NO IORG
نووترين نووچه
Twitter

ئه‌ڤرۆ نیوز:

لژنا قه‌یرانان بۆ به‌رهنگاربوونا ڤایرۆسێ كورونایێ ل عیراقێ راگه‌هاند: ل ده‌مێن بهێت چه‌ند بریاره‌كا دێ ده‌ت، وه‌ك كاركرن ب سیسته‌می تاك و جوت بۆ كێمكرنا قه‌ره‌بالغیا ترۆمبێلان ل جاده‌یان ب كار ئینیت.

جه‌عفه‌ر عه‌لاوی وه‌زیرێ ساخله‌میا عیراقی كۆ هه‌ڤده‌م سه‌رۆكێ لژنا قه‌یرانانه‌ ل عیراقێ راگه‌هاند: هێشتا هه‌لسه‌نگاندنێ بۆ ره‌وشا ساخله‌میا گشتی ل عیراقێ دكه‌ین.

جه‌عفه‌ر عه‌لاوی ئه‌و چه‌نده‌ ژی راگه‌هاند: لژنا قه‌یرانان ل ده‌مێ بهێت دێ چه‌ند بریاره‌كا ده‌ت، وه‌ك كاركرن ب سیسته‌می تاك و جوت بۆ كێمكرنا قه‌ره‌بالغیا  ترۆمبێلان ل جاده‌یان به‌لێ دڤی ده‌می دا پێنگاڤێ نا هاڤێژین بۆ قه‌ده‌غه‌یا هاتنوچونا ته‌مام.

ل سه‌ر ره‌وشا ڤایرۆسێ كورونایی، سه‌رۆكێ لژنا قه‌یرانان ل عیراقێ راگه‌هاند: لگۆری رێكخراوا ساخله‌میا جیهانی، عیراق ئێكه‌ ژ ئه‌وان وه‌لاتێن كۆ كێمترین توشبوون ب ڤایرۆسێ كورونایێ لێ هه‌ی و باشتره‌ ژ ئه‌مریكا و بریتانیا وه‌لاتێن دی یێن عه‌ره‌بی.

لگۆری دوماهی ئامارا وه‌زاره‌تا ساخه‌لمیا عیراقێ، تانوكه‌ 2003 كه‌س ل عیراق و هه‌رێما كوردستانێ تووشی ڤایرۆسێ كورونایێ بووینه‌، 1346 ژ وان توشبوویان ساخ بووینه‌ و 92 توشبوو ژی مرینه‌.

ئه‌ڤرۆ نیوز:

وه‌زاره‌تا ساخله‌میا هه‌رێما كوردستانێ توشبوونا پێنج كه‌سێن دی ب ڤایرۆسێ كورونایی ل هه‌ولێرێ راگه‌هاند كۆ ژیێن وان دناڤبه‌را 14 بۆ 49 سالیێ دانه‌.

د راگه‌هاندنا وه‌زاره‌تا ساخله‌میا حكومه‌تا هه‌رێما كوردستانێ دا هایته‌ ل به‌رده‌وامیا لیگه‌ریان و دووڤچوون و پشكنینا گۆمانلێكریان، پێنج توشبوویێن دی ب ڤایرۆٍسێ كوروونا كوڤید 19 ل پارێزگه‌ها هه‌ولێرێ هاتنه‌ ده‌ست نیشانكرن، زه‌لامه‌ك ژیێ وی 49 ساله‌ و دو ژن ژیێ وان 23 و 14 سالن ل قه‌زا سوران تاخێ 26 گۆلان.

