ئەڤرۆ نیوز:
رێڤەبەریا گشتی یا ئەزموونان ل هەرێمێ راگەهاند: ژبەر کو پرۆگرامێ خواندنێ ب تەمامی نەهاتیە خواندن، شێوازێ پرسیارێن ئەزموونێن دووماهیا وەرزێ دویێ یێ ئەڤ سالە دێ 50% ب شێوێ هەلبژارتن و 50% ب شێوێ نڤێسینێ دبیت.
رێڤەبەریا گشتی یا ئەزموونان ل هەرێمێ چەند رێنمایی بۆ ئەزموونێن دووماهیا وەرزێ دویێ یێ ئەڤ سالە یێ خواندنێ ٢٠١٩-٢٠٢٠ بەلاڤکرینە و راگەهاندیە، پێدڤیە ب خشتەکێ پرۆگرامێ خواندنا هەر بابەتەکێ وەرزێ دویێ یێ هەموو پۆلان بهێتە دیار کرن و ب هەر رەنگەکێ بیت بۆ قوتابیان بهێتە راگەهاندن.
ئه‌ڤرۆنیۆز، سالار دۆسكى:
رێڤه‌به‌رێ فه‌رمانگه‌ها ژینگه‌ها دهۆكێ ئاشكرا كر: كو به‌رى ده‌ست ب تاقیكرنێن زانكۆ و قوتابخانان بهێته‌كرن دێ هه‌وا تافیلكرن و پاقژكرنا ئاڤاهیان ده‌ست پێكه‌ت.
محه‌مه‌د تاهر سه‌لاحەدین بریفكانى، رێڤه‌به‌رێ فه‌رمانگه‌ها ژینگه‌ها دهۆكێ، بۆ ئه‌ڤرۆ نیۆز ئاشكرا كر: كو به‌رى ده‌ست ب پرۆسێسا ئه‌زموونان ل قوتابخانا و زانكۆیا بهێته كرن، دێ هه‌موو قوتابخانه و زانكویێن سه‌نته‌رێ پارێزگه‌ها دهۆك هێنه تافیلكرن و شووشتن.
محه‌مه‌د تاهر بریفكانى زێده‌تر ژى گۆت: ئه‌ڤه پلانا رێڤه‌به‌ریێ یه كو دێ ل هه‌موو قوتابخانه و زانكو و فه‌رمانگه‌هێن حوكمى ل سه‌نته‌رێ قه‌زا دهۆكێ هێته ده‌ستپێكرن، ئه‌ف كاره دهێته‌كرن ب هه‌فكارى ل گه‌ل رێكخراوا giz یا ئه‌لمانى و پێدڤى بوو 15/5 ده‌ست ب كارى هاتباركرن و پێدڤى بوو ئه‌ف جه هه‌موو هاتبانه تافیكرن و گرنگ بوو ئه‌ڤ جه بهێنه پاقژكرن چنكو ئه‌ف قوتابیه دێ ئه‌وان ئاڤاهیان ده‌وامێ كه‌ن.
رێڤه‌به‌رێ فه‌رمانگه‌ها ژینگه‌ها دهۆك ئه‌و ژى گۆت: ئه‌ف كاره نه‌هاته‌كرن چنكو رازیبوونا رێكخراوێ گیروبوو و نوكه چاڤه‌رێى رازیبووىنَ دكه‌ین و ب زووترین ده‌م دێ ده‌ست ب پلانا خوه كه‌ین.
ئەڤرۆ نیوز:
ئەندامەکێ لژنا دارایی ل پەرلەمانێ عیراق گۆت: مستەفا کازمی سۆز دایە بەری جەژنێ مووچێ فەرمانبەرێن هەرێما کوردستانێ بهنێریت، ئەو دەنگۆیە ژی رەتکرینە یێن کو دبێژن، ل ڤان نێزیکان بەغدا پێشنیارەکا وەسا كربیت، کو راستەوخۆ مووچێ فەرمانبەرێن كوردستانێ بدەت.
