ئەڤرۆ نیوز:
ئەڤرۆ میدیایێن ئیرانێ بەلاڤکرینە، کو عەلی لاریجانی سەرۆکێ پەرلەمانێ وی وەلاتی تووشی کۆرۆنایێ بوویە و هاتیە کەرەنتین کرن.
ئەڤرۆ نیوز:
وەزیرێ پەروەردێ پایامەک بەلاڤکریە و دبێژیت: ب پێدڤی دزانین ب رێیا ڤێ پەیامێ جەختێ ل سەر هندێ بکەین:
. جڤاتا وەزیران ،ب سەرۆکاتیا مەسرور بارزانی و ئامادەبوونا قوباد تالەبانی و ئەندامێن جڤاتا وەزیران پشتی گوتۆبێژکرنا پلانێن وەزارەتا پەروەردێ بریار هاتە دان، کو پێدڤیە قوتابی دلنیابن ژ هندێ کو سالا وان یا خواندنێ نافەوتیت.
. هەکە کۆنترۆلکرنا ڤایرۆسێ کۆرۆنا یێ رێکێ بدەت، هەموو بزاڤێن مه بۆ هندێ نە کو ل ۲ گولانێ ناڤەندێن خواندنێ ڤەکەین و بۆ ڤێ مەبەستی ژی پلان وخشتێن مە دێ ب ڤی جۆری بیت:
ـ ل ۱۲ گۆلانا ۲۰۲۰ هەتا ۲۱ گۆلانا ۲۰۲۰ ، دێ ئەزموونێن وەرزێ دویێ یێن پۆلا ۱۲ ئامادەیی، ب هەموو پشکێن خوە ڤە هێنە ئەنجام دان.
ـ ب تنێ بۆ ئەڤ سالا خواندنێ ئەزموونێن نیشتیمانی یێن قۆناغا ۹ بنەرەت ناهێنە ئەنجامدان و ل گەل پۆلێن نە یێن دووماهی دێ ئەزموونان کەن، بەلێ لدووڤ رێنمایان پێدڤیە بۆردێ نمرێن قوتابیان ڤەگەریت بۆ رێڤەبەریا گشتی یا ئەزموونێن وەزارەتێ.
ـ ئەزموواێن وەرزێ دویێ یێن پۆلێن نە دووماهیێ، ب قۆناغا ۹ بنەرەتی ژی، هەروەسا پەیمانگەهـ و خواندنا ئیسلامی ، ل ۱ خزیرانا ۲۰۲۰ دێ دەست پێکەت هەتا ۱۰ خزیرانا ۲۰۲۰.
ـ ئەزموونێن خولا ئێکێ یێن ئەزموونێن گشتی( ویزاری ) بۆ قۆناغا ۱۲ ئامادەیی ، ب هەموو پشکێن خوەڤە، دێ ل ۲٨ خزیرانا ۲۰۲۰ هەتا ۲۳ / ۷ /۲۰۲۰ هێنە ئەنجام دان، ب رەنگەکێ د حەفتیەکێ دا ب تنێ دێ دو ئەزموون هێنە ئەنجام دان.
ـ ئەزموونێن خولا دویێ یێن قۆناغا 12 ئامادەیی، ب هەموو پشکێن خوە ڤە دێ ل ۱٦ / ٨ / ۲۰۲۰ هەتا ۲٤ / ٨ / ۲۰۲۰ هێنە ئەنجام دان.
. بۆ هەموو قۆناغان ئەزموون ب تنێ دێ ژ وان بابەتان هێتە ئەنجام دان یێن کو وان خواندین یان یێن هاتینە خواندن ل ناڤا قوتابخانێ، واتە چ بابەتەک بۆ ئەزموونان داخا نابیت، هەکە قوتابیان نەخواندبیت.
. وەزارەتا پەروەردێ، پشتی رەزامەندیا جڤاتا وەزیران، خواندنا ئەلکترۆنی وەک پشتەڤانەک و هاریکاریەک و نە ئیلزامی دێ ل ناڤەراستا هەیڤا چار بۆ قوتابیان فەراهەم کەت، داکو ژ خواندنێ نەهێنە دابرین، هەموو قوتابخانە و پەیمانگەهێن نە حکومی دشێن ب سیستمەمێ ئەلکترۆنی یان ئۆنلاین یێ تایبەت ب خوەڤە ، ب هەمان شێوێ قوتابخانێن حکومی ڤی جۆرێ خواندنی فەراهەم بکەن، هەر قوتابخانەکا نە حکومی یا کو ب سیستەمێ وەزارەتا پەروەردێ دخوینیت ، ب کوردی ، ئینگلیزی ، عەرەبی ، دشێن مفای ژ پرۆسا خواندنا ئەلیکترۆنی یا وەزارەتێ وەربگریت.
. مامۆستایێن وانەبێژ یێن قوتابخانێن حکومی، کو ب ئەگەرێ بهێنڤەدانا خوە پارێزیێ ل ناڤەندێن خواندنێ ژ وانەگۆتنێ هاتینە دابرین، دێ ل بەرچاڤ وەرگرین و دێ شایستێن وان یێن دارایی د بەردەوام بن.
