ئەڤرۆ نیوز:
ساخلەمیا هەولێرێ راگەهاند، چار توشبوویێن دی یێن ڤایرۆسێ کۆرۆنا یێ چێبوون، ب ڤێ چەندێ هژمارا چێبوویان ل وێ پارێزگەهێ گەهشتە ١٧٣ کەسان.
رێڤەبەریا گشتى یا ساخلەمیا هەولێرێ راگەهاند ژی، چار توشبوویێن دی یێن ڤایرۆسێ کۆرۆنا یێ پشتى وەرگرتنا چارەسەریێ ب تەمامى چێبووینە، رەوشا ساخلەمیا وان هەموویان باشبوویە، هەتا نوکە ژ سەرجەمێ ٢٩٨ توشبوویان ل پارێزگەها هەولێرێ ١٧٣ کەس چێبووینە.
ئەڤرۆ نیوز:
د بەهیا ژنەكێ دا كو ب شێوەكێ نهێنی ل تاخێ (حوریە) یێ باژێرێ كەركوكێ دا هاتبوو دانان، ١٨ كەس كو هەموو كەسوكارێن ئێکبوون، تووشی ڤایرۆسێ كۆرۆنا یێ بوون، هەموو بۆ نەخۆشخانەكا تایبەت هاتینە ڤەگوهاستن.
رێڤەبەریا ساخلەمیا كەركوكێ راگەهاند، سەرەرای سەپاندنا قەدەغەیا هاتنوچوونێ، ب شێوەیەكێ نهێنی و نە قانوونی بەهیا ژنەكێ كو د ژیێ 105 سالیێ دا وەغەركربوو، ل تاخێ (حوریە) هاتبوو دانان، ژ ئەنجامێ وێ چەندێ كەسەكێ پشکدار د وێ بەهیێ دا هەلگرێ ڤایرۆسی بوو، ١٧ كەسێن دی تووشی وێ پەژیكێ كرینە.
ئەڤرۆ نیوز:
ب ناڤێ خودایێ مەزن و دلۆڤان
خێزانا بەرێز هونەرمەند سەعید گاباری
ب داخ و خەمەکا زۆر ڤە، نووچەیێ وەغەرا دووماهیێ یا هونەرمەندێ شۆرەشگێر و ناڤدارێ گەلێ مە، سەعید گاباری گه‌هشتە مە.
وی هونەرمەندی هەموو ژیانا خوە بۆ خزمەتا هونەرێ رەسەنێ کوردی و دۆزا رەوایا گەلێ خوە تەرخان کر و ژ دەستدانا وی خوسارەتیەکا مەزنە، سه‌ره‌خۆشیێ ل خێزانا وی یا تێکۆشەر و هەموو خزم و کەسوکار و هونەرمەندێن کوردستانێ دكەین، ئەم خوە ب هەڤبەشێن خەما هەوە دزانین.
ژ خودایێ مەزن دخوازین گیانێ هونەرمەندێ وەغەر کری بێخیتە بەر رەحمەتا خوە و ئۆقرەیی و ئارامیێ ببەخشیتە ھەموو ئالیان.
انا للە وانا الیە راجعون
مەسعود بارزانی
٤ ـی٥ـی ٢٠٢٠
ئەڤرۆ نیوز:
نەوزاد ئەدهەم رێڤەبەرێ گشتی یێ بازرگانی ل وەزارەتا بازرگانی و پیشەسازیا هەرێما كوردستانێ دیار کر: حوکمەتا عیراقێ بهایێ گەنمێ ئەڤ سالە یێ جوتیاران ئاشكرا كریە، كو هەمان بهایێ سالا 2019 یە.
نەوزاد ئەدهەمی زێدەتر گوت: بهایێ ئێك تەنا گەنمی د بۆرسا جیهانیدا ب 200 دولارایە و حوکمەتا عیراقێ بۆ كرینا گەنمێ پلە ئێك 560 هزار دينار دیاركرینە، بۆ گەنمێ پلە دو 480 هزار، بۆ گەنمێ پلە سێ 420 هزار دیناران ژلایێ حوکمەتا عیراقێ ڤە هاتیتە دیار کرن.
