ئەڤرۆ نیوز:
رێڤەبەرێ گشتی یێ ساخلەمیا سلێمانیێ راگەهاند، کەسەکێ دیتر یێ تووشبوویی ب ڤایرۆسێ کۆرۆنا یێ ل سلێمانیێ چێبوویە و سەرجەمێ گشتی یێن ئەوێن چێبووین گەهشتنە 95 کەسان.
د. سەباح هەورامی، رێڤەبەرێ گشتی یێ ساخلەمیا سلێمانیێ راگەهاند، ئەڤرۆ تووشبوویەکێ دیتر یێ ڤایرۆسێ کۆرۆنا یێ ل سلێمانیێ چێبوویە، پشتی چاڤدێری و چارەسەریێ هاتیە رەوانەکرن بۆ مال.
ئەڤرۆ نیوز:
وەزارەتا ساخلەمیا هەرێما کوردستانێ راگەهاند، چار کەسێن دیتر ل چەمچەمال تووشی ڤایرۆسێ کۆرۆنا یێ بوون، ب ڤێ چەندێ سەرجەمێ گشتی یێ تووشبوویان ب کۆرۆنا یێ گەهشتە 315 کەسان.
هەروەسا گۆتیە، د بەردەوامیا پشکنینان و لێگەریانێ لدووڤ گومانلێکریان، چار تووشبوویێن ڤایرۆسێ کۆرۆنا یێ هاتنە دەست نیشانکرن، کو سێ زەلام و ژنەکن ل قەزا چەمچەمال و بەرکەفتیێن تووشبوویێن بەری نوکە نە.
ئەڤرۆ نیوز:
شاندێ ئۆپێک بۆ دانوستانێ ل گەل وەلاتێن ئۆپێک پلەس راگەهاندیە، کو رووسیا و سعودیە رێککەفتینە ل سەر کێمکرنا بەرهەمئینانا نەفتێ ب رێژا 23%.
شاندێن ئۆپێک و ئۆپێک پلەس راگەهاندیە، کو سعودیە و رووسیا دووماهی ب جۆداهیێن دناڤبەرا خوە دا ئینایە و ل هەیڤا ئەیارێ و خزیرانێ دا ب رێژا 23% دێ بەرهەمئینانا نەفتێ کێم کەن، کو دگەهیتە 11 ملیۆن بەرمیلێن نەفتێ د رۆژەکێ دا.
سعودیێ راگەهاندیە، دێ پابەند بین ب کێمکرنا بەرهەمئینانا نەفتێ هەتا دو سالێن دیتر، ئانکو هەتا سالا 2022، بەلێ کێمکرنا بەرهەمئینانا نەفتا ئیرانێ و لیبیا و ڤەنزویلا ڤەناگریت.
ئەڤرۆ نیوز:
ئەڤرۆ پێنجشەمبی 30 تووشبوویێن نوو ب ڤایرۆسێ كۆرۆنا ل عیراقێ هاتنە تۆمار كرن.
وەزارەتا ساخلەمی و ژینگەها عیراقێ دیار کر، د دەمێ شەڤ و رۆژەکێ دا 30 كەس تووشی كۆرۆنا یێ بووینە، نوکە هژمارا تووشبوویێن کۆرۆنا ل عیراقێ گەهشتە هزار و 232 تووشبوویان.
تووشبوویێن ئەڤرۆ 12 ژ وان ل بەغدانە، هەشت ل پارێزگەها بەسرا، دو ل دیالا و دو ژ ل زیقارن، ئێك ل نەجەف، ئێك ژ ل كەربەلا و ئێك ژی ل واست تووش بووینە.
ئەڤرۆ نیوز:
فەخرەدین کۆجا، وەزیرێ ساخلەمیا تورکیا راگەهاند، کو هەتا نوکە 42 هزار کەس تۆشی ڤایرۆسێ کۆرۆنا یێ بووینە، ئەڤرۆ پێنجشەمبی 96 تۆشبوویان گیانێ خوە ژ دەست دایە، هەتا نوکە ب گشتی 908 کەسان ل تورکیا گیانێ خوە ژ دەست دایە.
ناڤهاتی گۆت ژی: ئەڤرۆ پێنجشەمبی 4056 کەس تۆشی کۆرۆنا یێ بووینە، ژ بەر ڤێ چەندێ رەوشا تورکیا ژ ئالیێ ساخلەمی وئابووری ڤە بەرەف خرابیێ ڤە دچیت.
ئەڤرۆ نیوز:
ئەڤرۆ پێنجشەمبی 9.4.2020 مستەفا کازمی بەربژارێ راسپاردی بۆ پێکئینانا کابینا نوو یا حوکمەتا عیراقێ پەیامەک ب زمانێ کوردی بەلاڤکر و تێدا هاتیە، سۆزێ ددەت کار بۆ چارەسەرکرنا ئاریشان بکەت و ئابوورێ عیراقێ بەرەف پێشڤە ببەت.
مستەفا کازمی پشتی ھاتیە راسپاردن بۆ پێکئینانا حکومەتا نوو یا عیراقێ د توویتەرێ دا نڤێسیە، ب راسپاردنا من بۆ ئەرکێ سەرۆکاتیا حوکمەتا عێراقێ ، سۆزێ ددەم ھەمبەر گەلێ خۆ یێ بەخشندە بۆ کارکرنێ ل سەر پێکئینانا حکومەتێ، کو داخوازیێن عێراقیان بێخمە دەستپێکا کارێن خوە، سەروەریا نیشتیمانی و مافێن وان بپارێزیت و کار بکەت بۆ چارەسەرکرنا قەیرانان و ئابووری بەرەڤ پێشڤە ببەت.
