ئەڤرۆ نیوز:
سەرۆک مەسعود بارزانی ژ بەر وەغەرکرنا هونەرمەندێ ناڤدار سەعید گاباری پەیام بەلاڤکر.
سەرۆک بارزانی د پەیاما خوە دا دیار دکەت کو سەعید گاباری ئەو هونەرمەندە کو هەموو ژیانا خوە بۆ هونەرا کوردی و دۆزا رەوا یا گەلێ کوردستانێ تەرخانکربوو و ژ بەر هندێ ژی ژ دەستدانا سەعید گاباری خوسارەتەکا مەزنە.
سەرۆک بارزانی دیار ژی دکەت کو سەرخوشیێ ل خێزانا تێکوشەر سەعید گاباری و کەسوکارێن وی و هەموو هونەرمەندان دکەم و خوە ب شریکێ خەما وان دزانم.
ئەڤرۆ نیوز:
د. سەباح نەسرەدین رێڤەبەرێ گشتی یێ ساخلەمیا سلێمانیێ راگەهاند کو پشتی چو حالەتێن کۆرۆنایێ ل سلێمانیێ نەمان وان بریار داینە کو ژ سێ نەخوشخانێن تایبەت ب کۆرۆنایێ ل سەنتەرێ سلێمانیێ ئێک بهێتە داخستن.
ناڤهاتی دیار ژی کر کو سەرەرای داخستنا نەخوشخانەکا تایبەت ب کۆرۆنایێ ل سلێمانیێ لێ دێ بەردەوام پشکنین بۆ وەلاتیان هێتە کرن دا کۆرۆنا ب تەمامی بهێتە کۆنترۆلکرن.
ئەڤرۆ نیوز:
وەزارەتا دارایی و ئابووری یا حوکمەتا هەرێما کوردستانێ بەری دەمەکێ راگەهاند کو سپێدێ رۆژا سێ شەمبی دێ مووچێ دیوان و لیوایێن وەزارەتا پێشمەرگەی هێتە دابەشکرن.
وەزارەتا دارایی و ئابووری دیار ژی کریە کو رۆژا چارشەمبیێ ٢٠٢٠/٥/٦ دێ هەر دو یەکەیێن ٧٠ و ٨٠ یێن وەزارەتا پێشمەرگەی مووچێن خوە وەرگرن.
ئه‌ڤرۆ، ره‌مه‌زان هه‌رنی:
شاره‌زایه‌كێ بوارێ ئابووری ئاشكرا دكه‌ت هەکە ل كوردستانێ جوتیار هه‌موو جوره به‌رهه‌مه‌كێ بچینن دێ ره‌وشا ئابووری گه‌له‌ك باشتر بیت ل جهه‌كێ مفایه‌كێ دێ گه‌له‌ك مفا گه‌هیت جوتیارا و ره‌وشا چاندنێ و ئابووری ژی باشتر بیت ل وه‌لاتی دا .
هاوكار ئیبراهیم شاره‌زایێ بوارێ ئابووری بۆ ئه‌ڤرۆ نیوز گۆت: (پێدڤیه مفای ژ ئه‌زموونا وه‌لاتێن پێشكه‌فتی ببینین و وه‌رگرین ل بوارێ چاندنێ وی ده‌می دێ كێمتر پشت به‌ستنێ بۆ بۆدجه‌ی كه‌ین تایبه‌ت كو ل به‌غدا دهێت بۆ كوردستانێ، هەکە جوتیار هه‌موو جورێن به‌رهه‌ما بچینن خاله‌كا گه‌له‌ك گرنگه دێ مفایه‌كێ ئێكجار مه‌زنێ ئابووری گه‌هیتە جوتیار و كوردستانێ به‌لێ ڤێ هه‌موو جور كرنێ پێدڤیه ب پلان و سیسته‌م بیت بۆ وێ چه‌ندێ هه‌موو به‌رهه‌م ب باشی بهێنه چاندن و به‌رهه‌مئینان) .