ئەو ژی خویا کر: حوکمەتا عیراقێ بۆ ڤی وەرزێ دوورینێ، دێ 360 هزار تەنێن گەنمێ جوتیارێن هەرێما كوردستانێ وەرگریت.
ئەڤرۆ نیوز:
پەرلەمانێ ئیرانێ ب دەنگێ پرانیا ئەندامان بریار دا کو ناڤێ پارێ فەرمی یێ ئیرانێ ژ ریال ببیتە تمەن.
ئەو یەک د دەمەکێ دایە کو تمەن ل ئیرانێ دهێتە بکارئینان لێ پارێ فەرمی یێ ئیرانێ ریال بوو و پەرلەمانی بریار دا ئێدی ریال نەمینیت و ببیتە تمەن. ئانکۆ چار سفر ل سەر پارەی دێ هێنە راکرن.
بسپۆرێن ئابووری دیار دکەن کو ئارمانجا سەرەکی یا ئیرانێ ئەوە دا بهایێ پارێ وێ بهێز کەڤیت، لێ ئەو یەک ژی چو ئەنجامێن خوە نابن، چونکو ژ بەر سزایێن ئابووری یێن ل سەر ئیرانێ ئابوورێ وی وەلاتی گەلەک لاواز بوویە و بزاڤا گوهۆرینا پارەی ژی چو کارتێکرنەکا خوە یا مەزن نابیت.
ل گۆر قانوونێن ئیرانێ هەر بریارەک ژ ئالیێ پەرلەمانی ڤە بهێتە دان دڤێت ژ ئالیێ جڤاتا چاڤدێریێ ڤە بهێتە پەسەندکرن و پاشی ببیتە بریارا فەرمی یا دەولەتێ و کار پێ بهێتە کرن.
ئەڤرۆ نیوز:
جێمس مۆرۆڤ بسپۆرێ ناڤدارێ ئوسترالی کو دەمەک درێژە ل سەر بابەتێ کۆریا باکور کار دکەت دیار کر کو د راستی دا چو ئاریشێن ساخلەمیێ یێ سەرۆکێ کۆریا باکور کیم جۆنگی نینن و ساخلەمیا وی گەلەک باشە و گۆت: (سەرۆکێ کۆریا باکور هەست دکر کو هندەک کەس د ناڤ دەستهەلاتێ دا ل دژی وی کار دکەن، ژ بەر هندێ ژی ب رێیا کەسێن نێزیکی خوە دەنگوباسێ نەخوشی و هەتا مرنا خوە بەلاڤکر دا بزانیت کا دێ کێ بزاڤا هندێ کەت جهێ وی بگریت).
بسپۆرێ ناڤدار جێمس مۆرۆڤ دیار ژی دکەت کو تیمەکێ تایبەت یێ کەسێن نێزیکی سەرۆکێ کۆریا باکور د ماوەیێ ٢١ رۆژێن کو ئەو بەرزە بوو سیخوری ل سەر وان کەسان دکرن یێن کو ژ مرنا وی کەیفخوش بوون، ژ بەر هندێ ژی سەرۆکێ کۆریا باکور پتر ژ دەمێن بۆری دێ بزاڤا ژناڤبرنا دژبەرێن خوە کەت.
ناڤهاتی ئەو یەک ژی دیار کر کو ئەو پێشبینی دکەت ب سەدان کەس ل کۆریا باکور بهێنە کوشتن.
ئەڤرۆ نیوز:
چاڤدێرەکێ سیاسی ل رۆژئاڤایێ کوردستانێ دیار کر کو دەمەکە شاندەکێ فرەنسا ل رۆژئاڤایێ کوردستانێ ل گەل هەر دو جڤاتێن کوردی یێن رۆژئاڤایێ کوردستانێ و پارتێن سیاسی دەست ب هەڤدیتنان کریە و دخوازیت هەموو هێزێن سیاسی یێن رۆژئاڤایێ کوردستانێ ئاریشێن خوە چارەسەر بکەن دا بشێن پێکڤە رۆژئاڤا برێڤە ببەن.
