ئەڤرۆ نیوز:
ناڤەندا چاڤدێریا مافێن مرۆڤی یا سووریێ راگەهاند کو ئەمریکا ل باژێرێ دێرازۆرێ دەست ب ئاڤاکرنا بنگەهەکێ مەزن یێ سەربازی کریە و هژمارەکا زێدە چەکێن گران ژی ل وی بنگەهی دێ هێنە بجهکرن.
هەمان ناڤەندێ ئەو یەک ژی دیار کر کو ئەمریکا هێزێن خوە یێن ل نێزیکی دەڤەرێن پەترۆلێ ل سووریێ و رۆژئاڤایێ کوردستانێ ژی زێدەتر لێ دکەت و ئەو یەک ژی نیشا ددەت کو بەرۆڤاژی گۆتنێن سالا بۆری یێن ترامپی، ئەمریکا دڤێت بۆ دەمەکێ درێژ ل سووریێ و رۆژئاڤایێ کوردستانێ بمینیت.
ئەڤرۆ نیوز:
هولوسی شاهین پارێزگارێ باتمانێ ل باکورێ کوردستانێ راگەهاند کو مخابن ل باتمانێ رەوش گەلەک خرابە و رۆژ ب رۆژێ هژمارا تووشبوویێن ب کۆرۆنایێ زێدەتر لێ دهێن و هەکە رەوش وەسا بیت ئەو نەچارن بریارێن توند بدەن و دێ قەدەغەیا هاتنوچوونێ هەتا جەژنا رەمەزانێ هێتە درێژکرن.
ناڤهاتی راگەهاند کو وەلاتی وەکو پێدڤی پێگیریێ ب رێنمایان ناکەن و ئەو یەک ژی بوویە ئەگەرێ هندێ هژمارا تووشبوویێن ب ڤایرۆسێ کۆرۆنایێ ل باتمانێ زێدەتر ببن.
ئەڤرۆ نیوز:
ئەتیەن مەهچوپیان جێگرێ ئەحمەد داوود ئوگلۆ دیار کر کو یێن ژ دل کار بۆ چارەسەرکرنا پرسا کوردی ل تورکیا دکرن و رۆلەک سەرەکی د قۆناغا ئاشتیێ دا دگێران تووشی شکەستنێ هاتن، هەم د ناڤ هەدەپێ دا هەم ژی د ناڤ دەولەتێ دا و گۆت: (مخابن نها دیار دبیت یێن کو ل دژی چارەسەرکرنا پرسا کوردی بوون بهێزتر لێ هاتینە و ئەو یەک ژی بوویە جهێ مەترسیێ).
جێگرێ سەرۆکێ پارتا پاشەرۆژێ یا تورکیا دیار ژی کر کو پرسا کوردی ل تورکیا ب شەری ناهێتە چارەسەرکرن و تورکیا نەچارە ب رێیێن سیاسی چارەسەریەکا گونجای بۆ پرسا کوردی پەیدا بکەت.
ئەڤرۆ نیوز:
ئەڤرۆ ئێکەمین کۆمبوونا جڤاتا وەزیران ب سەرپەرشتیا مستەفا کازمی سەرۆک وەزیرێن عیراقێ برێڤە چوو، د کۆمبوونێ دا بەحسێ رەوشا ناڤخوەیی یا عیراقێ و بابەتێ ئاریشێن دارایی و ژیانا وەلاتیان هاتە کرن.
جڤاتا وەزیران یا عیراقێ دیار کر کو بابەتێ ژیانا وەلاتیێن کێم دەرامەت، خانەنشین و باشترکرنا ژیانا وەلاتیان دێ ئەرکێ سەرەکی یێ حوکمەتێ بیت.
ئەڤرۆ نیوز:
سەرۆک مەسعود بارزانی سەرەخۆشیێ ل خێزانا پێشمەرگێ هەر دو شۆرەشێن ئەیلول و گۆلانێ عەبدولرەحمان حاجی عەلی دکەت، ئەڤە ژی دەقێ پەیاما سەرۆک بارزانی یە.
ب ناڤێ خودێ مەزن و دلۆڤان
ب داخ و خەمەکا زۆر ڤە، نووچەیێ وەغەرا دووماهیێ یا کەسایەتیێ نشتیمانپەوەر و پێشمەرگێ هەر دو شۆرەشێن ئەیلول و گۆلانێ عەبدولرەحمان حاجی عەلی گەهشتە مە.
خودێ ژێ رازی عەبدولرەحمان حاجی عەلی رۆلەکێ بەرچاڤ د هەر دو شۆرەشێن ئەیلولا مەزن و گۆلانێ دا هەبوویە و ب درێژاهیا ژیێ خوە خزمەتا رێبازا بارزانی و کوردایەتیێ کریە و ژ دەستدانا وی زیانەکا گەلەک مەزنە.
سەرەخوشیێ ل خێزانا تێکوشەرێ خودێ ژێ رازی عەبدولرەحمان حاجی عەلی و هەموو کەسوکارێن وی دکەین و خوە ب شریکێ خەما هەوە دزانین.
