ئەڤرۆ نیوز:
رێڤەبەرێ ساخلەمیا سلێمانیێ راگەهاند، ل سلێمانیێ کەسەکێ گیانێ خوە ژ دەستدا کو هەلگرێ ڤایرۆسێ کۆرۆنا یێ بوویە.
د. سەباح هەورامی، رێڤەبەرێ ساخلەمیا سلێمانیێ د کۆنگرەکێ رۆژنامەڤانیدا راگەهاند، ئەڤرۆ شەمبیێ وەلاتیەکێ دیتر ل سلێمانیێ ب ئەگەرێ کۆرۆنا یێ وەغەر کر، پشتی پشکنینێ دەرکەفتیە، کو هەلگرێ وی ڤایرۆسی بوویە، لێ ساخلەمیا پرانیا نەخۆشێن کۆرۆنا یێ ل سلێمانیێ گەلەک یا باشە، ب تنێ ئێک ل ژێر چافدێریا هوور یا نۆسداران دایە.
ئەڤرۆ نیوز:
ئەڤرۆ شەمبیێ 4.4.2020 كامى كه‌مال، په‌یڤدارێ كۆمه‌لگه‌ها ده‌روازێ نێڤده‌وله‌تى یێ ئیبراهیم خه‌لیل دیار کر: ئەو خه‌لكێ هه‌رێما كوردستانێ ئاگەهدار دكه‌ن، كو بزاڤا بازرگانى ل ده‌روازێ سنوری یێ نێڤده‌وله‌تى یێ ئیبراهیم خه‌لیل یا به‌رده‌وامە و دێ یا بەردەوام ژی بیت.
ھەروەسا ل دۆر بزاڤا بازرگانی و رێکارێن ساخلەمیێ، ھەماھەنگی و کۆمبوونێن بەردەوام دناڤبەرا سەرپەرشتیا کۆمەلگەھا ئیبراھیم خەلیل و کۆمەلگەھا خابور یا وەلاتێ تورکیایێ دا یێن ھەین و ھەموو رێکارێن ساخلەمیێ و ئێمناهیێ ژی ل ھەردو کۆمەلگەھان ب مۆکومی دھێنە جێبەجێ کرن.
ئەڤرۆ نیوز:
ژ پێخەمەت رێگریێ ل دوبارە سەرهەلدانا ڤایرۆسێ كۆرۆنا یان هەر ڤایرۆسەكێ دیتر، ل باژێرەكێ چینێ خوارنا گوشتێ سەی و پشیكان هاتە قەدەغەكرن.
ل باژێرێ (شین ژین) یێ چینی بریار هاتەدان خوارنا گوشتێ سەی و پشیكان بهێتە قەدەغە كرن.
باژێرێ (شین ژین) دكەڤیتە باشورێ چینێ و د بەیاننامەكێ دا بەرپرسێن وی باژێری خەلك ئاگەهدار كریە، كو سە و پشیك گیانەوەرێن ناڤمالێ نە و پەیوەندیەكا باش ل گەل مرۆڤان هەیە و ب چو رەنگان نابیت گوشتێ وان بهێتە خوارن.
ئەڤرۆ نیوز:
د ڤەکۆلینەکا نوو دا زانایێن ئەمریکا دەربارەی ڤایرۆسێ کۆرۆنایا دیار کریە، کو پشتی سیھان ڤایرۆسێ کۆرۆنا زیانێ دگەهینیتە ماسولکێن دلی، ب رەنگەکێ دشێت سست بکەت، دگەهینیتە وان کەسان ژی ئەوێن ئێشا دلی نەی.
رۆژناما زەسەن یا بریتانی د بابەتەکێ ساخلەمیێ دەربارەی کۆرۆنا یێ دیار کریە، کو زیانەکا زێدە ب وان کەسان دکەڤیت یێن کو نەخۆشیێن سیھان و سورا خوینێ ھەی، یان نەخۆشیا بلندبوونا پەستانا خوینێ ھەی.
