدیایی دیار دکەن کو چەند رۆژێن فرۆکێن شەرێ یێن روسیا ب توندی سەنگەرێن چەکدارێن هشکباوەر ل ئدلبێ بۆمبەباران دکەن و ب رێیا ئەردی ژی هێزێن بەشاری و هێزێن ئیرانێ پێکڤە دەست ب ئۆپەراسیۆنا بەرفرەه بۆ پاقژکرنا ئدلبێ ژ گرۆپێن تیرۆرستی کرینە.
وەزارەتا دەرڤە یا تورکیا ژی راگەهاند کو ژ بەر شەرێ ل ئدلبێ ب هزاران کەس دێ ئاوارە بن و دڤێت ئۆپەراسیۆنا ئدلبێ بهێتە راگرتن.
ئەڤرۆ نیوز:
سەرۆکاتیا پەرلەمانێ کوردستانی دیار دکەت کو پشتی پشکنین بۆ چەندین کارمەند و ئەندامێن پەرلەمانی هاتیە کرن ئەنجامێ پشکنینان دیار دکەت کو هندەک کەس تووشی کۆرۆنایێ بووینە، ژ بەر هندێ ژی نها هەموو چالاکیێن پەرلەمانی بۆ ماوەیێ ١٤ رۆژان هاتینە راگرتن.
سەرۆکاتیا پەرلەمانێ کوردستانێ هەروەسا داخواز ژ هەموو ئەندامێن پەرلەمانێ کوردستانێ ژی دکەت کو د زووترین دەم دا پشکنینا کۆرۆنایێ ئەنجام بدەن.
ئەڤرۆ نیوز، نەوزاد هلۆری:
پشتى سال و نیڤا ژ قه‌ده‌غه‌كرن و گرتنا بازاڕ و جهێن گه‌شتوگۆزارى ل هاڤینگه‌ها ئاڤا مارك یا سه‌ر ب ناحیا شێلادزێ، ئەڤرۆ وێڤه هه‌موو ئه‌و جهه هاتنه ڤه‌كرن، رێڤه‌به‌رێ نڤیسینگه‌ها گه‌شتوگۆزارا ئامێدیێ ژى دیاركر كو رێنمایێن كۆرۆنایێ دێ ل هاڤینگه‌ها ئاڤا مارک هێنەبجهكرن، به‌لێ وه‌كو رێنمایێن جهه‌تێن ئه‌منى ئه‌و موله‌ت داینه.
زیاد رێكانى، خودانێ ئێك ژ جهێن گه‌شتوگۆزارى و خارنگه‌هێن ئاڤا مارك بو ئەڤرۆ نیوز گۆت: پشتى مە كۆمبوونه‌ك ل گه‌ل جهێن شوله‌ژێ ل شێلادزێ کری وتێدا داخوازکری کۆ رێکێ بدەن مە بچینە سەر کارێن خوە و بازاڕ و جهێن خوه یێن گوزارى ڤه‌كه‌ن، سوپاس بو خودێ دوماهیێ ئەوان رێ ب مە دا.
زێده‌تر گۆت: ڤه‌كرنا رێیا دێ ب گوره‌ى هنده‌ك رێنمایان و ل به‌ر چاڤ وه‌رگرتنا سه‌لامه‌تیا گیانێ وه‌لاتیان بیت، بەلێ هێشتا جارێ رێنما بومە نەهاتینە رەوانەکرن.
