ئه‌ڤرۆ نیوز:
ستێرا به‌رێ یا هه‌لبژارتیێ ئیسپانیا و یانا ریال مه‌درید چابى ئه‌لونسو ئێك ژ به‌ربژارێن بهێزه بیته هاریكارێ راهێنه‌رێ یانا مانچێسته‌ر سیتى بوو وه‌رزێ بهێت.
راپورتێن روژنامه‌ڤانی ل بریتانیا دیاركرینه راهێنه‌رێ یانا مانچێسته‌ر سیتى گواردیولا دخوازیت ستێرا به‌رێ یا ریال مه‌درید ئه‌لونسو وه‌كو هاریكارێ خوه ده‌ست نیشان بكه‌ت ژبه‌ركو ئه‌وى شاره‌زایه‌کا باش ل سه‌ر وی یاریزانی هه‌یه تایبه‌ت ل ده‌مێ یاری ل بن سه‌رپه‌رشتیا وی کری ل یانا بایرن میونیخ .
ئەڤرۆ نیوز:
مەزلوم عەبدی فەرماندارێ گشتی یێ هێزێن سووریا دیموکرات راگەهاند کو قۆناغا ئێکێ یا دانوستاندنێن هەر دو جڤاتێن کوردی ل رۆژئاڤایێ کوردستانێ ب رەنگەکێ سەرکەفتیانە ب دووماهی هاتیە و نها دەست ب قۆناغا دویێ دهێتە کرن.
فەرماندارێ هەسەدێ ئەو یەک ژی دیار کر کو قۆناغەکا گەلەک هەستیار ل رۆژئاڤایێ کوردستانێ دەستپێکریە و پێدڤیە هەموو هێز و ئالیێن سیاسی ل رۆژئاڤایێ کوردستانێ ژ بۆ بەرژەوەندیێن نەتەوی یێن گەلێ کوردستانێ کار بکەن دا بشێن مەترسیێن ل سەر رۆژئاڤایێ کوردستانێ نەهێلن.
ئەڤرۆ نیوز:
ل گوندێ کوسەلەر یێ سەر ب پارێزگەها ئەرزروم ل باکورێ کوردستانێ ژ بەر کێشا زەڤی شەر د ناڤبەرا دو بنەمالان دا روو دا و د ئەنجام دا ٥ کەس ژ هەر دو بنەمالان هاتنە کوشتن و ٤ کەس ژی بریندار بوون.
دەزگەهێن راگەهاندنا تورکیا ژی دیار کرن کو هێزێن ئێمناهیێ هەر زوو گەهشتنە جهێ روودانێ، لێ ژ بەر بکارئینانا چەکی هژمارا قوربانیان زێدە بوویە و چەند کەس ژ هەر دو بنەمالان هاتینە گرتن و دو تومەتبارێن سەرەکی ژی رەڤینە.
ئه‌ڤرۆ نیوز، مه‌حمود نهێلى:
ل سپێده‌هیا ئه‌ڤرۆ شەمبیێ 30/5/2020 فرۆکێن تورکی ل نێزیك گوندێ هێتوتێ یێ سه‌ر ب ناحیا دێره‌لۆكێ ڤه بوردومان کر و د ئه‌نجام دا دو وەلاتى شه‌هید بوون و ئێك ژى بریندار بوو.
ل گور وان زانیاریێن ده‌زگه‌هێن ئه‌منى ب ده‌ست ئه‌ڤرۆ نیوز كه‌فتین، ئه‌ڤرۆ فرۆكێن توركیا پشتا چیایێ ده‌ره‌جێ ل هنداڤا دێره‌لۆك بوردومانكریه و د ئه‌نجامێ دا دو وەلاتى شه‌هید بووینه و ئێك ژى بریندار بوویه.
وى ژێده‌رى گوت ژى: ئه‌و كه‌سێن شه‌هید بووین كور و بابن بناڤێ جەلال نوره‌دین د ژیێ 60 سالیێ دایە و ئه‌حمه‌د جه‌لال د ژیێ 30 سالیێ دایە و ئاكنجیێن سه‌نته‌رێ ناحیا دێره‌لۆكێ نه.