. پێدڤیە ناڤەندێن خواندنا نە حکومی ، د ڤێ رەوشێ دا پابەندبن ب گرێبەستێن خوە ل گەل مامۆستایێن خوە و شایستێن دارایی وەک د گرێبەستێن وان دا هاتویە بۆ وان خەرج بکەن.
ئالان حەمە سەعید
وەزیرێ پەروەردێ
ئەڤرۆ نیوز:
وەزارەتا ساخلەمیا عێراقێ راگەھاند، د دەمێ ۲٤ دەمژمێرێن بوری دا ۲٥ حالەتێن نوو یێن توشبوون ب کۆرۆنا یێ و دو حالەتێن گیان ژ دەستدانێ ھاتنە تۆمار کرن.
ئەڤرۆ پێنجشەمبی وەزارەتا ساخلەمی و ژینگەها عیراقێ راگەھاند، د دەمێ ۲٤ دەمژمێرێن بوری دا ۲٥ حالەتێن نوو یێن توشبوون ب ڤایڕۆسێ کۆرۆنایێ ھاتینە تۆمار کرن ، کو ۱۰ ل نەجەف ، حەفت ل کەربەلا، پێنج ل بەسرە، دو ل بەغدا و ئێک ژی ل دیوانیە.
دیار کر ژی، دو حالەتێن گیان ژ دەستدانێ ل بەغدا و بەسرە ھاتینە تۆمار کرن.
لدووڤ دووماهی ئامار ھەتا نوکە ۷۷۲ کەس د عیراقێ دا تووشی کۆرۆنایێ بووینە.
ئەڤرۆ نیوز:
حەسەن رۆحانی سەرۆک کۆمارێ ئیرانێ ئەڤرۆ راگەهاند کو ئەو نەشێن ل ئیرانێ هەتا دووماهیا ڤێ سالێ ژی ڤایرۆسێ کۆرۆنایێ کۆنترۆل بکەن و دێ کارتێکرنا وێ یا بەردەوام بیت، ژ بەر هندێ ژی پێرابوونێن وان وەرگرتینە ژی ل هەموو ئیرانێ دێ د بەردەوام بن.
سەرۆک کۆمارێ ئیرانێ داخواز ژ هەموو وەلاتیێن ئیرانێ ژی کر کو ب هەموو رەنگەکێ هاریکاریا حوکمەتێ و وەزارەتا ساخلەمیێ بکەن، چونکو هەکە خەلک پێگیریێ ب رێنمایان بکەن دێ ڤایرۆس زوو هێتە کۆنترۆل کرن.
ئەڤرۆ نیوز:
مینا تەها بەرپرسا راگەهاندنا رێڤەبەریا ساخلەمیا سۆران دیار کر ئەڤرۆ ل باژێرێ سۆران ب ئامادەبوونا وەزیرێ ساخلەمیێ، پارێزگارێ هەولێرێ و سەرۆکێ زانکۆیا سۆران بنگەهێ پشکنینا کۆرۆنایێ ل باژێرێ سۆران هاتە ڤەکرن و بریارە د چەند رۆژێن داهاتی دا پشکنین ل وی سەنتەری بۆ وەلاتیان بهێتە کرن.
ناڤهاتیێ راگەهاند کو ڤەکرنا بنگەهێ پشکنینا کۆرۆنایێ ل سۆران گەلەک گرنگە، چونکو وەلاتیێن باژێرێ سۆران و دەوروبەرێن وێ دێ شێن ب ساناهی پشکنینان بکەن و پێدڤی ناکەت کو سەرەدانا هەولێرێ بکەن و د چەند رۆژێن داهاتی دا دێ ئەڤ بنگەهە کەڤیتە د خزمەتا وەلاتیان دا.
ئەڤرۆ نیۆز، قائید میرۆ:
سەرۆکێ لیژنا مافێ مرۆڤی ل پەرلەمانێ کوردستانێ ئاماژەکر، چەندین کەسێن راگرتی ژلایێ دادگەھێن ھەرێما کوردستانێ ھاتینە ئازادکرن و بڕیارە زیندانی ژی بھێنە ئازادکرن.
رۆمیۆ ھەکاری، سەرۆکێ لیژنا مافێ مرۆڤی لپەرلەمانێ کوردستانێ بۆ ئەڤرۆ نیۆز دیارکر” ژ بەر نەبوونا دەواما فەرمی دەوامێن دادگەھان ژی ھاتینە راگرتن، لەوڕا ھژمارەکا زۆرا کەسێن تۆمەتبار ھاتبوونە راگرتن ل بنکەھێن پۆلیسان و جھێن پەیوەندیدار، بەلێ پشتی پێداچوون دادوەرێن ھەرێما کوردستانێ بادەکێن وان ئێکلا کرینە.