حه‌مید ئامێدى، رێڤه‌به‌رێ نڤیسینگه‌ها گه‌شتوگۆزارا ئامێدیێ بۆ ئه‌ڤرۆ نیوز گۆت: ئه‌ڤه سال و نیڤه هاڤینگه‌ها ئاڤا مارك هاتینه گرتن و نوكه بریار هاتیه‌دان كو بهێنه ڤه‌كرن، بێگومان دروسته و ئه‌و موله‌تدارن بو ڤه‌كرنا جهێن خوه ژبه‌ركو پێشتر جهێن گه‌شتوگۆزارێ ل ده‌ڤه‌را ئامێدیێ ڤه‌كرى بوون، ئه‌و هه‌ر د گرتى بوون و په‌یوه‌ندى ب بابه‌تێن ئه‌منى ڤه هه‌بوو نه‌ك كۆرۆنایێ، به‌لێ دیسان ژبه‌ر رێنمایێن پاراستنا وه‌لاتیان ژ كۆرۆنایێ دێ جارێ گرتى بن و ل گه‌ل ڤه‌كرنا هه‌موو جهێن گه‌شتوگۆزار ئه‌و ژى دێ ڤه‌بن و گه‌شتیار دشێن قه‌ست بكه‌نێ، ئانكو وه‌كو ئه‌منى جهێن شوله‌ژێ رێ ب واندایه، به‌لێ وه‌كو ساخله‌میى هێشتا مایه.
هاڤینگه‌ها ئاڤا مارك كو دكه‌ڤیته ده‌ڤه‌را رێكان یا سه‌ر ب ناحیا شێلادزێ، رێكه‌فتى 26/1/2029 هاتبونه گرتن و هه‌تا نوكه ژى دگرتى نه، د نوکە دا رێ ب خودان دوكان و بازاڕ و جهێن گه‌شتوگۆزارى دا بچنه سه‌ر كارێن خوه، باله‌فرێن توركیا دده‌ما بورى دا چه‌ندین جاران بۆردمانا ده‌ورۆبه‌ر و نێزیك هاڤینگه‌ها ئاڤا مارك كریه، جهێن شوله‌ژێ ژ به‌ر سلامه‌تیا گیانێ وه‌لاتیان هه‌موو ئه‌و جهه گرتبوون.
هاڤینگه‌ها ئاڤا مارك 25كم دكه‌ڤیته باكوورێ رۆژئاڤایێ شێلادزێ و نێزیكێ 15 جهێن گه‌شتوگۆزارى هه‌نه و پترى 50 كه‌سان تێدا كاردكه‌ن، پێشتر روژانه دناڤبه‌را 300 بو 600 ترومبێلان رۆژانه سه‌ردان بو دكر.
ئه‌ڤرۆ نیوز:
ب بریارا سه‌رۆك كۆمارێ توركیا پۆستێن 41 پارێزگاران ل ته‌ڤایا توركیا گوهارتن كۆ 18 پارێزگار ژ پۆستێن وان هاتنه دور خستن.
ئه‌ڤرۆ 10/6/2020 ل سه‌ر داخازیا وه‌زاره‌تا ناڤخۆیا توركیا، ره‌جه‌ب ته‌یب ئه‌ردوغان سه‌رۆك كۆمارێ توركیا، جهگوهارتنا 23 پارێزگاران كر، د هه‌مان ده‌م دا 18 پارێزگار ژی ژ پۆستێن وان هاتنه دوورخستن و پارێزگارێن نوو ل جهێن وان هاتنه دانان.
لگۆری میدیایێن توركیا گوهورینێن ل پۆستێن ناڤ پارێزگه‌هان و باژێرڤانیان دێ به‌رده‌وام بیت دا ل ده‌مێن بهێت ب بریاره‌كا دی یا سه‌رۆك كۆمار گوهورینێن دی بهێنه ئه‌نجام دان.
ئه‌ڤرۆ نیۆز، عه‌زیز هه‌ورامی:
ئه‌مڕۆ له مه‌رزی پشته سه‌ر به‌پارێزگای هه‌ڵه‌بجه، هه‌ردوو پارێزگاری هه‌ڵه‌بجه و كرماشان كۆبوونه‌وه، ڕایان گه‌یاند، ڕێكه‌وتوون مه‌رزێكی نوێ بازرگانی بكرێته‌وه سه‌عاتی كاركردن له مه‌رزی پشته زیاد بكرێت.