ئاشكراكر پێدڤیه گرنگی ب كه‌رتێ چاندنێ، گه‌شت و گوزار و بازرگانیێ و پیشه‌سازیێ بهێته دان بۆ وێ چه‌ندێ دا كوردستان ببیته خودان به‌رهه‌مێ ناڤخویێ بجهكری نه ب تنێ ل وه‌رزه‌كێ، بڤێ چه‌ندێ ژی دێ گرانیا لسه‌ر ملێن حوكمه‌تێ ژی سڤك بیت و دێ ژێرخانا ئابووری ژی باشتر بیت و دێ گرنگیا باشتر ب چاندنێ هێته دان ژلایێ جوتیاران ڤه ب مه‌رجه‌كێ هاریكاریا جوتیارا بهێته كرن و هه‌موو جوره به‌رهه‌مه‌ك ژی ب به‌رفره‌هی بهێته چاندن).
ئه‌ڤرۆ نیوز، ره‌مه‌زان هه‌رنی:
رێژه‌كا باش مێشه‌ڤانا ل سنورێ ئاكرێ هه‌نه، سالانه به‌رهه‌مه‌كێ باشێ هنگڤینێ به‌رهه‌م دئینن و رۆژ بۆ رۆژێ خواست لسه‌ر به‌رهه‌مێ خۆماڵیێ ناڤخویی زێده دبیت.
عه‌لی ئه‌حمه‌د مێشه‌ڤانه‌كێ ده‌ڤه‌رێ یه بۆئه‌ڤرۆ نیوز گوت: (چه‌ندین ساله مێشان ب خودان دكه‌م و من پتری 200 مێشێن هنگڤینی هه‌نه به‌رده‌وام مه‌زاختنێ لێ دكه‌م هه‌تا به‌رهه‌مه‌كێ باشترێ هنگڤینێ به‌رهه‌م بینن، ئێك كێلویا هنگڤینێ دارا ب 125 هزار دینارا دهێته فروتن و یێ شانه و خلیفا ژی 25 بۆ 50 هزارا دفروشین ل دووڤ جورێ هنگڤینێ دمینیت و بازارێ روژێ، ل چاڤ ده‌مێ بوری خواسته‌كا باش لسه‌ر هنگڤینێ خوماڵی زێده بوویه).
ئه‌حمه‌د جه‌میل رێڤه‌به‌رێ چاندنا ئاكرێ بۆ ئه‌ڤرۆ نیوزراگه‌هاند ل ده‌ڤه‌رێ دو مێشگه‌هێن به‌رهه‌مئینانا هنگڤینی هه‌نه ل دینارته و خه‌ردسێ، ل سنورێ قه‌زا ئاكرێ 7778 مێشێن سندوقا هه‌نه ل گه‌ل 2722 مێشێن ناڤ خلیفه‌یان و یێن خوماڵی و ساڵانه رێژا ب خودانكرنا مێشا و به‌رهه‌مئینانا هنگڤینی ل ده‌ڤه‌رێ زێده دبیت.
ئه‌ڤرۆ نیوز:
سه‌رۆكاتیا په‌رله‌مانێ كوردستانێ داخوازێ ژ په‌رله‌مانتاران دكه‌ت بۆ كۆمبوونا رۆژا چارشه‌مبی د ئه‌ڤێ هه‌فتیی دا كۆ دێ ل سه‌ر دو ته‌وه‌ران دانوستاندنێ كه‌ن به‌رهه‌ڤ ببن.
سه‌رۆكا په‌رله‌مانێ كوردستانێ د نفیساره‌كێ دا راگه‌هاند: داخازێ ژ هه‌موو ئه‌ندامێن په‌رله‌مانێ كوردستانێ دكه‌ین بۆ به‌رهه‌ڤبوونێ ل رینشتنا ژماره 3 یا ئاسایی یا خۆلا بهاری سالا دوێ ل خۆلا هه‌لبژارتنێن پێنجێ یێن په‌رله‌مانێ كوردستانێ ل ده‌مژمێر 12:00 نیڤرۆ رۆژا چارشه‌مبی 6/5/202 .