ژ خودایێ مەزن دخوازین گیانێ کاک عەبدولرەحمان حاجی عەلی بێخیتە بەر رەحمەتا خوە و ئۆقرەیی و ئارامیێ ببەخشیتە ھەموو ئالیان.
انا للە و انا الیە راجعون
مەسعود بارزانی
٩ی٥ی٢٠٢٠
ئەڤرۆ نیوز:
هێزێن ئیرانێ ل باژێرێن خوێ و بانە یێن رۆژهەلاتێ کوردستانێ تەقە ل کۆلبەرێن کورد کرن کو د ئەنجام دا دو کۆلبەر هاتنە کوشتن و دو ژی ب گرانی بریندار بوون.
رێکخراوا مافێن مرۆڤی یا رۆژهەلاتێ کوردستانێ دیار دکەت کو رۆژانە هێزێن ئیرانێ ل سەر سنوران تەقە ل کۆلبەرێن کورد دکەن کو ژ بەر بێکاریێ نەچارن کارێ کۆلبەرێی بکەن، لێ مخابن رۆژانە کۆلبەر دهێنە کوشتن.
ئەڤرۆ نیوز:
سپێدێ دووماهی رۆژا قەدەغەیا هاتنوچوونێ یە ل هەرێما کوردستانێ و پەیڤدارێ ژوورا ئۆپەراسیۆنێن هەولێرێ ژی دیار دکەت کو وان نێرینێن خوە ل دۆر رەوشا نها داینە وەزارەتا ناڤخوە و بێژیت: هەکە قەدەغەیا هاتنوچوونێ نەهێتە درێژکرن ژی دڤێت وەلاتی پێگریێ ب رێنمایان بکەن.
هێمن قادر پەیڤدارێ ژوورا ئۆپەراسیۆنان ل پارێزگەها هەولێرێ دیار دکەت کو وان دووڤچوونا رەوشا نها کرینە و ل دۆر رەوشا هەی نێرینێن خوە بۆ وەزارەتا ناڤخوە دیار کرینە و جارێ دیار نینە کا دێ قەدەغەیا هاتنووچوونێ هێتە درێژکرن یان نە، لێ هەر چاوا بیت دڤێت وەلاتی پێگریێ ب رێنمایان بکەن، چونکو هەکە رەوش ئالۆز بیت دێ جارەکا دی قەدەغەیا هاتنوچوونێ هێتە راگەهاندن.
ئه‌ڤرۆ نیوز:
لگۆری دوماهی ئامار، توشبوویێن ڤایرۆسێ كورونا ل جیهانێ گه‌هشته چار ملیۆن 16 هزار و 21 حاله‌ت بوون.
لگۆری ئامارێن جیهانێ، ژماره‌یا توشبوویێن كورونا ل جیهانێ گه‌هشته چار ملیۆن و 16 هزار و 21 حاله‌تان، ژ وێ ژماره‌یێ دو سه‌د و حه‌فتێ شه‌ش هزار و 269 كه‌س مرینه.
ل سه‌ر ئاستێ وه‌لاتێن جیهانێ، ئه‌مریكا زۆرترین رێژه‌یا توشبوویێن ڤایرۆسی توماركر و گه‌هشتیه ملیۆنه‌ك و 322 هزار و 163 كه‌س و حه‌فتێ و هه‌شت هزار و 616 كس ژی مرینه.
ڤایرۆسێ كورونا نه‌خوشیه‌كا كوژه‌كه و هه‌یڤا 12 سالا بوری ل باژێرێ ئوهان یێ چینێ سه‌رهلدایه و هه‌تا نوكه زێده‌تری 200 وه‌لاتێن جیهانێ به‌ربه‌لاڤ بوویه.
ئه‌ڤرۆ نیوز:
دیاركرنا سوپاسالارێ نوو یێ عیراقێ پشتی سپاردنا پوستێ وه‌زاره‌تا ناڤخوب سوپاسالارێ كه‌ڤن هاته دیاركرن.
لگۆری میدیایێن عیراقی، فه‌ریق روكن عه‌بدلئه‌میر شه‌مه‌ری پشكنه‌رێ سه‌ربازی یێ وه‌زاره‌تا به‌ره‌ڤانیا عیراقێ هاتیه به‌ربژاركرن بۆ پۆستێ سه‌رۆك ئه‌ركانێ سوپاسالارێ عیراقێ.
فه‌ریقێ ئێكێ یێ روكن عوسمان غانمی به‌ری نها سوپاسالارێ عیراقێ بوو، به‌لێ رۆژا 6/5/2020 وه‌ك وه‌زیرێ ناڤخویێ عیراقێ باوه‌ریا جڤاتا نوونه‌رێن عیراقێ بده‌ستڤه ئینا.
شه‌ڤا 6/5/2020 یا جڤاتا نوونه‌رێن عیراقێ ب زۆرینه‌یا ده‌نگان كابینه‌یا نوو یا حكومه‌تێ ب سه‌رۆكاتیا مسته‌فا كازمی په‌سندكر.
نيشاندان