هەروەسا گوت ژی: ئه‌و كه‌سێ بریندار بووى په‌یوه‌ندیا ته‌له‌فونێ ب كه‌س و كارێن خوه كریه ل سه‌ر روودانێ و نوكه هژماره‌كا خه‌لكێ ده‌ڤه‌رێ قه‌سا جهێ روودانێ كریه بو ڤه‌گه‌راندنا ته‌رمێن وانا و گه‌هاندنا بریندارى بۆ نه‌خوشخانێ.
د ڤان چه‌ند سالێن داویێ دا پتر ژ 20 وەلاتیێن سنورێ ناحیا دێره‌لۆكێ و شێلادزێ ژ ئه‌گه‌رێ بوردومانێن فرۆكێن توكیا شه‌هید بوونه.
ئەڤرۆ نیوز،عەلی حاجی :
هاریکارێ رێڤەبەرێ نەخوشخانا تەنگاڤیان ل زاخۆ بۆ ئەڤرۆ نیوز ئاشکەرا کر د شەڤا دەرباز بوویی دا زاروویەک ل زاخۆ ژ ئەگەرێ کەفتنا لاندکا وێ د فەتسیت و گیانێ خوە ژ دەست دەت .
زێدەتر خەلات ئوسمان گۆت : ل شەڤا دەربازبویی یا رۆژا ئەینیێ ٢٩/٥/٢٠٢٠ دەمژمێر نێزیکی ٩:٠٠ ی شەڤ ل تاخەکێ ژ تاخێن زاخۆ زاروویەکا چار هەیڤی بناڤێ ( ل،س ) کو ئەو زاروویە دناڤ لاندکا خوە دا بوو ئەو لاندکە دکەڤیت و پشتی ماوەیەکی چ کەسان ئاگەه ژێ نەبوویه، ئەو زارووک د فەتسیت و گیانێ خوە ژ دەست دەت،ل دەمژمێر ٩:٣٠ لەشێ وێ زاروویێ بۆ نەخوشخانا تەنگاڤیان ل زاخۆ هات بوو رەوانە کرن بەلێ وێ زاروویێ هەر ل مال گیانێ خوە ژ دەست دا بوو.
ئه‌ڤرۆ نیوز:
لژنا به‌رهنگاربوونا ڤایرۆسێ كورونایێ ل حكومه‌تا عیراقێ شرۆڤه‌یا سه‌پاندنا قه‌ده‌غه‌یا هاتنوچونا ب ئێك جاره‌كی دكه‌ت.
حه‌سه‌ن ته‌میمی وه‌زیرێ ساخله‌میا عیراقێ راگه‌هاند ئه‌ڤرۆ 30/5/2020 لژنا به‌رهنگاربوونا كورونایێ دێ دانوستاندنێ ل سه‌ر دوماهی پێشهاتێن تایبه‌ت ب ڤایرۆسێ كورونایێ كه‌ت.
وه‌زیرێ ساخله‌میا عیراقێ ئه‌و چه‌نده ژی راگه‌هاند دوێ كۆمبونێ دا ئێك ژ ته‌وه‌ران سه‌پاندنا قه‌ده‌غه‌یا ئێك جاره‌كی ل ته‌ڤایا باژێرێن عیراقێ بیت.
حه‌سه‌ن ته‌میمی وه‌زیرێ ساخله‌میا عیراقێ ئه‌و چه‌نده ژی دازانین ژماره‌یا توشبوویێن كورونایێ ل عیراقێ ب ئه‌گه‌رێ زێده‌بوونا ژماره‌یا پشكنینێن تیمێن ساخله‌میێ، كۆ رۆژانه نێزیك بوویه ژ 10 هزار پشكنینان.