لگۆری راگه‌هاندنا سه‌رۆكاتیا په‌رله‌مانێ كوردستانێ، كارنامه‌یا كۆمبوونێ دو ته‌وه‌ران بخوڤه دگریت، و ته‌وه‌رێ ئێكێ خاندنا ئێكێ بۆ پێشنیار و بریارا( پێشكێشكرنا پێشنیازه یاسایی و پێشنیازه بریار ژلایێ ئه‌ندامێن په‌رله‌مانی ڤه ژ بلی حوكمێ ماده‌یێ 82 یا په‌یره‌وێ ناڤخۆ، لگۆری حوكمێ ماده‌یین 79 و 80 و82 ژ په‌یره‌وێ ناڤخویێ په‌رله‌مانێ دهێته‌كرن.
لگۆری راگه‌هاندنا سه‌رۆكاتیا په‌رله‌مانێ كوردستانێ ئاماژه ب وێ چه‌ندێ ژی هاتیه دان، كۆ دێ ته‌وه‌رێ دانوستاندن ل سه‌ر پلانا وه‌زاره‌تا خاندنا بلند و وه‌زاره‌تا په‌روه‌رده‌یێ بیت كۆ چه‌وا سه‌ره‌ده‌ریێ ل گه‌ل ئه‌ڤێ ره‌وشا نوكه‌یا كوروناێێ و پرسا خاندنا سالا 2019-2020 .
ئه‌ڤرۆ نیوز، ره‌مه‌زان هه‌رنی:
ده‌ڤه‌را ئاكرێ یا باشه بۆ كه‌رتێ چاندنا شتلێن فێقی و كه‌سكاتی و ساڵانه ئه‌ڤ رێژه زێده‌تر دبیت و ره‌ز و باغێن فێقی ل چاڤ سالێن بوری ب رێژه‌كا باش زێده‌بوویه .
شێرزاد محه‌مه‌د جوتیاره‌كێ ده‌ڤه‌را ئاكرێ یه بۆ ئه‌ڤرۆ نیوزراگه‌هاند به‌ری چه‌ند سالا كه‌س وه‌ك پێدڤی گرنگی ب كه‌رتێ چاندنێ نه‌دا ل ده‌ڤه‌رێ به‌لێ دوساله خه‌لكی ب گشتی ده‌ست ب چاندن و دروستكرنا باغێن فێقی كرینه ئه‌ڤساله نزیكی 500 شتلێن فێقی به‌رهه‌ڤكرینه بۆ چاندنێ ژ به‌ر كو ده‌ڤه‌را مه بارانێن باش هاتینه و ئه‌ڤساله كه‌رتێ چاندنا فێقی دێ گه‌له‌ك یێ باش بیت، هەکە ئه‌ڤ رێژا به‌رهه‌مێ فێقی یێ ئه‌ڤساله هاتیه چاندن تووشی چو نه‌خوشیا نه‌بیت دێ كه‌رتێ به‌رهه‌مێن ناڤخویی ل كوردستانێ ب رێژه‌كا باش كه‌ڤیته بازارا.
ئه‌حمه‌د جه‌میل رێڤه‌به‌رێ چاندنا ئاكرێ بۆ ئه‌ڤرۆ نیوز راگه‌هاند جوتیار و وه‌لاتیان ده‌ست ب كه‌رتێ چاندنا باغداریێ كرینه‌ڤه نوكه ل ده‌ڤه‌رێ ده‌ه ره‌زێن حلیكا و ده‌ه ره‌زێن هنارا و دوازده ره‌زێن هژیرا هاتینه دانان ب ریژه‌كا باش شتل دهێنه چاندن و ئه‌م ل گور به‌رنامه‌یێ چاندنێ هاریكاریێ لسه‌ر جوتیارا دابه‌ش دكه‌ین.
ئه‌ڤرۆ نیوز:
د.سه‌باح هه‌ورامی رێڤه‌به‌رێ گشتی یێ ساخله‌میا سلیمانیێ راگه‌هاند جیهان به‌حسی ئه‌گه‌رێ دروستبوونا پێلا دوێ یا كورونایێ دهێته‌كرن، هه‌كه خالێن توخیبی و فرۆكه‌خانه گرتی بن دێ دوور بین ژ ئه‌وێ پێلا دوێ.