ئەو یەک د دەمەکێ دایە کو چەند رۆژن شاندەکێ ئەمریکا ب سەرۆکاتیا بالیۆزێ وی وەلاتی ل سووریێ ژی بۆ چارەسەرکرنا ئاریشێن د ناڤبەرا پارتێن سیاسی یێن کوردی ل رۆژئاڤایێ کوردستانێ ل گەل هەموو ئالیان دەست ب کۆمبوونان کریە.
ئه‌ڤرۆ نیۆز، عه‌زیز هه‌ورامی:
هه‌ورامیه‌كان له گه‌ڵ دانانی باخ گرنگی سه‌ره‌كیان به داگوێز داوه به‌شی سه‌ره‌كی باخه‌كانی هه‌ورامان باخه گوێزه، چه‌ند ساڵێكه نه‌خۆشی بووه‌ته هه‌ڕه‌شه له‌سه‌ر ئاینده‌ی دارگوێزه‌كان .
شه‌ریف مه‌حموود لێپرسراوی به‌شی پاراستنی ڕوه‌ك له به‌ڕێوه‌به‌رایه‌تی گشتی كشتوكاڵی هه‌ڵه‌بجه، به ئه‌ڤرۆ نیۆزی راگه‌یاند، له ساڵی 2018 دوو جۆره نه‌خۆشی له دارگوێزه‌كانی هه‌ورامانی داوه پاش پێكهێنانی لیژنه‌یه‌ك پشكنین بۆ دار گوێزه‌كان له تاقیگه‌ی به‌ڕێوه‌به‌رایه‌تی گشتی كشتوكاڵی هه‌ڵه‌بجه، نه‌خۆشییه‌كان به‌كتریای و كه‌ڕووئه‌و نه‌خۆشییه له ڕێگه‌ی ئاودێرییه‌وه بۆ دارگوێزه‌كانی تر ده‌گوازرێته‌وه.
ئاماژه‌ی به‌وه‌دا،ساڵی 2018 پاش دابینكردنی بڕه پاره‌یه‌ك تواندرا ده‌رمانی پێویست دژ به نه‌خۆشییه‌كه بۆ باخ داره‌كان دابینبكرێت له ڕێگه‌ی تیمێكی ڕاهێندراو ده‌رمانی داگوێزه‌كان بكرێت و باخ داره‌كانیش ڕاهێنانیان پێ بكرێت، به‌ڵام به‌هۆی ئه‌وه‌ی به‌شێكی باخ داره‌كان نه‌هاتن به‌ده‌مانه‌وه له ده‌ره‌وه‌ی هه‌ورامان نیشته‌جێن وه به‌شێكیشیان باخه‌كانیان بۆ كرێ ته‌رخانك كردووه ساڵی 2019 تا ڕاده‌یه‌ك نه‌خۆشیه‌كه وه‌سێندرا به‌ڵام له ساڵی 2020 جارێكی تر نه‌خۆشیه‌كه له دارگوێزه‌كانی دایه‌وه.
هه‌روه‌ها وتیشی، به‌رنامه‌مان هه‌یه ئه‌مساڵ جارێكی تر هه‌ڵمه‌تێك بۆ ڕژاندنی ده‌رمان به دارگوێزه‌كانی هه‌ورامان ده‌ست پێبكه‌ین و ده‌بێت هه‌موو باخ داره‌كان به‌شداربن تاوه‌كو بتوانین ئه‌و نه‌خۆشیه بنه بڕبكه‌ن، چونكه ته‌نها دارگوێزێك ئه‌و نه‌خۆشیه‌ی پێوه بمێنێت، جارێكی تر بڵاو ده‌بێته‌وه له ڕێگه‌ی ئاودێرییه‌وه كاتێك دارێك ئاوده‌چێته بنی ڕه‌شی ئه‌و نه‌خۆشیه بۆ دارگوێزه‌كانی تر ده‌گوازێته‌وه، ئه‌و دارگوێزانه‌ی ته‌مه‌نیان 40 ساڵ ده‌بێت ماوه‌ی سێ ساڵ به‌و نه‌خۆشیه له‌ناو ده‌چێت، وه ئه‌و دارگوێزانه‌ی ته‌مه‌نیان كه‌مه دره‌نگتر نه‌خۆشیه‌كه ده‌گرن به‌ڵام گرتیان زوو وشكی ده‌كات، باخ دارانی هه‌ورامان ناویان لێناوه نه‌خۆشی سه‌ڕه‌تان.