هه‌تا نوكه ل عیراقێ پێنج هزار و 298 كه‌س ل عیراقێ بێ هه‌رێما كوردستانێ تووشی ڤایرۆسێ كورونایی بووینه ژ ئه‌ڤێ ژماره‌یێ 180 كه‌س مرینه.
ئەڤرۆ نیوز:
سەرۆکێ ئەمریکا دۆنالد ترەمپی راگەهاند: ژ ئەگەرێ بەردەوامیا ڤایرۆسێ کۆرۆنا یێ، مە هەموو پەیوەندیێن ئەمریکا ل گەل رێکخراوا ساخلەمیا جیهانی برینە.
ئەڤرۆ ئەینیێ، دۆنالد ترەمپێ سەرۆکێ ئەمریکا د کۆنفرانسەکێ رۆژنامەڤانی دا راگەهاند: ژبەر رەتکرنا چاکسازیێ، کو مە بەری نوکە داخواز ژ رێکخراوا ساخلەمیا جیهانی کربوو بکەن، لێ وان نەکر، لەوما مە بریار دایە هەموو پەیوەندیێن خوە ل گەل وێ رێکخراوی ببرین.
هەروەسا گۆتیە: مە فەرمان دایە ب ڤەگۆهاستنا وان هەموو پاران، کو د پلانا مە دابوو بۆ وێ رێکخراوێ تەرخان بکەین، کو سالانە دگەهشتنە نێزیکی ٤٥٠ ملیۆن دۆلاران، لێ ئەم وان پاران ژی نادەینێ.
ئەڤرۆ نیوز:
وەزارەتا ساخلەمیا هەرێمێ تووشبوونا شەش کەسێن دی ب کۆرۆنا یێ ل سلێمانیێ راگەهاند، کو ژ یێن وان دناڤبەرا 38 سالیێ بۆ 63 سالیێ دانە.
هەروەسا گۆتیە: د بەردەوامیا پشکنین و لێگەریانێ لدووڤ گومانلێکریان و تووشبوویان، شەش تووشبوویێن دی یێن ڤایرۆسێ کۆڕۆنا یێ ل سلێمانی هاتنە دەست نیشان کرن، کو پێنج زەلامن د ژیێن ٥١ و ٤٥ و ٤٤ و ٣٩ و ٣٨ سالیێ و ژنەکا د ژیێ ٦٣ سالیێ دایە، ب تنێ ئێک ژ تووشبوویان بەرکەفتیێن تووشبوویێن بەرێیە، پێنج تووشبوویێن دیتر نیشانا وێ نەخۆشیێ ھەیە و پشکنینێن وان پۆزەتیڤ دەرچووینە، ھەموو خۆجهێن ناڤا باژێرێ سلێمانیێ نە.
ئەڤرۆ نیوز، زنار تۆڤی:
خانما سترانبێژ هەداسە یەشرۆن، کوردەکا جوهی یه و نوکە ل وەلاتێ ئیسرائیلێ دژیت، د داخویانیەکێ دا بۆ ئەڤرۆ نیوز دیار کر: من گەلەک ستران ب هەردو زاراڤێن کرمانجیا خوارێ و کرمانجیا ژووری و دیسان ب ئارامی ژی گوتینە، نوکە چەندین پرۆژێن نوو یێن تۆمار کرنا سترانان ل بەر دەستێ من هەنە، ئەز نوکە یا کار تێدا دکەم، هەروەسا خەونا من یا مەزن ئەوە بهێمە کوردستانێ.
ناڤهاتیێ گۆتیە ژی: من ل گەل ئاڤا تیڤی هەڤدیتنەک چێکربوو، کو ئەز بهێمە کوردستانێ، داکو کلیپەکێ چێکەم و من سترانا بۆکێ دەلالێ ژی تۆمار کربوو، لێ ئەو بەرنامە ژ بەر ڤایرۆسێ کۆرۆنا یێ هاتە راوەستاندن، لەوما دخوازم ب زووترین دەم خەونا من بجهـ بهێت و سەرەدانا کوردستانێ بکەم.
نيشاندان