هه‌ر د ئه‌وێ راگه‌هاندنا وه‌زاره‌تا ساخله‌میا هه‌رێمێ دا هاتیه‌ كر توشبویێ چارێ ژیێ وی 67 ساله‌ و ل ناجیا سمیلانه‌، توشبویێ پینجێ كوره‌كه‌ ژیێ وی 18 ساله‌ ل ته‌لار ستی ل ناحیا كه‌سنه‌زان ژ ئه‌وی خیزانا به‌ری نوكه‌ توشبوویی یه‌،

وه‌زاره‌تا ساخله‌میا حكومه‌تا هه‌رێما كوردستانێ ئه‌و چه‌نده‌ ژی دیاركر ئه‌گه‌رێ توشبوونا ئه‌وان پینج كه‌سان ژ ئه‌گه‌رێ تێكه‌لیا وان ل گه‌ل توشبویێن به‌ری نوكه‌ بووینه‌.

ب تووماركرنا ئه‌ڤام توشبوویان ژماره‌یا توشبوویێن ڤایرۆسێ كورونایی ل هه‌رێما كوردستانێ گه‌هشته‌ 372 كه‌سان كۆ 325 كه‌س ساخ بووینه‌ و ڤه‌گه‌ریانه‌ مالێن خو و پێنچ كه‌س ژی مرینه‌.

ئه‌ڤرۆ نیوز:

ئاژانسا رویته‌رز به‌لاڤكریه‌، بهایێ پترۆلێ ئه‌ڤرۆ رۆژا پێنج شه‌مبی  30/4/2020 بلند بوونه‌كا دی تووماركر، ب ئاوایه‌كی بهایێ به‌رمیلا بڕێنت بۆ 24.74 دۆلار ل بازارێن جیهانێ كرین و فروتن پێڤه‌ هاتیه‌كرن، هه‌ڤده‌م بهایێ پترۆلا خام  یا ئه‌مریكی ژی ب 17.20 دۆلاران كرین و فروتن پێ هاتیه‌كرن.

ب ئه‌گه‌ری به‌لاڤ بوونا ڤایرۆسێ كورونایێ، پرانیا كارگه‌هـ و كه‌رتێن به‌رهه‌مهێنه‌ر هاتنه‌ گرتن و ژ كاركه‌ڤتن، له‌ورا خواست ل سه‌ر بهایێ بكار ئینانا پترۆلێ و كرینێ كێم بوو، ئه‌ڤه‌ ژی بوو ئه‌گه‌رێ داكه‌تنا بهایی پترۆلێ ل جیهانی و ئه‌و وه‌لاتێن پشت به‌ستنی ا سه‌ر به‌رهه‌مێ پترۆلێ دكه‌ن تووشی زیانه‌كا زۆرا مادی بوون.

 
ئەڤرۆ نیوز، عەلی حاجی :

 

ئەندامەکێ لژنا دووڤچوونا بازاری ل زاخۆ بۆ ئەڤرۆ نیوز دیار کر لژنەیا وان ل زاخۆ ئەڤرۆ چارشەمبی ٢٩/٤/٢٠٢٠ سەرەدانا ٤٠ جهێن جودا دناڤ سەنتەرێ باژێری دا کری یە و ژ وان پێنچ جهـ هاتینە دائێخستن و سزادان.
زێدەتر وەلات هەجەر گۆت : ژ وان جهێن مە سەرەدانا وان کری مارکێتەک و سەرتراشخانەیەک بوون کو هاتنە دائێخستن بۆ ماوەیێ سێ روژان ژبەرکو دناڤ مارکێتێ دا رێژەیەکا زور یا کەرەستەیێن ئێکسپایەر هەبوو و هەر دیسان سەرتراشخانا ژی ژبەر نەپێگریا وێ ب رێنمایێن ساخلەمیێ هاتە سزادان،ژلایەکێ دیتر ڤە سێ مارکێتێن دیتر ب کوژمەیەکێ پارەیی هاتنە سزادان و ژ وان جهێن مە سەرەدانا وان کری دەست ب سەر ٥٦٢ کێلوگرامێن کەرەستەیێن ئێکسپایەر دا هاتە گرتن و دێ بەردەوام بین دا کو بشێن زێدەتر کونترولا بازاری بکەین پێخەمەتی دەست ب سەر دا گرتنا کەرەستەیێن ئێکسپایەر،ژلایێ خوە ڤە ژی پولیس و ئاسایش و لژنا چاڤدێریا بازرگانی ل زاخۆ هەڤکار بووینە ل گەل مە دا دا کو بشێن ب دروستی ئەرکێ خوە جێبەجێ بکەین.