هوشەنگ بازوەند، پارێزگاری کرماشان له كۆنگره‌یه‌كی ڕۆژنامه‌نوسی رایگەیاند، ئه‌مڕۆ له كۆبونه‌وه‌مان له‌گه‌ڵ ئازاد تۆفیق پارێزگاری هه‌ڵه‌بجه ڕێكه‌وتنێكی نوێمان كردووه له‌وه‌ی پێوه‌ندی بازرگانی زیاتر په‌ره‌پێبده‌ین، له‌وه‌ی هه‌ردوولا هه‌وڵه‌كانیان چڕكه‌نه‌وه بۆ به‌ره‌نگاربوونه‌وه‌ی ڤایرۆسی كۆرۆنا له مه‌رزه‌كان و نه‌بێته هۆكاری ست بوونی پێوه‌ندی بازرگانی.
هه‌روه‌ها وتیشی، ڕێكه‌وتووین كاركردنی سه‌عاته‌كانی بازرگانی له مه‌رزی پشته و شۆشمێ ته‌وێڵه زیاد بكرێت و به‌پێ ئه‌و ڕێكه‌وتنه‌ی هه‌شمانه مه‌رزی سازان بكرێته‌وه ئێمه ئێستا ئاماده‌ین. ئاماژه‌ی به‌وه‌شكرد، ئه‌م ڕێكه‌وتنه‌ی ئه‌مڕۆ له نێوان پارێزگاری كرماشان و هه‌ڵه‌بجه واژو ده‌كرێت ده‌بێته پته‌وكردنی پێوه‌ندییه‌كانی هه‌رێمی كوردستان و ناوچه‌ی ڕۆژئاوای ئێران كه ناوه‌نده‌كه‌ی پارێزگای كرماشانه.
ئه‌ڤرۆ نیوز:
وه‌زاره‌تا ساخله‌میا حكومه‌تا هه‌رێما كوردستانی د راگه‌هاندنه‌كێ دا به‌لاڤكریه، د به‌رده‌وامیا پشكنین و لێگه‌ریان و دووڤچوونا گۆمانلێكریان، 26 توشبوویێن دی ب ڤایرۆسێ كورونایێ كوڤید 19 ل پارێزگه‌ها هه‌ولێری هاتنه ده‌ست نیشانكرن، 25 توشبوو زه‌لامن و ئێك ژی زارۆكه، به‌ركه‌تیێن توشبوویێن به‌ری نوكه بووینه.
د راگه‌هاندنا وه‌زاره‌تا ساخله‌میا حكوه‌تا هه‌ریما كوردستانێ دا هاتیه كۆ هه‌موو توشبوو ئاكنجیێن قه‌زا كویێ نه ل تاخێن چوارچرا و فیدرالی و كه‌كون و بایز ئاغا و راپه‌رین و ئازادی و دلدارن.
ئه‌ڤرۆ نیوز:
وه‌زاره‌تا ساخله‌میا عیراقێ هولێن پێشانگه‌ها نێڤ ده‌وله‌تی یا به‌غدا بۆ توشبوویێن ڤایرۆسێ كورونایێ به‌رهه‌ڤ دكه‌ت.
ئه‌ڤرۆ 10/6/2020، د.جاسب حیجامی رێڤه‌به‌رێ فه‌رمانگه‌ها ساخله‌میا كه‌رخ ل به‌غدا راگه‌هاند فه‌رمانگه‌ها وی پلانه‌كا گشتگیر بۆ كونترولكرنا زۆریا ژماره‌یا توشبوویێن ڤایرۆسێ كورونا دانایه.
جاسب حیجامی ئه‌و چه‌نده ژی راگه‌هاند ده‌ست ب به‌رهه‌ڤكرن و دانانا 300 ته‌ختان ل هولێن پێشانگه‌ها نێڤ ده‌وله‌تی یا به‌غدا كرینه، بۆ ل خوگرتنا توشبوویێن كورونایێ.
رێڤه‌به‌رێ فه‌رمانگه‌ها ساخله‌میا كه‌رخ ئه‌و چه‌نده ژی دازانین هه‌كه ل رۆژێن بهێت ژماره‌یا توشبوویێن كورونایێ ل به‌غدا زۆر بوو نه‌خوشخانه‌یان جه بۆ وه‌رگرتنا نه‌خوشیێن زێده‌تر نامینیت.
نيشاندان