ئەڤرۆ نیۆز، قائید میرۆ:
داکەتنا بھایێ پەتڕۆلێ زیانێن مەزن ب ئابوورا جیھانێ گەھاندینە و بسپۆرەکێ دارایا گشتی ژی پێشبینی دکەت بھایێ پەتڕۆلێ ل دەمەکێ نێزیک بگەھیتە زێدەتری ٤٠ دۆلاران.
دکتۆر سەباح خۆشناو، بسپۆرێ دارایا گشتی د داخویانیەکێ بۆ مالپەڕێ ئەڤرۆ نیۆز ئاشکراکر” پێشبینی دھێتەکرن ڤێ ھەیڤێ بھایێ پەتڕۆلێ ل بازاڕێن جیھانێ بەرەف بلندبوونێ بچیت و بھایێ ئێک بەرمیل دێ گەھیتە زێدەتری ٤٠ دۆلارێن ئەمریکی، بڤێ چەندێ ژی دێ زیانێن ل سەر ئابووریا جیھانێ بەرەف کێمبوونێ چن.
دکتۆر سەباح خۆشناو ئاماژەکر” ئەگەر بھایێ پەتڕۆلێ بلند ببیت، ئەڤە دێ ھەر دو حوکمەتێن ھەرێما کوردستانێ و عێراقێ گەھنە رێککەفتنێ و ئاریشەیا مووچێ فەرمانبەرێن ھەرێما کوردستانێ ژی دێ ھێتە چارەسەرکرن و مەترسی لسەر مووچەی نامینیت.
ئەڤرۆ نیۆز، قائید میرۆ:
پەرلەمانتارەکێ خۆلا بۆری یا پەرلەمانێ عێراقێ ئاشکراکر، ب ئەگەرێ بنپێکرنا دستوورێ عێراقێ مووچێ وەلاتیێن ھەرێما کوردستانێ ھاتیە بڕین و دبێژیت، عێراق یا بەرەف دابەشبوونێ دچیت و ناعەدالەتی ھەیە دناڤبەرا دەڤەرێن عێراقێ .
خۆشەڤی خەلیل، پەرلەمانتارێ بەرێ یێ عێراقێ بۆ ئەڤرۆ نیۆز دیارکر”وەلاتیێن عێراقێ و ھەرێما کوردستانێ دخوازن مافێن وان بھێنە گەرەنتی کرن، گورەی دستووری مافێن ھەموو وەلاتیان د پاراستینە، مخابن بجەئینانا دستووری ھاتیە سیاسی کرن و ب نڤیسارەکێ دستوور دھێتە بنپێکرن و نانێ وەلاتیان دھێتە بڕین.
ئەڤی پەرلەمانتارێ بەرێ یێ عێراقێ گۆتژی” پێدڤیە نەفرەت ل وان کەس و لایەنان بھێتەکرن یێن دەست ھەی ل بڕینا مووچێ فەرمانبەران و بھێنە شەرمەزارکرن، چونکە بڤێ چەندێ دێ عێراق بەرەف دابەشبوونی چیت، بتایبەتی کورد بێ ھیڤی بووینە ل دەولەتا عێراقێ، ژ بەر کو ناعەدالەتی دھێتەکرن دناڤبەرا دەڤەرێن عێراقێ.
خۆشەڤی خەلیل ئاماژەکر” پێدڤیە ڤێجارێ کورد ئێکگرتی بن بۆ دەربازکرنا ئەڤێ قۆناغا دژوار و ھزر بکەین باشترین چارەسەر بھێتە دیتن بۆ خۆشکرنا ژیانا وەلاتیان.
نيشاندان