 
ئەڤرۆ نیوز:
هونەرمەند سەعید گاباری توشی نەخۆشیەکا گران بوویە، نوکە ل باژێرێ هەولێرێ د نەخۆشخانێ دایە و رەوشا ساخلەمیا وی ژی نەیا باشە.

 

ئەڤە دو رۆژن هونەرمەند سەعید گاباری ژبەر نەخۆشیا پەنجەشێرێ ل هەولێرێ د نەخوەشخانێ دایە و ل ژێر چاڤدێریا هوور یا نۆشداران دایە.
هەر چەندە بزاڤ هاتینە کرن ڤرێکەنە دەرڤەی وەلاتی، لێ ژ ئەگەرێ تێکچوونا رەوشا وی نەشاینە ڤرێکەنە دەرڤەی وەلاتی.

 
ئەڤرۆ نیوز، مەحمود نهێلى:

 

لژنا ئابوورى یا قەزا ئامێدیێ د لێگەریانەکى دا ل کومەلگەها قەدشێ، ئەڤرۆ 29/4/2020 دەست ب سەر رێژەکا کەرەستێن ماوە ب سەرڤە چوویى دا گرتن و مارکێتەک و کلینکەکا نۆشدارى ژى ژ بەر نەپێگرى کرن ب رێنمایان سزادان.

 

کاروان حاجى سەعید، بەرپرسێ بنگەهێ چاڤدێریا بازرگانى ل قەزا ئامێدیێ بۆ ئەڤرۆ نیوز دیارکر، ژ بۆ پتر کونترولکرنا بازارى و پاراستنا ساخلەمیا وەلاتیان ئەو بەردەوام ل سەر هەموو بازارێن سنورێ قەزا ئامێدیێ دگەرن و گۆت: ( ل کومەلگەها قەدشێ یا سەر ب ناحیا سەرسنکێ ڤە وان دەست ب هژمارەکا کەرەسەتیێن ئێکسپایر دا گرتینە و هەروەسا مارکێتەک و کلینکەکا نۆشدارى هەر ئێک ب کوژمێ 100 هزار دیناران هاتنە سزادان).

 

ناڤهاتى ئاشکرا کر، کو دەست ب سەر جورەکى شیرى دا ژى هاتیە گرتن کو ل گور کونترۆلا جۆرى ب کێر ڤەخوارنێ ناهێت و دڤێت بهێتە ژناڤبرن.

 
ئەڤرۆ نیوز، عەلی حاجی :

 

ئەڤرۆ ب ئامادەبوونا رێڤەبەرێ گشتی یێ باژێرڤانیان ل پارێزگەها دهۆکێ و سەرۆکێ باژێرڤانیا زاخۆ ب ترومبێلەکا نوو باژێرێ زاخۆ هاتە تافیل کرن.

ئەندازیار دیار بەحری ل دور تافیلکرنا باژێرێ زاخۆ د کونگرەیەکێ روژنامەڤانی دا گۆت : جهێ دەست خوەشیێ یە بۆ باژێرڤانیا زاخۆ بۆ ئێکەم جارە ترومبێلەکا ب ڤی رەنگی بهێتە تەرخان کرن بۆ تافیلکرنا باژێرێ زاخۆ ب دەرمانێ دژە ڤایروسێ کۆرۆنایێ و هەر دیسان ئەڤ ترۆمبێلە بۆ گەلەک کارێن دیتر ژی دێ هێتە ب کارئینان، بۆ پروژێ ئاڤا گران مە هزر د وی بابەتی دا کریە کو جهەک تایبەت بهێتە تەرخان کرن بۆ دروست کرنا جهەکێ تایبەت بۆ کومڤەکرنا ئاڤا گران و هەتا باژێرڤانیا زاخۆ ژی ئەرد بۆ وێ چەندێ ژی تەرخان کری یە و مە دگەل رێکخراوێن جیهانی ژی ئاخفتیە ل دور وی بابەتی و وان ژی سوز دایە مە هاریکار بن دگەل مە دا وەکو ئەم هەمی ژی دزانین حکومەتا هەرێما کوردستانێ دناڤ قەیرانا دارایی دا دەرباز دبیت.