رۆمیۆ ھەکاری ئاشکراکر” گورەی زانیاریێن گەھشتینە بەردەستێ مە ھژمارەکا زۆرا کەسێن راگرتی ھاتینە ئازادکرن، ئەڤە ژی جھێ خۆشحالیا مەیە، ژ بەر کو ڤایرۆسا کۆرۆنایێ د دەمێ نوکە دا کاریگەری و مەترسی ل سەر ھەموو جیھانێ و ھەرێما کوردستانێ پەیدا کریە و راگرتنا تۆمەتباران ژی مەترسیە بۆ سەر ژیانا وان.
ئەڤرۆ نیوز:
ڤیلادەمیر پوتین سەرۆکێ روسیا راگەهاند کو نێزیکی سێ هزار کەس ل روسیا تووشی ڤایرۆسێ کۆرۆنا بووینە و رۆژانە ژی هژمارا کەسێن کو تووشی کۆرۆنایێ دبن زێدەتر لێ دهێت، ئەو یەک دێ کارتێکرنەکا خراب ل بارێ ئابووری و هەموو بیاڤێن دی یێن ژیانێ کەت و دڤێت وەلاتی ب باشی پێگیریێ ب رێنمایان بکەن.
سەرۆکێ روسیا د کۆمبوونا ل گەل کابینا حوکمەتا دا ئەو یەک ژی دیار کر کو دڤێت ب توندی ئەو کەسە بهێنە سزادان کو پێگیریێ ب رێنمایان ناکەن و دبنە ئەگەرێ هندێ کو ڤایرۆسێ کۆرۆنا ل روسیا بەلاڤ ببیت.
ئەڤرۆ نیۆز، قائید میرۆ:
نۆژدارەک کو ھەڤدەم رێڤەبەرێ نەخۆشخانا ئیماراتی یا تایبەت ب چارەسەریا کۆرۆنایێ یە ئاشکرا کر، زۆربەیا وەلاتیێن تووشی کۆرۆنایێ بووین بەرەف باشبوونێ دچن و دبێژیت، ئەو چارەسەریێن دھێنە بکارئینان کاریگەری لسەر باشبوونا نەساخان ھەبوویە.
دکتۆر شاخەوان خەیلانی، رێڤەبەرێ نەخۆشخانا ئیماراتی یا تایبەت ب کۆرۆنایێ بۆ ئەڤرۆ نیۆز دیارکر” ھەموو پێدڤیێن چارەسەرکرنێ بۆ ھەلگرێن ڤایرۆسا کۆرۆنا ل نەخۆشخانەیا ئیماراتی ھاتینە بەرھەڤکرن، بەلێ پێدڤیە وەلاتی پێگیریێ ب رێنمایێن خۆپارێزیێ بکەن، زۆربەیا وان کەسێن ل نەخۆشخانا ئیماراتی ھاتینە نڤاندن رەوشا وان یا ساخلەمی یا جێھگیرە و پێدڤی ب ئامیرێ ھەناسا دەستکرد نینە.
ل دۆر وان چارەسەریێن بۆ ڤایرۆسا کۆرۆنا دھێنە بکارئینان رێڤەبەرێ نەخۆشخانا ئیماراتی ل ھەولێرێ گۆت” ھندەک چارەسەری ھەنە و ئەم دەینە وان کەسێن تووشی کۆرۆنایێ بووین، سوپاس بۆ خودێ ئەڤان چارەسەریان کارێ خوە کریە و پشتی بکارئینانێ رەوشا نەساخا بەرەف باشتر دچیت.
دکتۆر شاخەوان خەیلانی ئاشکراکر” ئەو چارەسەری ژی گورەی پڕۆتۆکۆلەکا رێکخراوا ساخلەمیا جیھانی دھێنە بکارئینان و ژلایێ ساخلەمیا عێراق و ھەرێما کوردستانێ ژی ھاتینە پشتڕاستکرن.
ئەڤرۆ نیوز:
بەرپرسێ پشكا چاڤدێری وسلامەتیا خۆراكێ ل رێڤەبەریا كارۆبارێن خوە پاراستنا ساخلەمیا پارێزگەها دهۆكێ دیاركركو ژ بەر نە پێگریێ ب رێنمایێن ساخلەمیێ د هەیڤا بۆری دا هەر ژ رۆژا 1/3 هەتا 31/3/2020 ل پارێزگەها دهۆكێ زێدەتر ژ 50 فرۆشگەه و ماركێت وسەمۆنخانە هاتینە سزادان و دائێخستن.
عسمەت سەلمان بەرپرسێ پشكا چاڤدێری و سلامەتیا خۆراكێ ل رێڤەبەریا كارۆبارێن خوەپاراستنا ساخلەمیا پارێزگەها دهۆكێ دیار كر كو ب شەڤ و رۆژ تێمین ساخلەمیێ دووڤچوونێ ل سەر وان ماركێت، سەمۆنخانە و نانپێژیا دكەن یێن د ماوێ قەدەغەیا هاتنوچوونێ دا مۆلەت پێ هاتیە دان كار بكەن و پێدڤیە دووڤ رێنمایێن تەندروستی كار بكەن ژ بەر نەبجهئینانا رێنمایان دهەیڤا بۆری دا ل دهۆكێ پتر ژ 50 ماركێت، سەمۆنخانە و كۆگەهێن جودا جودا هاتینە سزادان.