محەمەد مەجیدی نۆشدار و سەرۆکێ ڤەکۆلینێ و ماموستایێ ھاریکار بۆ نەخوشیێن دلی ل کۆلیژا نۆشداری ل سەنتەرێ زانستی یێ ساخلەمیێ ل زانکۆیا تەکساس ل ھیوستن ل ئەمریکا دیار کریە، کو ئەو کەسێ نەخۆشیا دلی نەی، کۆرۆنا دشێت زیانێێ بگەهینیتە ماسولکێن دلی، دیسان دێ باندۆرەکا زێدەتر ھەبیت بۆ وان کەسێن نەخۆەشیا دلی ھەی.
ئەڤرۆ نیوز:
وەزارەتا دارایی یا حوکمەتا هەرێمێ دیار کر، ژ پێخەمەت دروست نەبوونا قەرەبالغێ د دەمێ دابەشکرنا مووچێ خانەنشین دا ، دێ لدووڤ خشتەکێ ڕێکخستی بیت، دیسان لدووڤ گۆژمێ مووچەی رۆژێن دابەشکرنا مووچەی ھاتینە دیارکرن.
ئەڤرۆ شەمبیێ 4.4.2020 ، وەزارەتا دارایی خشتەک بۆ دابەشکرنا مووچێ خانەنشینان بەلاڤکریە و تێدا هاتیە، مووچێ خانەنشینێن لەشکەرى ٦ نیسانێ دێ هێنە دابەشکرن و خانەنشینێن مەدەنی ژی دێ دناڤبەرا ١٢ نیسانێ بۆ ١٦ نیسانێ هێنە دابەشکرن.
ئەڤرۆ نیوز:
وەزارەتا ساخلەمیا عیراقێ راگەهاند، د دەمێ ٢٤ دەمژمێرێن بوری دا ٤٨ حالەتێن نوویێن تووشبوون ب ڤایرۆسێ کۆرۆنایێ هاتینە تۆمار کرن و دو کەسان ژی ژیانا خوە دەستداینە و ٢١ کەس ژى چێبووینە.
ئەڤرۆ شەمبیێ، وەزارەتا ساخلەمیا عیراقێ راگەهاند، د دەمێ ٢٤ دەمژمێرێن بوری دا ٤٨ حالەتێن توشبوون ب ڤایرۆسێ کۆرۆنایێ هاتینە تومار کرن، کو ٣٤ ل نەجەف و ٩ ل بەسرا سێ ل میسان و سێ ل بەغدا و ئێک ل دیالە و حالەتەک ژى ل موسەنا.
گۆتیە ژى، ٢١ کەسێن دیتر چێبووینە و بۆ مالێن وان هاتینە ڤەگەراندن، کو ١٢ ل بەسرا و چار ل نەجەف و دو ل بەغدا و دو ل واست و ئێک ژى ل مۆسل.
ئەڤرۆ نیوز:
دەزگەهێن راگەهاندنا بریتانیا دیار کرن کو د ماوەیێ ٢٤ دەمژمێرێن بۆری دا ٧٠٨ کەس ل بریتانیا ژ بەر ڤایرۆسێ کۆرۆنا جانێ خوە ژ دەست داینە و ب گشتی هەتا نها ٤ هزار و ٣١٣ کەسان ل بریتانیا ژ بەر ڤایرۆسێ کۆرۆنا جانێ خوە ژ دەست داینە.
دەزگەهێن راگەهاندنا ئورۆپا ژی دیار دکەن کو رەوش ل بریتانیا رۆژ ب رۆژێ خرابتر لێ دهێت و بریتانیا ژی تووشی چارەنڤیسێ ئیسپانیا و بریتانیا دبیت.