ئەڤرۆ نیوز:
فەرسەت سۆفی پارێزگارێ هەولێرێ دیار کر، ژ پێخەمەت ساخلەمیا وەلاتیان و کۆنترۆلکرنا ڤایرۆسێ کۆرۆنا یێ، وەزیرێ ناڤخۆ یێ هەرێمێ دێ دەمێ قەدەغەیا هاتنوچوونێ درێژکەت و وەزارەتا ساخلەمیێ ژی داخوازکریە، کو هەتا ١٥ ڤێ هەیڤێ قەدەغەیا هاتنوچوونێ بهێتە درێژ کرن.
ناڤهاتی گۆت ژی: وەزیرێ ناڤخۆ یێ هەرێمێ ل گەل وەزارەتا ساخلەمیێ و پارێزگاران و ئیدارێن سەربەخۆ دیراسا پلانەکا نوو دکەن، بۆ درێژکرنا قەدەغەیا هاتنوچوونێ، وەسا بریارە ئەڤرۆ یان سوبە هوورکاری و دەمێ درێژکرنا قەدەغەیا هاتنوچوونێ بهێتە ئاشکرا کرن.
هەروەسا محەمەد قادر پەیڤدارێ وەزارەتا ساخلەمیێ گۆتیە ، وان وەک وەزارەتا ساخلەمیێ داخواز ژ وەزارەتا ناڤخۆ کریە، کو هەتا ١٥ ڤێ هەیڤێ قەدەغەیا هاتنوچوونێ بهێتە درێژ کرن.
ئەڤرۆ نیوز:
ئەڤرۆ پێنجشەمبی وەزارەتا دارایی و ئابووری یا ھەرێما کوردستانێ چەندین بریارێن نوو دەرکرن و تێدا ھاتیە، کو بریار ھاتیە دان ل سەر پەیرەوکرنا میکانیزمەکێ، بۆ ڤەکرنا هژمارەکا کەسی بۆ هەموو مووچەخوران.
ژ وان خالان ژی:
١. کاراکرنا سندوقا خانەنشینیێ ل ھەرێما کوردستانێ دا و ڤەکرنا هژمارەکا تایبەت یی بانکی بۆ وێ سندوقێ.
٢. رێڤەبەریا گشتی یا خانەنشینیێ هاتیە راسپاردان ل سەر ئامادەکرنا پەیکەرێ نوو یێ رێڤەبەریا گشتی یا خانەنشینیێ، کو دێ بیتە تاکە رێڤەبەریا گشتی یا خانەنشینان ل ھەرێمێ دا، ب رەنگەکێ کو گشت خانەنشینێن (شارستانی، سەربازی، ھێزێن ئاسایشێ و پۆلیسێن نافخۆ، یەکەیێن رێکنەخستی یێن ھێزێن پێشمەرگەی) ل خوە دگریت.
٣. رێڤەبەریا گشتی یا ژمێرکاریێ راسپاردیە بۆ ھەماھەنگیێ ل گەل وەزارەتا پیشمەرگەی، بۆ هندێ پێنگاڤێن پێدڤی بگرنە بەر ب مەبەستا یەکخستن و رێکخستنا یەکەیێن ژمێریاری یێن ھێزێن پێشمەرگەیێ کوردستانێ.
٤. بریار هاتیە دان ل سەر پەیرەوکرنا میکانیزمەکا گونجای بۆ لابرنا ئاستەنگێن بەردەم ڤەکرنا هژمارەکا کەسی بۆ سەرجەم مووچەخۆران.
٥. ئامادەکرنا رێکارێن قانوونی و کارگێری، بۆ وەرگرتنا قەرێن بازرگانی.
٦. بریار هاتیە دان ل سەر ھەماھەنگیا تەمام دناڤبەرا لژنا بلند یا وەزارەتا دارایی و ئابووری، تایبەت ب جێبەجێکرنا قانوونا چاکسازیێ ل گەل سەرجەم وەزارەتێن پەیوەندیدار ژ پێناڤی جێبەجێکرنا ب لەز یا فێ قانوونێ.
ئەڤرۆ نیوز:
د. بژار موسا عەلی، پەیڤدارێ رێڤەبەریا گشتی یا ساخلەمیا هەولێرێ راگەهاند، کو تووشبوویەکێ ڤایرۆسێ کۆرۆنا یێ پشتی وەرگرتنا چارەسەریێن نۆشداری ب تەمامی چێبوویە و بارێ ساخلەمیا وی تەمام یا جێگیرە، بریار هاتیە دان ڤرێکەنە مال.
ل پارێزگەها هەولێرێ 159 کەس تووشی ڤایرۆسی کۆرۆنا یێ بووینە، ژ وێ ژمارێ ژی 29 کەس ساخبووینە.
ل هەرێما کوردستانێ 311 کەس تووشی ڤایرۆسێ کۆرۆنا یێ بووینە، 133 کەس چێبووینە و 3 کەس ژی مرینە.
نيشاندان