ئەحمەد حاجی رەشید، ئەندامێ لژنا دارایی ل پەرلەمانێ عیراقێ دیار کریە: نوکە بەغدا چ پێشنیارەکا وەسا نەكریە، کو راستەوخۆ ئەو ب خوە مووچێ فەرمانبەرێن هەرێما كوردستانێ دابەش بكەت.
هەروەسا ئەحمەد حاجی رەشید دبێژیت ژی: ل ڤان دووماهیان د كۆمبوونەکێ دا مستەفا كازمی سەرۆك وەزیرێن عیراقێ بەحسێ هندێ کریە، کو بەری جەژنا رەمەزانێ دێ مووچەکێ بۆ هەرێما كوردستانێ هنێریت، بەلێ هێشتا ئەو چەندە ئێكلایی نەبوویە، کەنگی و چاوا دێ وی مووچەی هنێریت.
ئەڤرۆ نیوز:
وەزارەتا ساخلەمی و ژینگەها عیراقێ راگەهاند: د دەمێ شەڤ و رۆژەکێ دا 95 حالەتێن نوو یێن توشبوون ب کۆرۆنایێ هاتینە تۆمار کرن، کو ٧٦ حالەت ل بەغدا و ١٨ ل بەسرا و ئێک ل کەربەلا و پێنج ژی ل دیالا، دیسان دو کەسان ب ڤێ نەخۆشیێ ل بەغدا گیانێ خوە ژ دەستدایە.
هەروەسا گۆتیە: 112 کەسێن دی چێبووینە، کو ٤٣ ل بەسرا، ٥١ ل بەغدا، نەهـ ل کەرکوکێ و ئێک ژی ل واست و چار ل زیقار و دو ل سەلاحەدین و دو ژی ل نەجەف.
ئه‌ڤرۆ نیوز، بارزان مزوورى:
ئه‌ڤرۆ ده‌مژمێر 2 پشتى نیڤرۆ 12/5/2020 “فازل میرانى”سكرتێرێ مه‌كته‌با سیاسى یا پارتى دیموكراتى كوردستان سه‌ره‌دانا لقا بیست یا شێخان دا ژلایێ به‌رپرسێ لقا بیست و قائیمقامێ قه‌زا شێخان ڤە هاتە پێشوازى كرن، دیسان ل گه‌ل به‌رپرسێ لقێ و كارگێر و به‌رپرسێن لژنێن سه‌ر ب لقێ ڤه كۆمبوو.
فازل میرانى، سكرتێرێ مه‌كته‌با سیاسى یا پارتى دیموكراتى كوردستان د كونگره‌كێ رۆژنامه‌ڤانى دا ل باره‌گایێ لقا 20 شێخان راگه‌هاند: راسته شێخان ژلایه‌كى ڤه سه‌ر ب ئیدارا مووسل و ژلایه‌كى دیڤە سه‌ر ب ئیدارا دهوك ڤه‌یه، به‌لێ ئه‌م هه‌موو دزانین كوردستان به‌شه‌ك سه‌ر ب هه‌رێمێ و به‌شه‌ك سه‌ر عێراقێ ڤه‌یه ئه‌ڤه كێشه‌یه‌كا سه‌ره‌كى یه ئه‌گه‌ر ئه‌ڤ كێشه هاته چاره‌سه‌ركرن پشت راست كێشا دو ئیداره‌ى ل شێخان ژى دێ چاره‌سه‌ربیت.
ناڤهاتى خویاكر ژی: ئه‌و ئاوارێن عه‌ره‌ب یێن ئه‌نبار و تكریت ئه‌وێن ل كوردستانێ دژین ژمارا وان زێده‌ترى ئاوارێن ئێزدیانه ئه‌وێن دناڤ كه‌مپان دا دژین پێدڤى یه حكومه‌تا عێراقێ ببیته حكومه‌ت هه‌تا بشێت ڤان كێشه‌یه‌یێن ڤه‌گه‌راندنا ئاواران بۆ سه‌ر جهێن وان چاره‌سه‌ر بكه‌ت.