ئەڤرۆ نیوز:
ئەمریکا ب کوژمێ ١ ملیۆن و دوسەد هزار دۆلاران کەرەستێن ساخلەمیێ بۆ پاراستنا خەلکێ مەدەنی یێ رۆژئاڤایێ کوردستانێ رەوانەی نەخوشخانێن حەسەکێ، شەدادی و زیندانێن هێزێن سووریا دیموکرات دکەت و بەرپرسەکێ رێڤەبەریا خوەسەر ژی سوپاسیا ئەمریکا دکەت.
فەرماندارەکێ هێزێن سووریا دیموکرات ژی راگەهاند کو دڤێت وەلاتێن دی یێن هەڤپەیمانیا نێڤدەولەتی یا شەرێ ل دژی داعشێ ژی بۆ بەرهنگاریا کۆرۆنایێ هاریکاریا رۆژئاڤایێ کوردستانێ بکەن، چونکو گەلەک گرتیێن داعشێ و هەروەسا ئاوارە ژی هەنە و دڤێت ژیانا وان ژ کۆرۆنایێ بهێتە پاراستن.
ئەڤرۆ نیۆز، قائید میرۆ:
بەرپرسەکێ پارتی ل کەرکووکێ داخوازێ ل ئیدارەیا کەرکووکێ دکەت ھاریکاریا دەزگەھێ خێرخوازیێ بارزانی بکەت ژ بۆ گەھاندنا ھاریکاریان بۆ کەرکووکێ.
دکتۆر محەمەد خورشید، بەرپرسێ لقێ پارتی ل کەرکووکێ بۆ ئەڤرۆ نیۆز دیارکر” بەری نوکە مە داخوازەک ئاراستەی دەزگەھێ خێرخوازیێ بارزانی کربو ھاریکاریان بسەر خەلکێ کەرکووکێ بەلاف بکەن، بەلێ ئیدارەیا کەرکووکێ وەک پێدڤی یا ھاریکار نینە و دەمەکێ زۆر بسەرڤەچوو ھەتا مۆھلەتا بەلافکرنا ھاریکاریان دایە دەزگەھێ بارزانی.
ئەڤی بەرپرسێ پارتی گۆتژی” ھندەک رێگری ھەنە بۆ گەھاندنا ھاریکاریان ژلایێ خالێن پشکنینێ یێن دچنە ناڤا کەرکووکێ.
دکتۆر محەمەد خورشید ئاماژەکر” ئەم داخوازێ ل ئیدارەیا کەرکووکێ دکەین ل خالێن پشکنینێ ھاریکاربن بۆ ڤەکرنا رێکێ و گەھاندنا ھاریکاریان بۆ خەلکێ کەرکووکێ، چونکە خەلکەکێ زۆرێ ھەژار ل کەرکووکێ پێدڤی ب ھاریکاریان ھەیە.
ئەڤرۆ نیوز:
ژێدەرێن میدیایی یێن روسیا دیار دکەن کو زێدەبارێ مەترسیا کۆرۆنایێ ل سەر هەموو جیهانێ، لێ تورکیا بەردەوام هێزێن چەکداری و چەکێن گران دەربازی ئدلبێ دکەت و خوە بۆ شەرەکێ بەرهەڤ دکەت، ئەو یەک ژی دێ بیتە مەترسی ل سەر ئدلبێ و هەموو سووریێ و بەرپرسێن روسیا بەری دو رۆژان ل دۆر هندێ ب توندی هوشداری داینە تورکیا.
ئاژانسا سپوتینگ یا روسی دیار کریە کو تورکیا دڤێت مفای ژ بابەتێ ڤایرۆسێ کۆرۆنا وەربگریت و ب رێیا گرۆپێن چەکداری یێن ل سووریێ ل ئدلبێ دەست ب هندەک هێرشان بکەت و روسیا ژی ل دۆر بزاڤێن تورکیا ب توندی هوشداری دایە وی وەلاتی.
نيشاندان