ل دور کێمکرنا پێشینەیا باژێرڤانیان ل پارێزگەها دهوکێ ناڤهاتی خویا کر، بریارا حکومەتێ بوویە پێشینەیا هەموو باژێرڤانیان ٥٠٪ بهێتە کێمکرن و ئەگەر ژی بۆ کاودانێن نوکە یێ هاتنا ڤایروسێ کورونایێ ڤەدگەریت ژبەر کو بوویە ئەگەرێ پەیداکرنا قەیرانان و ئاریشان.

ل دوماهیێ گۆت ژی، ل باژێرێ زاخۆ هژمارەکا کێشەیان هەنە و ئەم مژوولی چارەسەرکرنا ئاریشاینە و هەر دەمێ رەوش بەرەف باشتر بونێ ڤە بچیت، دێ بزاڤێ کەین وان کێشەیان چارەسەر کەین.

 

ئەڤرۆ نیوز:

 

 

وەزارەتا ساخلەمی و ژینگەها عیراقێ راگەھاند، د دەمێ ۲٤ دەمژمێرێن بوری دا ۷٥ حالەتێن نوو یێن توشبوون ب کورونا یێ و ۲٥ حالەتێن چێبوونێ و دو حالەتێن گیان ژ دەستدانێ ھاتینە تۆمار کرن.

 

 

وەزارەتا ساخلەمی و ژینگەھا عیراقێ گوتیه ژی، د دەمێ شەڤ و رۆژەکێ دا ۷٥ حالەتێن نوو یێن کۆرۆنا یێ ھاتینە تۆمار کرن، کو زێدەترین حالەت ژی ل بەسرا و بەغدا بووینە، هەروەسا دو حالەتێن گیان ژ دەستدانێ ل بەغدا ھاتینە تۆمار کرن.

 

ئەڤرۆ نیوز:
وەزارەتا ساخلەمیێ راگەیاند، کەسەکێ دی ل سلێمانیێ تووشی ڤایرۆسێ کۆرۆنا بوویە، کو د ژیێ 32 سالیێ دایە و بەرکەفتیێ تووشبوویەکێ بەرێ یە.

 

هەروەسا گوتیە، د بەردەوامیا پشکنینان و لێگەریانێ لدووڤ گومانلێکریان، تووشبوویەکێ دی یێ ڤایرۆسێ کۆرۆنا یێ ل سلێمانیێ هاتە دەست نیشانکرن، کو زەلامەکێ د ژیێ 32 سالیێ دایە، خۆجهێ سلێمانیێ یە، نەڤی و بەرکەفتیێ تووشبوویەکێ بەرێ یە.

فۆتۆ: هه‌رژين عوسمان

 
ئەڤرۆ نیوز:

 

ل دەمژمێر ھەشتی شەڤ، ئەردھەژەک ب گۆرەی ٤.٦ شەش پلێن رێختەرێ ل سلێمانیێ و چەمچەمال روودا.
رێڤەبەریا گشتی یا سەقاناسی و ئەردھەژان ل ھەرێما کوردستانێ راگەھاند، ئەڤ شەڤە ۲۹ نیسانا ۲۰۲۰ ل دەمژمێر ٨ شەڤێ ئەردھەژەک ب گۆرەی ٤.٦ پلان ب پیڤەرێ رێختەرێ ب کووراتیا ۱۰ کم دووریا ۲۷ کم ژ چەمچەمال و ۳۱ کم ل سلێمانیێ روودایە.

website security
WP Facebook Auto Publish Powered By : XYZScripts.com