ئه‌ڤرۆ نیوز، مه‌حمود نهێلى:
پشتى راوه‌ستاندنا پرۆژێ ستراتیژى یێ ئاڤا ئامێدیێ ئاریشه‌یا ئاڤێ ل دێره‌لۆكێ بوویه جهێ گازندا وه‌لاتیان و دیار دكه‌ن كو دڤێ ره‌مه‌زانێ دا ئاریشه‌یا ئاڤێ بوویه كێشه‌یه‌كا مه‌زن و داخاز دكه‌ن ئه‌ڤ ئاریشه‌یا وان بهێته چاره‌سه‌ركرن و رێڤه‌به‌رێ پرۆژێ ستراتیژى یێ ئاڤا ئامێدیێ دیار كر، كو ئه‌و نه‌شێن ئاڤێ بده‌نه وەلاتیان.
ل سه‌ر ڤێ یه‌كێ ئه‌ندازیار شیمال رێڤه‌به‌رێ پرۆژێ ستراتیژى یێ ئاڤا ئامێدیێ دیار كر: ئه‌ڤه هه‌یاما 20 رۆژایه ئه‌و نه‌شیانه ئاڤا ستراتیژى بده‌نه هاولاتیێن قه‌زا ئامێدیێ و گۆت: ( هه‌موو سالان د وه‌رزێ بهارێ دا ئاڤا رووبارێ زێ ب ره‌نگه‌كى گه‌له‌ك شێلى دبیت و خیزه‌كێ زۆر دگه‌ل دا دهێته خارێ و دبیته ئه‌گه‌رێ ژ كار كه‌فتنا پالده‌رێن ئاڤێ دناڤ رووبارى دا).
ناڤهاتى ئاشكراكر، كو ئه‌وان ئه‌ڤ ساله به‌رى ئاڤ شێلى دبیت هه‌موو فه‌رمانگه‌هێن ئاڤێ ئاگه‌هدار كربوونه كو بۆ به‌رى وه‌خت خوه به‌رهه‌ڤ بكه‌ن و پرۆژه‌ێن به‌رێ نووژه‌ن بكه‌ن و دیار كر، هه‌ر ل رۆژا 22/4/2020 پرۆژه ژ كارى هاتیه راوه‌ستاندن و نه‌شێت ئاڤێ بده‌ته هاولاتیان و گۆت: ( به‌ردانا ئاڤێ یا گرێدایه ب ره‌وشا سه‌قاى و حه‌لبوونا به‌فرێ ل باكورێ كوردستانێ و بارینا بارانێ و هندى خیز ل گه‌ل ئاڤێ بهێته خوارێ كو چێدبیت ببیته ئه‌گه‌رێ ژ كار كه‌فتنا پالده‌ران ئه‌و نه‌شێن ئاڤێ بده‌نه وەلاتیان).
ده‌ربارەی ئاریشا ئاڤێ ل دێره‌لۆكێ ناڤهاتى دیار كر: كو نوكه تا راده‌یه‌كى ئاریشه‌یا ئاڤێ چاره‌سه‌ر بوویه و ل پرۆژێ كه‌ڤنێ گه‌لیێ شێرانه دهات دشێت هه‌ر 6 ده‌مژێران 4 هزار میترێن موكه‌عه‌ب ئاڤێ بده‌ته بركان و پشتى تژى دبن ئه‌ڤ ئاڤه دهێته دابه‌شكرن ب سه‌ر هه‌موو گوند و كومه‌لگه‌هێن سه‌ر ب ناحیێ ڤه رۆژانه یان هه‌ر دوو رۆژان جاره‌كى ئاڤ بۆ وەلاتیان دێ هێته به‌ردان.
ئەڤرۆ نیوز:
وەزیرێ باژێرڤانی و گەشتۆگوزارێ یێ هەرێما کوردستانێ راگەھاند: کەسوکارێن شەھیدان و ئەنفالکریان و کێم ئەندامێن سەنگەری دێ ژ رسوماتێن تاپۆکرنا خانیێن زێدەگاڤی ل سەر ھێنە بەخشین.