رێڤه‌به‌رێ گشتی یێ ساخله‌میا سلیمانیێ ئه‌و چه‌نده ژی راگه‌هاند:
ڤه‌كرنا خالین توخیبی و فرۆكه‌خانه ئه‌گه‌رێ دروستكرنا مه‌ترسیێ نه چونكو كورونا نه‌هاتیه كۆنترۆلكرن ل چ وه‌لاتان رۆژانه هزاران توشبوویێن نوو دهێنه راگه‌هاندن.
ئه‌ڤرۆ نیوز:
ده‌سته‌یا وه‌به‌رهێنانا حكومه‌تا هه‌رێما كوردستانێ زیده‌تری 1000 پرۆژه‌یێن وه‌به‌رهێنانێ بۆ سالا 2020 راگه‌هاند.
د كۆنگره‌یه‌كێ رۆژنامه‌ڤانی دا، محه‌مه‌د شوكری سه‌رۆكێ ده‌سته‌یا وه‌به‌رهێنانا هه‌رێما كوردستانێ، پلانا حكومه‌تا هه‌رێما كوردستانێ بۆ وه‌به‌رهێنانێ ل سالا 2020 ئێخستنه ری و كۆ زیده‌تری هزار پرۆژه‌یانه.
سه‌رۆكێ ده‌سته‌یا وه‌به‌رهێنانا هه‌رێما كوردستانێ ئه‌و چه‌نده ژی راگه‌هاند: پرۆژه‌یێن وه‌به‌رهێنانا هه‌رێما كوردستانێ كه‌رتێ پێشه‌سازی و چاندن و ژێده‌رین ئاڤێ و گه‌شتوگۆزار و دارای و به‌نك و كاره‌ب و ڤه‌گۆهاستن و گه‌هاندن و په‌روه‌رده و خاندنا بلند و ساخله‌می و كارۆبارێن جڤاكی و ئاكنجیبوون و رێك و بان و بازرگانی و ره‌وشه‌نبیری و ژێرخانا ئابووری بخوڤه دگریت.
ناڤبری ئه‌و چه‌نده ژی دیاركر ئه‌ڤ پلانا به‌رده‌ست یا وه‌به‌رهێنانێ كۆ وه‌به‌رهێنانا ناڤخۆ و ده‌ره‌كی بخوڤه‌دگریت، تاكۆ ئه‌و ژی لگۆری بسپوریێ پشكدار بن ل وه‌به‌رهێنانێ ل هه‌رێما كوردستانێ بۆ ئیسال.
ئه‌ڤرۆ نیوز، نه‌وزاد هلۆرى:
شه‌ڤا بورى گورگه‌ك كه‌فته ناڤا په‌زێ وه‌لاتیه‌كێ گوندێ بانیێ یا سه‌ر ب ده‌ڤه‌را به‌رێ گارێ ل سنوورێ قه‌زا ئامێدیێ و 32 سه‌رێن په‌زى كوشتن و برینداركرن.
سامى ره‌زیكى، خودانێ په‌زى بو ئه‌ڤرۆ نیوز گۆت: شه‌ڤا بورى ژ ئه‌گه‌رێ هاتنا گورگه‌كێ بۆ ناڤا په‌زێ من ل گوندى، 32 په‌ز مرن و برینداربوون، زیانێن زۆر گه‌هشتن من. زێده‌تر گۆت “ئه‌وى گورگى 27 سه‌رێن په‌زى كوشتینه و پێنج ژی ب دژوارى برینداركرینه و مه ڤه‌كوشتن داكو مرار نه‌بن، هنده‌كێن په‌زێ دى گورگى تنێ شینوارێن ساده ل سه‌ر له‌شێ وان دروستكرینه و یێ ره‌ڤى، به‌لێ مه ئه‌و دیتن و سلامه‌تن، ب ره‌نگه‌كێ گشتى 32 سه‌رێن ته‌ش و كه‌والێ من مرینه. ناڤبرى خواست جهێن شوله‌ژێ هاریكاریا وى بكه‌ن داكو بشێت دووباره بچیته سه‌ر ژیان و كارێ خوه و گۆت ژى: ژین و ژیارا من ل سه‌ر خودانكرنا ته‌رش و كه‌والى یه و ئه‌ڤه چه‌ند ساله ئه‌ز ڤى كارى دكه‌م.
نيشاندان