ساسان عەونی وەزیرێ باژێرڤانی و گەشتوگوزارێ یێ حوکمەتا ھەرێما کوردستانێ دیار کر ژی: هەموو خانیێن بەری هەیڤا ئادارا ۲۰۱٨ ب رەنگەکێ زێدەگاڤی ل باژێر و باژێرکێن ھەرێمێ ھاتینە دروستکرن، دێ ب بھایەکێ رەمزی ھێنە تاپۆکرن و کەسوکارێن پلە ئێکێن شەھید و ئەنفالکریان و کێم ئەندامێن سەنگەر دێ ژ رسوماتێن تاپۆکرنا خانیان ھێنە بەخشین.
راگەھاند ژی: لیژنەک بۆ وێ مەرەمێ ھاتیە پێکئینان، کەسوکارێن شەھید و ئەنفالکریان وکێم ئەندامێن سەنگەری دێ ژ رسوماتێن تاپۆکرنا خانیێن وان ھێنە بەخشین.
ئەڤرۆ نیوز:
سەرۆک وەزیرێ نوو یێ عیراقێ ژ سەرجەمێ حەفت وەزارەتان، شەش ب وەکالەت پر کرن و ب شێوەکێ دەمکی هەتا دیار کرنا وەزیرێن وان وەزارەتان.
ب ڤی رەنگی هاتینە دیار کرن:
ئێک: عەدنان دەرجال، وەزیرێ وەرزش و لاوان، دێ ئەرکێ وەزیرێ رەوشەنبیری ب وەکالەت برێڤەبەت، هەتا وەزیرێ رەوشەنبیری دهێتە دیار کرن.
دو: عەلی حەمید، وەزیرێ پەروەردێ، دێ ئەرکێ وەزیرێ بازرگانی ب وەکالەت برێڤە بەت.
سێ: نەبیل کازم، وەزیرێ خواندنا بلند، دێ ئەرکێ وەزیرێ داد ب وەکالەت برێڤە بەت.
چار: ناسر حوسێن، وەزیرێ ڤەگوهاستنێ، دێ ئەرکێ وەزیرێ کۆچ و کۆچبەران ب وەکالەت برێڤە بەت.
پێنج: عەلی عەلاوی، وەزیرێ دارایی، دێ ئەرکێ وەزیرێ نەفتێ ب وەکالەت برێڤە بەت.
شەش: کازمى ب خوە دێ وەزارەتا دەرڤە برێڤە بەت، لێ دەستهەلات ب عەبدولکەریم هاشمی داینە وەک بریکارێ وەزارەتێ کار بکەت.
هەروەسا وەزارەتا حەفتێ، کو وەزارەتا چاندنێ یە، هەتا نوکە چ وەزیر و چ کەس ب وەکالەت بۆ نەهاتینە دانان.
ئه‌ڤرۆ نیوز:
جڤاتا بلندا دادوه‌ریا عیراقێ، داخاز ژ جڤاتا نوونه‌رێن عیراقێ دكه‌ت، پارێزبه‌ندیا یاسایی ل سه‌ر هژماره‌كا ئه‌ندامێن جڤاتا نوونه‌رێن عیراقێ بهێته هه‌لگرتن.
جڤاتا بلندا داوه‌ریێ داخاز ژ جڤاتا نوونه‌رێن عیراقێ كریه پارێزبه‌ندیا یاسایی ل سه‌ر 15 ئه‌ندامێن جڤاتا نوونه‌ران بهێته هه‌لگرتن.
ئه‌ڤ داخازیا جڤاتا بلندا دادوه‌ریا عیراقێ، پشتی توماركرنا سكالایێن یاسایی ل سه‌ر ئه‌وان ئه‌ندامێم جڤاتا نوونه‌ران كۆ ب گه‌نده‌ل و كه‌یسێن دی هاتینه تومه‌تباركرن.
نيشاندان